Gado meki wi skin na so wan kefalek fasi taki a man dresi ensrefi. Te wi abi wan gosontu skin èn wan sani koti wi noso wi kisi wan soro, dan wantewante a skin fu wi e du wan sani fu stop a brudu, so taki a soro kan bigin drei.

PRAKSERI A SANI DISI: Efu a Mekiman meki wi skin na so wan fasi taki a man dresi ensrefi te a kisi wan soro noso wan mankeri, dan san disi e sori wi? We, a no de fu taki dati wi kan bribi Gado te a e pramisi wi taki a o yepi wi fu no sari moro te sani pasa di hati wi èn di e meki wi firi brokosaka. A psalm skrifiman ben taki: „A e dresi den sma di brokosaka èn a e tai den soro di e hati den” (Psalm 147:3). Ma efu yu e sari fu di wan hati sani miti yu wan leisi, dan fa yu kan de seiker taki Yehovah o tai yu soro nownow kaba èn na ini a ten di e kon?

Gado e pramisi wi: „No frede, bika mi de nanga yu. No luku leki yu e frede, bika mi na yu Gado. Mi o meki yu kon tranga. Mi o yepi yu trutru” (Yesaya 41:10). Te wan sma sabi taki Yehovah e broko en ede nanga en, dan dati e gi en wan korostu firi èn a o abi a krakti fu pasa difrenti sortu tesi. Na apostel Paulus ben kari a firi disi „a freide fu Gado di bigi moro iniwan sani di libisma man frustan”. A ben taki tu: „Mi man du ala sani nanga yepi fu a sma di e gi mi krakti.”​—Filipisma 4:4-7, 9, 13.

Bijbel e yepi wi fu bribi den sani di Yehovah taki dati a o du gi libisma na ini a ten di e kon. Fu eksempre, Openbaring 21:4, 5 e taigi wi san a o du èn fu san ede wi kan bribi taki a o du den sani dati:

• „A o figi ala watra puru” na sma ai. Yehovah o tyari wan kaba kon na ala pina èn na ala den broko-ede fu wi, srefi na sani di trawan e si leki lawlaw sani.

• A sma di e „sidon na tapu a kownusturu” na ini hemel, na a Almakti Kownu di meki ala sani. A o gebroiki a krakti nanga a makti fu en fu sorgu taki wi no e pina èn fu gi wi a yepi di wi abi fanowdu.

• Yehovah e gi wi a dyaranti taki den sani di a pramisi „tru èn sma kan bribi den”. Fu di Yehovah na a tru Gado, meki wi kan bribi taki ala ten a e du san a pramisi.

„’A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.’ Ne a sma di ben e sidon na tapu a kownusturu taki: ’Luku, mi e meki ala sani kon nyun.’ A taki sosrefi: ’Skrifi, bika den wortu disi tru èn sma kan bribi den.’”​—Openbaring 21:4, 5.

Na universum nanga a Bijbel e meki wi kon sabi den fasi fu wi hemel Tata. Te wi e luku den sani di Gado meki, dan den e meki taki wi wani kon sabi Gado moro bun fu man tron bun mati fu en. Boiti dati, Bijbel e gi wi a rai tu fu du dati. A e taki: „Kon krosibei na Gado èn a o kon krosibei na unu” (Yakobus 4:8). Tori fu den apostel 17:27 e taki: „A no de fara fu nowan fu wi.”

Te yu e meki muiti fu kon sabi Gado, dan moro nanga moro yu o bribi taki a e ’broko en ede nanga yu’ (1 Petrus 5:7). Sortu wini a abi te yu e frutrow tapu Yehovah?

Luku a tori fu Toru, di de fu Yapan. Aladi en Kresten mama ben kweki en, toku a go moksi nanga den ogri-ati yakuza, a Mafia fu Yapan. A e fruteri: „Mi ben denki taki Gado no ben lobi mi èn mi ben e firi leki na strafu Gado ben e strafu mi te sma di mi ben sabi, spesrutu den lobiwan fu mi, ben e lasi den libi.” Toru e taki dati den takru sani di ben e pasa na ini en libi èn a fowtu denki di a ben abi, meki taki a kon tron „wan ogri-ati man di no ben e firi gi trawan”. A e memre ete san a ben wani du. A e taki: „Mi ben wani dede yongu, baka te mi ben kiri wan sma di ben pôpi moro mi, so taki mi ben kan meki wan nen gi misrefi.”

Ma di Toru nanga en wefi Hannah studeri Bijbel, a tyari bigi kenki kon na ini en libi èn na ini a fasi fa a ben e denki. Hannah e taki: „Mi si nanga  mi eigi ai fa mi masra ben e kenki.” Now Toru e taki: „Mi sabi taki wan Gado de di e broko en ede trutru nanga ibriwan fu wi. A no wani taki nowan sma dede, èn a de klariklari fu gi sma pardon te den e sori berow gi den fowtu fu den. A e arki wi te wi e fruteri en sani di wi no man fruteri nowan tra sma èn di en wawan man frustan. Heri esi Yehovah o tyari wan kaba kon na ala problema, pina, nanga sari. Nownow kaba a e yepi wi na fasi di wi no ben fruwakti srefisrefi. A lobi wi èn a e gi wi krakti te wi lasi-ati.”​—Psalm 51:17.

San na ondrofenitori fu Toru sori wi? Te wi sabi taki Gado man tyari wan kaba kon na ala pina èn taki heri esi a o figi ala watra-ai puru, dan dati e gi wi wan moi howpu gi a ten di e kon èn a e yepi wi tu fu abi wan moro bun libi nownow kaba. Iya, aladi wi e libi na ini wan grontapu pe pina lai, toku yu kan kisi wini fu a lobi di Gado e sori gi libisma.