Bijbel e sori taki wan engel, di wi kon sabi leki Satan Didibri, ben prefuru fu opo ensrefi teige Gado fu di a ben feni taki Gado no abi a reti fu tiri. A ben feni taki libisma ben o de moro koloku efu Gado no ben e taigi den san fu du èn efu a no ben e tiri den. A sari taki wi fosi papa nanga mama, Adam nanga Eva, waka baka Satan èn taki den opo densrefi teige Gado tu.​—Genesis 3:1-6; Openbaring 12:9.

Fu di Adam nanga Eva no ben wani Gado leki a Tiriman fu den, meki den ben musu komoto na ini a Paradijs pe den ben e tan èn den lasi a howpu fu libi fu têgo leki sma di no ben o siki noiti (Genesis 3:17-19). A bosroiti fu den ben tyari problema kon tu gi ala den pikin di den kisi bakaten. Bijbel e taki dati na a sondu fu Adam „meki sondu kon na grontapu èn sondu tyari dede kon” (Romesma 5:12). Ma a sondu fu libisma tyari ete wan bigi problema kon: „Sensi di libisma bigin tiri tra libisma, sani no waka bun gi den” (Preikiman 8:9). Disi wani taki dati solanga libisma e tiri, dati o tyari problema kon.

Bijbel e sori taki Nimrod ben de a fosi libisma di bigin tiri. Nimrod no ben wani taki Yehovah tiri en. Sensi a ten fu Nimrod, sma di ben abi furu makti gebroiki a makti dati fu pina trawan. Sowan 3000 yari pasa, Kownu Salomo ben skrifi: „Mi si den watra-ai fu den wan di trawan ben e pina, ma nowan sma ben de fu trowstu den . . . fu di den sma di ben e pina den, ben abi furu makti.”​—Preikiman 4:1.

Teleki now, sani de a srefi. Na ini 2009, wan buku fu den Verenigde Naties taki dati moro nanga moro sma e kon si taki a fasi fa libisma e tiri, na „wan fu den sani di meki taki so furu ogri de na ini den libimakandra fu wi”.

Grontapu abi moro bun tiriman fanowdu èn a musu tiri na wan moro bun fasi. Èn na dati wi Mekiman pramisi tu!

Gado seti wan Kownukondre, noso wan regering di o teki a presi fu ala den regering fu libisma èn „a kownukondre srefi o tan fu têgo” (Danièl 2:44). Disi na a Kownukondre di milyunmilyun sma e begi fu en (Mateyus 6:9, 10). Ma Gado srefi no o tiri a regering disi. Na presi fu dati, a poti wan Tiriman di ben de wan libisma fosi. Suma na a sma di Gado poti?