1. O prenspari a ben de gi Yesus fu preiki fu a Kownukondre? Fruklari dati.

YESUS ben lobi taki fu Gado Kownukondre. Soleki fa Bijbel e sori, dan disi ben de a moro prenspari sani di Yesus ben e taki fu en. Moro leki 100 leisi a taki fu a tori disi na ini a diniwroko fu en. A Kownukondre ben prenspari srefisrefi gi Yesus.—Leisi Mateyus 12:34.

2. Omeni sma ben de drape di Yesus gi a komando di skrifi na Mateyus 28:19, 20, èn fu san ede wi kan taki dati? (Luku a futuwortu sosrefi.)

² Syatu baka di Yesus kisi wan opobaka a kon makandra nanga moro leki 500 sma di ben o tron bakaman fu en (1 Kor. 15:6). A kan taki na a dei dati Yesus gi a komando fu preiki gi „sma fu ala kondre”. * Disi no ben o de wan makriki sani! Yesus ben taki dati a bigi wroko disi ben o du te na a ten fu „a kaba fu grontapu”. Èn na dati e pasa tu. Te yu e preiki a bun nyunsu, dan yu e yepi fu meki a profeititori disi kon tru.—Mat. 28:19, 20.

3. San na dri sani di yepi wi fu preiki a bun nyunsu?

 ³ Baka di Yesus gi a komando fu preiki, a pramisi den bakaman fu en: „Mi o de nanga unu” (Mat. 28:20). Dati wani taki dati na en ben o tiri a preikiwroko disi di ben o du na heri grontapu. Ma Yehovah de nanga wi tu èn a gi wi „ala bun sani” di de fanowdu fu yepi wi du a wroko disi (Hebr. 13:20, 21). Na ini na artikel disi wi o luku dri fu den bun sani dati: (1) Den sani di wi gebroiki fu du a preikiwroko, (2) den difrenti fasi fa wi du a wroko disi èn (3) a leri di wi kisi. Kon meki wi go luku fosi san wi gebroiki fu du a preikiwroko na ini den 100 yari di pasa.

4. Fu san ede wi gebroiki difrenti sani fu du a preikiwroko?

⁴ Yesus ben taki dati „a wortu fu a Kownukondre” de leki siri di sai na difrenti sortu gron (Mat. 13:18, 19). Wan gronman kan gebroiki difrenti sani fu sreka a gron fu en, so taki a kan prani na tapu. Na so a de tu taki na ini den yari di pasa wi Kownu gi wi difrenti sani di wi gebroiki fu sreka na ati fu milyunmilyun sma gi a Kownukondre boskopu. Sonwan fu den sani disi wi ben man gebroiki fu wan pisi ten nomo, trawan wi e gebroiki te now ete. Ma ala den sani disi yepi wi fu tron moro bun preikiman.

5. San na wan kotoigikarta èn fa den ben gebroiki en?

⁵ Na ini 1933, Kownukondre preikiman bigin gebroiki a kotoigikarta. A karta disi di ben bradi sowan 8 centimeter èn di ben langa 13 centimeter, ben abi wan syatu Bijbel boskopu na tapu. A yepi furu sma fu bigin nanga a preikiwroko. Ten na ten wan nyun karta ben e meki nanga wan tra boskopu. A no ben muilek fu gebroiki a karta. Brada C. W. Erlenmeyer ben abi tin yari di a bigin preiki nanga a karta disi. A ben fruteri: „Te wi ben e go na sma, dan ala ten wi ben e aksi: ’Yu wani leisi a karta disi grantangi?’ Te na ososma ben kaba leisi a karta wi ben e gi en buku, dan wi ben e gowe.”

6. Fa a kotoigikarta ben yepi furu preikiman?

⁶ A kotoigikarta yepi den preikiman na difrenti fasi. Fu eksempre, sonwan fu den ben wani go na ini a preikiwroko, ma den ben e syen èn den no ben sabi san den ben musu taki. Trawan baka ben e taki tumusi furu. Den ben wani fruteri den ososma ala san den sabi na ini wan tu miniti nomo. A no ala ten den ben e hori den firi fu na ososma na prakseri. Ma nanga yepi fu a kotoigikarta ala preikiman ben man tyari wan syatu boskopu di ben makriki fu frustan.

7. Sortu problema son preikiman kisi di den ben e wroko nanga den kotoigikarta?

⁷ A no de fu taki dati a no ala ten a ben makriki fu wroko nanga a karta disi. Grace A. Estep, di de wan Kotoigi bun langa kaba, e fruteri: „Son leisi sma ben e aksi wi: ’We, san skrifi tapu a karta? Yusrefi no man fruteri mi?’” Boiti dati, son ososma no ben man leisi a boskopu tapu a karta. Trawan baka ben denki taki a karta ben de fu den, dati meki den ben e teki en èn den ben e tapu a doro. Efu na ososma no ben lobi Kotoigi, dan kande a ben e priti a karta pisipisi. Toku wi brada nanga sisa ben e leri fu preiki gi sma èn fu no frede fu fruteri den taki den ben e preiki fu a Kownukondre.

8. Fruteri fa den ben e gebroiki a gramofon. (Luku a prenki na a bigin fu na artikel.)

⁸ Wan tra sani di preikiman gebroiki  baka a yari 1930, ben de a gramofon. Son brada ben e kari a masyin disi Aron, fu di a ben de leki a ben e taki gi den. (Leisi Eksodes 4:14-16.) Te na ososma ben wani, dan a preikiman ben e prei wan Bijbel lezing fu fo nanga afu miniti gi en. Baka dati a ben e gi a sma buku fu leisi. Son leisi wan heri famiri ben e kon arki den Bijbel boskopu disi! Na ini 1934 a Waktitoren Genootschap bigin meki gramofon di sma ben kan gebroiki na ini a preikiwroko makriki. Te fu kaba den ben abi moro leki 92 difrenti lezing tapu gramofon-plaat.

9. Sortu bun bakapisi preikiman ben abi di den wroko nanga a gramofon?

⁹ Baka di wan ososma di nen Hillary Goslin ben yere wan fu den lezing disi, a aksi a preikiman efu a kan leni a gramofon fu en wán wiki langa so taki a ben kan meki den sma na ini a birti fu en arki a Kownukondre boskopu. Di a preikiman drai go baka, wan tu sma di ben wani kon sabi moro ben de drape e wakti en. Baka wan pisi ten wan tu fu den gi densrefi abra na Yehovah. Den tu umapikin fu Hillary go na Gileadskoro te fu kaba èn den go dini na wan tra kondre. Neleki a kotoigikarta, a gramofon yepi furu sma fu bigin du a preikiwroko. Bakaten, a Kownu fu wi ben o gebroiki a Theokrasia Diniwroko-skoro fu leri den brada nanga sisa fu wi san den musu taki.

10, 11. Fa Kotoigi gebroiki koranti nanga radio fu prati a Bijbel boskopu? Fu san ede den difrenti fasi disi fu prati a boskopu ben abi bun bakapisi?

¹⁰ Ondro a tiri fu a Kownu fu wi, Gado pipel gebroiki difrenti fasi fu panya a bun nyunsu gi someni sma leki den man. Disi ben prenspari trutru na a pisi ten di ’furu wrokoman no ben de’. (Leisi Mateyus 9:37.) Wan tu yari baka 1900 den gebroiki koranti fu prati a bun nyunsu gi furu sma na den kontren pe yu ben abi wan tu Kotoigi nomo. Ibri wiki Brada Charles Taze Russell ben seni wan Bijbel lezing gi wan nyunsu kantoro, dan a kantoro disi ben e seni a lezing fu en gi koranti na ini Amerkankondre, Kanada, nanga Europa. Na ini 1913 den lezing fu Brada Russell ben de fu feni na ini 2000 koranti di moro leki 15.000.000 sma ben e leisi!

¹¹ Baka di Brada Russell dede, den brada fu wi bigin prati a bun nyunsu na wan tra fasi di ben abi bun bakapisi tu. Den bigin gebroiki radio fu preiki a bun nyunsu. A lezing di Brada Joseph F. Rutherford hori na tapu 16 april 1922, na wan fu den fosi lezing di a hori tapu radio. Sowan 50.000 sma arki a lezing dati. Syatu baka dati na organisâsi opo den eigi radio station di ben nen WBBR. A fosi programa ben de fu yere na tapu 24 februari 1924. Luku san The Watch Tower fu 1 december 1924 ben taki fu a nyun fasi disi fu meki sma yere a boskopu fu wi: „Wi e bribi taki te nanga now, radio na a moro bunkopu fasi èn a moro bun fasi fa wi kan panya a Bijbel boskopu gi bun furu sma.” Neleki koranti, radio ben yepi na organisâsi fu panya a boskopu fu wi gi bun furu sma na presi pe furu Kownukondre preikiman no ben de.

12. (a) San yu lobi fu a spesrutu preikiwroko di wi e du na presi pe furu sma de? (b) San kan yepi wi te wi e frede fu preiki na a fasi disi?

¹² Na ini a ten disi wi e du spesrutu preikiwroko na presi pe furu sma de, soleki na presi pe sma e wakti bus, na presi pe loko e stop, na presi pe sma e parkeer wagi, èn na wowoyo. Yu e frede pikinso fu preiki na a fasi disi? Efu dati de so, dan begi Gado fu yepi yu èn prakseri na eksempre fu Brada Angelo Manera, di de kring-opziener  omeni yari kaba. A ben taki: „Wi ben e si ala den nyun fasi disi fu preiki leki wan nyun fasi fu dini Yehovah, leki wan nyun fasi fu sori taki wi wani tan gi yesi na en, èn leki wan nyun fasi fu buweisi taki wi o gi yesi na en awinsi san pasa. Wi ben de klariklari fu sori taki wi o dini en na iniwan fasi di a wani.” Te wi de klariklari fu preiki na wan nyun fasi, srefi efu wi frede pikinso fu du dati, dan disi o yepi wi fu frutrow moro tapu Yehovah èn a o tranga a bribi fu wi. Disi o yepi wi fu tron moro bun preikiman.—Leisi 2 Korentesma 12:9, 10.

13. Fu san ede a bun taki wi e gebroiki a website fu wi fu preiki a bun nyunsu, èn san yu ondrofeni di yu du dati?

¹³ Furu preikiman lobi fruteri sma fu a website fu wi, jw.org. Tapu a website disi den kan leisi noso download buku di e taki fu Bijbel. Den buku disi de na ini moro leki 700 tongo. Ala dei moro leki 1.600.000 sma e go tapu a website fu wi. Neleki fa radio ben e yepi furu sma na ini den yari di pasa fu kon sabi a bun nyunsu, awinsi den ben e libi na farawe presi, na so a website e yepi sma tu na ini a ten disi.

14. Sortu leri Kownukondre preikiman ben abi fanowdu èn sortu skoro yepi den fu tron moro bun leriman?

¹⁴ Wi taki fu wan tu fu den sani di wi gebroiki fu preiki a bun nyunsu èn fu difrenti fasi fa wi du dati. Ma sortu leri wi kisi fu preiki a bun nyunsu disi? Kon meki wi taki dati wan ososma no ben e agri nanga a boskopu di a ben e yere na tapu wan gramofon-plaat, noso taki a ben wani sabi moro fu wan sani di a ben leisi na wan kotoigikarta. Den preikiman ben musu leri san den ben musu taki te wan sma no ben e agri èn fa fu yepi den wan di ben wani kon sabi moro. A no de fu taki dati na Gado santa yeye ben sori Brada Nathan H. Knorr taki a ben de fanowdu fu leri den preikiman fa fu taki nanga sma na ini a preikiwroko. Fa den preikiman ben o kisi a leri dati? Na ini 1943 sani seti fu hori a Theokrasia Diniwroko-skoro na ini den gemeente. A skoro dati yepi wi fu tron moro bun leriman.

15. (a) San son sma ondrofeni di den bigin hori lezing na a Theokrasia Diniwroko-skoro? (b) Fa Yehovah yepi yu soleki fa a pramisi na Psalm 32:8?

¹⁵ Furu brada no ben gwenti taki na fesi bigi grupu sma. Julio S. Ramu e memre a fosi lezing di a hori na a skoro na ini 1944. A ben musu taki fu Dowek, wan man di nen kari na ini Bijbel feifi leisi nomo! Julio e taki: „Mi ben senwe so te taki mi kindi  ben naki na makandra, mi anu ben beifi, èn mi tifi ben naki tapu makandra.” A ben hebi gi en fu hori a lezing soso nanga den feifi vers pe a nen fu Dowek skrifi. A taki tu: „Mi hori a lezing na ini dri miniti. Dati ben de a fosi leisi di mi go na tapu a podium. Ma mi horidoro.” Te fu kaba pikin-nengre go tapu a skoro tu. Ma a ben muilek gi sonwan fu den fu hori wan lezing na fesi a heri gemeente. Angelo Manera, di wi ben taki fu en kaba, e memre a fosi lezing di wan pikin boi ben hori. Angelo e fruteri: „A ben senwe so te, taki a bigin krei di a bigin taki. Ma fu di a ben wani hori a lezing meki a taki go doro aladi a ben e krei.” Yu e frede fu gi piki, fu hori lezing, noso fu du tra sani na den konmakandra, kande fu di yu e syen noso fu wan tra sani ede? We, aksi Yehovah fu yepi yu fu wini a firi dati. Yu o si taki a o yepi yu neleki fa a ben yepi den fosi studenti fu a Theokrasia Diniwroko-skoro.—Leisi Psalm 32:8.

16. Fu san ede a Gileadskoro ben seti (a) di a bigin na ini 1943 èn (b) san kenki na ini 2011?

¹⁶ A pipel fu Yehovah no e kisi leri na a Theokrasia Diniwroko-skoro wawan. Zendeling nanga tra brada nanga sisa kisi furu wini fu a Gileadskoro tu. Wan fu den leriman e taki fu san ede a skoro seti. A taki dati wan fu den sani di „den studenti e leri na a skoro, na fu du a preikiwroko nanga moro faya”. Na ini 1943, den bigin nanga a Gileadskoro èn sensi a ten dati moro leki 8500 sma kisi leri drape. Zendeling di go na a skoro disi dini na ini sowan 170 kondre. Sensi 2011 a skoro disi na soso gi den wan di e du spesrutu furuten diniwroko kaba, sobun, gi spesrutu pionier, kring-opziener, sma fu Betel, nanga zendeling di no go na a skoro disi ete.

17. Sortu wini a Gileadskoro ben abi gi a preikiwroko?

¹⁷ Sortu wini a leri di preikiman kisi ben abi gi a preikiwroko? Luku wan eksempre. Na ini augustus 1949, Yapan no ben abi tin preikiman srefi. Ma na a kaba fu a yari dati 13 zendeling fu a Gileadskoro bigin preiki drape. Now Yapan abi moro leki 216.000 preikiman èn pikinmoro 42 procent fu den na pionier!

18. Sortu tra skoro na organisâsi fu wi abi?

¹⁸ Tra skoro de tu di yepi Yehovah pipel fu du a wroko fu den moro bun èn fu tranga a bribi fu den. Wan tu fu den skoro disi na a Kownukondre Diniwroko-skoro, a Pionierskoro, a Skoro gi Kownukondre preikiman, a Skoro gi kring-opziener nanga den wefi fu den, nanga a Skoro gi memre fu Bijkantoro Komte nanga den wefi fu den. A de krin taki a Kownu fu wi e tan leri den bakaman fu en fa fu du den wroko moro bun!

19. San Brada Charles Taze Russell ben taki fu a preikiwroko?

¹⁹ Moro leki 100 yari pasa kaba sensi di Gado Kownukondre bigin tiri. A heri pisi ten dati wi Kownu, Yesus Krestes tan gi wi leri. Fosi Brada Charles Taze Russell dede na ini 1916, a taki wan sani di e sori taki a ben e frustan kaba taki a preikiwroko ben o du na heri grontapu. A ben taigi wan brada di ben e wroko nanga en: „A wroko e go na fesi esi-esi èn a o tan go na fesi, fu di na ’evangelie fu a Kownukondre’ musu preiki na heri grontapu” (Faith on the March, di A. H. Macmillan skrifi, blz. 69). Brada Russell ben abi leti! Wi de nanga tangi taki a Gado fu freide e tan gi wi sani di wi kan gebroiki fu du a prisiri wroko disi! Iya, a e gi wi „ala bun sani” di wi abi fanowdu fu du a wani fu en!