1, 2. Fa wi sabi taki Yesus lobi libisma trutru?

A KONI fu Yehovah bigi srefisrefi. Wi e si dati te wi e luku a fosi sani di a meki, dati na a Manpikin fu en. A Manpikin disi ben de „wan tumusi bun wrokoman” di ben e wroko makandra nanga en Papa. Prakseri fa Yesus ben e prisiri èn fa a ben e firi koloku di en Papa „sreka hemel” èn di a „seti den fondamenti fu grontapu”. Ma fu ala den sani di en Papa meki, Yesus ben abi moro ’lobi gi libisma’ (Odo 8:22-31). Iya, langa ten fosi Yesus tron wan libisma, a ben lobi den kaba.

² Bakaten Yesus „gowe libi ala san a ben abi” na hemel èn a tron wan libisma. A du disi fu sori taki a lobi en Papa èn taki a e gi yesi na en ala ten. A du en tu fu di a lobi „libisma” srefisrefi èn fu di a ben wani „gi en libi leki wan lusu-paiman fu frulusu furu sma” (Fil. 2:5-8; Mat. 20:28). Iya, Yesus lobi libisma trutru! Di a ben de na grontapu, Gado gi en a krakti fu du wondru. Den wondru disi sori fa Yesus lobi sma èn sortu moi sani a o du dyonsro gi libisma na heri grontapu.

3. San wi o go luku now?

 ³ Di Yesus kon na grontapu, a ben man ’fruteri sma a bun nyunsu fu Gado Kownukondre’ tu (Luk. 4:43). Yesus ben sabi taki a Kownukondre disi ben o meki a nen fu en Papa kon santa èn taki a ben o lusu ala problema fu libisma fu ala ten. Te Yesus ben e preiki, a ben e du furu wondru. Den wondru disi ben sori taki a ben e broko en ede nanga ala sma. Fu san ede disi prenspari gi wi? Fu di den sani di Yesus du e gi wi howpu èn den e meki wi de seiker taki a nyun grontapu o kon. Meki wi go luku fo wondru di Yesus du.

4. Fruteri san pasa di Yesus miti wan gwasiman.

⁴ Yesus ben e preiki wan tu yari kaba di a doro na a kontren fu Galilea. Na ini wan fu den foto drape Yesus si wan sari sani (Mark. 1:39, 40). Leti na en fesi wan man ben de di ben abi wan takru siki. A ben abi gwasi. Lukas, di ben de wan datra, fruteri srefi taki a man „ben abi gwasi na en heri skin” (Luk. 5:12). Di a gwasiman si Yesus „a saka kindi na Yesus futusei èn a begi en: ’Masra, efu yu wani nomo, yu kan meki mi kon krin.’” A man ben de seiker taki Yesus ben abi a makti fu dresi en. Ma a ben wani sabi efu Yesus ben wani yepi en tu. Fu san ede? Fu di a ben sabi taki den Fariseiman ben abi a gwenti fu wisiwasi gwasiman. Ma san Yesus denki di a si a man? A ben o yepi en, aladi son pisi fu a man en skin ben pori gowe? San yu ben o du?

5. San meki Yesus ben wani yepi a gwasiman?

⁵ A Wet fu Moses ben taki dati gwasiman ben musu bari gi sma: „Mi no krin, mi no krin!” Ma a man no du dati. Toku Yesus ati no bron nanga en. Na presi fu dati, a poti prakseri na a man srefi èn na san a ben abi fanowdu (Lef. 13:43-46). Wi no sabi san Yesus ben denki, ma wi sabi san ben de na ini en ati. A ben sari a man so te, taki a du wan wondru. Sondro fu frede, Yesus langa en anu, dan a fasi a man. Dan na wan switi fasi a taki: „Mi wani. Kon krin.” Ne „a gwasi komopo na a man en skin” wantewante (Luk. 5:13). Iya, Yehovah gi Yesus a makti fu du a bigi wondru disi èn fu sori omeni a lobi sma.—Luk. 5:17.

6. San yu lobi fu den wondru di Yesus du èn san dati e sori?

⁶ A krakti fu Gado meki taki Yesus Krestes ben man du furu bigi wondru. A no dresi gwasi wawan, ma a dresi ala tra siki nanga ibri sortu mankeri tu di den sma ben abi. Bijbel e taki: „Den sma fruwondru di den si fa babaw sma ben man taki, fa sma di lan ben man waka, fa breni sma ben man si” (Mat. 15:31). Yesus no ben abi fu du oparâsi fu meki sma kon betre. Nôno, a ben man dresi den sma wantewante, srefi te den ben de farawe (Yoh. 4:46-54). San den moi eksempre disi e sori? Den e sori taki wi Kownu Yesus Krestes no abi a makti wawan fu dresi sikisma fu ala ten, ma a wani du dati tu. Te wi e leri fa Yesus ben de nanga sma, dan dati e gi wi a frutrow taki na ini nyun grontapu, a Bijbel profeititori disi o kon tru: „A o firi sari gi den mofina sma èn gi den pôti sma” (Ps. 72:13). Yesus o yepi ala sma di e pina, fu di a wani du dati trutru.

7, 8. Fruteri san Yesus du fosi a miti wan lanman na a watra-olo fu Betsata.

⁷ Wan tu mun baka di Yesus miti a gwasiman na Galilea, a go na Yudea fu preiki èn fu meki a bun nyunsu fu Gado Kownukondre bekènti. A musu fu de taki dusundusun sma yere a boskopu fu en èn taki a lobi di a ben abi gi den, naki na ati fu den. Yesus ben wani trowstu den pôtisma nanga den sma di ben e pina. A ben wani tu taki den sma disi kisi howpu baka.—Yes. 61:1, 2; Luk. 4:18-21.

⁸ Na ini a mun Nisan, Yesus go na Yerusalem gi a Paskafesa soleki fa a Wet ben taki. A foto ben druk fu di furu sma ben kon drape gi a santa fesa disi. Pikinso na noordsei fu a tempel wan watra-olo ben de di sma ben sabi leki Betsata. Drape Yesus miti wan lanman.

9, 10. (a) San meki sma ben e go na a watra-olo fu Betsata? (b) San Yesus du na a watra-olo èn san disi e leri wi? (Luku a prenki na a bigin fu na artikel.)

⁹ Furu sikisma nanga malengrisma ben gwenti go na Betsata. Fu san ede? Fu di den ben denki taki efu wan sikisma ben o go na ini a watra-olo te a watra ben e seki, dan a sma disi ben o kon betre. Yu e frustan fa furu fu den sikisma drape ben e firi? A musu fu de taki furu fu den ben e bruya, den no ben sabi san fu du èn den ben e firi brokosaka. Den alamala ben wani kon betre. Ma Yesus ben de wan man sondro sondu èn a ben gosontu dorodoro. Sobun, san meki a go drape? We, fu di a ben lobi sma. Na so a kon miti wan man di ben siki wan langa pisi ten kaba. A man disi ben siki kaba fosi Yesus kon na grontapu srefi.—Leisi Yohanes 5:5-9.

¹⁰ Yesus aksi a lanman efu a ben wani waka baka. Prakseri fa a man ben sari di a fruteri Yesus taki a ben wani kon betre, ma a no ben man, fu di nowan sma ben de drape fu yepi en fu go na ini a watra-olo. Ne Yesus taigi en fu du wan sani di nowan sma ben fruwakti. A taigi en fu opo teki en bedi èn waka. Fu di a ben bribi Yesus, meki a opo teki en bedi èn a bigin waka. A moi wondru disi e sori san Yesus o du na ini a nyun grontapu. A e sori wi tu taki Yesus abi sari-ati. A suku den sma di ben de na nowtu. Na eksempre fu Yesus musu yepi wi fu tan suku den sma na ini a kontren fu wi di e firi brokosaka fu den ogri di e pasa na ini a grontapu disi.

11. Fa Markus 5:25-34 e sori taki Yesus ben abi sari-ati gi den sikisma?

¹¹ Leisi Markus 5:25-34. Yu ben abi wan uma di ben siki 12 yari kaba. A siki fu en ben meki taki a ben e firi syen. Furu sani na ini na aladei libi a no ben man du. A no ben man go na a tempel srefi fu dini Gado. Aladi „wan lo datra ben pina na uma èn a ben gebroiki ala en gudu kaba”, toku sani ben kon moro ogri gi en. Wan dei na uma prakseri na ensrefi taki a o du wan tra sani fu kon betre. A waka go na mindri den sma fu go krosibei fu Yesus. Di a doro na Yesus, dan a fasi en dyakti (Lef. 15:19, 25). Di Yesus firi taki krakti komopo na ini en skin, a aksi suma fasi en. „Na uma ben e frede èn a ben e beifi”, ma „a saka kindi na [Yesus] futusei, dan a fruteri en ala  sani”. Yesus ben sabi taki na en Papa Yehovah ben dresi na uma. Dati meki a taigi en na wan switi fasi: „Mi umapikin, a bribi fu yu meki yu kon betre. No broko yu ede moro. Yu o de gosontu now, bika yu no abi a takru siki moro.”

12. (a) Te yu e luku den sani di wi leri, dan san yu ben o taki fu Yesus? (b) Sortu eksempre Yesus gi wi?

¹² Iya, Yesus abi switifasi trutru! Wi e si taki a e firi gi sma, spesrutu den wan di siki. Ma Satan wani meki wi bribi taki Gado no lobi wi èn taki wi no warti noti. Den wondru di Yesus du, e sori wi krin taki a e broko en ede trutru nanga wi èn nanga den problema fu wi. Wi kan breiti taki wi abi so wan lobi-ati Kownu nanga Granpriester (Hebr. 4:15). Kande a no makriki fu frustan fa sma di e siki wan langa pisi ten kaba e firi, spesrutu te wi no ben de na ini so wan situwâsi noiti ete. Ma hori na prakseri taki aladi Yesus no ben siki noiti, toku a ben abi sari-ati gi den sikisma. Meki wi du ala san wi man fu sori lobi neleki en.—1 Petr. 3:8.

13. San na opobaka fu Lasarus e sori wi fu Yesus?

¹³ Te sma ben e sari, dan disi ben naki Yesus ati. Fu eksempre, di Yesus mati Lasarus dede, a „soktu dipi èn a ben kon hebi gi en trutru”, spesrutu di a si taki den mati nanga den famiriman fu Lasarus ben e krei. Aladi a ben sabi taki dyonsro a ben o meki Lasarus kon na libi baka, toku a ben e sari so. (Leisi Yohanes 11:33-36.) Yesus no ben e syen fu sori fa a e firi. Den sma ben kan si taki  a ben lobi Lasarus nanga en famiri. A ben lobi den so te, taki a gebroiki a krakti fu Gado fu meki Lasarus kon na libi baka.—Yoh. 11:43, 44.

14, 15. (a) San e sori taki Yehovah e angri fu puru den sani di e meki taki libisma e pina? (b) Sortu moi sani a Griki wortu di vertaal nanga „grebi” e sori wi?

¹⁴ Bijbel e taki dati Yesus „de soifri leki fa [a Mekiman] de” (Hebr. 1:3). Sobun, den wondru di Yesus du ben sori taki en nanga en Papa e angri fu puru siki, pina nanga dede. Dyonsro Yehovah nanga Yesus o meki furu sma kon na libi baka. Yesus ben taki: „A yuru o kon te ala den sma di de na ini den grebi o . . . komopo drape.”—Yoh. 5:28, 29.

¹⁵ A Griki wortu di vertaal nanga „grebi”, abi fu du nanga wan tra Griki wortu di wani taki „fu memre”. Na Almakti Gado na a sma di meki hemel nanga grontapu. Dati meki en wawan man memre ala sani fu den lobiwan fu wi di dede. A man memre finifini fa den ben de (Yes. 40:26). Yehovah no man memre den dedesma nomo, ma en nanga en Manpikin wani memre den. Na opobaka fu Lasarus nanga a di fu tra sma di kari na ini Bijbel, e sori wi san o pasa na ini a nyun grontapu.

16. Sortu grani furu Kresten na ini a ten disi o kisi?

¹⁶ Efu wi tan du san reti, dan a kan taki wi o si a moro bigi wondru di pasa oiti. Wi o si fa sma o pasa a bigi banawtu libilibi. Syatu baka a feti fu Armagedon moro wondru o pasa di o meki taki libisma kon de gosontu baka (Yes. 33:24; 35:5, 6; Openb. 21:4). Prakseri fa a o de fu si fa sma e trowe den bril, den wakatiki, den rolsturu, den sani di e yepi den fu yere moro bun nanga den sortu sani dati. Yehovah sabi taki ala sma di o pasa Armagedon libilibi o abi fu de tranga èn gosontu, fu di furu wroko o de fu du. Na den o meki a moi grontapu fu wi kon de wan paradijs.—Ps. 115:16.

17, 18. (a) San na a moro prenspari sani di meki taki Yesus du wondru? (b) Fu san ede yu musu tan meki muiti fu go na ini Gado nyun grontapu?

¹⁷ Na ini a ten disi, a „bigi ipi” e kisi deki-ati te den e leisi fa Yesus ben dresi sikisma (Openb. 7:9). Den wondru disi e tranga wi bribi taki wi o kon de gosontu dorodoro. Den e sori wi tu fa Gado en fosi Manpikin lobi libisma (Yoh. 10:11; 15:12, 13). A sari-ati di Yesus abi e sori wi na wan heri moi fasi taki Yehovah e broko en ede nanga ibri futuboi fu en.—Yoh. 5:19.

¹⁸ Ala libisma e geme, den e pina èn den e dede (Rom. 8:22). Wi abi Gado nyun grontapu fanowdu, pe ala sma o kon gosontu dorodoro soleki fa a ben pramisi. Na ini Maleaki 4:2 wi e leisi taki den wan di kon gosontu o „dyompo fu prisiri” fu di den no o de srafu fu sondu moro. Meki wi de nanga tangi gi san Gado du gi wi èn meki wi bribi na ini den pramisi fu en. Disi o gi wi deki-ati fu du ala san wi man fu kan go na ini a nyun grontapu. Den wondru di Yesus du di a ben de na grontapu, e tranga wi bribi taki dyonsro te a o tiri leki Kownu, ala libisma o kon fri fu têgo.