DI MI nanga Gwen ben abi feifi yari, wi bigin leri dansi. Na a ten dati wi no ben sabi makandra ete. Ma di wi ben e gro kon bigi, a wán sani di ben de na ini wi ede, na fu dansi ballet. Wi ben e kon pôpi moro nanga moro. Ma toku wi bosroiti fu stop. Fu san ede wi du dati?

David: Mi gebore na ini 1945 na ini a distrikt Shropshire, na Ingrisikondre. Wi ben e tan na boiti pe mi papa ben e kweki meti èn prani gron. A libi drape ben switi. Te mi ben komoto na skoro, mi ben lobi gi den fowru nyanyan èn piki eksi. Mi ben lobi sorgu tu gi den kaw nanga den skapu. Te mi ben abi fakansi, mi ben yepi koti den sani di wi ben prani èn son leisi mi ben mag rèi den traktor fu wi.

Ma baka wan pisi ten mi kon lobi wan tra sani. Mi ben de yonguyongu ete di mi papa kon si taki ala leisi te mi yere poku, mi ben wani dansi. Sobun, di mi ben abi feifi yari, a taigi mi mama fu tyari mi go na wan dansiskoro fu leri dansi wan spesrutu sortu dansi. A man di ben gi mi les si taki mi ben o man dansi ballet bun. Dati meki a leri mi fu dansi dati tu. Di mi ben abi 15 yari, mi kisi na okasi fu go na The Royal Ballet School, wan pôpi balletskoro na Londen. Sma ben o pai gi mi fu go na a skoro disi. Drape mi miti Gwen èn den poti wi fu dansi makandra.

Gwen: Mi gebore na ini 1944 na ini a druk foto Londen. Di mi ben de wan pikin meisje mi ben bribi tranga na ini Gado. Mi pruberi fu leisi Bijbel, ma a ben muilek gi mi fu frustan. Fosi a ten dati, di mi ben abi feifi yari, mi go na wan skoro fu leri dansi. Siksi yari baka dati, wan danswedstrijd ben de pe ala sma na ini Ingrisikondre ben kan go. A sma di ben o wini a wedstrijd disi ben o kisi na okasi fu go na The Royal Ballet School. Mi wini a wedstrijd disi èn mi tron wan studenti na ini a grupu fu den moro yongu dansiman. A skoro disi ben de na ini wan moi bigi owruten oso di ben nen White Lodge, na Richmond Park, Londen. Drape den moro bun leriman gi mi skoroleri èn den leri mi dansi ballet tu. Di mi ben abi 16 yari, mi go na ini a grupu fu den dansiman fu a skoro di ben moro owru èn drape mi miti David. Baka wan tu mun, wi bigin dansi ballet makandra na ini opera, wan sortu toneel pe sma e singi èn e dansi. Disi ben de na a Royal Opera House, wan theater na Covent Garden, Londen.

David: Soleki fa Gwen taki, dan wi bigin dansi na ini a pôpi Royal Opera House. Wi go dansi tu nanga wan bigi dansiskoro na Londen di den ben e kari London Festival Ballet (now a nen English  National Ballet). Wan fu den leriman fu Royal Ballet opo wan bigi dansiskoro na Wuppertal, Doisrikondre. A skoro fu en ben abi dansiman fu difrenti kondre èn a aksi wi fu kon dansi gi en. Wi dansi na ini difrenti theater na heri grontapu èn wi kisi na okasi fu dansi nanga bigi dansiman leki Margot Fonteyn nanga Rudolf Nureyev. A sortu libi disi kan meki taki wan sma kisi bigifasi. Na dati pasa tu nanga wi èn dansi ben kon tron a moro prenspari sani gi wi.

Gwen: A wan-enkri sani di ben de na ini mi ede na dansi. Mi nanga David ben wani tron bigi dansiman. Mi ben lobi te sma ben aksi mi handtekening èn te mi ben kisi bromki. Mi ben lobi yere fa sma e naki anu gi mi te mi ben e dansi. Furu fu dansiman di mi ben sabi ben e du hurudu, den ben e smoko èn den ben e dringi sopi. Neleki fa a ben de nanga tra dansiman, na so mi srefi ben e weri spesrutu sani tu fu tyari koloku gi mi.

David: Baka di mi ben dansi ballet someni yari, mi kon weri fu go na tra presi ala yuru. Fu di mi gro kon bigi na wan boitipresi pe wi ben e kweki meti, meki mi ben wani abi a sortu libi dati baka. Sobun, na ini 1967 mi stop fu dansi ballet èn mi go wroko na wan bigi bedrijf pe den ben e kweki meti. A ben de krosibei fu mi papa nanga mama. Mi yuru wan pikin oso na a man fu a bedrijf. Baka dati mi bel Gwen na a theater èn mi aksi en fu trow nanga mi. Na a ten dati Gwen ben de wan prenspari dansiman èn son leisi en wawan ben e dansi na ini wan show. A ben e kon pôpi moro nanga moro. Dati meki a ben muilek gi en fu teki wan bosroiti. Toku a trow nanga mi èn a kon libi na boiti tu, aladi a no ben gwenti a libi dati.

Gwen: A tru taki a no ben makriki fu gwenti a boitilibi. Mi no ben sabi kwetikweti fa fu merki kaw èn fa fu gi agu nanga fowru nyanyan. Mi ben musu du disi, awinsi fa a weer ben de. Na a ten dati, David bigin go na skoro neigi mun langa fu leri den moro nyun fasi fu kweki meti èn a ben kon lati na oso. Disi no ben switi gi mi fu di mi ben de na oso mi wawan heri dei. Dati meki David taigi mi fu leri rèi wagi. Na a ten dati Gilly, a fosi meisje fu wi ben gebore kaba. Wan dei di mi go na wan foto krosibei fu pe wi ben e libi, mi si Gael. Mi ben miti en kaba di a ben e wroko na ini wan wenkri na ini a birti drape.

Na wan switi fasi Gael aksi mi fu kon dringi te na en oso. Di wi luku den trow fowtow fu makandra, mi si wan grupu sma na tapu wan fu den fowtow fu en. Den ben e tanapu dorosei fu wan presi di ben nen Kownukondre zaal. Mi aksi Gael sortu kerki na dati. Di a taigi mi taki en nanga en masra ben de Yehovah Kotoigi, mi ben breiti. Mi kan memre taki wan tante  fu mi ben de wan Kotoigi. Ma mi ben sabi tu taki mi papa ben mandi nanga mi tante èn taki a ben trowe den buku fu en na ini wan dotibaki. Mi papa ben de wan man di ben abi switifasi. Sobun, mi aksi misrefi fu san ede en ati ben e bron nanga so wan safu-ati sma leki mi tante.

Now mi ben abi na okasi fu kon sabi fa den sani di mi tante ben e bribi, ben de tra fasi leki san kerki e leri. Gael sori mi san Bijbel e leri trutru. Mi fruwondru di mi si taki furu sani soleki a leri di e taki dati Gado, Yesus nanga a santa yeye na wán èn a leri di e taki dati a sili no e dede, no de na ini Bijbel (Preik. 9:5, 10; Yoh. 14:28; 17:3). Fosi tron mi si Gado nen Yehovah na ini Bijbel tu.—Eks. 6:3.

David: Gwen ben lobi fruteri mi san a ben e leri. Disi ben memre mi taki di mi ben yongu, mi papa ben taigi mi fu leisi Bijbel. Dati meki mi nanga Gwen ben feni en bun taki Gael nanga en masra Derrick studeri Bijbel nanga wi. Wi ben studeri siksi mun kaba di wi kisi na okasi fu yuru wan pikin bedrijf fu kweki meti na Oswestry di ben de na ini a srefi distrikt Shropshire. Dati meki wi froisi go drape. Drape Deirdre, wan sisa di ben abi furu pasensi, studeri Bijbel go doro nanga wi. Na a bigin a studie fu wi no ben e go so bun, fu di a wroko fu sorgu meti ben furu. Ma safrisafri den tru leri fu Bijbel ben abi krakti na wi tapu.

Gwen: Wan bigi problema na taki mi ben bribi taki son sani ben abi a makti fu tyari koloku gi mi noso fu du mi ogri. Yesaya 65:11 yepi mi fu si fa Yehovah e denki fu sma di e „seti wan tafra gi a gado fu Koloku”, fu meki sani go bun nanga den. Mi ben abi ten fanowdu fu trowe ala den tapu fu mi nanga den sani di mi ben weri fu tyari koloku kon èn mi ben musu begi furu tu. Di mi kon sabi taki ’Gado o saka a sma di e hei ensrefi èn taki a o hei a sma di e saka ensrefi’, mi frustan sortu sma Yehovah e suku (Mat. 23:12). Mi ben wani dini a Gado di lobi wi so te, taki a gi wi en lobi Manpikin leki lusu-paiman. Na a ten dati, wi ben kisi wan tra meisje èn mi ben breiti fu sabi taki wi osofamiri kan libi fu têgo na ini wan paradijs na grontapu.

David: Di mi kon frustan den moi profeititori na ini Bijbel, soleki den wan na ini Mateyus kapitel 24 èn den wan na ini a buku Danièl, mi ben sabi taki disi na a tru anbegi. Mi kon si taki noti ben de so prenspari leki fu de wan bun mati fu Yehovah. Sobun, baka wan pisi ten mi no ben feti moro fu meki a bedrijf moro bigi. Mi kon frustan taki mi wefi nanga den umapikin fu mi ben de prenspari tu neleki mi. Di mi leisi Filipisma 2:4, mi kon si taki mi no ben musu denki mi eigi sani nomo èn taki mi no ben musu feti fu kon abi wan moro bigi bedrijf. Mi ben leri taki a moro prenspari sani na ini mi libi ben musu de fu dini Yehovah. Dati meki mi tapu nanga smoko. Wi ben musu rèi sowan 10 kilometer fu go na den konmakandra. Tapu satraneti disi no ben makriki gi wi fu di wi ben musu merki den kaw na a srefi ten te a konmakandra ben e hori. Ma Gwen ben e yepi mi èn dati meki noiti wi no misi wan konmakandra.  Noiti a pasa taki wi no tyari den meisje fu wi go na ini a preikiwroko na sonde mamanten baka te wi ben merki den kaw.

Den famiri fu wi no ben breiti taki wi kenki wi libi. Siksi yari langa Gwen en papa no taki nanga en. Mi papa nanga mama srefi pruberi fu tapu wi fu bumui nanga den Kotoigi.

Gwen: Yehovah yepi wi fu horidoro di wi kisi den tesi disi. Baka wan pisi ten den brada nanga sisa fu Gemeente Oswestry tron leki nyun famiri gi wi. Na ini ala den tesi fu wi den sori lobi èn den horibaka gi wi (Luk. 18:29, 30). Na ini 1972, wi gi wi libi abra na Yehovah èn wi teki dopu. Mi ben wani wroko tranga fu yepi someni sma leki mi man fu kon sabi a tru anbegi. Dati meki mi bigin pionier.

David: Na ini ala den yari wi ben musu wroko tranga na ini a bedrijf fu wi. Toku wi pruberi fu sori den meisje fu wi taki na anbegi fu Yehovah na a moro prenspari sani na ini wi libi. Baka wan pisi ten wi ben musu tapu a bedrijf fu wi fu di lanti no ben gi wi moni moro fu drai en. Wi no ben abi wan oso noso wan wroko èn a di fu dri pikin fu wi ben abi wán yari nomo. Dati meki wi begi Yehovah fu yepi wi. Fu di wi ala tu ben sabi dansi, meki wi bosroiti fu opo wan dansiskoro so taki wi ben kan wroko moni fu sorgu wi osofamiri. Wi sori taki na anbegi fu Yehovah ben de a moro prenspari sani na ini wi libi èn dati ben abi bun bakapisi gi wi. Wi ben prisiri di ala den dri meisje fu wi bigin pionier, baka di den klari skoro. Fu di Gwen srefi ben e pionier, meki a ben man horibaka gi den meisje fu wi ala dei.

Baka di Gilly nanga Denise, den moro bigi pikin fu wi trow, wi tapu a dansiskoro. Wi skrifi wan brifi gi a bijkantoro fu di wi ben wani sabi pe yepi ben de fanowdu. Den taigi wi taki yepi ben de fanowdu na ini den foto na a zuid-owstusei fu Ingrisikondre. Na soso Debbie, a lasti umapikin fu wi, ben de na oso ete. Sobun, mi srefi go pionier tu. Feifi yari baka dati, den aksi wi fu go yepi na ini tra gemeente di ben de moro na noordsei. Baka di Debbie trow, wi kisi a grani fu horibaka gi a bow-wroko di e du na heri grontapu. Tin yari langa wi du a wroko disi na Zimbabwe, Moldafia, Hongaria nanga Ivoorkust. Baka dati wi drai go baka na Ingrisikondre fu yepi du bow-wroko na Betel na ini Londen. Fu di mi ben sabi fa fu drai wan bedrijf pe den e kweki meti, meki den aksi mi fu yepi nanga a kweki fu den meti na Betel na a ten dati. Now wi e pionier na a noordwest-sei fu Ingrisikondre.

Gwen: Fosi, ballet ben de a moro prenspari sani na ini wi libi. A ben gi wi prisiri, ma disi ben de gi wan syatu pisi ten nomo. Ma now a moro prenspari sani gi wi na taki wi e dini Yehovah. Disi gi wi furu prisiri èn a de fu ala ten. Te now ete wi na patna, ma na presi fu dansi nanga makandra, wi e preiki nanga makandra. A gi wi bigi prisiri fu yepi furu sma fu kon sabi den tru tori fu Bijbel di warti srefisrefi èn di kan kibri den libi. A grani di wi ben abi fu yepi den sma disi, bun moro a biginen di grontapu ben o gi wi (2 Kor. 3:1, 2). Efu wi no ben feni a tru anbegi, dan now wi ben o sidon taki nomo fa wi ben e dansi ballet fosi. Kande wi ben o luku owru fowtow nomo èn leisi den owru programa fu den show pe wi ben dansi.

David: A wroko di wi e du gi Yehovah, kenki wi libi trutru. Mi sabi taki a yepi mi fu tron wan moro bun masra èn wan moro bun papa. Bijbel e fruteri wi taki Meriam, Kownu David nanga tra sma ben e dansi fu prisiri. Wi srefi nanga furu tra sma tu e angri gi a ten taki wi o dansi fu prisiri na ini Yehovah en nyun grontapu.—Eks. 15:20; 2 Sam. 6:14.