Kande a no pasa nanga yu, ma kande yu si kaba fa a miti wan tra sma. Furu leisi wi e si noso yere fa sma abi bita-ati gi trawan fu di den de fu wan tra kondre, wan tra ras noso fu di den na homo. Dati meki lanti fu furu kondre e meki wet fu strafu sma di e du ogri nanga trawan, spesrutu efu den du ogri nanga wan sma fu di den abi bita-ati gi en.

Furu leisi sma abi bita-ati fu di trawan ben abi bita-ati gi den. Den sma disi e pai ogri fu ogri èn dati e meki taki bita-ati no e kaba.

Oiti wan sma spotu yu, kosi yu, taki ogri fu yu, noso taki dati a o du wan ogri nanga yu? Toku furu tron bita-ati ogri moro den sani disi. Furu leisi a e meki taki sma du ogri-ati sani nanga trawan. Fu eksempre, sma e naki trawan, den e broko sma sani, den e verkracht sma, den e kiri wan noso ipi-ipi sma fu wan tra ras.

A tijdschrift disi o piki den aksi di e kon now èn a o sori fa wi kan wini bita-ati:

• Fu san ede so furu bita-ati de?

• San wi kan du fu stop bita-ati?

• Oiti wan ten o kon te bita-ati no o de moro?