1-3. Fu san ede Paulus ben de seiker taki Yehovah ben o yepi en? (Luku a prenki na a bigin fu na artikel.)

EFU yu ben de wan Kresten di ben e libi na Rome na ini a yari 64, dan a no ben o de wan makriki ten gi yu fu di yu ben kan lasi yu libi. Na a ten dati, den Romesma ben frufolgu den Kresten na wan ogri-ati fasi. Den ben taki dati na den Kresten ben sutu faya gi Rome èn taki den ben e si ala sma leki den feanti. Dati meki den ben ben poti furu Kresten brada nanga sisa fu wi na strafu-oso èn den ben trowe sonwan fu den gi meti di ben priti den pisipisi. Tra leisi baka, sma ben e spikri den na postu èn den ben bron den libilibi leki wan faya gi a neti. Ibri dei wan fu den sani disi ben kan pasa nanga yu tu.

² Na ini a muilek ten dati den poti na apostel Paulus na strafu-oso a di fu tu leisi. Yu denki taki den tra Kresten ben o kon yepi en? Kande Paulus ben e broko en ede nanga a tori disi. Dati meki a skrifi Timoteyus: „A fosi leisi di mi ben abi fu opo taki gi misrefi, nowan sma horibaka gi mi, ma den alamala gowe libi mi. Meki Gado gi den pardon fu dati.” Toku Paulus ben  sabi taki wan sma ben de di ben o yepi en. A skrifi: „Ma Masra tan na mi sei èn a gi mi krakti.” Iya, Yehovah gebroiki Masra Yesus fu gi Paulus a krakti di a ben abi fanowdu. San ben de a bakapisi? Luku san Paulus taki: „A ben puru mi na a mofo fu a lew.”—2 Tim. 4:16, 17. *

³ Paulus ben memre fa Yehovah ben yepi en kaba na ini tra situwâsi. Sobun, a ben sabi taki Yehovah ben o gi en a krakti di a ben abi fanowdu fu horidoro na ini a situwâsi pe a ben de na ini. A ben o man horidoro tu te tra tesi ben o miti en. Paulus ben de seiker taki Yehovah ben o yepi en. Dati meki a skrifi: „Masra o puru mi na ini ala ogri” (2 Tim. 4:18). Iya, Paulus kon si taki srefi te brada nanga sisa no ben o man yepi en, Yehovah nanga en Manpikin ben o yepi en ala ten.

4, 5. (a) Suma o man yepi yu ala ten? (b) Fa yu kan meki a matifasi di yu abi nanga Yehovah kon moro tranga?

⁴ Oiti a pasa taki yu ben de na ini wan muilek situwâsi èn taki yu ben abi a firi dati nowan sma ben de fu yepi yu? Kande yu ben lasi yu wroko, yu ben kisi tesi na skoro, yu ben kon siki noso wan tra tesi ben miti yu. Kande yu aksi sma fu yepi yu, ma yu lasi-ati fu di no ben man du dati. A tru taki libisma no man yepi yu fu lusu son problema. Efu yu de na ini so wan situwâsi, dan san yu o du? Bijbel e taki dati wi musu „frutrow na tapu Yehovah” (Odo 3:5, 6). Ma yu kan de seiker taki a o yepi yu? Iya! Furu eksempre de na ini Bijbel di e sori wi taki Yehovah e yepi en pipel trutru.

⁵ No mandi te sma no man yepi yu. Du leki Paulus. Si a situwâsi di yu de na ini leki wan okasi fu sori taki yu e frutrow na tapu Yehovah nanga yu heri ati. Yu o man si tu fa Yehovah e broko en ede nanga yu. Dati o yepi yu fu frutrow moro na en tapu èn a matifasi di yu abi nanga en o kon moro tranga.

6. Fu san ede a no ala ten a makriki fu frutrow na tapu Yehovah te wi de na ini wan muilek situwâsi?

⁶ Kande yu de na ini wan muilek situwâsi di e gi yu furu broko-ede. Yu du ala san yu man fu lusu a problema èn yu begi Yehovah fu a yepi yu. Yu kan firi korostu now fu di yu de seiker taki a o yepi yu? Iya, a kan. (Leisi Psalm 62:8; 1 Petrus 5:7.) Efu yu wani abi wan bun matifasi nanga Yehovah, dan a prenspari taki yu e leri fu frutrow na en tapu. Ma a no ala ten a makriki fu du disi. Fu san ede? Wán sani na taki a no e pasa ala ten taki Yehovah e piki den begi fu wi wantewante.—Ps. 13:1, 2; 74:10; 89:46; 90:13; Hab. 1:2.

7. Fu san ede a no e pasa ala ten taki Yehovah e piki den begi fu wi wantewante?

⁷ Fu san ede a no e pasa ala ten taki Yehovah e piki den begi fu wi wantewante? Bijbel e taki dati Yehovah de leki wan papa (Ps. 103:13). Wan papa no e gi en pikin ala sani di a e aksi noso a no e gi a pikin a sani wantewante. Fu san ede? Fu di a sabi taki son leisi a pikin wani wan sani now, ma wantronso a no wani en moro. A sabi tu taki a bosroiti di a o teki bun gi a pikin èn gi den tra sma na ini na osofamiri. A sabi san a pikin abi fanowdu èn o ten a musu kisi en. Efu ibri leisi a papa e gi a pikin wantewante san a wani, dan a o gersi leki a papa na a futuboi fu a pikin. Na so a de tu nanga wi hemel Papa Yehovah di lobi wi. Fu di en na wi koni Mekiman, dan a sabi  san wi abi fanowdu. Na en e bosroiti o ten a o gi wi san wi aksi en. Dati meki a bun fu wakti èn fu si fa Yehovah o piki den begi fu wi.—Luku Yesaya 29:16; 45:9.

8. Soleki fa Yehovah pramisi wi, dan san a o du te a gersi leki wi no man moro?

⁸ Wan tra sani na taki Yehovah sabi heri bun san wi man du èn san wi no man du (Ps. 103:14). Dati meki a no e fruwakti taki wi e horidoro nanga wi eigi krakti, ma a wani yepi wi leki fa wan papa e yepi en pikin. Toku a e pasa son leisi taki a gersi leki wi no man moro. Ma Yehovah e gi wi a dyaranti taki noiti a o meki den futuboi fu en kisi tesi moro leki san den man tyari. Iya, ’a o yepi wi’. (Leisi 1 Korentesma 10:13.) Sobun, wi kan de seiker taki Yehovah sabi omeni tesi wi man tyari. A sani disi e trowstu wi.

9. San wi musu du efu wi no e kisi yepi wantewante baka te wi begi?

⁹ Efu wi no e kisi yepi wantewante baka te wi begi, dan meki wi wakti na tapu Yehovah fu di a sabi o ten a musu yepi wi. No frigiti taki en srefi e hori pasensi tu, fu di a wani yepi wi trutru. Bijbel e taki: „Yehovah o tan wakti unu, fu di a wani du bun gi unu. A o opo du wan sani fu sori unu sari-ati. Bika Yehovah na wan Gado di e koti krutu na wan reti fasi. Koloku fu ala den sma di e tan wakti en.”—Yes. 30:18.

10-12. (a) O ten a muilek fu sorgu gi wan famiriman di siki wan langa pisi ten kaba? (b) Te yu e frutrow na tapu Yehovah na ini wan muilek situwâsi, dan fa dati o abi krakti tapu a matifasi di yu abi nanga en? Gi wan eksempre.

¹⁰ A situwâsi fu yu kan hebi so te taki yu e firi leki yu de na ini „a mofo fu a lew” neleki Paulus. Na ini den sortu situwâsi disi a muilek srefisrefi fu frutrow na tapu Yehovah, ma a de tumusi prenspari taki wi e du en. Fu eksempre, kon meki wi taki dati yu musu sorgu gi wan famiriman di siki wan langa pisi ten kaba. Kande yu begi Gado fu a gi yu koni nanga krakti. * Baka te yu du ala san yu man fu tyari a problema disi, dan yu no o broko yu ede so furu moro. Yu sabi taki Yehovah e frustan a situwâsi fu yu èn a o yepi yu fu horidoro.—Ps. 32:8.

¹¹ Kande a gersi leki Yehovah no e yepi yu. A kan taki datra no e agri nanga makandra sortu yepi den musu gi. Noso kande famiriman e meki a situwâsi moro hebi gi yu, na presi fu trowstu yu soleki fa yu ben sa wani. Ma tan aksi Yehovah fu a gi yu krakti. Tan kon moro krosibei na en. (Leisi 1 Samuel 30:3, 6.) Bakaten yu o kon si fa Yehovah yepi yu. Na so a matifasi di yu abi nanga en sa kon de moro tranga.

¹² Na dati Linda * kon si tu, baka di a sorgu en papa nanga mama omeni yari teleki den dede. „Di mi ben de na ini a situwâsi disi, mi, a masra fu mi, nanga mi brada no ben sabi ala ten san fu du. Son leisi a ben gersi leki yepi no ben de. Ma te wi e prakseri fu a tori disi baka, dan wi e si moro krin fa Yehovah horibaka gi wi. A gi wi krakti èn a gi wi san wi ben abi fanowdu, srefi te a ben gersi leki nowan yepi no ben de.”

13. Fa Rhonda sori taki a frutrow na tapu Yehovah di wan tu sari sani pasa nanga en?

¹³ Te wi e frutrow na tapu Yehovah nanga wi heri ati, dan dati kan yepi wi tu te sari sani e pasa na ini wi libi. Luku a tori fu Rhonda. En masra di no ben de wan Kotoigi, ben de fu broko a trow nanga en. Na a srefi ten dati, datra kon si taki Rhonda en brada ben abi lupus, wan siki di kan kiri  wan sma. Wan tu mun baka dati a wefi fu en brada kon dede. Di Rhonda bigin kisi ensrefi baka, a go na ini a gewoon pionierwroko. Ma syatu baka dati, en mama dede. San yepi Rhonda fu horidoro di a kisi den tesi disi? A e taki: „Mi begi Yehovah ibri dei, srefi te mi ben musu teki bosroiti di no bigi. A sani dati yepi mi fu si Yehovah leki wan trutru mati. A leri mi fu frutrow na tapu Gado, na presi fu frutrow na tapu mi eigi frustan noso fu frutrow na tapu tra sma srefi. Yehovah yepi mi trutru. A sorgu gi ala sani di mi ben abi fanowdu. Na so mi kon si san a wani taki fu wroko makandra nanga Yehovah.”

14. Fa Yehovah kan yepi yu te den puru wan famiriman fu yu na ini a gemeente?

¹⁴ Luku wan tra situwâsi. Kon meki wi taki dati den puru wan sma na ini a gemeente èn a sma dati na wan famiriman fu yu. Yu leri na ini Bijbel taki yu no mag bumui nanga den sortu sma disi (1 Kor. 5:11; 2 Yoh. 10). Ma son leisi a kan hebi fu horibaka gi a seti disi èn a kan gersi srefi leki yu no man du en. * Yu denki taki yu hemel Papa o gi yu a krakti fu gi yesi na a rai di Bijbel e gi wi na ini a tori disi? Yu e si disi leki wan okasi fu meki a matifasi di yu abi nanga Yehovah kon moro tranga?

15. Fu san ede Adam trangayesi Yehovah?

¹⁵ Prakseri a tori fu a fosi man Adam. A ben denki trutru taki a ben kan trangayesi Yehovah èn tan na libi? Nôno, a no ben denki dati. Bijbel e taki dati „Didibri no ben kori Adam” (1 Tim. 2:14). Dan fu san ede a trangayesi Yehovah? Adam ben lobi Eva moro leki fa a ben lobi Yehovah. Dati meki  a nyan fu a froktu di en wefi gi en. Adam arki a sten fu en wefi na presi fu arki a sten fu en Gado Yehovah.—Gen. 3:6, 17.

16. Suma yu musu lobi moro èn fu san ede?

¹⁶ Disi wani taki dati wi no musu lobi wi famiri? Nôno. Ma wi no musu lobi den moro leki Yehovah. (Leisi Mateyus 22:37, 38.) Te a lobi di wi abi gi Yehovah tranga, dan wi kan yepi den famiriman fu wi na a moro bun fasi, awinsi den e dini Yehovah, noso den no e dini en. Sobun, tan du muiti fu meki a lobi gi Yehovah kon moro tranga èn tan frutrow na en tapu moro. Efu yu e broko yu ede nanga a fasi fa wan famiriman di den puru na ini a gemeente e tyari ensrefi, dan yu musu taigi Yehovah krin san de na tapu yu ati (Rom. 12:12; Fil. 4:6, 7). * Gebroiki a sari situwâsi disi fu meki a matifasi di yu abi nanga Yehovah kon moro tranga. Na so yu o man frutrow na en tapu èn yu o sabi taki te yu e gi yesi na en, a o sorgu taki sani o waka bun.

17. Fa wi e sori taki wi e frutrow na tapu Yehovah te wi e tan du a Kownukondre preikiwroko fayafaya?

¹⁷ Fu san ede Gado „puru [Paulus] na a mofo fu a lew”? Paulus e taki: „So taki mi ben kan du a preikiwroko finifini èn ala pipel ben kan yere a boskopu disi” (2 Tim. 4:17). Neleki Paulus, na so wi musu tan du a preikiwroko fayafaya. Dan wi kan de seiker taki Yehovah o sorgu taki ’wi o kisi’ ala tra sani di wi abi fanowdu (Mat. 6:33). Yehovah gi wi leki Kownukondre preikiman „a wroko fu preiki a bun nyunsu” èn a e si wi leki sma di e ’wroko makandra nanga en’ (1 Tes. 2:4; 1 Kor. 3:9). Te wi e du ala san wi man na ini a preikiwroko, wi o feni en makriki fu wakti teleki a yepi wi.

18. San wi kan du fu frutrow na tapu Yehovah moro èn fu meki a matifasi di wi abi nanga en kon moro tranga?

¹⁸ Sobun, meki wi gebroiki a ten di wi abi now fu meki a matifasi di wi abi nanga Gado kon moro tranga. Efu wi e broko wi ede nanga wan situwâsi, gebroiki disi fu kon moro krosibei na Yehovah. Leisi èn studeri Bijbel. Denki dipi fu den sani di yu leisi. Tan begi Yehovah èn tan dini en fayafaya. Efu yu e du den sani disi, dan yu kan de seiker taki Yehovah o yepi yu fu horidoro te yu e kisi tesi now èn na ini a ten di e kon.