1, 2. (a) Fu san ede yu de seiker taki Yehovah lobi a pipel fu en? (b) Nanga sortu firi Gado meki ala libisma?

FU SAN EDE yu de seiker taki Yehovah lobi a pipel fu en? Fosi yu piki na aksi dati, dan luku den eksempre disi: Wan heri pisi ten brada nanga sisa ben e gi Taylene deki-ati. Den taigi en na wan switi fasi fu no fruwakti tumusi furu fu ensrefi. A sisa disi e taki: „Efu Yehovah no ben lobi mi, dan a no ben o tan gi mi rai ala ten baka.” Baka di Brigitte en masra dede, a ben musu kweki den tu pikin fu den en wawan. Brigitte e taki: „Fu kweki tu pikin na ini a grontapu disi fu Satan na wan fu den moro muilek sani di mi ben musu du, spesrutu fa mi de mi wawan. Ma mi de seiker taki Yehovah lobi mi, bika a yepi mi di mi ben e krei furu fu den problema fu mi èn di mi ben e sari. Noiti a meki sani miti mi di ben hebi moro leki san mi ben man tyari” (1 Kor. 10:13). Sandra abi wan seryusu siki di datra no man dresi. Na wan kongres wan sisa di a no ben sabi so bun kon taki nanga en. A masra fu Sandra e taki: „Aladi wi no ben sabi a sisa disi so bun, toku a ben gi wi furu prisiri taki a ben e broko en ede so nanga wi. Srefi den pikinpikin sani di brada  nanga sisa e du fu sori taki den lobi wi, e sori mi taki Yehovah lobi wi trutru.”

² Gado meki libisma na so wan fasi taki den man lobi trawan èn taki den srefi wani taki sma lobi den tu. Ma sani kan pasa di wi no fruwakti noso di e meki wi firi brokosaka. Boiti dati wi kan kon siki, wi kan kisi moni problema, noso kande a preikiwroko no e go leki fa wi wani. Den sani disi kan meki wi denki taki Yehovah no lobi wi moro. Efu na so wi e firi, dan a bun fu prakseri taki wi warti gi en èn taki a de leti na wi sei fu „grabu [wi] reti-anu hori” èn fu yepi wi. Noiti a o frigiti wi efu wi tan gi yesi na en.—Yes. 41:13; 49:15.

3. San kan yepi wi fu de seiker taki Yehovah e tan sori lobi gi wi?

³ Den sma di wi kari na a bigin, ben de seiker taki Yehovah yepi den di den kisi problema. Na so wi kan de seiker tu taki Gado de na wi sei (Ps. 118:6, 7). Na ini na artikel disi wi o taki fu fo sani di e sori taki Yehovah lobi wi. Wi o taki fu (1) den sani di a meki, (2) en Wortu Bijbel, (3) begi, nanga (4) a lusu-paiman. Efu wi tan denki dipi fu den bun sani di Yehovah du gi wi, dan dati kan yepi wi fu kisi moro warderi gi a lobi di a e tan sori wi.—Leisi Psalm 77:11, 12.

4. San wi e leri te wi e luku den sani di Yehovah meki?

⁴ Te wi e luku den sani di Yehovah meki, dan wi e si taki a lobi wi trutru (Rom. 1:20). Fu eksempre, Yehovah meki grontapu na so wan fasi taki wi no man tan libi nomo, ma taki wi kan prisiri tu fu a libi. A gi wi ala san wi abi fanowdu fu kan du dati. A no de fu taki dati wi alamala musu nyan. Toku Yehovah no gi wi nyanyan nomo fu di a de fanowdu, ma a gi wi ala sortu sani tu di switi fu nyan (Preik. 9:7). Wan sisa di nen Catherine e prisiri trutru te a e luku den sani di Gado meki. A e du disi spesrutu na ini a mun april te a waran ten fu a yari e bigin na ini Kanada. A e taki: „A moi fu si fa ala sani e kon na libi. Den bromki e gro komoto na ini a gron soifri na a ten te den musu bigin gro. Den fowru e drai kon na oso baka, sosrefi a pikin kolibri di e kon nyan den sani di mi poti na fesi a fensre fu a kukru fu mi. Yehovah musu fu lobi wi taki a gi wi someni sani fu prisiri.” Wi hemel Papa di lobi wi, e prisiri nanga den sani di a meki èn a wani taki wi e prisiri fu den tu.—Tori 14:16, 17.

5. Fa a lobi fu Yehovah de fu si krin na ini a fasi fa a meki libisma?

⁵ Yehovah meki wi na so wan fasi taki wi kan du bun wroko di e gi wi prisiri èn di e meki taki wi de koloku na ini a libi (Preik. 2:24). A ben wani taki libisma ben musu kon furu na grontapu èn taki den ben musu basi ala sani na grontapu, sosrefi den fisi, den fowru nanga ala tra meti di de (Gen. 1:26-28). Yehovah lobi wi. Fu dati ede a meki wi na so wan fasi taki wi kan teki na eksempre fu en èn sori den srefi fasi di a abi.—Ef. 5:1.

6. Fu san ede wi musu abi furu warderi gi Gado Wortu?

⁶ Yehovah gi wi a Wortu fu en fu di a lobi wi trutru. Bijbel e sori san wi musu sabi fu en èn san a e denki fu libisma. Fu eksempre, Gado Wortu e fruteri wi san a ben e du nanga den Israelsma, ibri tron te den ben e trangayesi en. Psalm 78:38 e  taki: „A ben e sari den. A ben e tapu den sondu èn a no ben e kiri den alamala. Someni leisi a meki na atibron fu en kon saka baka èn en ati no ben faya pasa marki.” Te yu e prakseri fu a tekst disi, dan dati kan yepi yu fu kon si taki Yehovah lobi yu trutru èn taki a e broko en ede nanga yu. Yu kan de seiker taki yu prenspari gi en.—Leisi 1 Petrus 5:6, 7.

7. Fu san ede wi musu si Bijbel leki wan sani di prenspari gi wi?

⁷ Wi musu si Bijbel leki wan tumusi prenspari sani. Fu san ede? Fu di Yehovah e gebroiki en Wortu fu taki nanga wi. Te wan papa noso mama e taki fri nanga a pikin fu den, dan a lobi di den e firi gi makandra e kon moro tranga èn den e frutrow makandra moro. Yehovah na wi lobi Papa. Aladi noiti wi no si en noso yere en sten, toku a e gebroiki en Wortu fu taki nanga wi, èn wi musu arki en (Yes. 30:20, 21). Yehovah wani sori wi a pasi fu di wi na en spesrutu pipel èn a e kibri wi. A wani tu taki wi sabi en èn taki wi e frutrow en.—Leisi Psalm 19:7-11; Odo 1:33.

8, 9. San Yehovah wani taki wi musu sabi? Gi wan eksempre fu Bijbel di e sori dati.

⁸ Yehovah wani taki wi sabi en leki wan sma di lobi wi èn di no e poti prakseri nomo na den fowtu fu wi. A e suku a bun na ini wi (2 Kron. 16:9). Fu eksempre, na dati a du nanga Kownu Yosafat fu Yuda. Wan leisi Yosafat meki a fowtu fu go yepi Kownu Akab fu Israel fu puru Ramot-Gilead na  a anu fu den Siriasma. Na a ten dati, fo hondro falsi profeiti taigi na ogri Kownu Akab taki a ben o wini a feti. Ma Yehovah en tru profeiti Mikaya taigi en taki a ben o lasi a strei. Na dati pasa tu. Akab dede na ini a strei èn bijna Yosafat lasi en libi. Baka a feti, Yehovah gebroiki Yehu fu piri-ai gi Yosafat fu a fowtu di a meki. Toku Yehu taigi en: „Gado si [a] bun na ini yu.”—2 Kron. 18:4, 5, 18-22, 33, 34; 19:1-3.

⁹ Di Yosafat bigin tiri leki kownu, a taigi den granman, den Leifisma nanga den priester fu go na ala den foto fu Yuda fu leri a pipel a Wet fu Yehovah. A wroko di den man disi du go so bun, taki srefi sma fu tra kondre kon sabi Yehovah (2 Kron. 17:3-10). Iya, Yosafat du wan don sani di a go yepi Akab, ma toku Yehovah si den bun sani di a du. A Bijbel tori disi e memre wi taki aladi wi e meki fowtu, Yehovah o tan lobi wi te wi e du ala san wi man fu prisiri en ati.

10, 11. (a) Fu san ede begi na wan spesrutu seti fu Yehovah? (b) Fa Gado kan arki den begi fu wi? (Luku a prenki na a bigin fu na artikel.)

¹⁰ Wan papa di lobi den pikin fu en, e teki en ten fu arki den te den wani taki nanga en. Fu di a lobi den, a wani kon sabi san de na tapu den ati. A wani sabi nanga san den e broko den ede èn san den e firi. Na so wi hemel Papa Yehovah e arki wi te wi e taki nanga en na ini begi. Disi na wan moi grani di wi abi.

¹¹ Iniwan ten wi kan taki nanga Yehovah na ini begi. A no e tapu wi fu du disi. En na wi Mati èn ala ten a de klariklari fu arki wi. Taylene di wi ben kari kaba, e taki: „Yu kan fruteri en ala sani, awinsi san na en.” Te wi e begi Gado fu fruteri en san de dipi na ini wi ati, dan kande a e piki wi nanga yepi fu wan Bijbel tori, wan artikel na ini wan tijdschrift, noso nanga wan sani di wan brada noso sisa e taigi wi fu gi wi deki-ati. Yehovah e yere den begi fu wi èn a e frustan den firi fu wi, srefi te nowan sma e frustan wi. A fasi fa a e piki den begi fu wi, e sori taki a e tan lobi wi.

12. Fu san ede wi musu ondrosuku den begi di skrifi na ini Bijbel? Gi wan eksempre.

¹² Wi kan leri furu fu den begi di skrifi na ini Gado Wortu. Dati meki son tron a bun fu leisi den begi disi te wi abi wi Osofamiri Anbegi. Te wi e luku fa den futuboi fu Yehovah fu owruten ben e fruteri en san ben de dipi na ini den ati, dan dati kan yepi wi fu meki den begi fu wi kon moro bun. Fu eksempre, luku fa Yona begi nanga sakafasi di a ben de na ini a bere fu wan bigi fisi (Yona 1:17–2:10). Luku a fasi fa Salomo begi Yehovah nanga en heri ati di a gi a tempel abra na Gado (1 Kow. 8:22-53). Denki dipi fu a begi di Yesus leri wi (Mat. 6:9-13). A moro prenspari sani na taki wi musu „begi Gado ala ten . . . Na so a o kon sabi san unu wani aksi en.” A bakapisi o de taki „a freide fu Gado di bigi moro iniwan sani di libisma man frustan, o kibri un ati nanga un frustan”. Wi o kisi moro warderi gi a lobi di Yehovah e tan sori wi.—Fil. 4:6, 7.

13. Sortu okasi a lusu-paiman e gi wi?

¹³ Yehovah gi wi wan spesrutu kado èn dati na a lusu-paiman fu Yesus di pai gi wi so taki wi kan „kisi libi” (1 Yoh. 4:9). Di na apostel Paulus skrifi fu a moi fasi disi fa Gado sori a lobi fu en, a taki: „Krestes dede gi sondari na a reti ten. A no makriki  fu feni wan sma di ben o dede gi wan sma di e du san reti. Ma kande wan sma ben o wani dede gi wan bun sma ete. Toku Gado sori wi taki a lobi wi fu di a meki Krestes dede gi wi, aladi wi ben de sondari ete” (Rom. 5:6-8). Disi na a moro moi fasi fa Yehovah sori a lobi fu en èn na so libisma kisi na okasi fu tron krosibei mati fu en.

14, 15. San a lusu-paiman wani taki gi (a) den salfu Kresten? (b) den sma di abi a howpu fu libi na grontapu?

¹⁴ Wan pikin grupu Kresten de di e firi a lobi fu Yehovah na wan spesrutu fasi (Yoh. 1:12, 13; 3:5-7). Fu di Gado salfu den Kresten disi nanga en santa yeye, meki den tron „pikin fu Gado” (Rom. 8:15, 16). Paulus e taki fu den salfu Kresten dati den ’alamala kon na libi èn dati den alamala teki presi na ini hemel, fu di den de wán nanga Krestes Yesus’ (Ef. 2:6). Den e kisi a grani disi fu go na hemel fu di ’Gado poti a santa yeye di a pramisi den leki wan stampu na den tapu. A santa yeye disi na wan dyaranti taki den o kisi wan gudu.’ San na a gudu disi? Na ’a howpu di den abi fu kisi a sani di poti na wan sei gi den na ini hemel’.—Ef. 1:13, 14; Kol. 1:5.

¹⁵ Ma awinsi sma no salfu nanga santa yeye, toku den kan tron wan mati fu Gado efu den e bribi na ini a lusu-paiman. Den abi a howpu fu tron pikin fu Gado èn fu libi fu têgo na ini a paradijs di a pramisi wi. Sobun, nanga yepi fu a lusu-paiman Yehovah e sori a lobi fu en gi ala libisma (Yoh. 3:16). Efu wi abi a howpu fu libi fu têgo na grontapu èn wi e tan dini Yehovah nanga wi heri ati, dan wi kan de seiker taki a o meki wi prisiri fu a libi na ini a nyun grontapu. Dati meki a fiti taki wi e si a lusu-paiman leki a moro moi buweisi fu a lobi di Gado e tan sori wi.

16. San wi o du te wi e denki dipi fu a lobi fu Gado?

¹⁶ Wi no man teri ala den fasi fa Yehovah sori taki a lobi wi. A psalm skrifiman David ben singi: „Den prakseri fu yu warti trutru gi mi! Fu tru, mi Gado, den furu srefisrefi! Efu mi ben o pruberi fu teri den, dan den ben o furu moro leki santi” (Ps. 139:17, 18). Te wi e denki dipi fu ala den fasi fa Yehovah e sori a lobi fu en, dan dati o gi wi deki-ati fu lobi en tu èn fu du ala san wi man du gi en.

17, 18. San na wan tu fasi fa wi kan sori taki wi lobi Gado?

¹⁷ Furu fasi de fa wi kan sori taki wi lobi Yehovah. Fu eksempre, te wi e du a Kownukondre preikiwroko fayafaya, dan wi e sori taki wi lobi Gado nanga tra sma (Mat. 24:14; 28:19, 20). Wi kan sori lobi gi Yehovah tu efu wi e tai hori na en te wi e kisi tesi. (Leisi Psalm 84:11; Yakobus 1:2-5.) Wi prenspari gi Gado. Sobun, te den tesi fu wi e kon hebi, dan wi kan de seiker taki Gado sabi taki wi e pina èn taki a o yepi wi.—Ps. 56:8.

¹⁸ Te wi lobi Yehovah, dan dati o meki wi denki dipi fu ala den moi sani di a meki. Te wi e studeri Gado Wortu fayafaya, dan wi e sori taki wi lobi en èn taki wi e si Bijbel leki wan prenspari sani. Lobi gi Yehovah o meki taki wi o du moro muiti fu taki nanga en na ini begi. Wi o kisi moro lobi gi Gado tu te wi e denki a frulusu-ofrandi di a gi fu den sondu fu wi (1 Yoh. 2:1, 2). Disi na soso wan tu fu den furu fasi fu sori Yehovah taki wi e warderi a lobi di a e tan sori wi.