BAKA di Anita * teki dopu èn tron wan Kotoigi fu Yehovah, en masra bigin gens en hebi. Anita e fruteri: „A ben tapu mi fu go na den konmakandra èn mi no ben mag kari Gado nen srefi. Efu mi ben kari a nen fu Yehovah nomo, dan mi masra ben bigin rigeri.”

A ben muilek tu gi Anita fu leri den pikin fu en fu Yehovah. Anita e taki: „Na ini mi eigi oso mi no ben man dini Yehovah. Mi ben studeri kibrikibri nanga mi pikin èn mi no ben man tyari den go na den konmakandra.”

Soleki fa a tori fu Anita e sori, dan a no makriki fu tan dini Gado te famiriman e gens wi. Tra situwâsi kan meki en muilek tu gi wi fu tan dini Gado. Fu eksempre, te wi e siki wan langa pisi ten, te wan pikin fu wi noso wi trowpatna dede, noso te wan famiriman gowe libi Yehovah. Ma san kan yepi wan Kresten fu tan dini Yehovah?

San yu kan du te den tesi disi e miti yu? Na apostel Paulus taki: ’A de fanowdu taki yu horidoro (Hebr. 10:36). Ma san kan yepi yu fu horidoro?

Te tesi e miti yu, dan no frigiti taki yu musu frutrow na tapu Yehovah fu yepi yu horidoro. Begi en fu a yepi yu. Luku wan eksempre. Wan munde bakadina wan sari sani miti a famiri fu Ana. Sondro taki a ben fruwakti en, Ana en masra dede. Den ben trow 30 yari kaba. Ana e taki: „A mamanten dati mi masra go na wroko, ma noiti a kon na oso baka. A ben abi 52 yari nomo.”

A wroko fu Ana ben meki taki a ben abi furu fu du, ma a no puru a sari fu en. San Ana du? A e taki: „Mi fruteri Yehovah ala sani di ben de na tapu mi ati èn begi en fu yepi mi.” Yehovah piki den begi fu en? Ana de seiker taki Yehovah arki en. A e taki: „A freide fu Gado meki taki mi ben abi wan korostu firi èn a yepi mi fu no lasi mi frustan. Mi de seiker taki Yehovah o gi mi masra wan opobaka.”—Fil. 4:6, 7.

Yehovah, „a sma di e arki begi”, pramisi taki a o gi den futuboi fu en ala san de fanowdu fu tan dini en (Ps. 65:2). A pramisi disi no e gi yu deki-ati? A no e yepi yu fu si taki yu srefi kan horidoro tu?

Yehovah e gebroiki a Kresten gemeente fu yepi en pipel. Fu eksempre, na a ten di a gemeente na Tesalonika kisi hebi frufolgu, dan Paulus taigi den Kresten fu „tan gi makandra deki-ati èn tan yepi makandra, soleki fa [den ben] e du kaba” (1 Tes. 2:14; 5:11). Fu di den Kresten disi ben kon makandra, meki den ben tron bun mati èn den ben man yepi makandra. Na so den ben man horidoro di den kisi tesi. A fasi fa den horidoro na wan heri bun eksempre gi wi na ini a ten disi èn a e sori wi san kan yepi wi fu horidoro.

Te wi de bun mati fu wi brada nanga sisa na ini a gemeente, dan dati kan yepi wi „fu du sani di e gi [makandra] deki-ati” (Rom. 14:19). A sani disi de prenspari spesrutu na ini muilek ten. Paulus srefi ben kisi furu problema èn sma ben frufolgu en, ma Yehovah gi en a krakti fu horidoro. Son leisi Gado gebroiki tra Kresten fu gi Paulus deki-ati. Fu eksempre, di Paulus seni odi gi den sma fu a gemeente na ini Kolose, dan a taki a sani disi: „Den ben trowstu mi trutru” (Kol. 4:10, 11). Iya, a lobi di den ben abi gi Paulus meki taki den trowstu en èn den gi en deki-ati di a ben de na nowtu. A kan taki yu srefi kisi deki-ati nanga yepi tu fu den sma fu yu gemeente.

Wan tra fasi fa Gado e yepi wi na taki a e gebroiki den owruman na ini a gemeente. Den lepi  man disi de „leki wan kibripresi gi tranga winti èn gi sibibusi. Den o de leki wan liba di e lon na wan kontren sondro watra èn leki a kowrupe fu wan bigi ston na ini wan kontren di drei” (Yes. 32:2). A e trowstu wi fu sabi taki den brada disi de klariklari fu yepi wi. Sobun, te yu abi problema, dan go na den owruman. Den kan yepi yu fu tan dini Yehovah.

A no de fu taki dati den owruman no man lusu ala yu problema. Den na sondu libisma „di abi den srefi swakifasi leki [wi]” (Tori 14:15). Ma yu kan firi moro bun te yu go na wan owruman èn a e begi Yehovah fu yepi yu nanga yu problema (Yak. 5:14, 15). Wan brada na ini Italiakondre di ben siki hebi furu yari langa e taki: „Den owruman ben gwenti kon luku mi èn den ben sori lobi gi mi. Dati yepi mi fu horidoro.” Efu yu de na ini wan muilek situwâsi, dan Yehovah wani taki yu aksi den owruman fu yepi yu.

Moro sani de ete di kan yepi wi fu horidoro. Wan fu den sani na taki wi musu tan poti prakseri na a diniwroko fu Yehovah. Luku na eksempre fu John di abi 39 yari èn di abi kanker. A e taki: „Mi no ben man frustan taki mi ben abi a siki disi fu di mi yongu ete.” Na a ten dati a boi fu John ben abi dri yari nomo. John e taki: „Mi wefi no ben musu luku a boi fu wi wawan, ma a ben musu sorgu mi tu èn a ben musu yepi mi te mi ben musu go na datra.” Den dresi di John ben kisi gi a siki fu en ben meki a firi weri srefisrefi èn a ben kisi problema nanga en maag. Ma dati no ben de ala. A papa fu John kon siki so hebi taki a ben o dede èn a ben abi wan sma fanowdu fu sorgu gi en.

San yepi John nanga en osofamiri na ini a muilek situwâsi disi? Aladi John ben weri furu, toku a sorgu taki en osofamiri tan poti prakseri na a diniwroko fu Yehovah. A e taki: „Wi ben go na ala den konmakandra, wi ben go ibri wiki na ini a preikiwroko èn wi ben hori na Osofamiri Anbegi doronomo srefi te a ben muilek.” John kon si o prenspari a de fu tan abi wan bun matifasi nanga Yehovah. Sortu rai John abi gi den sma di de na ini wan muilek situwâsi tu? A e taki: „Mi ben skreki srefisrefi di mi yere taki mi siki èn heri dei mi ben broko mi ede. Ma bakaten di mi firi a krakti nanga a lobi fu Yehovah, dan dati yepi mi fu de korostu. Yehovah kan tranga yu tu neleki fa a tranga mi.”

Te yu e kisi tesi, dan memre san Paulus ben taki: ’A de fanowdu taki yu horidoro.’ Frutrow na tapu Yehovah èn begi en meki a yepi yu. Tron bun mati nanga den brada nanga sisa fu yu gemeente. Aksi den owruman fu yepi yu èn tan poti prakseri na a diniwroko fu Yehovah. A o yepi yu awansi sortu problema yu abi now noso awansi sortu muilek situwâsi opo kon na ini yu libi.