A profeiti Moses ben taki dati wi o kisi blesi fu Gado te wi e gi yesi na den komando fu en (Deuteronomium 10:13; 11:27). Wi no e gi yesi na Gado fu di wi frede taki a o strafu wi, ma fu di wi lobi en. Di wi kon sabi den moi fasi fu en, wi kon lobi en. A lobi dati meki taki wi wani gi yesi na en èn taki wi no wani du wan sani di o meki a firi sari. „Te wi lobi Gado, dan wi o hori den komando fu en.”​—1 Yohanes 5:3.

Ma fa wi kan kisi blesi te wi e gi yesi na Gado? Luku tu fasi fa wi kan kisi blesi.

„Mi, Yehovah, na yu Gado. Mi na a sma di e leri yu fu kisi wini. Mi na a sma di e meki yu waka a pasi di yu musu waka.”​—YESAYA 48:17.

Yehovah Gado, wi Mekiman, sabi wi èn a e gi wi a leri di wi abi fanowdu. Efu wi wani taki den sani di a e leri wi yepi wi fu teki bun bosroiti, dan wi musu ondrosuku Gado Wortu fu kon sabi san Gado wani taki wi musu du èn wi musu du san a leri wi.

„Koloku fu den sma di e yere a wortu fu Gado èn di e du san a wortu e taki!”​—LUKAS 11:28.

Na ini a ten disi, milyunmilyun sma di e du san Gado Wortu e taki, de koloku trutru. Luku na eksempre fu wan man na Spanyorokondre di ben atibron esi-esi èn di ben grofu nanga tra sma, srefi nanga en eigi frow. Wan leisi, a man disi leisi san a profeiti Moses ben skrifi fu Yosef, a manpikin fu Yakob. Den ben seri Yosef leki strafu èn den poti en na strafu-oso, aladi a no ben du noti. Toku a ben abi safri-ati, a no ben e meki trobi, èn a ben de klariklari fu gi sma pardon (Genesis, kapitel 37-45). A man fu Spanyorokondre e taki: „Di mi go prakseri na eksempre fu Yosef, dan dati yepi mi fu kon abi safri-ati fasi, switifasi, èn fu dwengi misrefi. Now mi kon abi wan moro koloku libi.”

Gado Wortu e leri wi moro sani di e sori wi fa wi musu libi nanga trawan. Wi o luku a tori disi moro fini na ini a tra artikel.