1, 2. Fu san ede Yesus ben lobi Marta? Ma fa wi sabi taki Marta ben e meki fowtu tu?

TE YU e prakseri Marta, a sisa fu Lasarus, dan fa yu denki taki na uma disi ben de? Bijbel e sori taki Marta ben de wan bun mati fu Yesus èn a e taki dati Yesus ben lobi en. A no de fu taki dati Marta no ben de a wan-enkri uma di Yesus ben abi leki mati èn di a ben lobi èn lespeki. Fu eksempre, Maria, a sisa fu Marta ben de wan bun mati fu Yesus tu. Boiti dati, Yesus ben lobi en mama Maria tu (Yoh. 11:5; 19:25-27). Ma fu san ede Yesus ben lobi Marta?

² Yesus ben lobi en fu di Marta ben lobi kari sma kon na en oso èn a ben e wroko tranga. Ma a ben lobi en tu fu di a ben abi tranga bribi. Marta ben e bribi den sani di Yesus ben e leri sma. A ben e bribi trutru taki Yesus ben de a Mesias di ben o kon (Yoh. 11:21-27). Ma neleki fa wi na sondusma di e meki fowtu, na so Marta ben e meki fowtu tu. Wan leisi di Yesus ben kon na en oso, Marta ben atibron nanga en sisa Maria èn a taigi Yesus  fu piri-ai gi en. Marta taki: „Masra, a no e trobi yu taki mi sisa e meki mi wawan du ala sani? Taigi en dan, meki a kon yepi mi.” (Leisi Lukas 10:38-42.) San wi kan leri fu a tori disi?

3, 4. Fu san ede wi kan taki dati Maria teki „a bun pisi”? San Marta ben leri? (Luku a prenki na a bigin fu na artikel.)

³ Yesus ben breiti taki Marta nanga Maria ben kari en kon na den oso, èn dati meki a ben wani leri den den tru tori fu Gado. Maria teki na okasi dati fu kisi leri fu a Moro Bigi Leriman. Dati meki a go sidon „na Masra futusei èn a . . . arki san Yesus ben e taki”. Marta ben kan du dati tu. A no de fu taki dati Yesus ben o prèise Marta efu a ben tapu nanga a wroko fu en fu kon arki san a ben e taki.

⁴ Ma Marta go bori ala sortu nyanyan èn a ben e seti ala sortu sani fu meki Yesus abi wan bun ten na den oso. Ma ala a wroko dati ben e meki taki a e broko en ede tumusi nanga san a musu du èn taki en ati ben e bron nanga Maria. Yesus e si taki Marta wani du tumusi furu sani. Dati meki a taki na wan switi fasi: „Marta, Marta, yu e broko yu ede nanga furu sani èn yu abi tumusi furu fu du.” Dan a taki dati a ben o moro bun efu a ben meki wán sani nomo fu nyan. Ne Yesus prèise Maria taki a kon sidon arki en. A taki: „Maria teki a bun pisi, èn mi no o puru disi na en anu.” Kande Maria ben o frigiti san a ben nyan na a spesrutu okasi dati, ma a no ben o frigiti san Yesus ben leri en èn taki a ben prèise en di a ben arki nanga ala en prakseri. Moro leki 60 yari baka dati na apostel Yohanes skrifi: „Yesus ben lobi Marta, [nanga] en sisa” (Yoh. 11:5). Den wortu disi di skrifi na ini Bijbel e sori taki Marta teki a rai fu Yesus èn taki en heri libi langa a dini Yehovah nanga en heri ati.

5. Fu san ede a moro muilek now fu tan poti prakseri na san moro prenspari? Sortu aksi wi o go luku?

⁵ Wi sabi taki now moro sani de di kan puru wi prakseri na a diniwroko fu Yehovah leki na ini Bijbel ten. A Waktitoren fu 15 september 1958 ben warskow brada nanga sisa fu no meki den nyun sani di sma e meki puru den prakseri na a diniwroko fu Yehovah. Srefi na a ten dati a ben gersi leki ala dei sma ben e kon nanga nyun sani. Sani soleki moi tijdschrift, radio, felem, nanga telefisi ben kon pôpi. A Waktitoren ben taki dati o moro a kaba fu a grontapu disi e kon krosibei „o moro den sani di kan puru wi prakseri o kon moro furu”. Na ini a ten disi, moro sani de di kan puru wi prakseri moro leki iniwan ten na fesi. San wi kan du fu de leki Maria èn fu tan poti prakseri na a anbegi fu Yehovah?

6. Fa a pipel fu Yehovah gebroiki den nyun sani di libisma meki?

⁶ Ala ten Yehovah pipel gebroiki den nyun sani di libisma e meki fu preiki a bun nyunsu. Fu eksempre, a „Fowtow-Drama fu den sani di Gado meki”, ben abi syatu pisi felem, moi fowtow nanga moi poku. A ben de na ini kloru èn yu ben kan yere sma sten. Na a ten fu a Fosi Grontapufeti, milyunmilyun sma na heri grontapu kisi trowstu nanga yepi fu a „Fowtow-Drama”. A felem disi ben e sori sma fa a libi o de na a ten fu a Dusun Yari Tiri fu Yesus Krestes di o tyari freide kon. Bakaten den panya a Kownukondre boskopu na radio èn milyunmilyun sma na ala sei fu grontapu yere en. Na ini a ten disi wi e gebroiki computer nanga  Internet fu prati a bun nyunsu. Na a fasi disi wi kan doro sma na den moro fara èilanti èn na ala sei fu grontapu.

7. (a) Fu san ede a no bun fu gebroiki den sani fu grontapu tumusi furu? (b) San musu de a moro prenspari sani gi wi? (Luku a futuwortu.)

⁷ Bijbel e warskow wi fu no gebroiki den sani fu grontapu tumusi furu. (Leisi 1 Korentesma 7:29-31.) Wan Kresten kan poti prakseri na sani di no fowtu, ma di e teki furu fu en ten. A kan taki a e gebroiki furu fu en ten fu du sani di a lobi, fu leisi buku, fu luku telefisi, fu koiri, fu bai moi sani èn fu luku san na a moro nyun sani di sma meki. Te wan sma e taki furu nanga trawan tapu Internet, e seni sms noso e-mail, noso e luku ala yuru baka sortu sport nyunsu noso tra nyunsu de, dan a kan lasi furu ten tu. Te fu kaba a kan taki a no man tan sondro den sani disi (Preik. 3:1, 6). * Efu wi no e luku bun omeni ten wi e gebroiki fu du sani di no de so prenspari, dan dati kan puru wi prakseri na a anbegi fu Yehovah, di musu de a moro prenspari sani na ini wi libi.—Leisi Efeisesma 5:15-17.

8. Fu san ede a de so prenspari fu gi yesi na a rai fu no lobi den sani fu grontapu?

⁸ Satan e du ala san a man fu hari wi prakseri nanga den sani fu grontapu èn fu puru wi prakseri na a anbegi fu Yehovah. Na ini a ten fu den apostel a ben e du dati kaba èn now a e du en moro srefi (2 Tim. 4:10). Dati meki wi musu gi yesi na a rai disi: „No lobi . . . den sani fu grontapu.” Te wi e tan du muiti fu fiti den sortu rai disi na ini wi libi, dan den sani fu grontapu no o hari wi prakseri èn wi o „lobi a Tata” moro nanga moro. Disi o meki taki a o kon moro makriki gi wi fu du a wani fu Gado èn fu tan en mati fu têgo.—1 Yoh. 2:15-17.

9. Tapu sortu sani Yesus leri den disipel fu en fu poti prakseri èn sortu eksempre a gi den?

⁹ Yesus ben leri Marta na wan switi fasi taki a no musu meki ala sortu sani puru en prakseri na a anbegi fu Gado. Na dati a leri den disipel fu en tu. A gi den deki-ati fu tan poti prakseri na a anbegi fu Yehovah èn na a Kownukondre fu en. (Leisi Mateyus 6:22, 33.) Yesus srefi ben gi wan bun eksempre. A no ben abi furu sani èn a no ben  abi en eigi oso noso gron.—Luk. 9:58; 19:33-35.

10. Sortu eksempre Yesus gi na a bigin fu a diniwroko fu en?

¹⁰ Di Yesus ben e du en diniwroko na grontapu furu sani pasa di ben kan puru en prakseri na a wroko fu Gado. Toku a no gi pasi taki dati pasa. Na a bigin fu Yesus en diniwroko a ben de na a foto Kaperna-um. Drape a ben gi sma leri èn a du wondru. Di den sma si dati den begi en fu tan na ini a foto fu den. Ma san Yesus du? A taigi den: „Mi musu go fruteri a bun nyunsu fu Gado Kownukondre na tra foto tu, bika na fu disi Gado ben seni mi kon” (Luk. 4:42-44). Yesus waka heri Palestina fu preiki gi sma èn fu gi den leri. Aladi a no ben de wan sondu libisma, toku a ben e kon weri èn a ben musu rostu te a ben wroko tranga na ini a diniwroko fu Gado.—Luk. 8:23; Yoh. 4:6.

11. San Yesus ben taigi wan man di ben abi wan famiri trobi èn sortu warskow Yesus gi?

¹¹ Wan tra leisi di Yesus ben e leri den bakaman fu en san den musu du te den kisi gens, wan man koti en mofo, dan a taki: „Leriman, taigi mi brada meki a prati a gudu nanga mi di wi papa libi gi wi.” Ma Yesus no ben wani bumui na ini a tori fu den. A piki a man: „Suma poti mi leki krutuman fu unu, noso leki a sma di musu prati sani na un mindri?” Baka dati Yesus warskow den sma drape fu no meki sani soleki gudu puru den prakseri na a diniwroko fu Gado.—Luk. 12:13-15.

12, 13. (a) San Yesus du di ben hari a prakseri fu wan tu Grikisma di ben kon na Yerusalem? (b) San Yesus du di Filipus kon aksi en fu miti nanga den sma dati?

¹² A lasti wiki di Yesus ben de na grontapu leki libisma, ben hebi gi en (Mat. 26:38; Yoh. 12:27). A ben abi furu wroko fu du. A ben sabi taki a ben o pina furu èn taki a ben o dede na wan ogri-ati fasi. Prakseri san pasa tapu sonde 9 Nisan fu a yari 33. Soleki fa Bijbel ben taki na fesi Yesus rèi kon na ini Yerusalem na tapu wan buriki èn sma ben e gi en grani. Den ben e taki dati en na „a sma di e kon leki Kownu na ini Yehovah nen” (Luk. 19:38). A tra dei Yesus go na ini a tempel èn a yagi den gridi bisnisman di ben e fufuru den Dyu di ben e kon bai sani na den na ini a tempel.—Luk. 19:45, 46.

¹³ Wan tu Grikisma di ben kon na a Paskafesa na Yerusalem ben fruwondru fu si san Yesus du. Dati meki den aksi Filipus efu den ben kan miti Yesus. Ma Yesus no ben wani taki sani puru en prakseri na den moro prenspari sani di a ben musu du ete. A no ben wani pruberi tu fu kon pôpi, soso fu no meki den feanti fu Gado kiri en. Sobun baka di a fruteri den bakaman fu en taki heri esi a ben o dede, a taigi Andreas nanga Filipus: „A sma di lobi en libi, o lasi en, ma a sma di no lobi en libi na ini a grontapu disi, o kibri en fu kan kisi têgo libi.” Na presi fu du san den Grikisma ben aksi en, a sori taki wan sma musu de klariklari fu gi en libi leki wan ofrandi efu a de fanowdu, neleki fa en ben o du dati. A pramisi den: „Efu wan sma wani dini mi, dan a Tata o gi en grani.” A no de fu taki dati Filipus go fruteri den Grikisma san Yesus ben taki.—Yoh. 12:20-26.

14. Aladi a preikiwroko ben de a moro prenspari sani na ini Yesus libi, sortu tra sani a ben du tu?

¹⁴ Yesus ben weigri fu meki sani puru en prakseri fu a preikiwroko, ma dati no wani taki dati a no ben e du tra sani. Di sma gi en wan kari fu kon na wan trow-oso, dan a go èn a du wan sani srefi fu meki a fesa waka bun. A meki watra kenki kon tron win (Yoh. 2:2, 6-10). Te mati nanga tra sma di ben wani yere moro fu a bun nyunsu ben  kari en fu kon nyan na den oso, dan a ben e go tu (Luk. 5:29; Yoh. 12:2). San moro prenspari na taki ala ten Yesus ben meki ten fu rostu. A ben sorgu taki a ben abi ten fu de en wawan fu man denki èn fu man begi.—Mat. 14:23; Mark. 1:35; 6:31, 32.

15. Sortu rai na apostel Paulus gi Kresten, èn fa a ben de wan bun eksempre?

¹⁵ Na apostel Paulus ben gi a rai disi: „Meki wi puru ala hebi na wi tapu.” Paulus ben agersi a libi fu wan Kresten nanga wan streilon di wi musu lon te na a kaba. Efu wi wani lon te na a kaba, dan wi musu puru ala hebi na wi tapu. (Leisi Hebrewsma 12:1.) Paulus ben de wan bun eksempre na ini a tori disi. A ben kan tron wan gudu Dyu kerki fesiman di ben pôpi. Ma a no du dati. Na presi fu dati a poti prakseri „na den moro prenspari sani”. A ben wroko tranga na ini a preikiwroko èn a ben go na furu presi, soleki Masedonia, Pikin Asia, Siria nanga Yudea. Paulus ben skrifi fu a howpu di a abi fu libi na hemel: „Mi frigiti den sani di de na mi baka èn mi e meki tranga muiti fu lon go miti den sani di de na mi fesi. Dati meki mi e lon nanga a marki fu kisi a pai fu Gado” (Fil. 1:10; 3:8, 13, 14). Fu di Paulus no ben trow, meki a ben man ’dini Masra doronomo sondro taki sani puru en prakseri’.—1 Kor. 7:32-35.

16, 17. Fa wi kan teki na eksempre fu Paulus, awinsi wi trow noso wi no trow? Fruteri wan ondrofenitori.

¹⁶ Neleki Paulus son anbegiman fu Yehovah e bosroiti fu no trow, so taki den abi moro ten fu du a diniwroko fu Yehovah (Mat. 19:11, 12). Nofo tron sma di trow abi moro frantwortu fu di den musu sorgu gi den osofamiri. Ma awinsi wi trow noso wi no trow, ibriwan fu wi kan ’puru ala hebi na en tapu’ fu man dini Gado sondro taki sani puru wi prakseri. Kande wi o abi fu tyari wan tu kenki kon so taki wi no e lasi wi ten na sani di no de so prenspari. Disi o meki taki wi kan du moro na ini a diniwroko fu Yehovah.

¹⁷ Meki wi go luku na eksempre fu Mark nanga Claire, wan trowpaar fu a kondre Wales. Den ala tu bigin pionier baka di den klari nanga skoro èn den tan pionier baka di den trow. Mark taki: „Wi ben man tyari moro kenki kon na ini wi libi. Wi seri wi oso di ben abi dri kamra èn wi tapu nanga a grontapuwroko di wi ben du wan tu dei na ini a wiki, so taki wi ben kan go du bow-wroko na tra kondre gi Yehovah organisâsi.” Na ini den 20 yari di pasa, den go yepi bow Kownukondre zaal na difrenti presi na ini Afrika. Wan leisi den ben abi 15 Amerkan dala nomo, ma toku Yehovah sorgu gi den. Claire taki: „Wi e firi koloku fu di wi man dini Yehovah ala dei. Wi meki so furu mati èn wi no e mankeri noti. A prisiri di wi abi fu di wi e du a furuten diniwroko, furu moro den sani di wi ben musu libi na baka.” Furu brada nanga sisa di e du a furuten diniwroko e firi a srefi fasi. *

18. San wi kan aksi wisrefi?

¹⁸ Fa a de nanga yu? San yu kan du efu yu e si taki yu no e poti a Kownukondre na a fosi presi moro fu di tra sani e puru yu prakseri? Kande yu musu leisi èn studeri Bijbel moro bun. Fa yu kan du dati? A tra artikel o taki fu a tori disi.