1, 2. San e meki taki libisma de trafasi leki den meti?

NA EDETONTON fu wan libisma na wan aparti sani. Fu eksempre, libisma man leri taki wan tongo. A tongo di wi e taki e meki taki wi man leisi, skrifi, taki nanga trawan èn frustan san wi e yere. Fu di wi man taki wan tongo meki wi man begi èn singi prèisesingi gi Yehovah tu. Ala den sani disi e meki taki wi de trafasi leki den meti. Sabiman no man frustan so bun ete fa na edetonton fu wi man du ala den kefalek sani disi.

² Di Yehovah meki wi a gi wi a spesrutu koni fu man taki wan tongo (Ps. 139:14; Openb. 4:11). A gi wi wan tra sani tu di e meki taki wi de trafasi leki den meti. Libisma meki „soleki fa Gado de”. Wi de fri fu teki wi eigi bosroiti. Dati meki wi kan bosroiti fu gebroiki a tongo di wi e taki fu dini Yehovah èn fu gi en grani.—Gen. 1:27.

3. Sortu moi kado Yehovah gi wi fu meki wi kon koni?

³ Yehovah gi wi a Bijbel fu sori wi fa wi musu dini en èn fa wi kan prèise en. Now a heri Bijbel noso pisi fu en de fu feni na ini sowan 2800 tongo. Te yu e denki dipi fu den sani di skrifi na ini Bijbel, dan yu e furu yu frustan nanga den prakseri fu Gado  (Ps. 40:5; 92:5; 139:17). Na a fasi dati yu kan denki fu sani di „kan meki yu kon koni, so taki yu kan kisi frulusu”.—Leisi 2 Timoteyus 3:14-17.

4. San a wani taki fu denki dipi fu sani èn sortu aksi o kisi piki na ini na artikel disi?

⁴ Te wi e denki dipi fu wan sani, dan wi e poti ala wi prakseri na a sani dati, awinsi a sani dati bun noso fowtu (Ps. 77:12; Odo 24:1, 2). Te wi e denki dipi fu Yehovah Gado nanga en Manpikin, Yesus Krestes, dan wi e kisi furu wini fu dati (Yoh. 17:3). Na ini na artikel disi wi o kisi piki tapu den aksi disi: Fa wi kan leisi na so wan fasi taki a e kon moro makriki gi wi fu denki dipi fu san wi leisi? Fu sortu sani wi kan denki dipi? San o yepi wi fu man abi a gwenti fu denki dipi èn fu lobi du disi?

5, 6. San kan yepi yu fu frustan moro bun san yu e leisi èn fu memre den sani dati tu?

⁵ Yu sabi taki yu kan du son sani sondro taki yu e poti prakseri na sani yu e du? Fu eksempre, sondro fu denki yu e hari bro, yu e waka noso yu e rèi baisigri. Te yu luku en bun, dan disi kan pasa tu te yu e leisi. Dati meki a prenspari fu poti prakseri na san yu e leisi, so taki yu kan frustan san yu e leisi. Te yu kaba leisi wan paragraaf noso fosi yu bigin nanga wan nyun edeprakseri na ini wan buku, dan a ben o bun fu stop èn denki fu den sani di yu leisi. Na a fasi dati yu kan de seiker taki yu frustan san yu leisi. A no de fu taki dati te sani de di e puru yu prakseri èn te yu e denki tra sani, dan yu no o frustan trutru san yu e leisi. San yu kan du fu no meki dati pasa?

⁶ Sabiman kon si taki te yu e leisi na so wan fasi taki yu kan yere yu sten, dan a moro makriki gi yu fu memre san yu leisi. A sma di meki wi edetonton sabi disi. Na fu dati ede Yosua ben kisi a komando fu leisi a Wetbuku fu Gado „nanga wan safri sten”. (Leisi Yosua 1:8.) Yu o si taki te yu e leisi Bijbel nanga wan safri sten, noso na so wan fasi taki yu kan yere yu sten, dan yu o man memre moro bun san yu ben leisi. Disi kan yepi yu tu fu no meki sani puru yu prakseri.

7. San na a moro bun ten fu denki dipi fu Gado Wortu? (Luku a prenki na a bigin fu na artikel.)

⁷ Leki fa wi si, dan wi kan leisi sondro fu denki. Ma efu wi wani denki dipi fu wan sani, dan wi musu poti prakseri na san wi e du. Dati meki a moro bun ten fu denki dipi fu sani na te wi no weri èn te wi de na wan presi pe furu babari no de èn pe sani no o puru wi prakseri so makriki. A Psalm skrifiman ben kon si taki wan bun ten fu denki dipi fu sani ben de te a ben didon na tapu en bedi te neti (Ps. 63:6). Srefi Yesus di no ben abi sondu ben sabi taki a bun fu go na wan tiri presi fu denki dipi fu sani èn fu begi.—Luk. 6:12.

8. (a) Fu sortu tra sani wi kan denki dipi tu, boiti fu den sani di wi e leisi na ini Gado Wortu? (b) Fa Yehovah e firi te a e si taki wi e fruteri tra sma fu en?

⁸ Boiti den sani di yu e leisi na ini Bijbel, yu kan denki dipi fu tra sani tu. Fu eksempre, te yu luku den sani di Yehovah meki, dan a bun fu teki ten fu denki dipi fu san yu si. A no de fu taki dati disi o meki taki yu wani prèise Yehovah gi den bun di a e du èn efu yu de nanga wan tra sma yu o wani fruteri en fa yu e warderi den sani di Gado meki (Ps. 104:24; Tori 14:17). Te wi e denki dipi fu den sortu sani disi, te wi e taki Gado tangi na ini begi èn te wi e fruteri tra sma fu en, dan Yehovah e si dati èn a e gi en prisiri.  Bijbel e taki: „Den wan di abi lespeki gi Yehovah ben e taki nanga makandra. Iya, ibriwan fu den ben e taki nanga wan trawan. Disiten Yehovah ben e poti prakseri na den èn a ben e arki den. Ne Yehovah gi a komando fu skrifi wan buku fu memre den wan di abi lespeki gi en èn di e hori en nen na prakseri.”—Mal. 3:16.

9. (a) Fu sortu sani Paulus ben taigi Timoteyus fu denki dipi? (b) Fa wi kan fiti a rai fu Paulus na ini a diniwroko fu wi?

⁹ Na apostel Paulus ben taigi Timoteyus fu „prakseri bun”, sobun, fu denki dipi fu den sani di a ben e taki, fu a fasi fa a ben e tyari ensrefi èn fu a fasi fa a ben e gi leri. (Leisi 1 Timoteyus 4:12-16.) Neleki Timoteyus, yu srefi kan denki dipi fu den sani disi. Fu eksempre, wi musu meki ten fu denki dipi fu sani te wi e sreka wisrefi gi wan Bijbelstudie. Te wi e sreka wisrefi gi ibriwan fu den sma di wi e studeri nanga den wi musu prakseri sortu aksi wi kan poti gi den fu kon sabi fa den e denki fu wan tori. Wi kan luku tu sortu agersitori wi kan gebroiki fu yepi den. Te wi e meki ten fu du den sani disi, dan wi eigi bribi kan kon moro tranga èn dan wi o man gi leri moro bun èn nanga moro faya. Wi kan du a srefi sani disi te wi e sreka wi ati fu go na ini a preikiwroko. (Leisi Esra 7:10.) Te wi e leisi wan kapitel fu a Bijbel buku Tori fu den apostel, dan dati o „memre” wi fu du wi diniwroko fayafaya. Te wi e denki dipi fu tekst di wi wani gebroiki na ini a preikiwroko èn fu den tori na ini den buku di wi wani prati gi sma, dan dati kan yepi wi fu tyari wi frantwortu na wan bun fasi (2 Tim. 1:6). Prakseri sortu sma e libi na ini a kontren pe yu e preiki èn san kan hari den prakseri. Te wi e sreka wisrefi na a fasi disi, dan dati kan yepi wi fu gebroiki Bijbel moro bun te wi e preiki gi trawan.—1 Kor. 2:4.

10. San na ete wan tu okasi di wi abi fu denki dipi fu sani?

 ¹⁰ Yu e skrifi den sani di yu e yere na ini den lezing di e hori na a Kownukondre zaal, na den kring konmakandra noso na den kongres? Te yu e meki ten fu luku den sani baka di yu ben skrifi, dan a e gi yu na okasi fu denki dipi fu den sani di yu leri fu Gado Wortu nanga en organisâsi. A bun tu fu denki dipi fu den sani di wi e leisi na ini den Waktitoren nanga Ontwaakt! di wi e kisi ibri mun èn na ini den nyun buku di wi e kisi na den kongres. Te yu e leisi wan ondrofenitori na ini a Yaribuku, dan a bun fu stop, fosi yu go doro nanga wan trawan. Na a fasi disi yu o abi ten fu denki fu san yu leisi so taki na ondrofenitori kan naki yu ati. Kande yu wani hari strepi na den prenspari pisi di yu leisi, noso skrifi wan sani na seisei. Kande yu wani gebroiki den sani dati te yu e go baka na wan sma, te yu e go luku wan brada noso sisa, noso na ini wan lezing di yu o hori. Ma san prenspari fu hori na prakseri na taki a bun fu stop wanwan leisi, so taki yu kan denki dipi fu den sani di yu leisi na ini den buku fu wi. Disi o meki taki yu no frigiti den sani di yu leisi èn a o memre yu fu taki Yehovah tangi gi den bun sani di yu e leri.

11. San musu de a moro prenspari sani di yu e denki dipi fu en èn fu san ede? (Luku a futuwortu sosrefi.)

¹¹ A no de fu taki dati den moro prenspari sani di wi musu denki dipi fu den na den tori di skrifi na ini Gado Wortu Bijbel. Kon meki wi taki dati yu de na ini wan situwâsi pe sma puru yu Bijbel na yu anu. * Noiti wan sma o man tapu yu fu denki dipi fu den sani di yu leri kaba èn di yu kan memre ete. Sani soleki den tekst di yu lobi nanga den wortu fu den Kownukondre singi fu wi (Tori 16:25). A santa yeye fu Gado kan yepi yu fu memre den bun sani di yu leri.—Yoh. 14:26.

12. Sortu fasi fu leisi Bijbel kan tyari wini kon gi wi?

¹² Yu kan seti sani na so wan fasi taki yu poti spesrutu dei na ini a wiki fu leisi den pisi fu Bijbel di wi musu leisi gi a Theokrasia Diniwroko-skoro èn fu denki dipi fu den pisi dati. Tra dei baka yu kan leisi pisi fu den Evangelietori fu Mateyus, Markus, Lukas, nanga Yohanes so taki yu kan denki dipi fu den sani di Yesus ben taki èn du (Rom. 10:17; Hebr. 12:2; 1 Petr. 2:21). Wi kisi wan buku srefi di e sori fa den sani di pasa na ini Yesus libi pasa baka makandra. A buku dati kan yepi yu fu kisi moro wini fu den Evangelietori.—Yoh. 14:6.

13, 14. Fu san ede a prenspari fu tan denki dipi fu Yehovah nanga Yesus, èn sortu deki-ati disi o gi wi?

¹³ Te wi e denki dipi fu Yehovah nanga Yesus, dan dati kan yepi wi fu tron lepi Kresten di abi tranga bribi (Hebr. 5:14; 6:1). Wan sma di no e teki nofo ten fu denki fu Yehovah nanga Yesus no o man abi tranga bribi. Safrisafri so wan sma kan gowe libi a tru anbegi (Hebr. 2:1; 3:12). Yesus ben warskow wi taki efu wi no e gi yesi na Gado Wortu nanga „wan krin èn bun ati”, dan wi no o man ’meki a wortu teki rutu na ini wi ati’. Na presi fu dati ’den broko-ede, den gudu, nanga den prisiri fu a libi kan meki wi lasi pasi’ so taki wi „no man gro”.—Luk. 8:14, 15.

¹⁴ Sobun, meki wi tan denki dipi fu Gado  Wortu. Disi o gi wi deki-ati fu du muiti fu kon abi den srefi fasi di Yehovah abi èn fu tyari wisrefi neleki en soleki fa Bijbel e sori (2 Kor. 3:18). A de wan bigi grani fu kon sabi moro fu Gado èn fu kan tyari wisrefi neleki en. Fu têgo wi kan tan leri fu wi lobi hemel Tata.—Preik. 3:11.

15, 16. (a) Fa ibriwan fu wi kan kisi wini fu a muiti di wi e du fu denki dipi fu Bijbel tori? (b) Fu san ede a kan muilek son leisi fu feni ten fu denki dipi fu den sani dati, ma fu san ede wi musu tan du muiti?

¹⁵ Te wi e denki dipi fu Yehovah nanga Yesus, dan wi no o lasi a faya di wi abi gi a tru anbegi. Wi o de wan deki-ati gi wi brada nanga sisa èn gi den sma di wi e miti na ini a preikiwroko. Te wi e denki dipi fu a frulusu-ofrandi fu Yesus di de a moro bigi kado di Gado gi wi, dan dati o yepi wi fu tan warderi a grani di wi abi fu de bun mati fu wi Santa Papa Yehovah (Rom. 3:24; Yak. 4:8). Mark na wan brada na Zuid-Afrika di koti strafu dri yari langa fu a bribi fu en. A brada disi taki: „Te wi e denki dipi fu sani, a de leki wi e go na wan presi di wi no sabi ete. O moro wi e denki fu a tori, o moro wi e kon si nyun sani di abi fu du nanga wi Gado Yehovah. Te mi e firi brokosaka son leisi noso te mi e broko mi ede nanga a tamara, dan mi e teki mi Bijbel èn mi e denki dipi fu wan tekst di mi leisi. Mi feni taki a sani dati e meki mi firi moro bun.”

¹⁶ A tru taki someni sani de fu du na grontapu na ini a ten disi taki son leisi a muilek fu feni ten fu denki dipi fu Bijbel tori. Patrick, wan tra brada fu Afrika di e dini Gado fayafaya, e taki dati ibri dei a e kon sabi furu sani. Sonwan fu den na sani di a wani sabi, trawan baka na sani di a no wani sabi. Ala yuru a musu luku san a wani memre en san a wani frigiti. Patrick e taki: „Te mi e ondrosuku den prakseri fu mi, dan son leisi mi e si taki mi e prakseri sani di e ’trobi mi’. Te dati pasa, dan mi musu taki nanga Yehovah fu den sani dati, so taki mi kan denki dipi fu Bijbel nanga wan krin frustan. Son leisi disi kan meki taki a e teki pikinso ten fosi mi kan bigin denki dipi fu Bijbel tori. Ma toku a e meki mi firi taki mi e tron wan moro bun mati fu Yehovah. A sani disi e yepi mi fu kon frustan den tru leri fu Gado moro bun” (Ps. 94:19). Iya, ibriwan fu wi di „e ondrosuku Gado Buku finifini ibri dei” èn di e denki dipi fu den sani di wi e leri o kisi wini fu dati.—Tori 17:11.

17. San yu e du fu kan feni ten fu denki dipi fu sani?

¹⁷ Son sma e wiki fruku mamanten fu leisi, fu denki dipi, èn fu begi. Tra sma e du disi na ini a pauze na wrokope. Ma kande yu e du en latilati bakadina noso fosi yu go sribi. Son sma lobi leisi Bijbel tu leisi, fruku mamanten èn fosi den go sribi. Sobun, yu kan taki dati den e ’leisi en dei nanga neti’ noso ala dei (Yos. 1:8). San prenspari na taki wi musu gebroiki wi ten na wan koni fasi so taki ibri dei wi kan denki dipi fu Gado Wortu.—Ef. 5:15, 16.

18. San Bijbel e taki fu den sma di e denki dipi fu Gado Wortu ibri dei èn e pruberi fu du san den leri?

¹⁸ Gado Wortu e pramisi taki wi o kisi blesi te wi e denki dipi fu den sani di skrifi na ini èn te wi e du muiti fu du san wi e leri. (Leisi Psalm 1:1-3.) Yesus ben taki: „Koloku fu den sma di e yere a wortu fu Gado èn di e du san a wortu e taki!” (Luk. 11:28) San moro prenspari na taki te wi e gebroiki wi edetonton fu denki dipi fu Bijbel, wi e gi grani na a Bigi Mekiman fu wi. Dan a o blesi wi nanga wan koloku libi now èn nanga têgo libi na ini a nyun grontapu fu en pe retidu o de.—Yak. 1:25; Openb. 1:3.