1. San na apostel Yohanes gi Kresten deki-ati fu du èn fu san ede?

NA APOSTEL Yohanes gi wi deki-ati fu denki dipi fu a bigi lobi di Yehovah abi gi wi. Na 1 Yohanes 3:1 wi e leisi: „Luku fa a Tata lobi wi!” Iya, Yehovah lobi wi trutru èn a e sori wi taki a lobi wi. Te wi e prakseri a sani disi, dan dati o meki wi kon moro krosibei na en èn wi o lobi en moro.

2. Fu san ede son sma no man frustan taki Gado lobi den?

² Ma son sma no man frustan taki Gado lobi den. Den e denki taki Gado no e broko en ede nanga libisma. Kande den e bribi tu taki Gado e meki wet nomo èn taki a e strafu den sma di no e gi yesi na en. Noso kande son sma leri na ini kerki taki Gado na wan ogri-ati sma èn taki nowan sma man lobi en. Trawan e denki taki Gado lobi ala sma awinsi san den e du. Ma fu di yu studeri Bijbel, meki yu kon si taki lobi na a moro prenspari fasi fu Yehovah. A lobi fu en, meki taki a gi wi en Manpikin leki wan lusu-paiman (Yoh. 3:16; 1 Yoh. 4:8). Ma son leisi den sani di miti yu na ini yu libi, kan meki en muilek gi yu fu frustan o furu Yehovah lobi yu.

3. San o yepi wi fu frustan taki Yehovah lobi wi?

³ Fu yepi wi frustan taki Yehovah lobi wi, wi musu kon frustan fosi taki en na a sma di meki wi. Na en gi wi libi. (Leisi  Psalm 100:3-5.) Dati meki Bijbel e kari Adam „a manpikin fu Gado”. Yesus ben leri den bakaman fu en tu fu kari Gado „Wi Tata na hemel” (Luk. 3:38; Mat. 6:9). Sobun, fu di Yehovah na a sma di gi wi libi, meki en na wi Tata. Neleki fa wan bun papa lobi den pikin fu en, na so Yehovah lobi wi tu.

4. (a) Fa Yehovah e difrenti fu libisma papa? (b) San wi o luku na ini na artikel disi èn na ini a trawan?

⁴ Ma wi sabi taki den papa fu wi na sondusma. Awinsi omeni muiti den e du, den no man sori lobi leki fa Yehovah e du dati. Fu taki en leti, son sma kan memre ete fa a papa fu den du wan lo ogri nanga den di den ben pikin. Te den e prakseri den sani disi, a e hati den èn den e firi sari. Yehovah no de so wan papa kwetikweti (Ps. 27:10). Te wi sabi fa Yehovah lobi wi èn taki a e sorgu wi, dan wi kan de seiker taki wi o kon moro krosibei na en (Yak. 4:8). Na ini na artikel disi, wi o luku fo fasi fa Yehovah e sori taki a lobi wi. Na ini a tra artikel wi o luku fo fasi fa wi kan sori lobi gi en.

5. San na apostel Paulus fruteri den Ateinesma fu Gado?

⁵ Di na apostel Paulus ben de na Ateine na ini Grikikondre, dan a si furu popki fu falsi gado na ini a foto dati. A si tu taki a pipel ben bribi taki den falsi gado disi ben gi den libi èn taki na den gado disi ben gi den san den ben abi fanowdu. Dati meki a taki: „A Gado di meki grontapu nanga ala sani na en tapu, . . . e gi ala sma libi, a e meki den bro èn a e gi den ala sani. . . . Na en meki taki wi de na libi, taki wi e buweigi èn taki wi de” (Tori 17:24, 25, 28). Iya, fu di Yehovah lobi wi, meki a gi wi „ala sani” di wi abi fanowdu fu hori wi na libi. Denki wan tu fu den sani di a gi wi fu di a lobi wi.

6. Fa a grontapu di Yehovah meki gi wi na wan buweisi taki a lobi wi? (Luku a prenki na a bigin fu na artikel.)

⁶ Luku a grontapu di Yehovah a Mekiman, „gi na libisma” (Ps. 115:15, 16). Sabiman gebroiki omeni moni fu meki masyin nanga programa di musu ondrosuku efu tra planeiti de di de leki grontapu. Aladi den sabiman disi feni hondrohondro planeiti, toku den no feni nowan di de leki grontapu èn di bun fu libisma libi drape. Soleki fa a sori, dan grontapu na a wan-enkri planeiti di Gado meki na a fasi disi. Prakseri nomo. Na ini a heri starisistema fu wi, Yehovah teki wán planeiti nomo fu poti libisma na tapu. A planeiti disi na grontapu. A no bun nomo fu libi na en tapu, ma a moi tu èn Gado meki en na so wan fasi taki wi kan libi switi na tapu. Wi no abi fu frede taki wan dei grontapu no o de moro (Yes. 45:18). Disi e sori taki Yehovah musu fu lobi wi.—Leisi Yob 38:4, 7; Psalm 8:3-5.

7. Fa Yehovah meki wi èn fa dati e sori taki a lobi wi trutru?

⁷ Aladi Yehovah meki wan moi tanpresi gi wi, toku a sabi taki wi abi moro fanowdu fu kan firi koloku. Fu eksempre, te wan pikin sabi taki en papa nanga mama lobi en èn den e sorgu gi en, dan a e firi bun. Yehovah meki wi leki fa ensrefi de. A meki wi na so wan fasi taki wi man firi taki a lobi wi èn wi srefi kan sori tu taki wi lobi en (Gen. 1:27). Yesus ben taki tu: „Koloku fu den sma di sabi taki den abi Gado fanowdu” (Mat. 5:3). Fu di Yehovah de leki wan Papa gi wi, meki a gi wi „ala sani di e gi wi prisiri”. A e  sorgu gi wi èn a lobi wi trutru.—1 Tim. 6:17; Ps. 145:16.

8. Fu san ede wi sabi taki „a Gado di no e fruteri lei” lobi wi?

⁸ Wan papa lobi en pikin èn a wani kibri den so taki sma no man kori den noso bedrigi den. Ma furu papa nanga mama no man yepi den pikin fu den na wan bun fasi fu di den srefi no e du san skrifi na ini Gado Wortu. Nofo tron a bakapisi de taki den e bruya èn den no sabi san fu du (Odo 14:12). Na a tra sei, Yehovah, „a Gado di no e fruteri lei”, e gi den pikin fu en a moro bun rai (Ps. 31:5). A lobi den pikin fu en èn a e prisiri fu leri den ala den tru tori di abi fu du nanga en. A e leri wi tu fa fu anbegi en èn a e sori wi san na a moro bun fasi fu libi. (Leisi Psalm 43:3.) Sortu tru tori Yehovah leri wi èn fa disi e sori taki a lobi wi?

9, 10. (a) Fu san ede Yehovah e fruteri wi suma na en trutru? (b) Fa a sori wi san a abi na prakseri gi wi?

⁹ A fosi sani na taki Yehovah e sori wi suma na en trutru. A fruteri wi san na a nen fu en di de fu feni na ini Bijbel moro iniwan tra nen. Na a fasi disi a e yepi wi fu kon sabi en moro bun (Yak. 4:8). Yehovah e sori wi tu sortu fasi a abi. Te wi e luku den planeiti, a son nanga den stari, dan wi e si a makti nanga a koni fu en. Yehovah e gebroiki Bijbel tu fu sori wi o furu a lobi wi èn taki a de wan Gado fu retidu (Rom. 1:20). Yehovah de leki wan papa di no tranga èn koni nomo, ma di e sori tu taki a abi retidu èn taki a lobi wi. Na so a moro makriki gi den pikin fu en fu abi wan bun matifasi nanga en.

¹⁰ Yehovah e leri wi tu san a abi na prakseri. A e sori wi taki wi de na ini a bigi famiri fu en. A e fruteri wi tu san a e fruwakti fu wi so taki freide kan de na ini a famiri fu en èn wi alamala kan wroko makandra na ini wánfasi. Bijbel e leri wi taki di Gado meki libisma, a no gi den a reti fu libi sondro en èn fu bosroiti gi densrefi san bun nanga san ogri fu di dati ben o abi takru bakapisi (Yer. 10:23). A sani disi prenspari srefisrefi gi wi. Soso te wi e si Gado leki wi Tiriman, sani o waka bun nanga wi èn wi o firi bun. Yehovah leri wi den sani disi fu di a lobi wi.

11. San wi lobi Papa Yehovah fruteri wi fu a ten di e kon?

¹¹ Wan lobi-ati papa e broko en ede nanga a fasi fa a libi fu den pikin fu en o de. A wani taki den abi wan koloku libi. Ma a sari fu taki dati furu sma no sabi san o pasa na ini a ten di e kon. Nofo tron den e gebroiki den heri libi fu feti na baka sani di no e tyari têgo wini kon (Ps. 90:10). Te wi leki Gado pikin, e prakseri a moi ten di a pramisi wi, dan wi e firi taki Yehovah lobi wi trutru, wi e firi koloku èn wi sabi fa a libi fu wi o waka.

12. Fa Yehovah pruberi fu yepi Kain nanga Baruk?

¹² „Fu san ede yu ati e bron so? Fu san ede yu e swa yu fesi? Yu no denki taki mi o prisiri nanga yu baka, efu yu bigin du bun? . . . Yu denki taki yu o man basi [sondu]?” (Gen. 4:6, 7) Yehovah gi Kain a rai disi fu yepi en èn a rai ben kon na a yoisti ten. Di a ben de krin taki sani no ben o waka bun gi Kain, Yehovah warskow en. Toku Kain no arki a warskow èn a firi den takru bakapisi fu dati (Gen. 4:11-13). Ma luku a tori fu Baruk, a sekretarsi  fu Yeremia. Wan pisi ten ben de taki Baruk ben kon weri èn a ben lasi-ati. Dati meki Yehovah gi en rai so taki a ben man si san na a problema fu en. Baruk no ben de leki Kain. A arki a rai fu Yehovah èn disi meki taki a tan na libi.—Yer. 45:2-5.

13. Fu san ede Yehovah e gi pasi taki den futuboi fu en e kisi tesi?

¹³ Paulus skrifi: „Yehovah e strafu a sma di a lobi. Fu taki en leti, a e wipi ala sma di a e teki leki en manpikin” (Hebr. 12:6). Ma strafu a no a wan-enkri sani di Yehovah e gebroiki fu gi wi leri. A kan gebroiki tra sani tu fu du dati. Eksempre de na ini Bijbel di e sori wi disi. Furu futuboi fu Gado di ben kisi hebi tesi leri wan sani fu a situwâsi pe den ben de na ini. Luku Yosef, Moses nanga David fu eksempre. Wi e leisi moro furu fu sani di pasa na ini a libi fu den man disi leki fu tra sma di kari na ini Bijbel. Te wi e leisi fa Yehovah yepi den na ini ala den tesi di den kisi èn fa a gebroiki den, dan dati e sori wi moro krin taki Yehovah e broko en ede nanga den futuboi fu en èn taki a lobi den.—Leisi Odo 3:11, 12.

14. Te wi du wan sondu, dan fa Yehovah e sori taki a lobi wi?

¹⁴ Wan tra fasi fa Yehovah e sori taki a lobi wi, na te a e gi wi piri-ai. Te wi du wan sondu èn Yehovah gi wi piri-ai, wi musu sori berow. Efu wi du dati, dan ’a o gi wi pardon nanga en heri ati’ (Yes. 55:7). San disi wani taki? David e sori na wan heri moi fasi fa Yehovah e gi sma pardon. A taki: „A e gi yu pardon fu ala yu sondu. A e fri yu fu ala yu pina. A e puru yu na ini grebi-olo, so taki yu kan libi baka. A e sori yu bun-ati èn a abi  sari-ati nanga yu. So fara leki son-opo de fu sondongo, na so fara fu wi a poti den sondu fu wi” (Ps. 103:3, 4, 12). Noiti wi musu weigri fu teki a rai fu Yehovah, srefi te disi wani taki dati a musu strafu wi. Wi no musu draidrai fu du san a taigi wi èn wi musu si disi leki wan fasi fa Yehovah e sori taki a lobi wi.—Ps. 30:5.

15. San e sori taki Yehovah en pipel warti trutru gi en?

¹⁵ Wan fu den moro prenspari sani gi wan papa di lobi en osofamiri na fu kibri den so taki bigi ogri no e miti den. Na dati wi hemel Papa Yehovah e du tu. A psalm skrifiman ben taki fu Yehovah: „A e kibri a libi fu den wan di e tai hori na en. A e frulusu den puru na a anu fu den ogriwan” (Ps. 97:10). Luku wan eksempre. Den ai fu yu na sani di warti trutru gi yu. Na so Yehovah e si a pipel fu en tu. Den warti gi en trutru!—Leisi Sakaria 2:8.

16, 17. Fruteri na sortu fasi Yehovah kibri en pipel, srefi na ini a ten fu wi.

¹⁶ Wán sani di Yehovah e du fu kibri en pipel na fu gebroiki den engel fu en (Ps. 91:11). Na ini wán neti, wán engel kiri wan legre fu 185.000 srudati. Na so Yehovah frulusu Yerusalem fu den Asiriasma (2 Kow. 19:35). A ben gebroiki engel tu fu frulusu den apostel Petrus nanga Paulus na strafu-oso. Na dati a du tu nanga tra sma (Tori 5:18-20; 12:6-11). Na ini a ten fu wi Yehovah e kibri a pipel fu en tu. No so langa pasa, wan bigi feti ben de na wan kondre na Afrika. A heri kondre ben bruya fu di furu dyugudyugu ben de, sma ben e fufuru sani, sma ben e dwengi trawan fu abi seks nanga den èn den ben e kiri sma. Aladi nowan fu den Kotoigi drape lasi libi, toku furu fu den lasi ala san den ben abi. Ma den alamala ben e si fa Yehovah lobi den èn den ben sabi taki a ben e sorgu gi den. Aladi den kisi furu tesi, toku den ben e firi koloku. Di wan brada fu na edekantoro go luku den Kotoigi drape, a aksi den fa a e go nanga den. Den piki en: „Tangi fu Yehovah, meki ala sani e go bun!”

¹⁷ Son leisi Yehovah gi pasi taki feanti kiri den futuboi fu en. Wan fu den ben de Stefanus. Ma nofo tron Gado e kibri en pipel fu di a e warskow den na a yoisti ten gi den triki fu Satan (Ef. 6:10-12). Wi kan leisi den warskow disi na ini Bijbel èn na ini den buku di wi e kisi fu Yehovah en organisâsi. Fu eksempre, wi e leri taki wi musu luku bun nanga Internet, nanga a lobi gi moni èn nanga hurudu. Wi musu luku bun tu nanga felem, buku noso game di e sori fa sma e feti èn e kiri makandra. A de krin taki Yehovah de wan lobi-ati Papa èn taki a wani kibri en pipel so taki sani e go bun nanga den.

18. San yu e denki fu a lobi di Yehovah abi gi yu?

¹⁸ Wi luku soso wan tu moi fasi fa Yehovah e sori taki a lobi wi. Disi e meki wi firi san Moses ben firi. Di a prakseri fa a dini Yehovah en heri libi langa, a taki: „Meki wi firi a bun-ati fu yu na mamanten, so taki wi kan bari fu prisiri èn breiti wi heri libi langa” (Ps. 90:14). Fu frustan taki Yehovah lobi wi èn fu firi a lobi disi, na wan fu den moro bigi grani nanga blesi di wi kisi na ini a ten disi. Wi e firi neleki na apostel Yohanes, di ben taki: „Luku fa a Tata lobi wi!”—1 Yoh. 3:1.