ALADI wi alamala kisi sondu nanga dede fu di wi fosi papa nanga mama, Adam nanga Eva, ben trangayesi Gado, toku Gado no kenki san a ben abi na prakseri gi libisma. Na ini Bijbel Gado e taki ibri tron baka dati en prakseri no kenki.

• „Na den reti-ati sma o kisi grontapu èn fu têgo den o tan libi drape.”​—Psalm 37:29.

• „A Moro Hei Masra Yehovah o swari dede fu têgo èn a o figi den watra-ai fu ala sma puru na den fesi.”​—Yesaya 25:8.

• „Dede na a lasti feanti di a o puru na pasi.”​—1 Korentesma 15:26.

• „Dede no o de moro. Nowan sari, noso krei, noso pen no o de moro.”​—Openbaring 21:4.

Fa Gado o „swari dede”, so taki a feanti dede no de moro? Soleki fa wi si, dan Bijbel e taki krin taki „den reti-ati sma” o libi „fu têgo”. Ma Bijbel e taki tu dati „nowan reti-ati sma no de na grontapu, di e du bun ala ten” (Preikiman 7:20). Ma dan fa Gado o tyari wan kaba kon na dede? A de so taki Gado no o fruwakti moro taki sondu libisma hori den wet fu en? Nôno! Noiti Gado o gi pasi taki a sani dati pasa, fu di ’Gado no man lei’ (Titus 1:2). Ma fa Gado o du san a ben abi na prakseri gi libisma?

Fu di Yehovah Gado lobi libisma, meki a pai wan lusu-paiman fu man frulusu wi fu dede. Wan lusu-paiman na wan sani di sma e pai fu bai wan sani baka. A musu abi a srefi waarde leki a sani di musu bai baka. Fu di ala libisma na sondu sma di musu kisi dedestrafu, meki Bijbel e taki krin: „Nowan fu den kan frulusu wan tra sma, awinsi san den e du èn den no man pai Gado fu bai a sma disi kon fri. (A paiman di musu pai fu bai wan sma baka, hei so te, taki noiti wan libisma o man pai en.)”​—Psalm 49:7, 8.

Te wan sondu sma dede, dan a kan pai soso gi en eigi sondu. A no kan frulusu ensrefi èn a no kan pai tu gi den sondu fu wan tra sma (Romesma 6:7). Dati meki wan sma di no abi sondu ben o abi fu dede gi den sondu fu wi.​—Hebrewsma 10:1-4.

Na a sani dati Gado seti. A seni en Manpikin, Yesus, fu hemel kon na grontapu pe a gebore leki wan libisma di no abi nowan sondu (1 Petrus 2:22). Yesus ben taki dati a kon fu „gi en libi leki wan lusu-paiman fu frulusu furu sma” (Markus 10:45). A dede fu pai gi den sondu fu wi so taki wi kan kisi libi.​—Yohanes 3:16.

Now wi e libi na ini ’muilek ten di tranga fu pasa’, soleki fa Bijbel profeititori ben taki. Disi e sori taki wi e libi na ini den „lasti dei” fu na ogri grontapu disi (2 Timoteyus 3:1). Na a kaba fu den lasti dei, ’Gado o krutu den ogri sma èn a o pori den’ (2 Petrus 3:3, 7). Ma sma di lobi Gado o pasa den dei dati libilibi èn den o kisi „têgo libi”.​—Mateyus 25:46.

Milyunmilyun tra sma di dede kan kisi têgo libi te Gado wiki den baka. Di Yesus ben go na a foto Nain, dan a wiki wan sma di ben dede. Wan uma di no ben abi masra moro, ben lasi en wan-enkri manpikin. Fu di Yesus ben e „firi sari”, meki a wiki a manpikin so taki a ben kan libi baka (Lukas 7:11-15). Boiti dati, na apostel Paulus ben taki: „Mi abi a howpu taki Gado sa gi wan opobaka na den sma di du san reti èn na den sma di no du san reti.” A moi  howpu disi di Gado gi wi e sori krin taki a lobi libisma.​—Tori fu den apostel 24:15.

Milyunmilyun sma kan abi a howpu fu libi fu têgo. Bijbel e taki: „Na den reti-ati sma o kisi grontapu èn fu têgo den o tan libi drape” (Psalm 37:29). Na a ten dati, den o de koloku trutru fu di den o ondrofeni a moi sani disi di na apostel Paulus ben skrifi sowan 2000 yari pasa: „Dede, yu no o wini moro! Dede, pe yu maka de?” (1 Korentesma 15:55) Dede, a moro bigi feanti fu wi, no o de moro!