1. Trowlibi

Sma abi difrenti denki fu a trowlibi èn fu san yu musu du fu abi wan koloku trowlibi.

SAN DISI WANI TAKI: A trowlibi na wan sani di Gado seti. Dati meki a sabi san trowpatna musu du fu de koloku (Markus 10:6-9). Den o de koloku te ibriwan fu den e poti prakseri na san den kan du gi a patna fu den, na presi fu luku nomo san den man kisi fu a trawan. Wan masra di lobi en frow e sori a lobi fu en te a e sorgu bun gi en èn te a e libi bun nanga en. Èn wan frow di e lespeki en masra e sori dati te a e horbaka gi en masra èn te a e taki na wan lespeki fasi nanga en.

BIJBEL YEPI SMA TRUTRU: Quang nanga Thi fu Vietnam no ben abi wan koloku trowlibi èn den ben denki taki a ben o tan so fu ala ten. Nofo tron Quang ben grofu nanga en frow. Quang e ferteri: „Mi no ben span nanga fa Thi ben e firi èn furu leisi mi ben gi en syen.” Thi ben wani broko trow. A ben taki: „Mi ben feni taki mi no ben man fertrow mi masra moro èn mi no ben abi lespeki gi en moro.”

Te fu kba Quang nanga Thi kon sabi san Bijbel e leri èn fa den musu du san skrifi na Efeisesma 5:33 na ini den trowlibi. Quang e taki: „A vers disi yepi mi fu si taki a prenspari fu sori switifasi èn fu meki Thi firi taki mi lobi en. Mi musu sorgu taki a abi san a abi fanowdu ala dei èn mi musu hori den firi fu en na prakseri. Te mi e du den sani dati, dan a lobi mi moro èn a abi moro lespeki gi mi.” Thi e taki: „O moro mi e sori lespeki gi mi masra soleki fa Efeisesma 5:33 e leri, o moro a e meki mi firi taki a lobi mi, a e kibri mi èn mi no abi fu broko mi ede nanga noti.”

 2. Fa wi musu libi nanga tra sma

Nofo tron sma e du takru sani nanga trawan fu di den de fu wan tra ras, fu di den de fu wan tra kondre, fu di den de tra fasi, fu di den abi wan tra bribi, noso fu di den na homo.

SAN DISI WANI TAKI: Bijbel no leri wi fu haat sma di kmoto na wan tra kondre, di de fu wan tra ras, noso di de homo. Na presi fu dati, Bijbel e gi wi dek’ati fu abi lespeki gi ala sma, awinsi fu sortu ras noso kondre den de, noso awinsi den gudu noso pôti (Tori fu den apostel 10:34). Srefi te wi no agri nanga san tra sma e bribi noso fa den e tyari densrefi, tòg wi kan sori switifasi nanga lespeki gi den.​—Mateyus 7:12.

BIJBEL YEPI SMA TRUTRU: Danièl leri fu si sma fu Azië leki wan kefar gi en kondre. A ben haat iniwan sma di ben de fu Azië èn nofo tron a ben gi den syen na strati. Danièl e taki: „Mi ben denki taki na a fasi dati mi ben e horbaka gi mi kondre. Mi no ben prakseri srefi taki a fasi fa mi ben e denki èn den sani di mi ben e du ben fowtu.”

Te fu kba Danièl kon sabi san Bijbel e leri. Danièl e taki: „Mi ben musu kenki mi denki helemaal. Mi ben musu si sma neleki fa Gado e si den, taki wi alamala de a srefi awinsi fu pe wi kmoto.” Danièl e ferteri fa a e firi now te a e miti sma. A e taki: „Nofo tron mi no e denki srefi fu pe den kmoto. Mi lobi ala sortu sma now èn mi abi bun mati fu ala sei fu grontapu.”

 3. Moni

Furu sma e suku fu kon gudu fu man firi koloku èn fu abi wan bun tamara.

SAN DISI WANI TAKI: Wi abi moni fanowdu, ma a no kan gi wi a dyaranti taki wi o de koloku noso taki wi o abi wan bun tamara (Odo 18:11; 23:4, 5). Na presi fu dati, wi o de koloku trutru èn wi o abi wan bun tamara seiker te wi e teki den koni rai fu Gado di de fu feni na in Bijbel.​—1 Timoteyus 6:17-19.

BIJBEL YEPI SMA TRUTRU: Cardo, wan man na Indonesia, ben e suku nomo fu kon gudu. A e taki: „Mi ben abi ala sani san furu sma e dren fu abi. Mi ben man go na tra kondre, mi ben bai diri sani, wagi nanga oso.” Ma a lasi ala den sani dati. Cardo e taki: „Wan sma fufuru mi èn a teki ala moni san mi wroko so tranga fu en ala den yari. Wantronso mi lasi ala. Mi wroko mi heri libi langa fu kon gudu, ma te fu kba mi ben firi sari fu di mi no ben abi noti moro èn mi no ben firi warti.”

Cardo bigin teki a rai di Bijbel e gi fu moni. A no e gebroiki ala en krakti moro fu kon gudu ma a besroiti fu libi wan moro sempel libi. A e taki: „Now mi e firi taki mi gudu trutru fu di mi kon tron wan bun mati fu Gado. Mi man sribi bun ibri neti èn mi de koloku trutru.”

 4. Seks

Sma abi ala sortu difrenti denki fu san bun te a abi fu du nanga seks.

SAN DISI WANI TAKI: Bijbel e sori san wi no mag du te a abi fu du nanga seks. A wortu „hurudu” abi fu du nanga sma di e waka gi a trowpatna fu den, sma di e seri den skin, sma di abi seks nanga makandra sondro fu trow, homolibi, èn sma di abi seks nanga meti (1 Korentesma 6:9, 10). Seks na wan kado di Gado gi soso na wan man nanga wan uma di trow nanga makandra.​—Odo 5:18, 19.

BIJBEL YEPI SMA TRUTRU: Wan uma na Australia di nen Kylie e taki: „Mi no ben trow èn mi ben denki taki efu mi ben abi seks nanga wan sma, dan mi ben o firi leki a sma lobi mi èn taki a ben sorgu mi. Ma dati no ben de so. Mi no ben firi taki a sma lobi mi èn na soso broko-ede mi ben abi.”

Bakaten Kylie kon sabi san Bijbel e leri fu seks èn a teki den rai dati. A e taki: „Mi kan si taki den sani di Gado e taki, na fu yepi wi fu no libi na wan fasi di kan meki wi firi pen nanga sari. Mi e du sani na a fasi fa Yehovah wani taki wi musu du sani. Now mi abi wan masra di lobi mi èn di e sorgu gi mi. Den rai fu Bijbel yepi mi fu no du sani di kan broko mi ati!”