Gado ben taigi Adam: „Na a dei di yu o nyan fu [a bon], na dede yu o dede” (Genesis 2:17). Efu Gado ben meki Adam fu kon owru èn fu dede te fu kaba, dan a no ben o abi fu taigi en a sani dati. Adam ben sabi taki a no ben o dede efu a no nyan fu a bon.

Fu di a dyari ben lai ala sortu froktubon, meki Adam nanga Eva no ben abi fu nyan fu a bon fu kan tan na libi (Genesis 2:9). Efu a fosi trowpaar no ben o nyan fu a bon, dan den ben o sori taki den ben e gi yesi na a sma di ben gi den libi. A sani disi ben o sori tu taki den ben e si Gado leki a sma di abi a reti fu taigi den san fu du.

Fu man frustan fu san ede Adam nanga Eva dede, wi musu poti prakseri na wan prenspari sani di ben pasa na a ten dati èn di abi krakti tapu wi alamala. Satan Didibri gebroiki a sneki fu fruteri wan ogri lei. Bijbel e taki: „Fu ala den busimeti di Yehovah Gado meki, a sneki ben de a wan di ben luku bun fosi a du wan sani. Ne a sneki taigi na uma: ’A de so trutru taki Gado taki dati un no musu nyan fu ala den bon na ini a dyari?’”​—Genesis 3:1.

Ne Eva piki en: „Wi kan nyan den froktu fu den bon na ini a dyari. Ma fu den froktu fu a bon di de na mindrisei fu a dyari, Gado taki: ’Un no musu nyan den, nôno, un no musu fasi a bon srefi, noso unu o dede.’” Baka dati, a sneki taigi en: „Unu no o dede kwetikweti, bika Gado sabi taki na a dei di unu o nyan den froktu, un ai o opo èn unu o de leki Gado. Unu o sabi san bun èn san ogri.” Te yu luku en bun, dan Satan ben taki dati Yehovah na wan leiman èn taki a ben e hori wan bun sani na baka gi Adam nanga Eva.​—Genesis 3:2-5.

Eva ben e bribi san Satan taigi en. A tan luku a bon. A bon ben e hari en trutru! Ne a langa en anu fu piki wan froktu, dan a bigin nyan en. Bijbel e taki: „Bakaten di en masra ben de nanga en, a gi en masra meki a nyan tu. Ne en masra srefi bigin nyan.”​—Genesis 3:6.

Gado ben musu fu sari di a si taki den pikin fu en di a ben lobi ben trangayesi en fu espresi! San a du? Yehovah taigi Adam: „Yu o . . . drai go baka na a gron di mi teki yu puru na ini, bika na fu doti yu meki èn na doti yu o tron baka” (Genesis 3:17-19). Na fu a sani disi ede meki „Adam libi neigi hondro dritenti yari, dan a dede” (Genesis 5:5). Adam no go na hemel noso na wan yeye kondre. A no ben de fosi Yehovah meki en nanga a doti fu a gron. Sobun, di a dede, a lasi en libi èn en skin tron doti baka. A no ben de moro. Dati na wan sari tori!

Fu di Adam nanga Eva trangayesi Gado fu espresi, meki den tron sondu sma èn den lasi a howpu fu libi fu têgo. Now a skin fu den ben o kon owru èn den ben o dede. Ma a sondu fu Adam nanga Eva no tyari takru bakapisi gi den wawan, ma sosrefi gi den pikin fu den. Romesma 5:12 e taki: „Wán man [Adam] meki sondu kon na grontapu èn sondu tyari dede kon. Dati meki ala sma e dede, bika den alamala sondu.”

Bijbel e sori taki sondu nanga dede de leki wan ’duku di tapu ala den pipel èn leki wan krosi di brei lontu ala den pipel’ (Yesaya 25:7). Nowan sma man lowe gi sondu nanga dede. Iya, ’ala sma e dede fu Adam ede’ (1 Korentesma 15:22). Dati meki neleki na apostel Paulus wi kan aksi: „Suma sa frulusu mi fu a skin disi di e tyari mi go dede?” Wan sma de di man du dati?​—Romesma 7:24.