1, 2. (a) San yu e fruwakti na ini a paradijs? (Luku a prenki na a bigin fu na artikel.) (b) San o gi wi a moro bigi prisiri na ini a nyun grontapu?

„A TRUTRU LIBI”. Den wortu disi e meki furu fu wi prakseri a howpu di wi abi fu libi fu têgo na ini wan paradijs na grontapu. Te yu luku en bun, dan na apostel Paulus ben sori taki „a trutru libi” abi fu du nanga „têgo libi”. (Leisi 1 Timoteyus 6:12, 19.) Wi e fruwakti taki wi o libi fu ala ten. A libi dati o meki wi prisiri èn wi o firi bun fu ala ten. Nowan fu wi sabi fa a o de fu wiki ibri dei nanga wan bun gosontu èn fu firi bun èn koloku (Yes. 35:5, 6). Prakseri fa wi o prisiri fu de nanga den lobiwan fu wi èn nanga wi mati, sosrefi den wan di kon na libi baka! (Yoh. 5:28, 29; Tori 24:15) Yu o abi moro ten fu leri nyun sani èn fu du den sani di yu lobi. Fu eksempre, yu o man leri moro bun fa sani na ini a naturu e wroko. Yu o man leri fa fu prei poku noso yusrefi o man taki fa yu wani yu oso musu de èn yu o man teken en tu.

² Wi e fruwakti ala den bun sani disi di o gi wi prisiri. Ma san o gi wi a moro bigi prisiri, na taki wi e dini Yehovah. Prakseri fa a libi o de te ala sma o si Yehovah leki a Tiriman fu den èn  te a nen fu en o de wan santa sani gi den (Mat. 6:9, 10). Wi o breiti fu si taki grontapu o lai nanga sma di no abi sondu neleki san Gado ben abi na prakseri sensi a bigin. Denki o makriki a o de gi wi alamala fu tron moro bun mati fu Yehovah èn fu de sondro sondu te fu kaba!—Ps. 73:28; Yak. 4:8.

3. Gi san wi musu sreka wisrefi nownow kaba?

³ Wi kan kisi ala den blesi disi fu di Yesus e gi wi a dyaranti taki „Gado man du ala sani” (Mat. 19:25, 26). Ma efu wi wani libi na ini a nyun grontapu dati, srefi baka a Dusun Yari Tiri fu Krestes, dan wi musu „grabu a têgo libi hori bun steifi”. A fasi fa wi e libi now, musu sori taki wi sabi taki a kaba fu na ogri grontapu disi o kon iniwan ten. Wi musu du sani nownow kaba fu sreka wisrefi fu libi na ini a nyun grontapu. Fa wi kan du dati, aladi wi e libi ete na ini na ogri grontapu disi?

4. Fa wi kan sreka wisrefi nownow kaba gi a libi na ini a nyun grontapu? Gi wan eksempre.

⁴ Fa wi kan sreka wisrefi nownow kaba gi a libi na ini Gado en nyun grontapu? We, kon meki wi taki dati wi wani froisi go na wan tra kondre. Fa wi kan sreka wisrefi gi a kenki disi? Kande wi e bigin leri a tongo fu den sma di e libi drape. A ben o bun tu fu leri den gwenti fu den sma. Kande wi e meki muiti fu nyan sonwan fu den sani di den sma disi gwenti nyan. Noso kande wi e bigin libi leki wi e libi na ini a kondre kaba fu di dati na a fasi fa wi e fruwakti fu libi te wi de drape. Na so wi kan sreka wisrefi gi a libi na ini a nyun grontapu fu di wi e du ala san wi man fu libi now leki fa wi o libi na a ten dati. Luku wan tu eksempre di e sori fa yu kan du dati.

5, 6. Te wi e saka wisrefi na ondro a tiri fu Yehovah organisâsi, dan fa disi e yepi wi fu sreka wisrefi fu libi na ini a nyun grontapu?

⁵ Na ini a nyun grontapu, ala sma o si Gado leki a Tiriman fu den. A o de heri tra fasi leki a grontapu disi fu Satan. Furu sma feni taki densrefi musu bosroiti fa den musu libi. Den no feni taki a de fanowdu fu gi yesi na Gado. Ma san na a bakapisi? Fu di den no wani du san Gado taki, meki den e pina, den no de koloku èn ogri e miti den srefi (Yer. 10:23). Fa wi e sori taki wi e fruwakti a ten te ala sma o si Yehovah leki a lobi-ati Tiriman fu den?

⁶ A o switi fu libi na ini a nyun grontapu. Drape Yehovah organisâsi o sori wi fa wi kan yepi fu meki grontapu tron wan paradijs. Den o sori wi tu fa fu gi leri na den wan di kisi wan opobaka. Yehovah o abi furu wroko gi wi. Ma san wi o du efu wi kisi wan wroko di wi no lobi? Wi o gi yesi na a tiri fu Gado organisâsi èn meki ala muiti fu du a wroko so bun leki wi man? Furu fu wi o taki, iya! Ma fa a de nanga wi now? Wi e saka wisrefi na ondro a tiri fu Yehovah en organisâsi nownow kaba? Efu wi e du dati, dan wi e sreka wisrefi fu kan libi fu têgo na a ten te Yehovah o tiri grontapu.

7, 8. (a) Fu san ede wi musu leri nownow kaba fu wroko makandra nanga den wan di e teki fesi? (b) Fa a libi fu son brada nanga sisa kon kenki? (c) Fu san wi kan de seiker na ini a nyun grontapu?

⁷ Fu sreka wisrefi gi a libi na ini a nyun grontapu wi no musu leri nomo fu saka wisrefi na ondro Yehovah organisâsi na ini a ten disi. Wi musu leri tu fu de tevrede èn fu wroko makandra nanga trawan. Fu eksempre, te wi e kisi wan nyun wroko fu du na ini Gado organisâsi, dan wi musu de klariklari fu du en. Wi musu meki ala muiti fu de tevrede nanga a wroko èn fu du en nanga  prisiri. Te wi leri fu wroko makandra nanga den wan di e teki fesi now, dan a kan taki wi o du a srefi sani tu na ini a nyun grontapu. (Leisi Hebrewsma 13:17.) Di den Israelsma go na ini a Pramisi Kondre Gado meki sma iti lòt fu prati a kondre gi den (Num. 26:52-56; Yos. 14:1, 2). Na ini a ten disi wi no sabi ete pe wi o kisi fu tan na ini a nyun grontapu. Ma efu wi e wroko makandra nanga den wan di e teki fesi dan wi o de koloku èn a o gi wi bigi prisiri fu du a wani fu Yehovah awinsi pe fu grontapu wi e libi na a ten dati.

⁸ A o de wan bigi grani fu wroko na ini Gado en nyun grontapu na a ten te a Kownukondre o tiri. Dati meki nownow kaba wi breiti fu kan wroko makandra nanga Yehovah organisâsi èn fu du iniwan sani di wi e kisi fu du. Ma kande wi e kisi wan tra wroko baka wan pisi ten. Na dati pasa nanga wan tu brada nanga sisa di ben e wroko na Betel na ini Amerkankondre. Den ben kisi a grani fu go dini leki pionier. Toku den e prisiri srefisrefi nanga a nyun wroko disi èn nanga den someni blesi di den e kisi fu Yehovah. Son brada di ben e dini leki kring-opziener fosi e dini now leki spesrutu pionier, fu di den kon owru noso fu tra sani ede. Efu wi leri nownow kaba fu de tevrede, fu begi Gado fu yepi wi èn fu du ala san wi man na ini a diniwroko, dan wi o abi prisiri èn wi o kisi furu blesi, srefi na ini den lasti dei disi di muilek srefisrefi. (Leisi Odo 10:22.) San wi kan fruwakti na ini a ten di e kon? Kande wi abi na prakseri kaba pe wi wani libi na ini a nyun grontapu. Toku a kan taki den wan di e teki fesi e aksi wi fu froisi go tan na wan heri tra presi. Ma awinsi pe wi o libi na a ten dati èn awinsi san wi o du, wi kan de seiker taki wi o de nanga tangi, wi o de tevrede èn wi o prisiri srefisrefi.—Neh. 8:10.

9, 10. (a) Fu san ede a kan taki wi o abi pasensi fanowdu na ini a nyun grontapu? (b) Fa wi kan sori taki wi abi pasensi nownow?

⁹ Na ini a nyun grontapu wi kan kon na ini situwâsi pe wi o abi fu sori pasensi. Kon meki wi taki dati wi e yere fa sma breiti fu di famiriman noso mati fu den kisi wan opobaka. Ma kande wi abi fu wakti pikinso fu di den lobiwan fu wi no kisi wan opobaka ete. San wi o du dan? Wi o breiti gi den trawan, aladi wi e wakti nanga pasensi? (Rom. 12:15) Efu nownow kaba wi leri fu wakti nanga pasensi teleki den pramisi fu Yehovah kon tru, dan dati o yepi wi fu abi pasensi na a ten dati tu.—Preik. 7:8.

¹⁰ Wan tra fasi fa wi kan sreka wisrefi gi a libi na ini a nyun grontapu na fu leri abi pasensi nownow te kenki e kon na ini a fasi fa wi e frustan son Bijbel leri. San wi e du na ini den situwâsi dati? Wi e du muiti fu studeri den nyun sani disi èn fu hori pasensi efu wi no e frustan den so bun? Efu wi e du dati, dan a kan taki a o de moro makriki gi wi fu hori pasensi na ini a nyun grontapu te Yehovah o sori wi nyun sani di a wani fu wi du.—Odo 4:18; Yoh. 16:12.

11. Fu san ede a bun fu leri fu gi trawan pardon nownow kaba èn sortu wini disi o abi gi wi na ini a nyun grontapu?

¹¹ Wan tra sani di wi musu leri now fu kan libi na ini a nyun grontapu na taki wi musu de klariklari fu gi trawan pardon. Na a ten fu a Dusun Yari Tiri fu Krestes, a kan teki pikinso ten fosi ala sma na grontapu no abi sondu moro (Tori 24:15). Wi o man sori lobi gi makandra na a ten dati? Efu nownow kaba wi e leri fu gi trawan pardon èn fu no hori sma na ati, dan a o moro makriki gi wi na a ten dati.—Leisi Kolosesma 3:12-14.

12. Fu san ede wi musu sreka wisrefi nownow kaba gi a libi na ini a nyun grontapu?

¹² Na ini a nyun grontapu a no abi fu de  so taki wi o kisi ala den sani di wi wani, na a ten di wi wani. Na presi fu dati, wi o abi fu breiti nanga den sani di wi o kisi èn wi o abi fu de tevrede awinsi na ini sortu situwâsi wi de. Disi o wani taki dati wi o abi den srefi fasi fanowdu di Yehovah e leri wi now. Sobun, te wi abi den fasi disi nownow kaba, dan wi e sori taki a nyun grontapu de wan trutru sani gi wi èn taki wi e sreka wisrefi gi a têgo libi (Hebr. 2:5; 11:1). Boiti dati, wi e sori taki wi e angri trutru fu a ten te retidu o de na heri grontapu.

13. Te wi de na ini a nyun grontapu, dan san o de a moro prenspari sani na ini wi libi?

¹³ Luku ete wan fasi fa wi kan sreka wisrefi gi a trutru libi di wi o abi. Gado pramisi wi taki a o gi wi bun furu nyanyan nanga tra sani di wi abi fanowdu na ini a nyun grontapu. Ma san o gi wi a moro bigi prisiri na taki wi o man de krosibei mati fu Yehovah (Mat. 5:3). Wi o abi furu wroko fu du gi en èn nanga prisiri wi o dini en (Ps. 37:4). Sobun, te wi e si Yehovah leki a moro prenspari sma na ini wi libi nownow kaba, dan wi e sreka wisrefi gi a libi na ini a nyun grontapu.—Leisi Mateyus 6:19-21.

14. San kan yepi yonguwan fu du moro na ini a diniwroko fu Yehovah?

¹⁴ Fa wi kan kisi moro prisiri na ini a diniwroko fu Yehovah? Wán fasi na fu luku san wi kan du moro. Efu yu yongu ete èn yu wani du moro gi Yehovah, dan fu san ede yu no e leisi wan tu fu den artikel di e taki fu den difrenti fasi fa wi kan du a furuten diniwroko? Fu san ede yu no e pruberi fu seti sani so taki yu kan du wán fu den wroko disi? * Kande yu kan taki nanga wan sma di de na ini a furuten diniwroko omeni yari kaba. A bosroiti di yu teki fu du a furuten diniwroko yu heri libi langa, o sreka yu fu tan go doro nanga a wroko disi na ini Gado en nyun grontapu. Drape yu o si taki a leri di yu kisi nanga na ondrofeni di yu kon abi, prenspari srefisrefi.

15. San na ete wan tu fasi fa wi kan du moro na ini a diniwroko?

¹⁵ Leki Kownukondre preikiman, wi kan seti sani fu man du moro na ini a diniwroko. Fu eksempre, wi kan luku sortu fasi fu a preikiwroko wi kan du moro bun. Noso kande wi kan pruberi fu kon frustan den rai fu Bijbel moro bun èn wi kan leri fa fu gebroiki den na ini wi libi. Fu san ede yu no e meki muiti fu leisi moro bun na ini a gemeente,  fu hori moro bun lezing noso fu gi moro bun piki? Wi de seiker taki tra sani de ete di yu kan du. Ma a moro prenspari sani na taki te yu e seti yu libi fu du moro na ini a diniwroko, dan dati o yepi yu fu de nanga moro faya èn a o sreka yu gi a libi na ini a nyun grontapu.

16. Fu san ede a dini di wi e dini Yehovah na a moro bun fasi fu libi?

¹⁶ Yu denki taki wi e misi wan sani na ini a libi te wi e gebroiki wi ten now fu sreka wisrefi gi Gado en nyun grontapu? Kwetikweti! Te wi e dini Yehovah, dan dati na a moro bun fasi fu libi. Wi no e dini en fu di wan sma e dwengi wi, noso fu di wi wani pasa a bigi banawtu libilibi. Te wi de wan bun mati fu Yehovah, dan wi libi e go moro bun èn wi de moro koloku. Na so Gado ben wani taki wi libi ben musu de. A lobi wi èn a e sori wi fa wi musu libi èn dati bun moro ala tra sani. (Leisi Psalm 63:1-3.) Ma wi no abi fu wakti teleki a nyun grontapu kon fu kisi blesi fu Yehovah. Nownow kaba a e blesi wi fu di wi e dini en nanga wi heri ati! Iya, someni yari kaba sonwan fu wi e kisi den blesi disi èn den sani di wi ondrofeni meki wi kon si taki nowan tra fasi fu libi kan meki wi firi moro koloku.—Ps. 1:1-3; Yes. 58:13, 14.

17. San o de a moro prenspari sani gi wi na ini a paradijs?

¹⁷ Na ini a paradijs, wi o abi moro ten fu du den sani di wi lobi èn di e gi wi prisiri. Te yu luku en bun, dan na Yehovah meki wi nanga a firi fu wani abi prisiri. A pramisi wi taki a o „gi ala libisani san den e angri fu kisi” (Ps. 145:16; Preik. 2:24). A tru taki a de fanowdu fu meki prisiri na ini a libi èn fu rostu. Ma efu wi wani taki den sani disi gi wi moro prisiri, dan a moro prenspari fu abi wan bun matifasi nanga Yehovah. Na so a o de tu na ini a paradijs. Sobun, a de wan koni sani fu ’suku a Kownukondre fosi’ èn fu poti prakseri na den blesi di wi e kisi te wi e dini Yehovah.—Mat. 6:33.

18. Fa wi kan sori taki wi e sreka wisrefi gi a têgo libi na ini a paradijs?

¹⁸ Na ini a nyun grontapu, wi o firi koloku moro leki san wi ben prakseri. Meki wi sreka wisrefi nownow kaba fu di wi e angri fu kisi a trutru libi. Leri fu abi den fasi fu Gado. Du a Kownukondre preikiwroko fayafaya so taki yu kan kisi moro prisiri. Wi de seiker taki na ini a nyun grontapu, Yehovah o du ala san a pramisi wi. Sobun, meki wi libi neleki wi de na ini a nyun grontapu kaba.