A moro prenspari sani di yu kan ondrosuku

PREI

YU E si yusrefi leki wan Kresten? Efu dati de so, dan yu na wan fu den moro leki tu milyard sma di e taki dati den na bakaman fu Krestes. Dati na wán fu ibri dri sma na grontapu. Na ini a ten disi, furu kerki e taki dati den na Kresten, ma toku den prati fu di den no e agri nanga son sani èn den e leri sma difrenti sani. Sobun, a kan taki den sani di yu e bribi e difrenti fu den sani di tra sma di e kari densrefi Kresten e bribi. Yu denki taki a no abi trobi san yu e bribi? Fu taki en leti, efu yu wani de wan tru Kresten, dan a prenspari fu luku efu den sani di yu e bribi komoto fu Bijbel.

Sma ben e kari den fosi bakaman fu Yesus Krestes, „Kresten” (Tori fu den apostel 11:26). A no ben de fanowdu fu gi den wan tra nen fu di wán Kresten bribi nomo ben de. Ala den Kresten dati ben e hori densrefi na den leri nanga rai fu Yesus Krestes, a sma di seti a Kresten bribi. Fa a de nanga a kerki fu yu? Yu e bribi taki a kerki fu yu e leri sma san Krestes leri? A kerki fu yu e leri sma den srefi sani di den fosi bakaman fu Krestes ben e bribi? Fa yu kan kon sabi disi? Wán fasi nomo de: Yu musu luku san Bijbel e taki fu den sani dati.

Prakseri a sani disi: Yesus Krestes ben abi furu lespeki gi den Buku fu Bijbel fu di a ben e si den leki Gado Wortu. A krutu den sma di ben meki Gado Wortu lasi krakti fu di den ben feni taki libisma leri ben prenspari moro Gado Wortu (Markus 7:9-13). Dati meki wi kan frustan taki trutru bakaman fu Yesus e bribi san Bijbel e taki. Sobun, ibri Kresten musu aksi ensrefi a sani disi: ’A kerki fu mi e leri sma san Bijbel e taki?’ Fu kan piki na aksi disi, dan a bun fu ondrosuku a sani disi.

Yesus taki dati wi musu anbegi Gado nanga yepi fu san tru èn Bijbel e taki san tru (Yohanes 4:24; 17:17). Na apostel Paulus ben taki dati wan sma kan kisi frulusu, soso te a „kon sabi a tru leri finifini” (1 Timoteyus 2:4). Sobun, den sani di yu e bribi musu kruderi nanga den tru leri fu Bijbel. Iya, na so wawan yu kan kisi frulusu!

FA WI KAN SABI EFU DEN SANI DI WI E BRIBI E KRUDERI NANGA BIJBEL?

Grantangi poti prakseri na den siksi aksi di e kon now èn luku sortu piki Bijbel e gi tapu den aksi disi. Suku den tekst na ini yu Bijbel èn teki ten fu prakseri fu den piki. Baka dati aksi yusrefi: ’A kerki fu mi e leri san Bijbel e leri?’

Den aksi nanga den piki na ini a faki kan yepi yu fu luku efu a kerki fu yu e leri san Bijbel e leri. Yu de klariklari fu ondrosuku a tori disi? Yehovah Kotoigi wani yepi yu fu kon sabi san Bijbel e leri trutru. Yu kan aksi wan fu den fu studeri Bijbel nanga yu sondro taki yu abi fu pai. Yu kan go tu na a website fu wi jw.org/srn.

1 AKSI: Suma na Gado?

PIKI: Yehovah, a Papa fu Yesus, na a Gado di de fu têgo, a abi ala makti èn na en meki ala sani.

SAN BIJBEL E TAKI:

„Ala ten wi e taki Gado, a Tata fu wi Masra Yesus Krestes, tangi te wi e begi gi unu.”—Kolosesma 1:3.

„Na yu, Yehovah wi Gado, warti fu sma prèise yu gi a glori, a grani nanga a makti di yu abi, bika na yu meki ala sani.”—Openbaring 4:11.

Luku sosrefi Romesma 10:13; 1 Timoteyus 1:17.

2 AKSI: Suma na Yesus Krestes?

PIKI: Yesus na a fosi Manpikin fu Gado. Gado meki Yesus, sobun Yesus ben abi wan bigin. Yesus e saka ensrefi na Gado ondro èn a e du a wani fu Gado.

SAN BIJBEL E TAKI:

„A Tata bigi moro mi.”—Yohanes 14:28.

„[Yesus] abi den srefi fasi fu Gado di sma no man si. Iya, en na a fosiwan fu ala sani di Gado meki.”—Kolosesma 1:15.

Luku sosrefi Mateyus 26:39; 1 Korentesma 15:28.

3 AKSI: San na a santa yeye?

PIKI: A santa yeye no de wan sma, ma a de a krakti di Gado e gebroiki fu du a wani fu en. Sma kan kon furu nanga santa yeye èn a kan gi den krakti.

SAN BIJBEL E TAKI:

„Di Elisabet yere na odi fu Maria, a pikin na ini en bere dyompo èn Elisabet kon furu nanga santa yeye.”—Lukas 1:41.

„Unu sa kisi krakti te a santa yeye kon na un tapu.”—Tori fu den apostel 1:8.

Luku sosrefi Genesis 1:2; Tori fu den apostel 2:1-4; 10:38.

4 AKSI: San na a Kownukondre fu Gado?

PIKI: Gado Kownukondre na wan regering na hemel. Yesus na a Kownu fu Gado Kownukondre. Heri esi a Kownukondre disi o meki a wani fu Gado pasa na heri grontapu.

SAN BIJBEL E TAKI:

„A di fu seibi engel bro a trompeti fu en. Ne tranga sten ben de fu yere na ini hemel. Den taki: ’A Kownukondre fu grontapu kon tron a Kownukondre fu wi Masra èn fu a Krestes fu en. A o tiri leki kownu fu têgo, iya, fu ala ten.’”—Openbaring 11:15.

Luku sosrefi Danièl 2:44; Mateyus 6:9, 10.

5 AKSI: Na ala bun sma e go na hemel?

PIKI: Nôno. Gado bosroiti taki wan pikin grupu sma di e gi yesi na en o go na hemel. Bijbel e kari a grupu disi a „pikin ipi”. Den sma disi o tron kownu èn makandra nanga Yesus den o tiri grontapu.

SAN BIJBEL E TAKI:

„No frede, un pikin ipi, bika un Tata feni en bun fu gi unu a Kownukondre.”—Lukas 12:32.

„Den o de priester fu Gado èn fu Krestes, èn na ini den wán dusun yari, den o tiri leki kownu makandra nanga en.” —Openbaring 20:6.

Luku sosrefi Openbaring 14:1, 3.

6 AKSI: San Gado o du gi grontapu èn gi libisma?

PIKI: Te Gado Kownukondre o tiri, dan grontapu o tron wan paradijs pe reti-ati sma o de gosontu, den o libi na ini freide èn den o libi fu têgo.

SAN BIJBEL E TAKI:

„Den safri-ati sma o kisi grontapu èn den o prisiri srefisrefi, fu di freide o de pasa marki.”—Psalm 37:10, 11.

„A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.”—Openbaring 21:3, 4.

Luku sosrefi Psalm 37:29; 2 Petrus 3:13.