Prakseri a matifasi di twelengi abi nanga makandra, spesrutu a di fu tu boi noso tu meisje di gersi makandra srefisrefi. Den lobi makandra trutru èn den man frustan makandra heri bun. Nancy Segal di de wan twelengi tu èn di de a driktoro fu wan kantoro di e ondrosuku twelengi e taki dati son leisi a wan „kan taigi a trawan wan sani èn a paar fu en e frustan krin san a wani taki, sondro taki a trawan abi fu fruklari sani gi en”. Wan tra uma e taki fu a matifasi di a abi nanga a twelengi sisa fu en: „Wi sabi ala sani fu makandra.”

Fa a kan taki twelengi man frustan makandra so bun? Soleki fa ondrosuku e sori, dan a kan taki a presi pe den e libi èn a fasi fa den kweki abi fu du nanga a tori. Ma a moro prenspari sani, na taki den sani na ini den cel fu twelengi di e sori sortu sma den o de, na a srefi.

PRAKSERI A SANI DISI: Efu a Mekiman ben kan meki twelengi na so wan kefalek fasi, dan a no de fu taki dati a sabi ibriwan fu wi moro leki iniwan tra sma. Dati meki a psalm skrifiman David ben taki: „Yu ben kibri mi na ini mi mama bere. Den bonyo fu mi no ben kibri gi yu di yu meki mi sondro fu tra sma sabi. . . . Yu ai ben si mi di mi ben de na ini mi mama bere. Srefi di nowan pisi fu mi skin ben de ete, yu ben skrifi kaba na ini a buku fu yu taki ala den difrenti pisi fu mi skin ben o kon de” (Psalm 139:13, 15, 16). Gado wawan sabi soifri fa wi meki èn a man frustan wi tu. A sabi sortu sani pasa na ini wi libi di meki taki wi kon tron a sma di wi de now. Fu di Gado sabi ala sani fu wi èn fu di a sabi soifri fa wi meki, meki wi kan de seiker taki a e frustan wi heri bun.

David ben begi: „Yehovah, yu ondrosuku mi èn yu sabi mi dorodoro. Yu sabi o ten mi e saka sidon èn o ten mi e opo baka. Yu de farawe, ma toku yu sabi fa mi e prakseri. Yehovah, fosi mi opo mi mofo, yu sabi kaba san mi wani taki” (Psalm 139:1, 2, 4). Boiti dati, Yehovah sabi fa wi e firi dipi na ini wi ati èn a „sabi ibri sani di wan sma e prakseri fu du” (1 Kroniki 28:9; 1 Samuel 16:6, 7). San den vers disi e leri wi fu Gado?

Awinsi wi no e fruteri Gado ala san wi e prakseri noso san wi e firi, toku Gado e si san wi e du èn a e frustan tu fu san ede wi e du den sani dati. Boiti dati, te wi ben o wani du bun, ma sani e tapu wi fu du san wi wani du trutru, dan Gado e frustan dati tu. Fu di na Gado meki wi ati nanga wi frustan, meki a sabi taki wi man denki bun sani, èn a sabi tu taki wi man du san a feni bun.​—1 Yohanes 4:7-10.

 Gado Wortu e taigi wi:

• „Den ai fu Yehovah e si den reti-ati sma èn den yesi fu en e yere den fayafaya begi fu den.”​—1 PETRUS 3:12.

• Gado e pramisi: „Mi o gi yu koni èn mi o sori yu a pasi di yu musu waka. Mi o gi yu rai èn mi o luku yu.”​—PSALM 32:8.

Te wi sabi taki Gado e frustan a situwâsi fu wi èn taki a e frustan tu fa wi e firi, dan fa dati kan yepi wi fu horidoro te wi abi problema? Luku san pasa nanga Anna fu Nigeria. A e taki: „Fu di a libi ben muilek srefisrefi gi mi, meki mi ben aksi misrefi fu san ede mi ben de na libi ete. Mi masra ben dede kaba èn mi wawan ben e sorgu na umapikin fu mi di ben e didon na ati-oso. A ben abi wan watra-ede. Ne datra kon si taki mi ben abi kanker na mi bobi èn mi ben musu du wan oparâsi. Boiti dati, mi ben musu kisi difrenti sortu datrayepi ete. Mi ben feni en muilek taki mi ben musu didon na ati-oso na a srefi ten di mi umapikin ben e didon drape.”

San yepi Anna fu horidoro? A e taki: „Mi ben e prakseri Bijbeltekst soleki Filipisma 4:6, 7, pe skrifi taki ’a freide fu Gado di bigi moro iniwan sani di libisma man frustan, o kibri un ati nanga un frustan’. Ibri leisi te mi ben e prakseri a tekst disi, mi ben e firi taki Yehovah ben de krosibei fu mi. Mi ben sabi taki a ben e frustan mi moro bun leki fa mi ben e frustan misrefi. Mi kisi furu deki-ati tu fu mi lobi Kresten brada nanga sisa na ini a gemeente.

Aladi mi e feti ete nanga a gosontu fu mi, a situwâsi fu mi nanga mi umapikin kon moro betre. Fu di Yehovah de na wi sei, meki wi kon si taki wi no abi fu broko wi ede tumusi te tesi e miti wi. Yakobus 5:11 e gi wi a dyaranti disi: ’Den sma di horidoro, na koloku sma. Unu yere fa Yob ben horidoro èn unu si fa Yehovah meki sani waka gi en. Unu si taki Yehovah lobi sma trutru èn taki a abi sari-ati.’” Yehovah ben frustan heri bun san ben e miti Yob, èn wi kan de seiker taki awinsi sortu problema e miti wi, a e frustan dati tu.