DEN BOSROITI DI YU E TEKI KAN ABI KRAKTI TAPU A FASI FA YU LIBI O WAKA? Son sma e bribi taki den srefi no man bosroiti fa den libi o waka, ma taki sani ben seti kaba na fesi. Te sani no e waka soleki fa den ben fruwakti, dan den e taki: „San wi sa du? Na so sani ben musu waka.”

Tra sma e lasi-ati te den e si taki wan kaba no e kon na kruktudu. Kande den pruberi fu libi wan moro bun libi, ma ibri tron baka den e si taki sani soleki feti, ogridu, rampu, nanga siki e meki taki den no man du san den abi na prakseri. Kande den sma disi e aksi densrefi: ’Fu san ede mi musu tan meki muiti?’

A tru taki son leisi sani no e waka soleki fa wi ben fruwakti, èn wi no man du noti na a sani dati (Preikiman 9:11). Toku yu kan du wan sani fu sorgu taki yu kisi têgo libi. Fu taki en leti, Bijbel e sori taki den bosroiti di yu e teki o abi krakti tapu a fasi fa yu libi o waka. Meki wi go luku san Bijbel e taki.

Di den Israelsma fu owruten ben de fu go na ini a Pramisi Kondre, dan Moses di ben de a fesiman fu a pipel, taigi den: „Mi gi unu na okasi fu bosroiti efu unu wani libi noso dede, efu unu wani kisi blesi noso fluku. Ma grantangi, teki a libi, dan unu nanga un bakapikin o tan na libi. Unu o tan na libi efu unu lobi Yehovah un Gado, efu unu arki en sten, èn efu unu e tai hori na en.”​—Deuteronomium 30:15, 19, 20.

„Mi gi unu na okasi fu bosroiti efu unu wani libi noso dede, efu unu wani kisi blesi noso fluku. Ma grantangi, teki a libi.”​—Deuteronomium 30:19

Iya! Gado puru den Israelsma na ini katibo na Egepte èn a gi den a howpu fu libi na ini a Pramisi Kondre pe den ben o de fri èn koloku. Ma den ben o abi fu du wan sani fu man kisi a blesi dati. Den ben musu bosroiti fu „teki a libi”. Fa den ben kan du dati? Den ben musu ’lobi Gado, arki en sten, èn tai hori na en’.

Na ini a ten disi, yu musu teki wan srefi sortu bosroiti, èn a bosroiti di yu e teki o abi krakti tapu a fasi fa yu libi o waka. Te yu lobi Gado, te yu e arki en sten, èn te yu tai hori na en, dan yu e sori taki yu bosroiti fu teki a libi. Dati na têgo libi na ini wan paradijs na grontapu. Ma fa wi musu du den dri sani di kari na ini a paragraaf disi?

Lobi na a moro prenspari fasi fu Gado. Na apostel Yohanes ben skrifi nanga yepi fu santa yeye: „Gado na lobi” (1 Yohanes 4:8). Dati meki di sma ben aksi Yesus san na a moro bigi komando, dan a piki den: „Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan” (Mateyus 22:37). Wi no musu anbegi Gado fu di wi e frede en èn wi no musu gi yesi na en sondro fu denki, ma wi musu du dati fu di wi lobi en. Ma fu san ede wi musu bosroiti fu lobi Gado?

Yehovah lobi libisma neleki fa papa nanga mama lobi den pikin fu den. Aladi papa nanga mama abi sondu, toku den e gi den pikin leri, den e gi den deki-ati, den e horibaka gi den, èn den e piri-ai gi den. Den e du den sani disi fu di den lobi den pikin, den wani taki den musu de koloku èn taki sani waka bun nanga den. San papa nanga mama e fruwakti fu den pikin? Den wani taki den pikin musu lobi den èn taki den no musu frigiti den bun sani di den e leri den. Sobun, wi kan frustan fu san ede wi hemel Tata e fruwakti taki wi lobi en èn taki wi e warderi ala den sani di a du gi wi.

Na ini a tongo di Bijbel ben skrifi na ini biginbigin, a wortu „arki” wani taki a srefi leki „gi yesi”. Dati meki te wi e taigi wan pikin „Arki yu papa nanga mama”, dan fu taki en leti wi e taigi en fu gi yesi na en papa nanga mama. Sobun, fu man arki Gado sten, dan wi musu kon sabi san a e taigi wi èn wi musu du san a e taki. Fu di wi no man yere Gado sten trutru, meki wi e leisi en Wortu Bijbel fu kon sabi san a wani taigi wi èn wi e du san a e leri wi.​—1 Yohanes 5:3.

Fu di Yesus ben wani sori o prenspari a de fu arki Gado sten, meki a taigi sma wan leisi: „Sma no musu libi fu brede wawan, ma fu ibri wortu di Yehovah mofo taki” (Mateyus 4:4). Neleki fa nyanyan prenspari gi wi, na so a prenspari tu gi wi fu kon sabi moro fu Gado. Te yu luku en bun, dan a sani dati moro prenspari leki trutru nyanyan. Fu san ede? A koni Kownu Salomo ben taki: „Koni e kibri sma, neleki fa moni e kibri sma. Ma te wan sma abi sabi èn a abi koni tu, dan a o kisi wini fu di dati o hori en na libi” (Preikiman 7:12). A sabi nanga koni di wi e kisi fu Gado kan kibri wi na ini a ten disi èn a kan yepi wi fu teki a bosroiti di o meki taki wi kisi têgo libi.

Prakseri na agersitori fu Yesus di wi ben taki fu en na ini na artikel na fesi. Yesus ben taki: „A doro di e tyari sma go na libi, pikin èn a pasi fu en smara. Wan tu sma nomo e feni en” (Mateyus 7:13, 14). Te wi e waka tapu so wan pasi, dan a ben o de wan yepi gi wi te wi abi wan sma na wi sei di sabi a pasi bun. Na so wi o man doro a presi pe wi wani go. Dati na têgo libi. Sobun, wi abi bun reide fu tan krosibei fu Gado (Psalm 16:8). Ma fa wi musu du dati?

Ibri dei, wi abi wan lo sani fu du èn moro sani de di wi ben o wani du. Den sortu sani dati kan teki ala wi ten, noso den kan meki taki wi no abi ten fu prakseri san Gado wani taki wi du. Dati meki Bijbel e memre wi: „Luku bun taki unu no waka leki don sma, ma leki koni sma. Un musu gebroiki a ten fu unu na wan koni fasi, bika wi e libi na ini ogri ten” (Efeisesma 5:15, 16). Te a matifasi di wi abi nanga Yehovah na a moro prenspari sani na ini wi libi, dan dati e yepi wi fu tan krosibei fu Gado.​—Mateyus 6:33.

Aladi yu no man du noti fu kenki den sani di pasa kaba na ini yu libi, toku yu kan du sani fu sorgu taki a libi o waka bun gi yu nanga den lobiwan fu yu na ini a ten di e kon. Bijbel e sori taki wi hemel Tata, Yehovah Gado, lobi wi trutru èn taki a e meki wi kon sabi san a wani taki wi du. Luku san a profeiti Mika taki:

„Un libisma, Yehovah taigi unu san bun. Ma san a e aksi fu unu? A e aksi nomo taki unu du san reti, taki unu lobi fu du bun, èn taki unu abi sakafasi aladi unu e waka nanga un Gado.”​—Mika 6:8.

Yu o teki a kari di Yehovah e gi yu fu waka nanga en so taki yu kan kisi den têgo blesi di a o gi den sma di e gi yesi na en? Yu srefi musu bosroiti san yu o du!