Rose e taki: „Mi abi wan siki di e meki taki mi abi hebi pen doronomo. Bun furu sani de di mi no man du moro.” Wan fu den moro bigi broko-ede di a ben abi, na taki te a ben e studeri Bijbel èn te a ben e du tra sani na ini na anbegi, dan a no ben man poti ala en prakseri na san a e du. Ma a sani di Yesus taki na Mateyus 19:26 ben yepi en furu. Drape skrifi: „Gado man du ala sani.” Rose leri taki moro leki wán fasi de fu studeri. Fu di a abi furu pen, meki a no man leisi. Dati meki a bigin arki Bijbel nanga tra buku di e taki fu Bijbel na tapu mp3. * Rose taki: „Efu mi no ben abi den sani disi, mi no sabi fa mi ben o man tan abi wan bun matifasi nanga Gado.”

Te Rose e sari taki a no man du san a ben man du fosi, dan den wortu fu 2 Korentesma 8:12 e trowstu en: „Te wan sma de klariklari fu gi, dan dati bun spesrutu te a gi san a man gi. A no musu gi san a no man gi.” A tekst disi e memre Rose taki Gado breiti nanga san a e du, fu di a e du ala san a man, awansi a no furu.

Delphine, di wi taki fu en kaba, e taki: „Di mi meisje fu 18 yari dede, a ben hati mi so te, taki mi no  ben sabi fa mi ben o libi go doro. Mi heri libi ben o kenki.” Ma den wortu na ini Psalm 94:19 ben de wan bigi trowstu gi en. Drape a psalm skrifiman taigi Gado: „Di den prakseri fu mi di ben e trobi mi, ben kon hebi gi mi, dan na yu ben e trowstu mi, so taki mi ben man prisiri baka.” Delphine taki: „Mi begi Yehovah fu yepi mi fu feni sani di mi kan du èn di ben o meki mi firi moro bun.”

A bigin gebroiki furu fu en ten fu yepi sma. Bakaten a bigin si ensrefi leki kreiti. Awinsi a kreiti broko, yu kan tan skrifi nanga en. Na so a de tu nanga Delphine. Awinsi en ati ben broko, toku a kon si taki a ben kan yepi tra sma ete. A e taki: „Mi si taki te mi ben e gebroiki Bijbel fu trowstu den sma di mi e studeri Bijbel nanga den, dan na den momenti dati Yehovah e trowstu mi tu.” Delphine skrifi den nen fu sma na ini Bijbel di ben e sari fu di wan sma fu den ben dede. A si taki ’den alamala ben e begi furu’. A leri tu taki „yu kan feni trowstu soso te yu e leisi Bijbel”.

Delphine leri wan tra sani di a studeri Bijbel. A leri fu poti prakseri na a ten di e kon èn fu no tan prakseri den sani di pasa. A howpu di skrifi na ini Tori fu den apostel 24:15 e trowstu en. A tekst e taki: „Gado sa gi wan opobaka na den sma di du san reti èn na den sma di no du san reti.” Yu denki taki Delphine de seiker taki Yehovah o gi en meisje wan opobaka? Delphine srefi e piki: „Mi e si mi meisje kaba na ini a ten di e kon. A dei poti kaba te wi o miti. A de neleki a dei skrifi kaba na tapu a kalender fu mi Papa. Mi e si kaba fa mi nanga en o de na ini wi dyari èn fa mi o lobi en a srefi fasi leki fa mi ben lobi en di a gebore.”