DAVID e luku bun taki den srudati di e lon pasa en no pusu en trowe. Yu ben kan si taki den srudati ben e frede wan sani. Fu san ede den ben frede so? Kande David ben e yere ibri tron baka fa den ben e taki a srefi sani. Den alamala ben e kari a nen fu wan man. Ne David luku go na a lagipresi èn a si wan bigiskin man di ben e tapu skreki gi sma. Kande noiti ete David ben si so wan bigi man.

A man ben nen Goliat. David ben kan si fu san ede den srudati ben e frede en. A ben bigi leki wan bergi. A kan taki a ben hebi moro leki tu bigi man makandra. San moro ogri srefi, na taki a man disi ben abi kefalek fetisani èn a ben de wan tranga fetiman di ben sabi feti. Goliat ben bari sani gi den srudati fu Israel. Prakseri fa en tranga sten ben de fu yere na ini a heri presi di a ben e spotu a legre fu Israel nanga Saul, a kownu fu den. A ben e kari iniwan man di ben abi deki-ati fu kon feti nanga en. A man di ben o wini, na a kondre dati ben o wini a feti.​—1 Samuel 17:4-10.

Den Israelsma ben e frede. Kownu Saul ben e frede tu. David kon sabi taki na so sani ben de moro leki wán mun kaba! Den tu legre, a di fu den Filisteasma nanga a di fu Israel, ben e tanapu e luku makandra nomo aladi Goliat ben e spotu den Israelsma dei fu dei. David no ben lobi a sani disi srefisrefi. A ben de wan bigi syen taki a kownu fu Israel nanga den srudati fu en, sosrefi dri bigi brada fu David, ben e frede so! Gi David, a man Goliat di ben e anbegi falsi gado no ben e gi a legre fu Israel syen nomo. A ben e du wan moro ogri sani. A ben e spotu a Gado fu Israel, Yehovah! Ma san David ben kan du? A ben de wan yongu boi ete. San wi na ini a ten disi kan leri fu a bribi fu David?​—1 Samuel 17:11-14.

Meki wi go luku san ben pasa wan tu mun na fesi. Neti ben e fadon di David ben e luku den skapu fu en papa na den bergi krosibei fu Betlehem. David ben de wan moi rediredi yonkuman di ben abi moi ai. Soleki fa a sori, a no ben abi 20 yari ete èn a ben koni. Te a no ben abi noti fu du, a ben e prei harpu èn a ben e singi fu den moi sani di Gado meki. Fu di a ben lobi prei a harpu, meki a ben man prei en heri bun. Ma a neti dati di David ben de na den bergi, en papa seni kari en. A ben musu kon wantewante.​—1 Samuel 16:12.

Di a doro drape, a si en papa e taki nanga wan bun owru man. A man dati ben de a profeiti Samuel. Yehovah ben seni en kon fu salfu wan fu den manpikin fu Isai leki a nyun kownu fu Israel! Samuel ben si den seibi brada fu David kaba, ma Yehovah ben sori en krin taki a no ben wani nowan fu den. Ma di David doro drape, Yehovah taigi Samuel: „Salfu en, bika na en mi teki!” Na fesi ala den bigi brada fu David, Samuel teki a tutu di ben abi wan spesrutu oli na ini èn a kanti pikinso na tapu David en ede. Sensi a dei dati, David en libi kenki. Bijbel e taki: „Sensi a dei dati, a yeye fu Yehovah ben de na tapu David.”​—1 Samuel 16:1, 5-11, 13.

Ma a de so taki sensi a ten dati, David bigin feti fu tron kownu? Nôno. A ben e wakti nanga pasensi teleki a yeye fu Yehovah ben o sori en o ten a ben  musu teki moro bigi frantwortu na en tapu. Solanga a ten dati no ben doro, David tan du a skapuman-wroko fu en. A ben e du a wroko dati nanga en heri ati èn sondro frede. Tu leisi ogri meti pruberi fu kiri den skapu fu en papa. Wan leisi a ben de wan lew, wan tra leisi a ben de wan beer. David no pruberi nomo fu yagi den ogri meti dati gowe. Na presi fu dati, a bigin feti nanga den meti disi fu kibri den skapu fu en papa. Ala den tu leisi, en wawan kiri den ogri meti dati!​—1 Samuel 17:34-36; Yesaya 31:4.

Baka wan pisi ten, wan tra sma seni kari David. Kownu Saul ben yere fu den bun sani di David du. Aladi Saul ben de wan tranga fetiman ete, toku Yehovah no ben feni en bun moro fu di a ben trangayesi en. Yehovah ben puru en yeye na Saul tapu. Dati meki Saul ben gwenti kisi atibron, a no ben e frutrow nowan sma èn a ben e du ogri-ati sani. Te Saul ben abi den takru prakseri disi, dan wan sani di ben kan meki a firi moro bun, na poku. Sonwan fu den futuboi fu Saul ben kon yere taki David ben de wan pokuman èn taki a ben sabi feti. Dati meki Saul seni kari David. Heri esi David kisi a wroko fu prei poku gi Saul èn fu syow den fetisani fu en.​—1 Samuel 15:26-29; 16:14-23.

Spesrutu yonguwan kan leri furu fu a fasi fa David sori bribi na ini den situwâsi disi. Te David no ben abi noti fu du, a ben e du sani di ben e yepi en fu tron wan moro bun mati fu Yehovah. Boiti dati, a ben e teki en ten fu leri du son sani di ben kan yepi en fu du iniwan wroko. Ma san moro prenspari, na taki a meki a yeye fu Yehovah tiri en. Dati na moi sani di wi alamala kan leri!​—Preikiman 12:1.

Di David ben e wroko gi Saul, a ben gwenti go na oso fu go luku den skapu. Son leisi a ben de na oso wan langa pisi ten. Wan fu den leisi dati Isai seni David fu go luku den dri moro owru manpikin fu en di ben e feti na ini a legre fu Saul. David du san en papa aksi en èn a hari go na Ela-lagipresi fu tyari nyanyan-sani gi den brada fu en. Di a doro drape, a skreki fu si taki den tu legre ben e tanapu luku makandra nomo, soleki fa wi leisi na a bigin fu na artikel. Wan legre ben e tanapu na wan bergi na a wan sei, èn a tra legre ben e tanapu na wan bergi na a tra sei. A lagipresi ben de na den mindri.​—1 Samuel 17:1-3, 15-19.

David no ben feni a sani disi bun kwetikweti. Fa a legre fu a libilibi Gado, Yehovah, ben kan lon gowe gi wan libisma? Èn san moro ogri, na taki a man disi ben e anbegi falsi gado! Gi David, Goliat no ben e spotu den srudati fu Israel nomo, ma a ben e spotu Yehovah. Dati meki a bigin taki nanga den srudati fa den ben kan wini Goliat. Fosi yu denki, David en moro bigi brada Eliab kon yere san a ben wani du. A puru wiwiri gi en pikin brada èn a bari en taki a ben kon drape soso fu luku fa den srudati ben e kiri makandra na ini a feti. Ma David piki en: „San mi du baka? Na aksi mi e aksi wan sani nomo.” Ne David go doro fu taigi sma taki a ben de seiker taki den ben o man wini Goliat. Te fu kaba wan sma fruteri Saul san David taki. A kownu seni kari David.​—1 Samuel 17:23-31.

David pruberi fu gi a kownu deki-ati nanga den wortu disi: „No meki nowan man lasi-ati.” Saul nanga den futuboi fu en ben lasi-ati fu Goliat ede. Kande den ben meki a fowtu di ala sma ben o meki fu teki den srefi gersi nanga a bigiskin man dati.  Kande den ben e si taki den ben e doro soso na Goliat en bere noso en borsu. Den ben kan si kaba fa a bigiskin man dati ben o kiri den esi-esi nanga den fetisani fu en. Ma David no ben e denki so. Soleki fa wi o si, a ben e si sani heri tra fasi. Dati meki a taki dati en srefi ben o go feti nanga Goliat.​—1 Samuel 17:32.

Saul taigi en: „Yu no o man feti nanga a man, bika yu na wan boi ete. Sensi a man disi yongu, a de wan fetiman kaba.” A tru taki David ben de wan boi ete? Nôno, a ben bigi kaba, ma a ben yongu tumusi fu go na ini a legre èn a kan taki a ben gersi wan yongu boi. Sma ben sabi David kaba leki wan yonguman di no ben frede fu feti èn a kan taki a ben abi sowan 18 yari.​—1 Samuel 16:18; 17:33.

Di David fruteri Saul fa a ben kiri a lew nanga a beer, dan Saul bigin bribi en. Na dyaf David ben e dyaf? Kwetikweti. David ben sabi fa a du kon taki a ben wini den feti dati. A taki: „Na Yehovah puru mi na ini na anu fu a lew èn na ini na anu fu a beer. Na en o puru mi na ini na anu fu a Filistea man disi.” Te fu kaba David ben man overtoigi Saul èn dati meki Saul taigi en: „Go. Meki Yehovah srefi de nanga yu.”​—1 Samuel 17:37.

Yu wani abi bribi neleki David? Hori na prakseri taki David ben abi trutru bribi. A ben e bribi na ini a Gado fu en fu di a ben kon sabi en èn a ben si fa Yehovah ben yepi en kaba. A ben sabi Yehovah leki wan lobi-ati Gado di e kibri sma èn di e du san a pramisi. Efu wi wani abi bribi neleki David, dan wi musu kon sabi a Gado fu Bijbel moro bun. Te wi e du san wi leri, dan wi o abi bun bakapisi èn dati o tranga a bribi fu wi.​—Hebrewsma 11:1.

Saul pruberi fosi fu meki David weri den sani di a ben e weri fu go feti. Kande den ben de fu kopro neleki den di fu Goliat. A kan taki a ben weri wan bigi empi tu di ben meki fu pisipisi isri noso kopro di seti leki fisibuba. Ma di David pruberi fu waka nanga den bigi hebi sani dati, dan a kon si taki a no ben o man feti nanga den. A no ben leri fu feti leki wan srudati. Sobun, a no ben gwenti weri fetisani. Boiti dati den fetisani fu Saul ben musu fu bigi gi en, fu di Saul ben de a moro langa man na ini Israel! (1 Samuel 9:2) A puru ala den sani dati na en skin èn a teki den sani di wan skapuman ben gwenti abi na en fu kibri den skapu fu en.​—1 Samuel 17:38-40.

David teki en skapuman-tiki, a poti wan tas na en skowru èn a teki wan slenger. Kande a gersi leki a no ben o man du noti nanga a slenger, ma dati no ben de so kwetikweti. A slenger ben abi wan pisi leer noso wan pisi krosi di ben fasi na tu titei noso banti. A ben de a yoisti fetisani gi wan skapuman. A skapuman ben e poti wan ston na ini a pisi leer, dan a ben e drai a slenger bun tranga na loktu. Te a ben lusu wan fu den banti, a ston ben kan frei gowe bun tranga. Na so a ben kan kiri wan meti noso wan libisma. A fetisani disi ben e wroko so bun, taki son legre ben abi grupu srudati di ben e feti nanga slenger.

Sobun, nanga wan slenger David lon go miti a feanti fu en. Wi kan frustan fa David ben e begi Gado fayafaya di a bukundu fu piki feifi pikin grati ston tapu a drei gron fu a liba na ini a lagipresi. Dan a go miti Goliat. A no waka go, ma a lon go!

San Goliat ben e denki di a si suma ben kon fu feti nanga en? Bijbel e taki: „A bigin wisiwasi en, fu di David ben de wan moi rediredi boi.” Goliat bari: „Na si yu e si mi leki wan dagu, taki yu e kon nanga wan tiki na mi tapu?” Soleki fa a sori, dan a ben si a tiki fu David, ma a no luku a slenger. A fluku David na ini a nen fu den gado fu den Filisteasma èn a sweri taki a ben o meki den fowru nanga den busimeti nyan a meti fu David.​—1 Samuel 17:41-44.

Te na a dei fu tide a fasi fa David piki Goliat na wan moi eksempre fu a bribi di a ben abi. Prakseri fa a yongu David bari gi Goliat: „Yu e kon na mi tapu nanga wan feti-owru, wan bigi lansri nanga wan pikin lansri. Ma mi e kon na ini a nen fu Yehovah di e tiri den legre, iya, a Gado di e tiri a legre fu Israel. Na en yu e spotu.” David ben sabi taki a no prenspari o tranga wan libisma de èn omeni fetisani a abi. Goliat ben spotu Yehovah Gado èn Yehovah ben o du wan sani. Soleki fa David ben taki, „na Yehovah abi a feti”.​—1 Samuel 17:45-47.

David ben si taki Goliat bigi èn taki a ben abi kefalek fetisani. Ma toku David no meki den sani dati tapu skreki gi en. A no meki a fowtu di Saul nanga  den srudati fu a legre fu en ben meki. David no teki ensrefi gersi nanga Goliat. Na presi fu dati a ben sabi taki Yehovah ben bigi moro Goliat. A tru taki Goliat ben langa sowan 3 meter èn taki a ben bigi moro den tra srudati. Ma o bigi a ben de te yu ben teki en gersi nanga a Moro Heiwan fu hemel nanga grontapu? Iya, neleki iniwan tra libisma a ben pikin leki wan mira èn Yehovah ben o kiri en!

Di David lon go miti a feanti, a teki wan ston na ini en tas. A poti en na ini a slenger èn a drai a slenger na loktu teleki a bigin froiti. Goliat bigin waka go na David èn a kan taki a ben waka leti baka a man di ben e syow a bigi skelt fu en. Fu taki en leti, a no ben bun gi Goliat taki a ben langa so. Fu di a man di ben e syow a skelt fu en no ben langa leki en, meki a no ben man opo a skelt so hei fu kibri na ede fu Goliat. Èn na leti drape David ben o slenger a ston go.​—1 Samuel 17:41.

David lusu a ston. Prakseri fa ala sani ben tiri di a ston ben e frei go na ede fu Goliat. A no de fu taki dati Yehovah sorgu taki David no ben o abi fu slenger ete wan ston. A ston kisi Goliat na en fesi-ede èn a boro go na inisei. A bigiskin man fadon na gron na tapu en fesi! A srudati di ben e syow a skelt fu en skreki èn a lon gowe. David waka go na Goliat, a teki a feti-owru fu en èn a koti en ede puru.​—1 Samuel 17:48-51.

Te fu kaba, Saul nanga den srudati fu en kisi deki-ati. Nanga bigi babari den lon go feti nanga den Filisteasma. A feti waka neleki fa David ben taigi Goliat. A ben taki: „Yehovah . . . o meki wi wini unu.”​—1 Samuel 17:47, 52, 53.

Na ini a ten disi, den futuboi fu Gado no e teki prati na feti. A ten dati pasa kaba (Mateyus 26:52). Toku wi musu abi bribi neleki David. Neleki en, wi musu si Yehovah leki wan trutru Gado. Iya, wi musu si en leki a wan-enkri Gado di libisma musu dini èn lespeki. Son leisi a kan gersi leki den problema fu wi bigi tumusi, ma den problema na noti te wi e teki den gersi nanga a bigi krakti fu Yehovah. Efu wi e teki Yehovah leki a Gado fu wi èn efu wi e bribi na ini en neleki David, dan nowan tesi noso problema o meki wi lasi-ati. Nowan sani de di Yehovah no man du!