Bijbel e taki dati Goliat ben „langa sowan dri meter” (1 Samuel 17:4). Son sma feni nomonomo taki Goliat no ben kan langa so. Ma prakseri a tori disi: A moro langa man di sma sabi na ini a ten fu wi, ben langa moro leki 2.7 meter. Sobun, yu denki taki Goliat no ben kan de pikinso moro langa leki a man disi? Goliat ben de wan Rafasma èn furu fu den man dati ben bigi srefisrefi. Wan dokumenti fu Egepte fu a pisi ten fu 1200 Fosi Krestes, e taki dati sma ben frede son fetiman na ini a kontren fu Kanan fu di den ben langa moro leki 2.4 meter. Sobun, wi kan bribi taki Goliat ben langa sowan 3 meter, aladi furu sma no de di langa so.

Wan ten ben de taki sabiman ben pruberi fu sori taki Kownu David no ben de wan trutru sma. Ma now a moro muilek gi den fu du dati. Sabiman di e ondrosuku owruten sani feni wan sani pe den wortu disi skrifi na tapu: „Na oso fu David”. Boiti dati, den sani di Yesus Krestes taki e sori taki a ben e si David leki wan trutru sma (Mateyus 12:3; 22:43-45). Wi e bribi taki Yesus na a Mesias trutru fu di Bijbel e sori finifini taki en papa nanga en mama ben de bakapikin fu Kownu David (Mateyus 1:6-16; Lukas 3:23-31). Sobun, efu David na wan afo fu Yesus, dan David ben musu fu de wan trutru sma.

Bijbel e taki dati a feti ben pasa na Ela-lagipresi. Bijbel e taki tu dati den Filisteasma ben seti kampu na a skin fu wan bergi di ben de na mindri den foto Soko nanga Aseka. Den Israelsma ben seti den kampu na wan bergiskin na a tra sei fu a lagipresi. Den presi disi ben de trutru presi?

Wan man di ben go na a kontren dati no so langa pasa, ben taki: „A man di tyari wi go luku a kontren no ben de wan kerkisma. Di a tyari wi go na Ela-lagipresi a meki wi waka wan pasi di tyari wi go na a ede fu wan bergi. Di wi ben e tanapu e luku a lagipresi, dan a meki wi leisi 1 Samuel 17:1-3. Dan a sori go na abrasei fu a lagipresi èn a taki: ’Drape na yu kruktu-anusei yu kan si pe a foto Soko ben de.’ A drai, dan a taki: ’Drape na yu reti-anusei, yu kan si pe a foto Aseka ben de. Den Filisteasma ben seti kampu na mindri den foto dati, na tapu den bergi di yu e si na abrasei. Sobun, a kan taki wi e tanapu leti pe a kampu fu den Israelsma ben de.’ Mi prakseri taki kande Saul nanga David ben tanapu leti dyaso pe mi e tanapu. Baka dati wi saka go na ini a lagipresi, dan wi abra wan liba di ben kon drei èn di ben lai ston. Mi ben si kaba fa David e bukundu fu piki feifi grati ston. Nanga wan fu den a kiri Goliat.” A man disi nanga furu tra sma di ben go luku a presi, fruwondru srefisrefi fu den finifini sani di Bijbel e taki fu a presi disi.

Reide no de fu taki dati a tori fu David nanga Goliat no tru. Den sma disi ben de trutru sma èn a pasa na wan trutru presi. San moro prenspari, na taki a tori disi skrifi na ini Gado Wortu. Sobun, a tori disi kon fu a Gado „di no man lei”.​—Titus 1:2; 2 Timoteyus 3:16.