„EFU wán fu unu weigri fu feti teige Fransikondre noso Ingrisikondre, dan wi o kiri un alamala!” Na dati wan ofsiri fu den Nazisma ben bari gi wan grupu Yehovah Kotoigi na a ten fu a Di Fu Tu Grontapufeti. Aladi den SS-srudati ben tanapu krosibei nanga den gon fu den, toku nowan fu den brada nanga sisa pasa Yehovah wet. A no de fu taki dati den sori deki-ati trutru! Na eksempre disi e sori krin fa wi leki Yehovah Kotoigi e denki: Wi e weigri fu go feti te kondre e feti nanga makandra. Awinsi sma wani kiri wi, toku wi no e teki sei na ini den feti fu a grontapu disi.

1. DEN ANBEGIMAN FU GADO BEN DE FU A SREFI PIPEL

Na ini owruten, Yehovah teki wán pipel leki a pipel fu en èn dati ben de a pipel fu Israel. Yehovah ben kari den Israelsma en „spesrutu gudu . . . na mindri ala tra pipel” (Eks. 19:5). Gado ben gi den wan spesrutu kondre tu pe den ben musu tan. Sobun, te Gado ben e taigi den Israelsma fu go feti nanga tra pipel, dan den no ben e kiri tra anbegiman fu Yehovah. *

Na ini a ten disi, den tru anbegiman fu Yehovah e komoto fu „ala kondre, lo, pipel, nanga tongo” (Openb. 7:9). Efu a pipel fu Gado ben o go feti, dan den ben o feti nanga den eigi brada nanga sisa èn den ben kan kiri den srefi.

 2. YEHOVAH BEN TAIGI DEN ISRAELSMA FU GO FETI

Na ini owruten, Yehovah ben e bosroiti o ten èn fu san ede den Israelsma ben musu go feti. Fu eksempre, Gado ben taigi den Israelsma fu go feti nanga den Kanansma di ben gwenti anbegi ogri yeye, den ben e du wan lo morsu seks sani, èn den ben e gi den pikin fu den leki ofrandi na den gado fu den. Yehovah ben taigi den Israelsma fu kiri den sma di ben e du den tegu sani disi na ini a Pramisi Kondre, so taki a pipel fu en no ben o teki den tegu gwenti fu den abra (Lef. 18:24, 25). Baka di den Israelsma go libi na ini a Pramisi Kondre, dan Yehovah ben e taigi den son leisi fu go feti nanga feanti di ben wani kwinsi den (2 Sam. 5:17-25). Ma noiti Yehovah ben e meki den Israelsma srefi bosroiti o ten den ben o go feti. Te den ben e du dati, dan nofo tron sani no ben e waka bun kwetikweti.​—Num. 14:41-45; 2 Kron. 35:20-24.

Na ini a ten disi, Yehovah no e taigi sma fu go feti. Den kondre di e feti nanga makandra no e du dati gi Gado, ma den e suku den eigi bun. Kande den e bigin feti nanga makandra fu abi moro gron, fu meki moro moni, noso fu di den wani taki tra kondre teki a politiek sistema fu den abra. Ma fa a de nanga den sma di e taki dati den e feti na ini a nen fu Gado fu horibaka gi a bribi fu den noso fu kiri den feanti fu Gado? Yehovah o kibri den tru anbegiman fu en èn a o kiri den feanti fu en na ini wan feti di o feti na ini a ten di o kon. A feti disi na a feti fu Armagedon (Openb. 16:14, 16). A no den anbegiman fu Yehovah o feti na ini a feti dati, ma na soso engel fu hemel.​—Openb. 19:11-15.

3. DEN ISRAELSMA NO BEN E KIRI DEN SMA DI BEN E BRIBI NA INI YEHOVAH

Na ini owruten, a legre fu Israel ben gwenti sori sari-ati gi den sma di ben e sori taki den ben e bribi na ini Gado èn den ben e kiri soso den sma di Yehovah ben wani taki den ben musu kiri. Luku tu eksempre. Aladi Yehovah ben taigi den Israelsma fu pori a foto Yerikow, toku den Israelsma no kiri Rakab nanga en famiri fu di den ben abi bribi  (Yos. 2:9-16; 6:16, 17). Bakaten, den kibri a libi fu ala sma na ini a foto Gibeon, fu di den sma dati ben sori lespeki gi Gado.​—Yos. 9:3-9, 17-19.

Na ini a ten disi, den kondre di e feti nanga makandra no e draidrai fu kiri sma di e bribi na ini Gado èn den e kiri srefi sma di no de na ini a feti.

4. DEN ISRAELSMA BEN MUSU HORI DENSREFI NA DEN WET FU GADO TE DEN BEN E FETI

Na ini owruten, Yehovah ben wani taki den srudati fu Israel ben musu hori densrefi na den wet fu en te den ben e go na feti. Fu eksempre, son leisi Gado ben wani taki den aksi den feanti fosi ’efu den ben wani gi densrefi abra’ (Deut. 20:10). Yehovah ben wani tu taki den srudati fu Israel ben musu hori densrefi krin nanga a kampu fu den èn taki den ben musu tyari densrefi na wan fasi di fiti (Deut. 23:9-14). Den legre fu den tra pipel ben gwenti fu verkracht den uma fu den kondre di den ben teki abra, ma Yehovah ben taigi den Israelsma fu no du dati. Fu taki en leti, efu den ben wani trow nanga wan uma di den ben teki leki katiboman, dan den ben musu wakti wán mun.​—Deut. 21:10-13.

Na ini a ten disi, furu kondre meki frubontu nanga makandra fu hori densrefi na spesrutu wet te feti de. Aladi den wet disi meki fu kibri sma di no de na ini a feti, toku nofo tron den kondre no e hori densrefi na den wet disi.

5. GADO BEN E FETI GI EN PIPEL

Na ini owruten, Yehovah feti gi den Israelsma èn furu tron a du wondru fu meki den wini a feti. Fu eksempre, fa Yehovah yepi den Israelsma fu teki a foto Yerikow abra? Di Yehovah taigi den Israelsma fu „bari bun tranga leki fa fetiman e bari te den e go na feti”, dan „den skotu fu a foto bigin broko fadon”. A sani disi meki en moro makelek gi den Israelsma fu teki a foto abra (Yos. 6:20). Fa den wini a feti teige den Amorietsma? Bijbel e taki: „Yehovah meki bigi pisi ijs fadon komoto fu hemel kon na den tapu . . . Den Amorietsma di dede fu di den pisipisi ijs kiri den, ben furu moro leki den Amorietsma di den Israelsma kiri nanga feti-owru.”​—Yos. 10:6-11.

TRU KRESTEN E SUKU FU LIBI NA INI FREIDE NANGA TRAWAN

Soleki fa wi si, dan a situwâsi fu wi na ini a ten disi e difrenti fu Israel fu owruten. Ma den sani di wi luku a no den wan-enkri sani di e meki taki wi no e go na feti. Moro sani de. Fu eksempre, Gado ben taki dati na ini den lasti dei, a pipel fu en no ben o „leri fu feti moro”. Dati wani taki dati den no o go na feti (Yes. 2:2-4). Boiti dati, Krestes ben taki dati den disipel fu en ’no ben o de wan pisi fu grontapu’. Disi wani taki dati den no ben o teki sei na ini den feti fu a grontapu disi.​—Yoh. 15:19.

Krestes ben taigi den bakaman fu en fu du moro. A taigi den fu luku bun nanga denki di kan meki taki den kisi bita-ati, atibron, noso denki di kan tyari feti kon (Mat. 5:21, 22). A ben taigi den bakaman fu en tu fu de „sma di e suku fu libi bun nanga trawan” èn fu lobi den feanti fu den.​—Mat. 5:9, 44.

Ma fa a de nanga wi? A no de fu taki dati wi no wani go na feti. Ma a kan taki wi no lobi wan spesrutu brada noso sisa? Meki wi du ala muiti fu puru den sortu firi dati na ini wi ati.​—Yak. 4:1, 11.

Wi no e bumui nanga den feti fu a grontapu disi. Na presi fu dati wi e du tranga muiti fu abi freide nanga lobi na wi mindri (Yoh. 13:34, 35). Meki wi abi a fasti bosroiti fu no teki sei na ini grontapu afersi, aladi wi e tan wakti a dei te Yehovah o tyari wan kaba kon na feti fu ala ten.​—Ps. 46:9.