Na ini 1949, mi papa froisi fu Doisrikondre go na Australia. A ben go suku wroko na wan bigi electriciteit bedrijf, dan a go tan na wan boitipresi na ini Victoria. Drape a trow nanga mi mama èn mi gebore na ini 1953.

Wan tu yari baka dati, mi mama bigin studeri Bijbel nanga Yehovah Kotoigi. Sobun, frukufruku kaba mi kisi leri fu Bijbel. Ma mi papa no ben wani abi noti fu du nanga nowan kerki. A bigin du ogri nanga wi, a ben lobi tanteri wi èn mi mama ben e frede gi en srefisrefi. Mi mama tan studeri Bijbel kibrikibri èn a bigin lobi san a ben e leri. Te mi papa no ben de na oso, a ben e fruteri mi nanga mi sisa san a ben leri. A fruteri wi taki a grontapu disi o tron wan paradijs èn taki wi o de koloku efu wi e libi soleki fa Bijbel e leri.​—Psalm 37:10, 29; Yesaya 48:17.

Di mi ben abi 18 yari, mi ben de nomonomo fu gowe libi oso fu di mi papa ben e du ogri nanga wi. Aladi mi ben e bribi den sani di mi mama ben leri mi fu Bijbel, toku mi no ben abi warderi gi den sani dati. Dati meki mi no ben e hori misrefi na den. Mi go wroko na ini wan mijn. Di mi ben abi 20 yari, mi trow. Dri yari baka dati, a fosi umapikin fu wi gebore èn mi bigin prakseri baka san na a moro prenspari sani na ini mi libi. Mi ben sabi taki Bijbel ben o man yepi mi osofamiri. Dati meki mi bigin studeri Bijbel nanga wan Yehovah Kotoigi. Ma a wefi fu mi no ben lobi den Kotoigi kwetikweti. Di mi go na wan fu den konmakandra fu den Kotoigi, mi wefi taigi mi taki efu mi no tapu nanga a Bijbelstudie fu mi, a ben o yagi mi. Fu di mi no ben sabi san fu du, meki mi du san a ben wani èn mi tapu fu studeri nanga den Kotoigi. Bakaten a hati mi taki mi no tan studeri go doro, fu di mi ben sabi taki na wan bun sani mi ben e du.

Wan dei, den man na mi wrokope sori mi porno. Na a wan sei, den sani di mi si ben e hari mi prakseri, ma na a tra sei mi ben e fisti gi den tu. Mi ben sabi taki mi ben du wan sani di no bun kwetikweti. Fu di mi ben sabi taki Bijbel e krutu a sani disi, meki mi ben denki taki Gado ben o strafu mi. Ma fu di mi ben e luku den fisti prenki moro nanga moro, meki mi no ben e si porno leki wan ogri sani moro. Te fu kaba, mi no ben man tapu nanga en moro.

Na ini den 20 yari baka dati, mi tapu safrisafri fu du den bun sani di mi mama ben pruberi fu leri mi. Den sani di mi ben e luku ben abi krakti tapu a fasi fa mi ben e tyari misrefi. Mi ben  e taki dotitaki èn mi ben lobi fisti lafutori. Mi ben kon abi wan fowtu denki fu seks. Aladi mi ben e libi nanga mi wefi ete, mi ben e hori nanga tra uma. Wan dei mi luku misrefi na ini a spikri èn mi prakseri: ’Mi no lobi fa mi de.’ Mi no ben e lespeki misrefi moro, ma mi ben fisti gi misrefi.

A trowlibi fu mi broko èn mi libi ben pori. Mi begi Yehovah nanga mi heri ati. Mi bigin baka nanga wan Bijbelstudie, aladi 20 yari ben pasa. Na a ten dati mi papa ben dede kaba èn mi mama ben de wan dopu Kotoigi fu Yehovah.

A fasi fa mi ben e libi no ben kruderi srefisrefi nanga san Bijbel e leri. Ma disi leisi mi no ben o meki noti tapu mi fu kisi a korostu firi di Bijbel e pramisi. Mi bigin du muiti fu no taki dotitaki moro èn fu no ati bron so esi moro. Mi bosroiti tu fu tapu nanga a yayolibi fu mi, fu no dòbel moro, fu no dringi tumusi furu sopi èn fu no fufuru sani moro fu a basi fu mi.

Den man na mi wrokope no ben man frustan fu san ede mi ben wani tyari den bigi kenki disi kon. Dri yari langa den du ala sortu sani fu meki mi tyari misrefi baka leki fosi. Son leisi mi ben e lasi misrefi. Fu eksempre, mi ati ben e bron, noso mi ben e taki dotitaki. Te dati ben pasa, den ben e breiti èn den ben bari: „Ai! Na a Joe disi wi sabi.” A ben e hati mi srefisrefi te den ben e taki dati! Nofo tron mi ben e firi leki mi no ben o man wini a strei.

Porno ben lai na mi wrokope. A ben de tapu computer èn na ini buku. Den man na mi wrokope ben gwenti seni doti prenki gi makandra tapu den computer, neleki fa mi ben du fosi. Mi ben e meki muiti fu tapu nanga porno, ma den ben de nomonomo fu meki mi fadon baka. Mi suku yepi na a sma di ben e studeri Bijbel nanga mi, fu di mi ben e firi brokosaka. A arki mi nanga pasensi di mi fruteri en san ben e trobi mi. A sori mi wan tu Bijbeltekst di ben o yepi mi fu basi a swakifasi fu mi. A gi mi deki-ati fu tan begi Yehovah doronomo fu yepi mi.​—Psalm 119:37.

Wan dei mi kari den man na wrokope kon na wán. Mi taigi den fu gi tu fu den man drape wan biri, aladi mi ben sabi taki den man dati ben e meki muiti fu tapu nanga sopi. Wantewante a heri grupu bari: „Fa yu kan du so wan sani! Den man e feti fu tapu nanga wan takru gwenti!” Mi piki den: „Iya, mi srefi e feti fu tapu nanga wan takru gwenti.” Sensi a dei dati, den man dati kon frustan taki mi ben e du muiti fu tapu nanga porno èn den no dwengi mi moro fu libi soleki fa mi ben e libi fosi.

Fu di Yehovah yepi mi furu, meki baka wan pisi ten mi ben man tapu nanga a takru gwenti fu luku porno. Na ini 1999 mi teki dopu èn mi tron wan Yehovah Kotoigi. Mi ben breiti taki mi kisi ete wan okasi fu libi wan krin libi èn fu de koloku.

Now mi e frustan fu san ede Yehovah e tegu gi den sani di mi ben lobi so langa. Fu di Yehovah na wan lobi-ati Papa, meki a ben wani kibri mi gi den takru bakapisi fu porno. Den sani di skrifi na Odo 3:5, 6 tru! Drape skrifi: „Frutrow na tapu Yehovah nanga yu heri ati. No frutrow na tapu yu eigi frustan. Poti prakseri na en, awinsi sortu pasi yu e waka, dan na en o meki yu pasi kon reti.” Boiti taki den leri fu Bijbel kibri mi libi, den yepi mi fu de koloku te fu kaba.​—Psalm 1:1-3.

Fosi, mi ben e fisti gi misrefi, ma now mi e lespeki misrefi èn mi abi wan korostu firi. Mi e libi wan krin libi èn mi e firi taki Yehovah gi mi pardon èn taki a e yepi mi. Na ini a yari 2000, mi trow nanga Karolin, wan moi Kresten sisa di lobi Yehovah neleki mi. Wi oso na wan presi pe freide de. Wi e si en leki wan bigi grani fu de na ini wan organisâsi fu Kresten brada nanga sisa na heri grontapu di e libi wan krin libi èn di lobi makandra.