Sensi owruten, sma fu difrenti kulturu ben e si Bijbel leki wan buku nanga tru tori di den kan bribi. Na ini a ten disi, milyunmilyun sma e du san Bijbel e leri. Ma trawan feni taki Bijbel no prenspari èn taki den tori na ini no tru. San yu e denki? Yu kan feni san tru na ini Bijbel?

Fa yu kan kon sabi efu yu kan frutrow Bijbel? Kon meki wi taki dati furu yari langa yu abi wan mati di e fruteri yu ala ten san tru. Yu ben o frutrow a mati dati. Yu kan agersi Bijbel nanga so wan mati. A de so taki Bijbel taki san tru ala ten? Luku wan tu eksempre.

Skrifiman di skrifi san tru

Den man di skrifi Bijbel, ben skrifi ala ten san tru. Den ben skrifi srefi sortu fowtu den meki. Fu eksempre, a profeiti Yona ben skrifi fa a trangayesi Gado (Yona 1:1-3). Fu taki en leti, na a kaba fu a Bijbel buku fu en, a sori fa Gado strafu en. Ma a no taki fa a kenki a denki fu en, fu di a no ben wani taki sma poti prakseri na en (Yona 4:1, 4, 10, 11). Ala den skrifiman fu Bijbel ben e skrifi san tru. Disi e sori taki den ben lobi san tru.

Tru tori di kan yepi wi na ini na aladei libi

A de so taki Bijbel ala ten e gi bun rai di kan yepi wi? Iya, seiker. Luku san Bijbel e taki fu a fasi fa wi kan libi bun nanga trawan: „Ala sani di unu wani meki sma du gi unu, na dati un musu du gi den tu” (Mateyus 7:12). „Wan safri piki e kowru bigi atibron, ma te wan sma e taki sani fu hati trawan, dan dati e meki sma kisi atibron” (Odo 15:1). Iya, te na a dei fu tide, wi kan gebroiki Bijbel na ini wi aladei libi.

 Tru tori fu owruten

Furu owruten sani di sabiman feni sori taki difrenti sma nanga presi di kari na ini Bijbel ben de trutru èn taki sani pasa trutru soleki fa Bijbel e taki. Luku wan sani di no de so prenspari. Bijbel e taki dati na a ten fu Nehemia, den Tirus-sma (noso den Fenisiasma fu Tirus) di ben e libi na ini Yerusalem, „ben e tyari fisi nanga ala sortu tra sani kon fu seri”.​—Nehemia 13:16.

Buweisi de di e sori taki a Bijbeltekst disi tru? Iya. Sabiman feni son sani fu den Fenisiasma na ini Israel. Disi e sori taki den tu pipel disi ben e du bisnis nanga makandra. Boiti dati, na ini Yerusalem sabiman feni bonyo fu fisi fu a Mindrikondre Se. Den e bribi taki sma di ben e tan na a tra sei fu a se ben tyari den fisi kon drape fu seri. Baka di wan sabiman ondrosuku den buweisi disi, a taki: „A sani di skrifi na ini Neh[emia] 13:16 fu den Tirus-sma di ben e seri fisi na ini Yerusalem, na wan tru tori.”

Tru tori di e kruderi nanga san sabiman kon si

Bijbel e taki moro furu fu Gado èn fu sani di pasa na ini owruten. Ma te a e taki fu sani di sabiman kon sabi, dan a de krin taki densani dati tru. Luku wan eksempre.

Sowan 3500 yari pasa, Bijbel ben taki kaba taki grontapu e anga „na noti” (Yob 26:7). A sani disi no ben e kruderi kwetikweti nanga den sani di sma ben e bribi na ini a ten dati. Den ben e bribi taki grontapu ben de tapu watra noso taki a ben de tapu a baka fu wan bun bigi sekrepatu. Sowan 1100 yari baka di a buku fu Yob ben skrifi, sma ben e bribi ete taki grontapu no ben kan anga na noti, ma taki a ben musu fu de na tapu wan sani. Na ini 1687, dri hondro yari pasa nomo, Isaac Newton tyari wan artikel kon na doro di e taki fu zwaartekracht (a krakti di e hari sani kon baka na gron). A fruklari taki na a zwaartekracht disi e hori grontapu na en yoisti presi na loktu. A prenspari sani disi di wan sabiman kon sabi, e sori taki san Bijbel taki moro leki 3000 yari pasa, na wan tru tori!