1-3. San ben kan de a problema na mindri Eyodia nanga Sentike èn san wi kan du fu no meki den problema disi kon? (Luku a prenki na a bigin fu na artikel.)

DEN futuboi fu Yehovah abi furu lespeki gi Bijbel, a Wortu fu Gado. Fu di wi na sondusma, meki wi alamala abi rai fanowdu fu Gado Wortu son leisi. San wi e du te wi e kisi rai? Luku na eksempre fu Eyodia nanga Sentike, tu sisa fu a fosi Kresten gemeente. Wan seryusu problema ben de na mindri den tu salfu sisa disi. San ben de a problema? Bijbel no e taki fu dati. Ma meki wi go luku wan sani di ben pasa kande.

² Kon meki wi taki dati Eyodia ben kari wan tu brada nanga sisa fu kon nyan na en oso èn fu meki prisiri. A no kari Sentike, ma Sentike kon yere fa sani ben switi gi den trawan. Kande a ben taki na ensrefi: ’Mi no man bribi taki Eyodia no kari mi kon! Mi ben denki taki wi ben de bun mati.’ Fu di Sentike mandi, meki a e bigin hori Eyodia na ati èn a no wani taki nanga en srefi. Now Sentike e orga wan sani tu èn a e kari wan tu brada nanga sisa, ma a no e kari Eyodia. A problema  di Eyodia nanga Sentike abi, kan pori a freide na ini a heri gemeente. Bijbel no e taki fa a tori waka, ma soleki fa a sori, dan den sisa disi teki a rai di na apostel Paulus ben gi den na wan lobi-ati fasi.​—Fil. 4:2, 3.

³ Son leisi wan srefi sortu sani kan tyari problema kon na ini den gemeente fu Yehovah pipel na ini a ten disi. Ma te wi e teki a rai fu Bijbel, dan den problema disi no abi fu de èn efu den kon, wi kan lusu den esi-esi. Te wi abi furu lespeki gi a Wortu fu Yehovah, dan wi o du san a e leri wi.​—Ps. 27:11.

4, 5. Sortu rai fu Gado Wortu e yepi wi fu dwengi den firi fu wi?

⁴ A no makriki fu dwengi den firi fu wi. Kande wi mandi fu di wan sma taki wan fruferi sani fu wi, noso kande a du wan hati sani nanga wi. A kan hati wi te sma e desko wi fu di wi de fu wan tra ras, fu di wi abi wan tra skin kloru noso fu di wi no gersi den. Èn efu na wan brada noso sisa e du a sani disi, dan a kan hati wi moro srefi. Sortu rai Gado Wortu e gi wi te so wan problema e miti wi?

⁵ Sensi a bigin, Yehovah e luku fa libisma de nanga makandra. A sabi fa wi e firi èn san wi e du. Te wi mandi noso te wi ati e bron, wi kan taki noso du sani di wi e sari fu en bakaten. Dati meki a bun fu hori wisrefi èn fu no kisi atibron esi-esi, soleki fa Bijbel e gi wi a rai. (Leisi Odo 16:32; Preikiman 7:9.) Wi alamala musu meki muiti fu no mandi esi-esi èn fu de gaw fu gi trawan pardon. Yehovah nanga Yesus feni en prenspari taki wi e gi trawan pardon (Mat. 6:14, 15). Yu denki taki yu musu meki moro muiti fu hori yusrefi noso fu gi sma pardon?

6. Fu san ede wi musu luku bun taki wi no e kisi bita-ati gi trawan?

⁶ Nofo tron a de so taki sma di no man dwengi den firi, e kisi bita-ati gi trawan. Disi e meki taki sma no e prisiri fu de nanga den. So wan sma kan pori a freide na ini a gemeente. Kande a e pruberi fu kibri suma a de, soso fu di a no wani meki sma si taki a abi bita-ati noso taki a no lobi sma. Ma te fu kaba, den takru prakseri di de na ini en ati, o kon na krin na ini a gemeente (Odo 26:24-26). Kande den owruman man yepi den sortu sma disi fu si taki te den abi bita-ati gi trawan noso den e hori trawan na ati, den no kan de na ini Gado organisâsi. A Wortu fu Yehovah e sori krin taki den fasi disi no bun (Lef. 19:17, 18; Rom. 3:11-18). Yu e agri nanga disi?

7, 8. (a) Fa Yehovah e tiri a pisi fu en organisâsi di de na grontapu? (b) San na wan tu rai di Gado Wortu e gi wi èn fu san ede wi musu teki den rai disi?

⁷ Yehovah e gebroiki „a koni srafu di de fu frutrow” fu tiri a pisi fu en organisâsi di de na grontapu. A poti Krestes leki fesiman fu a srafu disi èn leki na „ede fu a gemeente” (Mat. 24:45-47; Ef. 5:23). Neleki a tiri skin na ini a ten fu den apostel, na so a srafu disi e si Bijbel leki a Wortu fu Gado èn den abi furu lespeki gi a buku disi. (Leisi 1 Tesalonikasma 2:13.) San na wan tu rai di Bijbel e gi wi so taki wi kan kisi wini?

⁸ Bijbel e gi wi a rai fu no misi konmakandra (Hebr. 10:24, 25). A e gi wi alamala deki-ati fu de wán na ini ala san wi e bribi (1 Kor. 1:10). Gado Wortu e taigi  wi fu poti a Kownukondre na a fosi presi na ini wi libi (Mat. 6:33). Bijbel e sori tu taki wi kisi a prenspari wroko fu preiki oso fu oso, na presi pe furu sma de èn na ibri okasi. Wi musu si a wroko disi leki wan bigi grani (Mat. 28:19, 20; Tori 5:42; 17:17; 20:20). A Wortu fu Gado e sori Kresten owruman taki den musu sorgu taki Yehovah en organisâsi e tan krin (1 Kor. 5:1-5, 13; 1 Tim. 5:19-21). Èn Yehovah wani taki ala sma na ini en organisâsi musu de krin. Den no musu doti den skin nanga den denki.​—2 Kor. 7:1.

9. Suma kisi a frantwortu fu yepi wi fu kon frustan Gado Wortu?

⁹ Kande son sma e taki dati den no abi sma fanowdu fu fruklari Bijbel gi den. Ma Yesus gi „a koni srafu” a frantwortu fu gi nyanyan na ala den futuboi fu Gado. Sensi 1919, Yesus Krestes e gebroiki a srafu disi fu yepi den bakaman fu en fu kon frustan Gado Wortu èn fu teki den rai di a buku disi abi. Te wi e gi yesi na den rai fu Bijbel, dan wi e sorgu taki a gemeente tan krin èn taki freide nanga wánfasi de. Ibriwan fu wi musu aksi ensrefi: ’Mi e gi yesi na a koni srafu di Yesus e gebroiki fu tiri wi na ini a ten disi?’

10. San a buku fu Esekièl e fruteri wi fu a pisi fu Yehovah organisâsi di de na hemel?

¹⁰ Na ini Bijbel, Yehovah e meki wi kon sabi a pisi fu en organisâsi di de na hemel. Fu eksempre, a profeiti Esekièl ben kisi wan fisyun pe a si wan bigi hemel wagi (Esek. 1:4-28). Na Yehovah e rèi a wagi disi di e go na ala sei pe a yeye fu en wani taki a musu go. A wagi disi e prenki a pisi fu Yehovah organisâsi di de na hemel èn di e tiri a pisi fu en organisâsi na grontapu. A wagi disi e go na fesi esi-esi! Prakseri ala den kenki di wi si na ini den 10 yari di pasa. No frigiti taki na Yehovah e sorgu taki ala den kenki disi kon. Fu di a ten e doro taki Krestes nanga den santa engel o pori na ogri grontapu disi, meki a wagi fu Yehovah e go na fesi esi-esi. Na so Gado o meki en nen kon santa èn a o sori ala sma taki na en abi a reti fu tiri.

11, 12. San na wan tu sani di Yehovah en organisâsi e du na ini a ten disi?

¹¹ Prakseri ala den sani di a pisi fu Yehovah organisâsi na grontapu du na ini den lasti dei disi. A bow-wroko. Hondrohondro brada nanga sisa yepi bow a nyun edekantoro fu Yehovah Kotoigi na Warwick, New York, Amerkankondre. Na Afdeling di e luku a bow-wroko na heri grontapu e tiri a wroko fu dusundusun sma di e yepi bow nyun Kownukondre zaal noso di e yepi fu meki bijkantoro kon moro bigi. Wi breiti nanga  den furu brada nanga sisa di e wroko tranga fu bow den presi disi! Kownukondre preikiman na heri grontapu e gi moni fu horibaka gi a bow-wroko disi. Yehovah e blesi en pipel fu di den e sori sakafasi èn fu di den e horibaka gi a wroko fu en.​—Luk. 21:1-4.

¹² A leri di wi e kisi. Prakseri den difrenti skoro pe wi e kisi leri fu Gado (Yes. 2:2, 3). Fu eksempre, wi abi a Pionierskoro, a Skoro gi Kownukondre preikiman, a Gileadskoro, a Skoro gi nyun sma na Betel, a Skoro gi kring-opziener nanga den wefi fu den, a Skoro gi gemeente owruman, èn a Skoro gi memre fu Bijkantoro Komte nanga den wefi fu den. Yehovah lobi fu gi leri na a pipel fu en. Wi e kisi Bijbel leri tu tapu a website fu wi, jw.org, pe wi abi buku nanga tra sani na ini hondrohondro tongo. A website disi abi wan spesrutu pisi gi pikin-nengre nanga osofamiri, èn wan pisi de tu pe yu kan leisi nyunsu fu Yehovah Kotoigi. Yu e gebroiki jw.org na ini a preikiwroko èn te yu abi na Osofamiri Anbegi?

13. Sortu frantwortu wi leki futuboi fu Yehovah abi?

¹³ Na wan bigi grani fu de na ini na organisâsi fu Yehovah! Fu di wi sabi den wet fu Gado, meki wi abi a frantwortu fu du san bun èn fu gi yesi na Yehovah leki a Moro Hei Tiriman. Dei fu dei a grontapu disi e kon moro ogri èn dati meki neleki Yehovah wi „no musu lobi ogri sani kwetikweti” (Ps. 97:10). Wi no wani de leki den ogrisma di e taki dati „bun ogri èn ogri bun” (Yes. 5:20). Fu di wi wani prisiri na ati fu Yehovah, meki wi e pruberi fu tan krin na ala fasi (1 Kor. 6:9-11). Wi lobi Yehovah èn wi e frutrow en. Wi wani gi yesi na en èn dati meki wi e libi leki fa a skrifi na ini a Wortu fu en. Awinsi wi de na oso, na ini a gemeente, na wrokope noso na skoro, wi e du ala san wi man fu libi leki fa Gado wani (Odo 15:3). Luku san moro wi kan du fu sori taki wi wani gi yesi na Gado.

14. Fa Kresten papa nanga mama kan sori taki den e gi yesi na Gado?

¹⁴ A fasi fa wi e kweki wi pikin. Kresten papa nanga mama e sori taki den e gi yesi na Yehovah te den e kweki den pikin fu den leki fa Bijbel taki. Dati meki den no e kweki den leki fa a gwenti de na ini a kulturu fu den. Wan Kresten osofamiri no musu abi a denki fu grontapu (Ef. 2:2). Wan dopu Kresten papa no kan taki: ’We, na ini wi kondre na umasma e kweki pikin.’ Bijbel e taki krin: „Un papa, . . . tan kweki [un pikin] nanga a leri èn nanga den rai fu Yehovah” (Ef. 6:4). Papa nanga mama di lobi Gado wani taki den pikin fu den de leki Samuel, fu di Yehovah ben de nanga en di a ben e gro kon bigi.​—1 Sam. 3:19.

15. Fa wi kan sori taki wi e gi yesi na Yehovah, te wi musu teki prenspari bosroiti?

¹⁵ Te wi e teki bosroiti. Te wi musu teki prenspari bosroiti, dan wi musu suku yepi na ini Gado Wortu èn na en organisâsi. Na so wi e sori taki wi e gi yesi na Gado. Luku wan eksempre di e sori o prenspari disi de. Furu trakondre sma abi a gwenti fu seni den yongu pikin fu den go libi nanga den famiri na a kondre pe den komoto, so taki den kan tan wroko moni na ini a nyun kondre fu den. A tru taki na yusrefi musu bosroiti  san yu o du, ma yu no musu frigiti taki yu o abi fu gi Gado frantwortu fu den bosroiti di yu e teki. (Leisi Romesma 14:12.) Yu denki taki a ben o de wan koni sani fu teki prenspari bosroiti di abi fu du nanga wi osofamiri èn nanga a wroko fu wi, sondro fu luku fosi san Bijbel e taki? Nôno. Wi abi a yepi fu wi hemel Tata fanowdu fu di wi srefi no man taki pe wi o poti wi futu.​—Yer. 10:23.

16. Sortu bosroiti wan mama ben musu teki di en beibi gebore èn san yepi en fu teki a yoisti bosroiti?

¹⁶ Wan uma di ben e libi na ini wan tra kondre, kisi wan boi èn a ben wani seni en go na a kondre fu en fu go libi nanga a granpapa nanga granmama. Na a ten di a beibi gebore, wan Kotoigi fu Yehovah bigin studeri Bijbel nanga na uma disi. A ben leri taki na en Gado gi a frantwortu fu leri en pikin a pasi fu Yehovah (Ps. 127:3; Odo 22:6). A yongu uma begi Yehovah fu a tori, leki fa Bijbel e leri wi (Ps. 62:7, 8). A taki fu a tori tu nanga a sisa di ben e studeri nanga en èn nanga tra sma na ini a gemeente. Den famiri fu en nanga den mati fu en ben wani dwengi en fu seni a pikin gi a granpapa nanga granmama, ma a ben sabi taki a no kan du en. A masra fu na uma disi ben lobi a fasi fa a gemeente ben yepi en frow nanga a beibi. Dati meki a bigin studeri Bijbel tu èn a bigin go na den konmakandra nanga en wefi nanga en pikin. Fa yu denki taki a mama disi ben firi di a si fa Yehovah piki a begi fu en?

17. Sortu rai wi e kisi te wi e studeri Bijbel nanga wan sma?

¹⁷ Te wi e teki a tiri fu na organisâsi. Wan prenspari fasi fa wi kan sori taki wi e gi yesi na Gado, na te wi e teki a tiri fu en organisâsi. Fu eksempre, luku san wi musu du syatu baka te wi bigin studeri a Bijbel leri-buku nanga wan sma. Wi kisi a rai taki na a kaba fu a studie, wi musu teki wan tu miniti fu taki fu na organisâsi nanga a sma. Fu du disi, wi kan gebroiki a felem San wi e du na ini wan Kownukondre zaal? nanga a brochure Suma e du a wani fu Yehovah na ini a ten disi? Wi kisi a rai tu taki te wi kaba studeri a Bijbel leri-buku nanga wan sma di e go na fesi, wi musu studeri a buku Meki Gado tan lobi yu, srefi te a dopu kaba. Na organisâsi gi wi a rai disi so taki nyun sma man „tanapu steifi” na ini a bribi (Kol. 2:7). Yu e teki den rai disi fu Yehovah en organisâsi?

18, 19. Fu san ede wi musu taki Yehovah tangi?

¹⁸ Wi abi furu reide fu taki Yehovah tangi. Wi sabi taki na en meki taki wi de na libi, taki wi e buweigi èn taki wi de (Tori 17:27, 28). A gi wi wan moi kado. Dati na Bijbel. Nanga wi heri ati wi e teki a buku disi leki a boskopu fu Gado, neleki den Kresten na Tesalonika.​—1 Tes. 2:13.

¹⁹ Fu di wi abi Gado Wortu, meki wi e kon krosibei na Yehovah èn en e kon krosibei na wi (Yak. 4:8). Wi hemel Tata gi wi a moi grani fu de na ini na organisâsi fu en. Wi breiti nanga den blesi disi! A psalm skrifiman ben taki en na a moi fasi disi: „Un pipel, un taki Yehovah tangi, bika a bun. En bun-ati de fu têgo” (Ps. 136:1). Na ini Psalm 136, wi kan feni den wortu „en bun-ati de fu têgo”, twenti na siksi leisi. Te wi e tan gi yesi na Yehovah nanga en organisâsi, dan wi o si taki den wortu disi tru, fu di wi o libi fu têgo.