1. O prenspari a de fu abi bribi? (Luku a prenki na a bigin fu na artikel.)

OITI yu aksi yusrefi efu yu na wan fu den sma di Yehovah o wani hori na libi na a ten fu a bigi banawtu? A no de fu taki dati difrenti sani de fanowdu fu kan pasa a bigi banawtu libilibi. Ma wán sani di prenspari srefisrefi na san na apostel Paulus taki di a skrifi: „Sondro bribi wan sma no kan prisiri Gado” (Hebr. 11:6). Kande yu e si a sani disi leki wan gewoon sani, ma te yu luku en bun, dan „a no ala sma abi bribi” (2 Tes. 3:2). Den tu tekst di kari dyaso e sori wi taki a prenspari fu kon abi tranga bribi.

2, 3. (a) Fa den wortu fu Petrus e leri wi taki bribi prenspari? (b) Sortu aksi wi o go luku now?

² Na apostel Petrus ben sori o prenspari bribi de di „kisi tesi”. So wan bribi kan ’meki sma prèise wi’ èn a kan ’meki wi kisi glori nanga grani tu te Yesus Krestes sori ensrefi’ (Leisi 1 Petrus 1:7.) Dei fu dei a bigi banawtu e kon moro krosibei. Sobun, a no de fu taki dati wi wani de seiker taki a bribi di wi abi o meki taki wi kan de na mindri den wan di o kisi blesi te wi Kownu Yesus o kon na Armagedon. Wi wani de „sma di abi bribi, bika a bakapisi fu dati na taki wi o tan na libi” (Hebr. 10:39). Nanga a sani disi na prakseri wi wani de leki a man di ben begi Yesus: „Yepi mi efu mi e mankeri bribi!” (Mark. 9:24) Noso kande wi wani de leki den apostel fu Yesus di ben taki: „Gi wi moro bribi.”—Luk. 17:5.

³ Na ini na artikel disi wi o luku den aksi disi: San wi kan du  fu kon abi bribi? Fa wi kan sori taki wi abi bribi? Fu san ede wi kan de seiker taki Gado o arki wi begi te wi aksi en fu gi wi moro bribi?

4. Sortu eksempre kan gi wi deki-ati fu tranga a bribi fu wi?

⁴ „Ala sani di sma skrifi fositen, ben skrifi fu leri wi wan sani” (Rom. 15:4). Dati meki wi kan leri furu fu den sma na ini Bijbel di ben abi bribi. Te wi e leisi fu sma soleki Abraham, Sara, Isak, Yakob, Moses, Rakab, Gideon, Barak, nanga furu trawan, dan den tori fu den kan gi wi deki-ati fu go ondrosuku wi eigi bribi (Hebr. 11:32-35). Boiti dati, te wi e leisi den ondrofenitori fu brada nanga sisa na ini a ten disi di sori taki den bribi tranga, dan dati kan yepi wi tu fu du san wi man fu tranga a bribi fu wi. *

5. Fa Elia sori taki a ben abi tranga bribi na ini Yehovah, èn san wi kan aksi wisrefi?

⁵ Wan moi eksempre di skrifi na ini Bijbel na a di fu a profeiti Elia. Prakseri fa den sani di wi o luku now e sori taki Elia ben e frutrow tapu Yehovah nanga en heri ati. Di Elia taigi Kownu Akab taki Yehovah ben o tyari wan dreiten kon, dan nanga deki-ati a taki: „A de seiker taki Yehovah, a Gado fu Israel, a wan di mi e dini, de na libi. Na so a de seiker tu taki na ini den yari di e kon, nowan dow noso alen o fadon” (1 Kow. 17:1). Elia ben e bribi taki Yehovah ben o gi en san en nanga trawan ben abi fanowdu fu pasa a dreiten dati (1 Kow. 17:4, 5, 13, 14). Di a pikin fu wan uma di masra ben dede ben kon lasi libi, Elia ben de seiker taki Yehovah ben man gi a pikin libi baka (1 Kow. 17:21). A ben e bribi taki Yehovah ben man seni faya komoto na hemel fu bron na ofrandi di a ben tyari na tapu Karmel-bergi (1 Kow. 18:24, 37). Srefi fosi alen ben fadon Elia taigi Akab: „Kren go na tapu a bergi, dan yu nyan èn dringi wan sani, bika mi e yere wan hebi alen e kon” (1 Kow. 18:41). Den tori disi no e meki taki wi wani go ondrosuku wisrefi fu si efu wi bribi tranga neleki di fu Elia?

6. San wan sma abi fanowdu fu kan meki en bribi kon moro tranga?

⁶ Wisrefi no man meki wi bribi kon moro tranga. Bribi na wan fu den fasi di a santa yeye fu Gado e meki wan sma kon abi (Gal. 5:22). A de wan koni sani efu wi tan begi Yehovah fu gi wi a santa yeye fu en soleki fa Yesus leri wi. Yesus ben taki dati wi kan de seiker taki a Tata o „gi santa yeye na den sma di e aksi en”.—Luk. 11:13.

7. Gi wan eksempre di e sori san wi kan du fu tan abi wan tranga bribi.

⁷ Efu wi abi bribi kaba, dan wi musu tan du muiti fu no lasi en. Yu kan agersi a bribi fu wi nanga wan udufaya. Te yu leti a faya, a kan kon bigi srefisrefi. Ma efu yu no poti udu fu meki a faya tan bron, dan te fu kaba a o dede gowe teleki soso krofaya tan abra. Efu yu libi den krofaya dati tu, dan te fu kaba den o tron asisi. Sobun, fu meki a faya tan bron, yu o abi fu tan poti udu gi en. Na so a de tu nanga a bribi fu wi. Te wi e tan leisi èn studeri Bijbel, dan dati de leki udu di e sorgu taki wi bribi no dede gowe. Efu wi abi a gwenti fu studeri Bijbel, dan safrisafri wi o kon abi moro lobi gi a Bijbel èn gi Yehovah. Disi o meki wi bribi kon moro tranga.

8. San yu kan du fu meki yu bribi kon moro tranga èn fu no lasi en?

⁸ San na ete wan sani di yu kan du fu meki  yu bribi kon moro tranga èn fu no lasi en? No denki taki den sani di yu ben leri fosi yu dopu nofo fu abi tranga bribi (Hebr. 6:1, 2). Na presi fu dati yu musu poti prakseri na Bijbel profeititori di kon tru, fu di den kan yepi yu fu no lasi yu bribi. Ma yu kan gebroiki Gado Wortu tu fu luku efu a bribi fu yu tranga trutru.—Leisi Yakobus 1:25; 2:24, 26.

9, 10. Fa den sani disi e yepi wi fu kon abi moro tranga bribi: (a) demakandra nanga bun mati? (b) gemeente konmakandra? (c) a preikiwroko?

⁹ Na apostel Paulus ben taigi den Kresten brada nanga sisa fu en taki ibriwan fu den ben kan „kisi deki-ati fu a bribi fu a trawan” (Rom. 1:12). Te wi e moksi nanga wi Kresten brada nanga sisa, spesrutu nanga den wan di no lasi a bribi fu den di den „kisi tesi”, dan wi kan gi makandra deki-ati fu abi tranga bribi (Yak. 1:3). Hori na prakseri taki takru mati kan pori a bribi fu wi, ma bun mati kan meki a bribi fu wi kon moro tranga (1 Kor. 15:33). Na fu dati ede wi e kisi a rai fu „no misi konmakandra”, ma fu tan „gi makandra deki-ati”. (Leisi Hebrewsma 10:24, 25.) Wan tra sani fu san ede wi wani du disi na taki den sani di wi e leri na den konmakandra kan yepi wi fu tranga a bribi fu wi. Na dati Paulus ben abi na prakseri di a skrifi: „Bribi e kon baka te wan sma yere a boskopu” (Rom. 10:17). Yu abi a gwenti fu abi demakandra nanga yu Kresten brada nanga sisa na den konmakandra?

¹⁰ Te wi de na ini a preikiwroko, dan boiti taki wi e yepi trawan fu kon abi bribi, wi eigi bribi e kon moro tranga tu. Neleki den fosi Kresten wi e leri fu poti bribi na ini Yehovah èn fu taki fu en sondro frede na ini ala situwâsi.—Tori 4:17-20; 13:46.

11. Fa a du kon taki Yosua nanga Kaleb ben abi tranga bribi, èn fa wi kan de neleki den?

¹¹ O moro wi e si fa Yehovah e yepi wi, èn fa a e piki den begi fu wi, o moro wi bribi e kon tranga. Na dati ben pasa nanga Yosua nanga Kaleb. Den poti bribi na ini Yehovah di den go luku fa a Pramisi Kondre tan. Ma di den kon si fa Yehovah yepi den ibri tron baka di bigi kenki kon na ini den libi, a bribi fu den kon moro tranga. Dati meki a no e fruwondru wi taki Yosua ben piri-ai gi den Israelsma di a taki: „Yehovah un Gado du ala den bun sani di a ben pramisi unu.” Bakaten a taki tu: „Sobun, frede Yehovah. Dini en nanga wan krin ati èn na wan reti fasi. . . . Mi nanga mi osofamiri, wi o dini Yehovah” (Yos. 23:14; 24:14, 15). O moro wi e kon si taki Yehovah bun, o moro wi bribi o kon tranga neleki di fu Yosua nanga Kaleb.—Ps. 34:8.

12. Fa wi kan sori taki wi abi tranga bribi?

¹² Fa wi kan sori taki wi abi tranga bribi? A disipel Yakobus e piki na aksi dati na a fasi disi. A e taki: „Mi o du sani fu sori yu a bribi fu mi” (Yak. 2:18). A fasi fa wi o tyari wisrefi o sori taki wi abi bribi trutru. Meki wi go luku wan tu eksempre.

13. San na wan tu fasi fa a preikiwroko e yepi wi fu sori taki wi abi bribi?

¹³ Wan tra moi fasi fa wi kan sori taki wi abi bribi na te wi e du a preikiwroko. Fu san ede? Fu kan du a wroko disi wi musu bribi taki Gado o sorgu taki a kaba fu na ogri grontapu disi o kon na a yoisti ten. Wi musu bribi taki „a no o kon lati” (Hab. 2:3). Wan fasi fa wi kan sabi o tranga a bribi fu wi de na fu luku o prenspari a preikiwroko de gi wi. Wi e du ala san wi man fu du a wroko disi? Wi e du muiti fu si fa wi kan du moro na ini a diniwroko? (2 Kor. 13:5) Te wi e fruteri sma taki den kan kisi frulusu, dan dati na wan kefalek moi fasi fu sori taki wi abi tranga bribi.—Leisi Romesma 10:10.

14, 15. (a) Fa wi kan sori na ini wi aladei libi taki wi abi bribi? (b) Fruteri wan ondrofenitori di e sori fa tranga bribi kan yepi sma.

 ¹⁴ A fasi fa wi e tyari wisrefi te wi e kisi tesi na ini na aladei libi e sori tu efu wi abi bribi. Son leisi wi e siki, wi e lasi-ati, wi e firi brokosaka, wi pôti, noso kande wi e kisi tra tesi. Ma awinsi sortu problema wi abi wi de seiker taki Yehovah nanga en Manpikin o „yepi wi na a yoisti ten” (Hebr. 4:16). Te wi e begi Yehovah fu yepi wi, dan wi e sori taki wi e bribi na ini en. Yesus ben taki srefi dati wi kan aksi Gado fu gi wi sani di wi abi fanowdu na ini na aladei libi, soleki „a brede di wi abi fanowdu gi a dei” (Luk. 11:3). Den tori na ini Bijbel e sori wi krin taki Yehovah man sorgu gi wi. Di wan bigi dreiten ben de na ini Israel, Yehovah gi Elia nyanyan nanga watra. „Ibri mamanten nanga ibri neti den blaka fowru ben e tyari brede nanga meti kon gi en èn te a ben wani dringi watra, dan a ben e teki dati na ini a liba”, soifri leki fa Yehovah ben taki (1 Kow. 17:3-6). Wi srefi e bribi tu taki Yehovah man seti sani na so wan fasi taki wi kan feni den sani di wi abi fanowdu.

¹⁵ Wi e bribi taki te wi e du san Bijbel e taki, dan disi kan yepi wi fu feni a nyan di wi abi fanowdu. Wan uma na Asia di nen Rebecca e taki dati en osofamiri ben ondrofeni a sani dati tu. Den du san Mateyus 6:33 nanga Odo 10:4 e taki. Dati meki den poti sani di abi fu du nanga a Kownukondre na a fosi presi èn den wroko tranga. Rebecca e fruteri taki wan leisi en masra kon si taki a wroko di a ben e du ben kan pori a matifasi di den ben abi nanga Yehovah. Dati meki a libi a wroko. Ma den ben abi fo pikin fu sorgu. Rebecca e fruteri san pasa: „Wi bigin meki switisani, dan wi ben e seri den. Na ini den yari di wi suku fu meki moni na a fasi disi wi si taki Yehovah noiti no gowe libi wi. Ibri dei wi ben abi wan sani fu nyan.” Yu ben man sori tra sma tu taki yu e bribi taki Bijbel e gi wi den moro bun rai di sma kan kisi na ini a ten disi?

16. San o pasa efu wi e frutrow tapu Gado?

¹⁶ Noiti wi musu tweifri efu sani o waka bun gi wi te wi e du san Gado taki. Paulus gebroiki den wortu fu a profeiti Habakuk di a  skrifi: „A reti-ati sma o tan libi fu di a abi bribi” (Gal. 3:11; Hab. 2:4). Dati meki a prenspari fu poti bribi na ini a sma di kan yepi wi trutru. Paulus e memre wi taki na fu di „Gado na a sma di e meki a krakti fu en wroko na ini wi, meki a kan du moro leki iniwan sani di wi e aksi noso prakseri” (Ef. 3:20). Den futuboi fu Yehovah e meki ala muiti fu du san Gado taki. Ma fu di den sabi taki sani de di den no man du, meki den e frutrow tapu Yehovah taki a o blesi a muiti di den e meki. Yu no breiti taki a Gado fu wi de nanga wi?

17. (a) Fa den apostel kisi moro bribi di den ben aksi fu dati? (b) Fu san ede wi kan fruwakti taki wi o kisi moro bribi tu te wi aksi fu dati?

¹⁷ Now di wi luku ala den sani disi, dan kande yu e firi leki den apostel fu Masra Yesus di ben taigi en: „Gi wi moro bribi” (Luk. 17:5). Den kisi a bribi dati spesrutu na a Pinksterfesa na ini a yari 33, di santa yeye kon na den tapu èn di den kon frustan moro bun san Gado abi na prakseri gi libisma. A sani disi tranga a bribi fu den. A bakapisi ben de taki den go preiki na moro presi leki oiti bifo (Kol. 1:23). Wi kan fruwakti taki Gado o arki wi te wi aksi en fu gi wi moro bribi? Seiker! Bijbel e taki dati a o arki wi begi „solanga a e kruderi nanga a wani fu en”.—1 Yoh. 5:14.

18. Fa Yehovah e blesi den sma di e du muiti fu kon abi moro bribi?

¹⁸ A de krin taki Yehovah breiti nanga den wan di e frutrow en na ini ala sani. Yehovah o piki den begi fu wi te wi aksi en fu gi wi moro bribi èn a bribi fu wi o tranga so te, taki wi o tron sma di „warti fu go na ini a Kownukondre fu Gado”.—2 Tes. 1:3, 5.