Delphine, di wi ben taki fu en na ini na artikel na fesi, taki dati a ben abi a firi fu dringi furu sopi fu kan frigiti den broko-ede fu en. Bijbel no e taki dati wi no mag dringi pikinso sopi, ma a e taki: „No tron wan fu den sma di e dringi win pasa marki” (Odo 23:20). Ibri yari milyunmilyun sma e dede fu di den e dringi tumusi furu sopi, sma abi seryusu problema nanga na gosontu fu den, osofamiri e prati noso sani no e go bun nanga den. Furu den problema disi no abi fu de efu sma e du san Bijbel e taki.

Na dati Delphine du tu. Now a e taki: „Mi kon si taki sopi no ben e puru den broko-ede fu mi. Mi teki a koni rai di skrifi na Filipisma 4:6, 7: ’No broko un ede nanga nowan sani, ma begi Gado fayafaya. Na so a o kon sabi san unu wani aksi en.’ Ibri neti te den prakseri fu mi nanga den broko-ede ben e moro mi, mi ben e begi Yehovah. Mi ben e fruteri en fa mi e firi. Efu wan sani ben e meki mi ati bron, efu wan sani ben pasa di hati mi noso efu mi ben lasi-ati, dan mi ben e aksi en fu yepi mi so taki mi kan firi bun baka. Te mamanten, mi ben e sorgu taki mi no e prakseri den sani dati moro. A gwenti di mi abi fu begi Yehovah, yepi mi fu no tan prakseri sani di e meki mi lasi-ati, ma fu prakseri sani di e meki mi firi bun. Mi bosroiti taki noiti moro mi o dringi sopi. Fu di mi ben e firi bun now, meki mi no ben wani lasi a firi disi noiti.”

Hurudu na wan fu den moro bigi problema di e tyari furu sari kon gi trowpatna. Bijbel e sori san na wan tu sani di e meki taki sma e du hurudu. Fu eksempre te sma e prei nanga den firi fu wan trawan noso te den e luku porno. Fu man wai pasi gi hurudu, dan wi no musu du den sani disi. Wan yonguman di nen Samuel e taki: „A makelek fu prei nanga den firi fu trawan. Awinsi mi no ben lobi wan meisje, mi e firi switi te mi ben e prei nanga den firi fu en, fu di mi ben kan si taki a lobi mi.” Sma bigin krutu Samuel taki a lobi prei nanga den firi fu trawan, srefi te a no ben e du dati fu espresi. Di Samuel yere a tori, dan a taki dati a o go doro fu espresi. Ma te fu kaba en konsensi bigin fon en. Now a e taki: „A gwenti dati no bun kwetikweti. A e meki taki yu e denki yusrefi nomo.”

Samuel leisi wan artikel fu yongusma tapu a website jw.org. Dan a go denki fu Odo 20:11 pe skrifi: „Den sani di wan boi e du e sori suma a de trutru. Na so sma kan sabi efu a e du san reti èn efu a e du sani nanga wan krin ati.” Fa a tekst disi yepi en? Samuel kon si taki a no ben e du san reti. Now a e taki: „Mi leri tu taki wan yonguwan di e prei nanga tra sma firi no o man de wan bun trowpatna. Mi bigin denki fa mi frow ben o firi te mi trow èn te a e si taki mi e prei nanga den firi fu wan tra uma. Dati yepi mi fu si taki a no fu di a makelek fu prei nanga den firi fu trawan, meki a de wan bun sani fu du.” Samuel kenki. Fu di a no ben e prei moro nanga den firi fu trawan, meki dati yepi en tu fu no du hurudu.

Antonio ben abi wan moro bigi problema di ben kan meki taki a go du hurudu. A ben abi a gwenti luku porno. Aladi a ben trow nanga wan uma di a ben lobi kefalek, toku wanwan leisi a ben e luku porno. A taki dati a kisi yepi trutru di a prakseri fu 1 Petrus 5:8. Drape skrifi: „Tan nanga krin frustan. De na ai. Didibri, a feanti fu unu, e waka lontu leki wan lew di e bari, fu di a e suku fu swari wan sma.” Antonio e taki: „Seks prenki de na ala sei èn te yu si den, den e tan na ini yu prakseri. A tekst dati yepi mi fu prakseri suma e meki den sortu tesi disi miti wi. Mi leri fu si den prenki dati leki wan sani di e kon fu Didibri. Now mi sabi taki na Yehovah wawan kan yepi mi fu ’tan nanga krin frustan èn fu de na ai’ so taki mi no meki den sani dati pori mi frustan, mi ati nanga mi trowlibi.” Antonio kisi a yepi di a ben abi fanowdu èn te fu kaba a tapu fu luku porno. A sani dati yepi en fu no kon na ini moro bigi problema.

Sobun, a de krin taki Bijbel abi bun rai di kan yepi wi fu no kon na ini bigi problema. Ma fa a de efu wan sma de na ini problema kaba èn a gersi leki a no man komoto moro? Meki wi go luku fa Gado Wortu kan yepi wi fu lusu den sortu problema dati.