Mi gebore na ini wan dorpu na Saksen, wan kontren na ini a Doisri Demokrasia Republiek, di sma sabi now leki Owstu Doisrikondre. Mi kweki na ini wan switi osofamiri pe wi ben lobi makandra. Mi papa nanga mama leri mi san bun èn san no bun. A Doisri Demokrasia Republiek ben de wan Communist kondre èn gi furu sma na Saksen, kerki no ben de wan prenspari sani. Mi srefi no ben e bribi taki wan Gado de. Den fosi 18 yari fu mi libi, mi ben abi a denki disi: Gado no de èn a Communist tiri na a moro bun tiri.

Fu san ede mi ben lobi a denki fu den Communist-sma so? We, fu di mi ben lobi a prakseri taki ala sma na a srefi. Mi ben e bribi ala gudu musu prati na wan eerlijk fasi. Disi ben o meki taki yu no ben abi pôtisma èn yu no ben o abi gudusma. Dati meki mi go wroko gi wan Communist organisâsi gi yonguwan. Di mi ben abi 14 yari, mi ben e wroko na wan presi di ben meki owru papira kon tron papira di sma ben kan gebroiki baka. Den sma fu a foto Aue ben breiti so te nanga san mi ben e du, taki den gi mi wan prijs. Aladi mi ben yongu ete, toku mi leri sabi wan tu bigi politiek man fu a kondre. Mi ben feni taki mi ben e du bun èn taki sani ben o waka bun gi mi.

Ma wantronso ala sani kon kenki. Na ini 1989, di a Skotu fu Berlijn broko, ala den tiri fu den Communist kondre na Owstu Europa fadon. Baka dati, moro sani pasa di ben seki mi trutru. Mi ben kon si taki na a ten fu a Communist tiri, furu kruktudu ben de na ini a kondre. Fu eksempre, efu wan sma no ben wani horibaka gi den Communist tiriman, dan den no ben e si a sma dati leki wan bun borgu. Mi no ben man frustan a sani disi fu di den Communist-sma ben e leri taki ala sma na a srefi. Na kori den ben e kori wi? A sani disi ben bruya mi.

Dati meki mi bigin poti prakseri na tra sani èn mi bigin meki poku nanga skedrei. Mi ben kisi na okasi fu go na wan hei skoro pe mi ben kan leri plèi poku èn bakaten na okasi ben de fu go na wan universiteit. Mi ben wani tron wan bigi pokuman. Mi ben drai baka tu gi ala bun sani di mi papa nanga mama ben leri mi. Now na prisiri nomo mi ben wani meki èn mi ben e hori nanga omeni meisje na a srefi ten. Ma aladi mi ben e meki poku nanga skedrei èn mi ben e du san mi wani, toku mi ben e broko  mi ede nanga wan lo sani. Srefi na ini den tekening di mi ben e meki na ini den skedrei, yu ben kan si taki mi ben e frede srefisrefi. Mi ben aksi misrefi fa a tamara fu wi ben o de èn fu san ede wi de na libi.

Mi ben e fruwondru srefisrefi di mi feni a piki tapu den aksi disi. Wan neti mi ben e sidon nanga wan grupu studenti èn wi ben e taki fu a tamara. Wan fu den ben de Mandy *, wan Yehovah Kotoigi. A neti dati a gi mi bun rai. A taki: „Andreas, efu yu wani feni a piki tapu den aksi di abi fu du nanga a libi èn nanga a tamara, dan yu musu ondrosuku Bijbel bun.”

Aladi mi ben e tweifri pikinso, toku mi ben wani sabi moro fu a tori. Mandy ben taigi mi fu leisi Danièl kapitel 2 èn mi fruwondru trutru di mi leisi en. A profeititori disi e taki fu wan tu grontapumakti. Den regering disi ben o abi furu krakti tapu sani di e pasa na ini a ten disi. Mandy sori mi tra Bijbel profeititori di e taki fu a tamara fu wi. Now fosi mi ben feni a piki tapu den aksi fu mi! Ma suma ben skrifi den profeititori disi èn suma ben man taki so krin san o pasa na ini a ten di e kon? A kan taki toku wan Gado de?

Mandy meki mi miti Horst nanga Angelika, wan trowpaar di ben de Kotoigi. Den yepi mi fu kon frustan Gado Wortu moro bun. Heri esi mi kon si taki na Yehovah Kotoigi wawan e gebroiki Gado nen Yehovah ala ten baka èn den e leri sma a nen disi (Psalm 83:18; Mateyus 6:9). Mi leri taki Yehovah Gado wani gi libisma têgo libi na ini wan paradijs na grontapu. Psalm 37:9 e taki: „Den sma di e howpu na tapu Yehovah, na den o kisi grontapu.” Mi ben prisiri fu si taki ala sma man kisi a libi disi te den e du san Gado wani soleki fa a skrifi na ini Bijbel.

Ma a ben hebi gi mi fu kenki mi libi èn fu du san Bijbel e taki. Fu di mi ben de wan pôpi pokuman, meki mi ben kon abi heimemre. Sobun, mi ben musu leri fosi fa fu sori sakafasi. A no ben makriki gi mi tu fu libi wan krin libi. Mi breiti taki Yehovah abi pasensi nanga sari-ati èn taki a e frustan den sma di wani meki muiti fu du san Bijbel e leri.

A bribi di mi no ben e bribi na ini Gado èn a Communist denki, ben abi furu krakti tapu den fosi 18 yari fu mi libi. Ma baka dati, Bijbel kenki mi heri libi. Den sani di mi leri, meki taki mi no ben e broko mi ede moro nanga a tamara èn mi ben sabi san mi ben wani du nanga mi libi. Na ini 1993, mi teki dopu leki wan Kotoigi fu Yehovah èn na ini 2000 mi trow nanga Tabitha, wan fayafaya preikiman. Wi e gebroiki furu ten fu leri trawan san Bijbel e taki. Furu sma di wi e miti, ben e libi leki fa mi ben libi fosi fu di den no e bribi na ini Gado èn den abi a Communist denki. Mi e prisiri srefisrefi te mi man sori den fa den kan kon sabi Yehovah.

Di mi bigin studeri nanga Yehovah Kotoigi, mi papa nanga mama no ben lobi a tori kwetikweti. Ma now den kon si taki sensi di mi e moksi nanga den Kotoigi, a libi fu mi kon moro bun. Mi breiti taki den e leisi Bijbel now èn taki den e go na den konmakandra fu Yehovah Kotoigi.

Mi nanga Tabitha abi wan bun trowlibi fu di wi e pruberi fu teki ala rai di Bijbel e gi trowpaar. Fu eksempre, wi e gi yesi na a rai di e taki dati trowpaar musu tan lobi makandra èn disi e meki taki a trowlibi fu wi e kon moro betre.​—Hebrewsma 13:4.

Mi no e frede moro èn mi no e broko mi ede moro nanga a tamara. Mi e firi bun fu di mi de na ini wan bigi famiri fu Kresten brada nanga sisa na heri grontapu. A famiri disi e libi bun nanga makandra, wi abi wánfasi èn gi wi ala sma na a srefi. Ala ten mi ben e bribi taki a sani disi kan èn na dati mi ben wani mi heri libi langa.