SMA di ben libi 200 yari pasa no ben man bribi ala sani di ben skrifi na ini koranti. Na ini a ten disi tu wi no man bribi ala sani di wi e leisi noso si tapu Internet. Wi kan kon sabi furu sani te wi e go na tapu Internet èn now a makriki fu du dati nanga yepi fu computer noso telefon. Furu fu den tori tapu Internet tru, den bun fu sabi èn a no ogri sani. Ma wan lo fu den na lei, den no bun fu sabi èn den kan tyari problema kon gi wi noso gi trawan. Dati meki wi musu luku bun san wi e leisi. Te wan sma no gwenti go tapu Internet, dan a kan denki taki wan tori tru fu di a leisi en tapu Internet noso fu di na wan mati e-mail a tori gi en. Den sma disi e bribi wan tori awinsi den e si taki a sani dati no kan tru. Ma Bijbel e warskow wi: „Wan sma sondro ondrofeni e bribi ala san sma e taki, ma a koniwan e luku bun pe a e poti en futu.”—Odo 14:15.

Wan sma di no e bribi ala sani di a e yere noso leisi wantewante, na wan koni sma. Wan koni sma e bribi wan sani soso te a de seiker taki a tru. So wan sma no e bribi wan lei tori di a leisi tapu Internet, awinsi fa a tori pôpi. San kan yepi yu fu de wan koni sma? Na a fosi presi yu musu aksi yusrefi: ’A sani disi na fu wan website di mi man frutrow? Noso na fu wan website pe ala sma kan skrifi fa a e denki fu wan tori? Noso a komoto fu wan sma di mi no sabi srefi? Wan website di yu kan frutrow ben taki kaba dati a tori no tru?’ * Wan tra sani di yu kan du na fu gebroiki yu „frustan” (Odo 7:7). Efu a gersi leki wan tori no tru, dan nofo tron a de so taki a no tru. Boiti dati, te yu leisi wan sani di kan pori wan sma nen, dan a bun fu aksi yusrefi suma e kisi wini efu a tori panya èn fu san ede wan sma ben o wani panya so wan boskopu.

Son sma e kisi e-mail di den e seni go doro gi trawan sondro fu luku efu a tori dati tru. Den no e denki tu sortu bakapisi a kan abi efu den seni  so wan e-mail gi trawan. A kan taki den e du disi fu di den wani de a fosi sma fu prati a tori èn den wani taki sma poti prakseri na den (2 Sam. 13:28-33). Ma wan koni sma o denki sortu takru bakapisi a kan abi efu a seni so wan e-mail. So wan e-mail kan pori wan sma nen noso a kan tyari problema kon gi wan organisâsi.

Kande a sma e seni a e-mail sondro fu luku efu a tru, fu di a no wani meki a ten nanga a muiti fu du dati. A e denki taki a sma di kisi a e-mail kan du dati ensrefi. Ma a sma srefi o abi fu meki ten fu du dati èn en ten prenspari tu (Ef. 5:15, 16). Sobun, na presi fu seni e-mail go doro gi trawan sondro fu sabi efu den tru, a moro bun fu denki: „Efu mi no de seiker taki a sani disi tru, dan mi no o seni en gi trawan!”

Yu musu aksi yusrefi: ’Mi lobi seni e-mail go doro gi trawan sondro fu denki? Mi ben musu aksi den mati fu mi pardon fu di mi seni wan e-mail gi den di no ben tru? Oiti wan sma aksi mi fu no seni e-mail gi en di sma seni kon gi mi?’ Hori na prakseri taki den sma gi suma yu e seni e-mail abi Internet tu, sobun densrefi kan go suku sani di den lobi. Den no wani kisi omeni e-mail di abi lafu tori, felem noso fowtow fu luku. A no de wan koni sani tu fu seni den sani di yu skrifi fu wan Bijbel lezing gi sma fu den leisi noso fu arki. * Hori na prakseri taki efu wan sma srefi e ondrosuku sani, efu ensrefi e suku wan Bijbeltekst noso e sreka sortu piki a o gi na den konmakandra, dan a o kisi moro wini fu disi na presi taki yu seni den sani disi gi en.

San yu musu du te yu e si noso leisi ogri-ati lei fu Yehovah organisâsi tapu Internet? Wi musu tapu wantewante fu leisi noso luku den sani dati! Wi no musu bribi den lei dati. A no ben o de wan koni sani fu seni den e-mail dati gi sma èn fu aksi den fa den e denki fu a tori. Efu wi ben o du dati wi ben o yepi prati den ogri-ati lei dati. Efu yu e broko yu ede nanga wan sani di yu si tapu Internet, dan aksi Yehovah fu gi yu koni èn taki nanga lepi brada fu a tori (Yak. 1:5, 6; Yud. 22, 23). A no musu fruwondru wi taki sma e fruteri lei fu wi. Sma ben fruteri furu lei fu Yesus tu èn dati meki a warskow den bakaman fu en taki den feanti ben o frufolgu den, ben o ’lei gi den èn taki ala sortu ogri fu den’ (Mat. 5:11; 11:19; Yoh. 10:19-21). Dati meki wi musu gebroiki wi „frustan” nanga ’a koni di wi abi fu si sani krin’ fu kon sabi  suma na den „sma di e taki soso lei” èn di „abi a gwenti fu bedrigi trawan”.—Odo 2:10-16.

Wi musu luku bun tu nanga nyunsu noso ondrofenitori fu wi brada nanga sisa di sma e seni kon gi wi. Srefi efu wan tori tru, dan dati no wani taki dati wi musu prati en. Son leisi a no bun srefi fu seni so wan tori gi trawan. Efu wi ben o du dati wi no e sori lobi tu (Mat. 7:12). Fu eksempre, te wan sma meki wan fowtu èn wi sabi dati, dan wi no e sori lobi efu wi e panya a tori disi èn wi no e gi trawan deki-ati tu (2 Tes. 3:11; 1 Tim. 5:13). A no ala tori di wi kon sabi wi musu prati nanga trawan. Wi musu lespeki a reti di trawan abi fu prati wan tori na a ten di den wani èn na a fasi di den wani. Fu taki en leti efu wi ben o panya a tori disi gi trawan fosi a sma srefi du dati, dan a kan abi takru bakapisi.

Na ini a ten disi a makriki fu panya wan tori esi-esi, awinsi a tori disi tru noso na wan lei, awinsi a tori bun fu sabi noso a no bun èn awinsi a kan tyari problema gi sma. Ibriwan sma di e seni wan e-mail noso sms gi wan trawan, awinsi a seni en gi wán sma nomo, musu hori na prakseri taki na ini wan tu miniti nomo a boskopu fu en kan doro na ala sma na grontapu. Dati meki wi no musu de gaw fu seni wan e-mail go doro gi ala sma di wi sabi sondro fu denki. Lobi e bribi ala sani. Toku wi no e bribi ala nyun èn span tori di wi e leisi. Wi musu de seiker taki den tru (1 Kor. 13:7). Noiti wi musu bribi den lei nanga den ogri-ati sani di sma e prati fu Yehovah organisâsi nanga wi brada nanga sisa di wi lobi. Prakseri taki den wan di e fruteri den lei disi èn e prati den e du a wani fu Satan Didibri „a tata fu ala lei” (Yoh. 8:44). Sobun meki wi de konisma èn meki wi denki bun san wi o du nanga den tori di wi e kon sabi tapu Internet. Bijbel e taki: „Den wan sondro ondrofeni o kon de leki donman, ma den koniwan o weri sabi leki wan moi tai-ede.”—Odo 14:18.