1. Fruteri san pasa di Yerusalem kisi pori?

NA INI 607 Fosi Krestes, Kownu Nebukadnesar meki a bigi legre fu Babilon kon feti nanga a foto Yerusalem. Luku o furu sma dede na ini a feti disi: „[Nebukadnesar] kiri den yonkuman fu den na ini a santa presi fu den. A no ben abi sari-ati nanga nowan sma, awinsi a ben de wan yonkuman, noso wan uma di no didon nanga wan man ete, wan owru man, noso wan sma di swaki fu di a ben kon grani kaba. . . . A bron na oso fu a tru Gado èn a broko a skotu fu Yerusalem puru. A bron ala den bigi tranga oso èn ala den diri sani di ben de na ini Yerusalem.”​—2 Kron. 36:17, 19.

2. Sortu warskow Yehovah gi den sma fu Yerusalem èn san ben o pasa nanga den?

² A sani di pasa nanga Yerusalem no ben musu skreki den Dyu, fu di omeni yari langa den profeiti fu Gado ben warskow den taki efu den ben tan trangayesi a Wet fu Gado, Yehovah ben o meki den Babilonsma kon feti nanga den. Den ben o kiri furu Dyu nanga feti-owru èn den wan di no ben dede, ben o abi fu tan na Babilon den heri libi langa leki katiboman (Yer. 15:2). Fa a libi ben de na Babilon? Yu kan taki dati Kresten ben de na ini wan srefi sortu katibo tu? Efu dati de so, dan o ten disi pasa?

3. Fa a libi na Babilon ben de tra fasi leki a libi na Egepte?

³ Ala sani di den profeiti taki, kon tru. Yehovah ben meki Yeremia taigi den Dyu di ben o go na katibo taki den musu fiti densrefi na a nyun situwâsi fu den èn den musu du ala san de fanowdu fu abi wan bun libi drape. A ben taki: „Un bow oso [na ini Babilon], dan unu go tan na ini. Prani gron, dan unu nyan a nyanyan fu den gron. Un no musu meki nowan dyugudyugu na ini a foto pe mi meki unu go leki katiboman. Begi Yehovah fu a meki sani waka bun na ini a foto. Dan unu o abi wan korostu libi” (Yer. 29:5, 7). Den sma di du san Gado taki, no ben abi en muilek di den ben de na ini katibo na Babilon. Den Babilonsma ben gi den primisi fu seti den eigi tori èn den ben de fri srefi fu go na sortu sei fu a kondre den wani. Na a ten dati, Babilon ben abi a moro bigi bisnis fu grontapu. Sma kon feni dokumenti di e sori taki furu Dyu drape ben leri fa fu bai èn seri sani, èn trawan ben tron sma di ben sabi meki moimoi sani. Son Dyu ben kon gudu srefi. A libi na Babilon no ben hebi leki di den Israelsma ben de srafu na Egepte hondrohondro yari na fesi.​—Leisi Eksodes 2:23-25.

4. (a) Boiti den trangayesi Israelsma, suma ben firi en tu di den Babilonsma tyari den gowe leki katiboman? (b) Fu san ede den no ben man du ala san a Wet e taki?

⁴ Den Dyu ben abi ala san ben de fanowdu. Ma fa a ben de nanga na anbegi fu den? A tempel fu Yehovah nanga na altari ben kisi pori èn den priester no ben man du a wroko fu den leki fa a ben e orga fosi. Aladi sonwan fu den futuboi fu Gado di ben de na ini katibo, no ben du noti fu kisi a strafu disi, toku den ben abi fu pina makandra nanga den tra Israelsma. Ma den ben du san den man fu gi yesi na a Wet fu Gado. Fu eksempre, di Danièl nanga den dri mati fu en, Sadrak, Meisak nanga Abedneikow ben de na Babilon, den no ben nyan sani di den Dyu no ben mag nyan. Wi sabi tu taki Danièl ben abi a gwenti fu begi Gado (Dan. 1:8; 6:10). Ma fu di den Babilonsma ben e anbegi falsi gado, meki a no ben makriki gi den Dyu fu du ala san a Wet e taki.

5. Sortu sani Yehovah ben pramisi en pipel èn fu san ede disi ben de wan aparti sani?

⁵ Den Israelsma ben o man dini Gado baka soleki fa a wani? Na a ten dati, a ben gersi leki disi no ben o man, fu di den Babilonsma no ben abi a gwenti fu lusu den srafu fu den. Ma a sani disi no ben o tapu Yehovah Gado fu du san a wani. A ben pramisi en pipel taki a ben o fri den baka èn na dati pasa tu. Gado e du ala ten san a pramisi.​—Yes. 55:11.

6, 7. Fosi wi ben e taki dati Gado pipel go na ini katibo fu Babilon a Bigiwan na ini 1918, ma fu san ede wi musu kenki a fasi disi fa wi ben e denki?

⁶ Yu kan taki dati Kresten ben de na ini wan srefi situwâsi leki den Dyu di ben de na ini katibo na Babilon? Furu yari langa, a tijdschrift disi ben taki dati tru Kresten ben go na ini katibo fu Babilon na ini 1918 èn taki den ben kon fri na ini 1919. Ma na ini na artikel disi èn na ini a wan di e kon, wi o luku fu san ede wi musu kenki a fasi fa wi ben denki fu a tori disi fosi.

⁷ Prakseri fu disi: Babilon a Bigiwan na ala den falsi bribi di de na heri grontapu. Sobun, efu Gado pipel ben de na ini a  makti fu Babilon na ini 1918, dan den ben musu de srafu fu falsi bribi wan pisi ten na fesi kaba. Ma soleki fa a sori, dan na ini den yari bifo a Fosi Grontapufeti, den salfu futuboi fu Gado ben e meki muiti fu kon fri fu Babilon a Bigiwan. Den no ben e tron srafu fu en. A tru taki sma ben e frufolgu den salfu Kresten na a ten fu a Fosi Grontapufeti. Ma a no Babilon a Bigiwan ben e du a sani disi, na den tiriman. Sobun, a no sori leki a pipel fu Yehovah go na ini katibo fu Babilon a Bigiwan na ini 1918.

8. Fruteri fa falsi leri bigin kon na ini a Kresten gemeente. (Luku a prenki na a bigin fu na artikel.)

⁸ Na a Pinksterfesa fu a yari 33, dusundusun Dyu nanga sma di ben teki a Dyu bribi ben salfu nanga santa yeye. Den nyun Kresten disi ben tron „wan spesrutu grupu sma di Gado teki, iya, wan grupu priester di o tiri leki kownu, wan santa pipel, wan pipel di de wan spesrutu gudu”. (Leisi 1 Petrus 2:9, 10.) Solanga den apostel ben de na libi, na den ben e luku a pipel fu Gado. Ma baka di den dede, son man bigin taki „sani di no tru fu hari den disipel kon na den baka” (Tori 20:30; 2 Tes. 2:6-8). Furu fu den man disi ben abi frantwortu na ini den gemeente leki opziener, èn bakaten den bigin kari densrefi beskopu. Na so yu kon abi kerki fesiman di ben feni taki den prenspari moro trawan, aladi Yesus ben taigi den bakaman fu en taki den „alamala na brada” (Mat. 23:8). Fu di den heihei man disi ben lobi den leri fu Aristoteles nanga Plato, meki den bigin leri sma falsi sani na presi fu leri den a soifri leri fu Gado Wortu.

9. Fruteri fa den tiriman fu Rome bigin horibaka gi den falsi Kresten èn san ben de a bakapisi.

⁹ Na ini a yari 313, Grankownu Constantijn fu Rome di no ben de wan Kresten, gi den falsi Kresten disi primisi fu tron wan kerki. Sensi a ten dati, kerki nanga lanti bigin wroko makandra. Luku fu eksempre san pasa. Baka a Konmakandra fu Nicea di Constantijn ben hori nanga den kerki fesiman, a seni wan priester di ben nen Arius go na ini katibo fu di a ben weigri fu bribi taki Yesus na Gado. Bakaten, Grankownu Theodosius I di ben e tiri fu 379-395, meki a falsi Kresten bribi di sma ben kon sabi leki Lomsu Kerki, tron a kerki fu a kondre. Historia skrifiman taki dati na ini a pisi ten dati, den Romesma di ben e dini falsi gado bigin kari densrefi Kresten. Ma fu taki en leti, den falsi Kresten ben e wroko makandra kaba nanga den kerki fu a Gran Kownukondre Rome èn den ben tron Babilon a Bigiwan kaba. Ma yu ben abi wan pikin grupu salfu Kresten ete di yu kan agersi nanga aleisi na mindri takru wiwiri. Aladi den ben e meki muiti fu dini Gado, toku sma no ben wani arki san den ben abi fu taki. (Leisi Mateyus 13:24, 25, 37-39.) Iya, den ben de na ini katibo fu Babilon!

10. San yepi sma di ben e libi wan tu hondro yari Baka Krestes fu kon sabi efu kerki ben e leri sma san tru?

¹⁰ Ma wan tu hondro yari Baka Krestes, furu sma ben man leisi Bijbel na ini Grikitongo noso Latijntongo ete. Sobun, den ben man si a difrenti na mindri den leri fu Gado nanga den falsi kerkileri. Sonwan fu den di ben kon si san Bijbel e taki, no ben e bribi den falsi leri fu kerki. Ma efu den ben taki nanga  trawan fu den sortu sani disi, den ben kan lasi den libi.

11. San den kerki fesiman du fu sorgu taki sma no ben man leisi Bijbel?

¹¹ Baka wan pisi ten, furu sma no ben man leisi Bijbel moro fu di den no ben sabi Grikitongo nanga Latijntongo. Kerki no ben wani tu taki sma vertaal Gado Wortu na ini a tongo di den sma ben e taki. Dati meki soso den kerki fesiman nanga son sma di ben kisi bun skoroleri, ben man leisi Bijbel, aladi a no ala priester ben man leisi èn skrifi bun. Iniwan sma di no ben e agri nanga san kerki ben e leri, ben e kisi hebi strafu. Salfu futuboi fu Gado ben musu kon makandra kibrikibri èn son leisi den no ben man hori konmakandra srefi. Neleki fa a ben de di den Dyu ben de na ini katibo na Babilon, na so den salfu brada fu Krestes no ben man du a wroko fu den na wan orga fasi. Babilon a Bigiwan ben hori sma na ini en makti!

12, 13. Sortu tu sani meki taki Babilon a Bigiwan bigin lasi en makti tapu sma? Tyari disi kon na krin.

¹² Tru Kresten ben o man kon fri fu dini Gado leki fa a wani? Iya! A leti fu Gado bigin skèin safrisafri na ini a dungru di ben de. Tu sani ben meki taki disi pasa. A fosi sani na taki na a ten fu 1450, sma bigin meki masyin fu druk buku. Fosi a ten dati, sma ben e skrifi Bijbel abra nanga anu èn a no ben makriki fu du a wroko disi. Dati meki Bijbel ben diri èn yu no ben man feni en makriki. Sma taki dati wan bun skrifiman ben abi tin mun fanowdu fu skrifi wán Bijbel abra nanga anu. Boiti dati, den ben e skrifi na tapu wan sortu metibuba di ben diri srefisrefi. Ma te wan sma ben e gebroiki masyin nanga papira fu druk Bijbel, a ben e go moro gaw. A ben kan druk 1300 bladzijde na ini wán dei.

 ¹³ Wan tra sani na taki na a bigin fu a di fu 16 yarihondro, wan tu deki-ati man bosroiti fu vertaal Gado Wortu na ini den tongo di sma ben gwenti taki. Furu fu den bigin vertaal Bijbel, aladi den ben kan lasi den libi. Den kerki fesiman ati ben de na dyompo. Den ben frede taki efu Bijbel ben o kon na ini na anu fu sma di ben lobi Gado, dan den ben o bigin tweifri na san kerki e leri. Na dati pasa tu. Di moro Bijbel ben de fu feni, sma bigin leisi en èn den bigin poti aksi soleki: ’Pe na ini Gado Wortu wi e leisi taki wan vagevuur de noso taki sma musu hori mis gi den dedewan? Pe wi e leisi fu paus nanga kardinaal?’ Den kerki fesiman ati ben kon bron srefisrefi! Fa sma ben kan prefuru fu poti den aksi disi? Ma den kerki fesiman no ben libi a tori so. Den ben e krutu furu man nanga uma di no ben e agri nanga den kerkileri. Sonwan fu den leri disi ben komoto fu Aristoteles nanga Plato di ben libi fosi a ten fu Yesus Krestes. Na kerki ben e krutu den sma di musu kisi dedestrafu, ma na lanti ben e sorgu taki den sma kisi den strafu. Den ben e du disi fu di den no ben wani taki sma leisi Bijbel èn taki den tweifri na san kerki e leri. Nofo tron den ben man tapu skreki gi sma. Ma wan tu sma di ben abi deki-ati ben weigri fu meki Babilon a Bigiwan basi den. Den ben kon sabi now san Gado Wortu e taki èn den ben wani leri moro. Na so den ben o kon fri safrisafri fu falsi bribi.

14. (a) Sortu sani pasa di meki taki furu sma kon frustan Gado Wortu moro bun na ini 1870? (b) Fruteri san Brada Russell du fu kon frustan den tru leri fu Bijbel moro bun?

¹⁴ Furu sma di ben wani kon sabi Bijbel moro bun, lowe go na den kondre pe kerki no ben abi so furu makti. Den ben wani leisi èn studeri Bijbel, èn taki fu en sondro taki wan sma taigi den san den musu denki. Wan fu den kondre disi ben de Amerkankondre. Na drape Charles Taze Russell nanga den mati fu en bigin ondrosuku Bijbel na ini 1870. Na a bigin, Brada Russell ben wani kon sabi sortuwan fu den kerki ben e leri san tru. Dati meki a ben e ondrosuku den leri fu den difrenti Kresten kerki, èn den leri fu tra kerki di no abi a Kresten bribi. Dan a ben e luku efu den leri disi ben e kruderi nanga san Bijbel e taki. Heri esi a kon si taki nowan fu den kerki disi ben e du ala san Gado Wortu e taki. Wan leisi Russell go taki srefi nanga kerki fesiman fu di a ben howpu taki den man disi ben o teki a tru leri di en nanga den mati fu en ben kon si na ini Bijbel èn taki den ben o leri den kerkisma den sani disi. Ma den kerki fesiman no ben wani. Now den Bijbel Ondrosukuman ben musu teki wan bosroiti: Den no ben kan de wán nanga sma di ben e horibaka gi falsi bribi.​—Leisi 2 Korentesma 6:14.

15. (a) O ten Kresten go na ini katibo fu Babilon a Bigiwan? (b) Sortu aksi wi o luku na ini a tra artikel?

¹⁵ Sobun, san wi kon si na taki tru Kresten kon de na ini katibo fu Babilon syatu baka a dede fu den lasti apostel. Ma wan tu aksi de di musu kisi piki ete: Sortu tra buweisi wi abi taki na ini den yari fosi 1914, den salfu Kresten ben e du muiti fu kon fri fu Babilon a Bigiwan? A tru taki Yehovah ati bron nanga den futuboi fu en fu di den no ben e preiki fayafaya na a ten fu a Fosi Grontapufeti? A de so taki son brada ben teki sei na ini a feti èn taki disi ben meki Yehovah mandi nanga den? Wan lasti aksi na: Efu den Kresten ben go na ini katibo fu falsi bribi syatu baka a yari 100, dan o ten den kon fri? Disi na moi aksi. Na ini a tra artikel wi o feni a piki tapu den aksi disi.