San na Gado nen? Gado srefi e taki: „Mi na Yehovah. Dati na mi nen” (Yesaya 42:8). Gado en nen skrifi sowan 7000 tron na ini Bijbel. Ma furu Bijbel puru Gado nen, dan den poti wortu soleki „Masra” na den presi dati. Gado wani taki yu musu de en mati èn fu dati ede a e gi yu deki-ati fu „kari en nen”.​—Psalm 105:1.

Fa Bijbel e kari Yehovah? Bijbel e kari Yehovah „Gado”, „Almaktiwan”, „Mekiman”, „Tata”, „Masra”, nanga „Moro Heiwan”. Bijbel abi furu begi pe sma e kari Yehovah na wan fu den fasi disi fu sori lespeki gi en èn den e kari en nen, Yehovah tu.​—Danièl 9:4.

 Fa Gado de? Gado na wan yeye di wi no man si (Yohanes 4:24). Bijbel e taki dati „noiti wan sma si Gado” (Yohanes 1:18). Bijbel e sori tu taki Gado abi firi. Sma kan meki a sari noso „prisiri”.​—Odo 11:20; Psalm 78:40, 41.

Den moi fasi fu Gado. Gado lobi sma fu ala kondre nanga kulturu (Tori fu den apostel 10:34, 35). Boiti dati, a „abi sari-ati nanga switifasi. En ati no e bron esi, a abi bun-ati pasa marki, èn ala ten a e du san a e taki” (Eksodes 34:6, 7). Ma Gado abi fo fasi di e hari furu sma.

Makti. Fu di en na „Gado na Almaktiwan”, meki a abi ala makti fu du iniwan sani di a pramisi.​—Genesis 17:1.

Koni. Gado koni moro iniwan tra sma. Dati meki Bijbel e taki dati na en „abi ala koni”.​—Romesma 16:27.

Retidu. Ala ten Gado e du san reti. A e „du sani di bun dorodoro” èn a „no e du kruktudu”.​—Deuteronomium 32:4.

Lobi. Bijbel e taki dati „Gado na lobi” (1 Yohanes 4:8). Gado no e sori lobi nomo, ma en srefi na lobi. Na ini ala san a e du a e sori lobi di bigi srefisrefi èn disi e yepi wi na difrenti fasi.

Libisma kan de mati fu Gado. Gado na wi Papa na hemel di lobi wi (Mateyus 6:9). Efu wi abi bribi na ini en, dan wi kan de en mati (Psalm 25:14). Fu taki en leti, Gado e gi yu a kari fu begi en so taki yu kan tron wan moro bun mati fu en. A e taigi yu tu fu ’trowe ala yu hebi na en tapu, bika a e broko en ede nanga yu’.​—1 Petrus 5:7; Yakobus 4:8.

Yesus a no Gado. Nowan sma no de leki Yesus. En na a wan-enkri sma di Gado srefi meki. Dati meki Bijbel e kari en Gado Manpikin (Yohanes 1:14). Baka di Yehovah meki Yesus, a gebroiki en fosi Manpikin leki „wan tumusi bun wrokoman” fu meki ala tra sani èn ala tra sma.​—Odo 8:30, 31; Kolosesma 1:15, 16.

 Noiti Yesus Krestes taki dati en na Gado. Na presi fu dati a taki: „Na [Gado] gi mi a reti fu taki gi en, èn na en seni mi kon” (Yohanes 7:29). Di Yesus ben e taki nanga wan fu den disipel fu en, a kari Yehovah „mi Tata nanga un Tata” èn „mi Gado nanga un Gado” (Yohanes 20:17). Baka di Yesus dede, Yehovah gi en libi baka na hemel. Drape a go sidon na Gado en reti-anusei èn a kisi bigi makti.​—Mateyus 28:18; Tori fu den apostel 2:32, 33.

Yesus Krestes kan yepi yu fu tron wan mati fu Gado

Yesus ben kon na grontapu fu leri wi fu en Tata. Yehovah srefi ben taki fu Yesus: „Disi na mi Manpikin, a lobiwan. Un arki en” (Markus 9:7). Yesus sabi Gado moro bun leki iniwan tra sma. A taki: „Nowan sma sabi a Tata, boiti a Manpikin nanga a sma di a Manpikin wani yepi fu kon sabi a Tata.”​—Lukas 10:22.

Yesus abi den srefi fasi fu Gado. A ben de krin taki Yesus ben abi den fasi fu en Tata, èn dati meki a ben kan taki: „A sma di si mi, si a Tata tu” (Yohanes 14:9). Te Yesus ben e taki èn du sani, dan a ben e sori lobi neleki en Papa. Na so a ben e hari sma kon na Gado. A ben taki: „Mi na a pasi, mi na san tru, èn mi na a libi. Nowan sma kan kon na a Tata sondro mi” (Yohanes 14:6). A ben taki tu: „Tru anbegiman o anbegi a Tata nanga yepi fu a santa yeye èn nanga yepi fu san tru, bika a Tata e suku den sortu sma disi fu anbegi en” (Yohanes 4:23). Denki a tori! Yehovah e suku sma leki yu di wani kon sabi en moro bun.