Yu man memre san yu leisi na ini den Waktitoren di kon na doro no so langa pasa? We, luku efu yu kan gi piki na tapu den aksi di e kon now:

Sortu sani no o de moro te a kaba kon?

Wan tu sani di no o de moro na libisma tirimakti, feti, kruktudu, ogrisma nanga kerki di no e du a wani fu Gado èn di e pina libisma.—1/5, blz. 3-5.

Suma na Gok fu Magok na ini a Bijbel buku Esekièl?

Gok fu Magok no abi fu du nanga Satan. Ma soleki fa a sori, dan a abi fu du nanga den sma di o span anu makandra fu kon feti nanga Gado pipel baka te a bigi banawtu bigin.—15/5, blz. 29, 30.

Sortu siksi sani kan yepi wan sma fu tan abi prisiri aladi a e kon owru?

Bijbel e gi wi a rai fu (1) sori sakafasi, (2) fu sorgu wisrefi bun, (3) fu denki bun fu wisrefi, (4) fu prati sani nanga trawan, (5) fu sori switifasi èn (6) fu de nanga tangi. Te wan sma e du den sani disi, dan dati kan yepi en fu tan abi prisiri aladi a e kon owru.—1/6, blz. 8-10.

Fa den wondru di Yesus du, sori taki a lobi fu gi sma sani?

Di Yesus ben de na wan trow-oso na Kana, a meki 380 liter watra tron win. Wan tra leisi a du wan wondru fu gi moro leki 5000 sma nyanyan (Mat. 14:14-21; Yoh. 2:6-11). Ala tu leisi, a teki na eksempre fu en Papa di lobi fu gi sma sani.—15/6, blz. 4, 5.

Fu san ede wi kan de seiker taki wi kan meki Gado prisiri, aladi wi na sondusma?

Man leki Yob, Lot nanga David meki fowtu. Toku den ben wani du a wani fu Gado, den ben sari taki den meki fowtu èn den ben kenki a fasi fa den ben e si sani. Na so den meki taki Gado feni den bun. Wi srefi kan du dati tu.—1/7, blz. 12, 13.

A de so taki ala den sma fu den kerki o dede te Babilon a Bigiwan o kisi pori?

Soleki fa a sori, dan dati no de so. Sakaria 13:4-6 e sori taki srefi wan tu kerki fesiman o drai baka gi a kerki fu den èn den o taki dati noiti den ben de fu den falsi kerki dati.—15/7, blz. 15, 16.

Fu san ede Barak agri fu go feti soso te Debora ben o go nanga en?

Barak ben abi bribi. A no aksi Yehovah fu gi en moro fetisani. Ma a ben wani meki Debora, a profeiti fu Gado, go nanga en fu tranga a bribi fu en nanga den man fu en (Krut. 4:6-8; 5:7).—1/8, blz. 13.

San na wan tu sani di wan Kresten kan prakseri dipi fu den?

Wan Kresten kan denki dipi fu den sani di Yehovah meki, a Wortu fu Gado di de prenspari gi wi, a grani di wi abi fu begi nanga a lusu-paiman di Gado gi wi fu di a lobi wi.—15/8, blz. 10-13.

Te wi e luku bun nanga takru kompe, dan fa dati o yepi wi fu no hori nanga sma di no e dini Yehovah?

Wi e sori switifasi srefi gi sma di no e libi leki fa Gado taki. Toku Bijbel e sori taki a no bun te wan Kotoigi di no trow e hori nanga wan sma di no gi ensrefi abra na Gado èn di no e lespeki den wet fu en (1 Kor. 15:33).—15/8, blz. 25.

Fa Petrus bribi ben kon swaki wan pisi ten, ma fa a kisi ensrefi baka?

Fu di na apostel Petrus ben abi bribi, meki a waka na tapu a se go na Yesus (Mat. 14:24-32). Ma di a luku a bigi winti, a kon frede. Ne a poti prakseri baka na Yesus èn a meki Yesus yepi en.—15/9, blz. 16, 17.

Tori fu den apostel 28:4 e taki dati den sma fu Malta prakseri taki na apostel Paulus ben de wan kiriman. Fu san ede den ben denki dati?

Di wan sneki beti Paulus, dan den sma ben denki taki Dike, na umagado fu retidu, ben strafu Paulus.—1/10, blz. 9.

Marta ben meki furu sani puru en prakseri. San wi kan leri fu dati?

Wan leisi Marta no ben e poti prakseri na prenspari sani, fu di a ben e sreka wan bigi nyanyan. Ma Maria, a sisa fu Marta, ben arki den leri fu Yesus. Dati meki Yesus taki dati a ben du a moro bun sani. Wi musu luku bun taki wi no e meki sani di no de so prenspari, puru wi prakseri na a anbegi fu Yehovah.—15/10, blz. 18-20.