„Mi si wan kownusturu di ben de na en presi na ini hemel èn wan sma ben e sidon na tapu a kownusturu. A sma di ben sidon na en tapu ben gersi wan yaspis-ston nanga wan redi diriston. Lontu a kownusturu wan alenbo ben de di ben gersi smaragd-ston.”​—Openbaring 4:2, 3.

„Wan brenki leti ben de na en lontu. A brenki leti di ben de na en lontu ben gersi wan alenbo di de fu si na den wolku, baka te hebi alen fadon. A ben gersi a glori fu Yehovah.”​—Esekièl 1:27, 28.

Den fisyun di na apostel Yohanes nanga a profeiti Esekièl kisi e sori o furu glori a Moro Hei Gado, Yehovah, abi. Den fisyun e taki fu sani di wi man frustan makriki. Fu eksempre, den e taki fu moi diriston di e brenki, wan alenbo èn wan kefalek moi kownusturu. Den fisyun e sori wi taki ala sani lontu Yehovah moi èn den krin. Pe Yehovah de, soso freide de.

Den fisyun disi e meki wi prakseri san a psalm skrifiman ben taki fu Gado: „Yehovah bigi èn ala sma musu prèise en. En na a wan di sma musu lespeki moro leki iniwan tra gado, bika ala den gado fu den tra pipel, na gado di no warti noti. Ma na Yehovah meki hemel. En na wan Gado di e kisi furu grani èn di abi bigi glori. Krakti nanga prisiri de na ini a santa presi fu en.”​—Psalm 96:4-6.

Aladi Yehovah na a Moro Heiwan, toku a e gi wi a grani fu begi en èn a e taigi wi krin taki a o arki wi (Psalm 65:2). Gado e broko en ede nanga wi èn a lobi wi so te, taki na apostel Yohanes ben kan taki: „Gado na lobi.”​—1 Yohanes 4:8.

„Fu di a santa yeye ben de na Stefanus tapu, meki a luku go na hemel èn a si a glori fu Gado èn sosrefi Yesus di ben e tanapu na Gado en reti-anusei. Ne a taki: ’Luku! Mi e si taki hemel opo èn a Manpikin fu libisma e tanapu na Gado en reti-anusei.’”​—Tori fu den apostel 7:55, 56.

Fosi Stefanus kisi a fisyun disi, den fesiman fu den Dyu ben meki sma kiri Yesus. Nanga den srefi man disi Stefanus ben e taki. A fisyun e sori taki Yesus ben de na libi. A ben kisi wan opobaka go na hemel èn a ben abi wan hei posisi. Na fu a tori disi na apostel Paulus ben taki di a skrifi: ’Yehovah gi Krestes wan opobaka èn a poti en sidon na  en reti-anusei na ini hemel. A poti Krestes moro hei leki ala tirimakti, ala hei makti, ala krakti, nanga a makti fu ala heihei sma, èn a gi en wan nen di bigi moro ala tra nen, no soso na ini a grontapu disi, ma sosrefi na ini a wan di o kon.’​—Efeisesma 1:20, 21.

Bijbel no e taki nomo fu a hei posisi di Yesus abi, ma a e sori tu taki neleki Yehovah, Yesus e broko en ede furu nanga libisma. Di a ben de na grontapu, a ben dresi den sikisma, a ben yepi den swakiwan èn a wiki den dedewan. Di a dede gi wi, a sori o furu a lobi Gado nanga libisma (Efeisesma 2:4, 5). Now di Yesus e tanapu na Gado reti-anusei, dan heri esi a o gebroiki a makti di a kisi fu tyari blesi kon gi ala libisma di e gi yesi na Gado.

„Mi [a profeiti Danièl] tan luku teleki mi si den e poti kownusturu. Ne a Graniwan di de sensi owruten [Yehovah] go sidon. . . . Dusun tron dusun engel ben e dini en èn tin dusun tron tin dusun ben e tanapu leti na en fesi.”​—Danièl 7:9, 10.

Na ini a fisyun disi Danièl no si wán engel nomo na hemel, ma a si dusundusun. A musu de so taki a fisyun disi meki a kisi furu lespeki gi Gado! Den engel moi srefisrefi, den koni èn den abi furu makti. Soleki fa Bijbel e sori, dan yu abi sosrefi seraf-engel nanga kerub-engel. Bijbel e taki fu engel moro leki 250 leisi.

Engel a no libisma di ben libi fosi na grontapu. Gado ben meki den engel langa ten fosi a meki libisma. Di Gado seti grontapu, den engel ben e luku èn den ben e prèise Gado nanga wan tranga sten.​—Yob 38:4-7.

Wan fasi fa den bun engel e dini Gado, na taki den e horibaka gi a moro prenspari wroko di e du na grontapu now. Dati na a bun nyunsu fu Gado Kownukondre di e preiki na ala sei (Mateyus 24:14). Na ini wan fisyun di na apostel Yohanes ben kisi, wi kan si fa den engel e horibaka gi a preikiwroko. Yohanes ben skrifi: „Mi si wan tra engel e frei na loktu. A ben abi têgo bun nyunsu di a ben musu fruteri den sma di e libi na grontapu, iya, sma fu ala kondre, lo, tongo, nanga pipel” (Openbaring 14:6). Aladi engel no e taki nanga libisma leki fa den ben e du dati son leisi na ini owruten, toku den e yepi den wan di e preiki a bun nyunsu fu feni reti-ati sma di wani arki.

„Wan feti bigin na ini hemel: Mikael [Yesus Krestes] nanga den engel fu en ben feti nanga a bigi kaiman èn a bigi kaiman nanga den engel fu en ben feti nanga den, ma a bigi kaiman no wini a feti èn presi no ben de moro gi den na ini hemel. Fu dati ede den fringi a bigi kaiman go na grontapu. En na a fosi sneki, a wan di den e kari Didibri nanga Satan èn a e kori sma na heri grontapu. Den fringi en go na grontapu èn den fringi den engel fu en go na grontapu makandra nanga en.”​—Openbaring 12:7-9.

Wan ten ben de taki freide no ben de na hemel. Syatu baka di Gado meki libisma, wan fu den engel ben wani taki sma anbegi en. A firi disi ben kon so tranga, taki a opo ensrefi teige Yehovah èn a tron Satan, san wani taki „Gensman”. Bakaten, tra engel teki a sei fu en èn den tron ogri yeye. Den engel disi takru srefisrefi èn den e gens Yehovah fayafaya. Den meki taki furu sma e libi na wan fasi di Yehovah no lobi.

Satan nanga den ogri yeye takru srefisrefi. Den na feanti fu libisma èn den meki taki furu pina de na grontapu. Fu eksempre, Satan kiri ala den meti nanga den futuboi fu a reti-ati man Yob. Baka dati a meki „wan bun tranga winti” broko na oso di den pikin fu Yob ben de na ini, so taki den alamala dede. Dan a meki Yob kisi „wan takru siki. Fu en ede te na en ondrofutu Yob ben lai butsweri.”​—Yob 1:7-19; 2:7.

Ma heri esi Gado o pori Satan. Sensi di den fringi en kon na grontapu, a sabi taki „en ten syatu” (Openbaring 12:12). Satan o kisi en strafu èn dati na bun nyunsu gi wi!

„Yu [Yesus] bai sma gi Gado, komopo fu ibri lo, tongo, pipel, nanga kondre. Na yu meki den tron wan Kownukondre èn yu meki den tron priester gi wi Gado èn den o tiri grontapu leki kownu.”​—Openbaring 5:9, 10.

Neleki Yesus, tra sma o kisi wan opobaka tu fu go libi na hemel. Yesus ben taigi den reti-ati apostel fu en: „Mi e gowe fu sreka wan presi gi unu. Te mi gowe . . , dan mi o kon baka èn mi o teki unu na ini oso, so taki unu kan de pe mi de.”​—Yohanes 14:2, 3.

Den sma di e go na hemel, e go drape fu du wan wroko. Makandra nanga Yesus, den o de na ini a  Kownukondre di o tiri ala sma na grontapu èn a o tyari blesi kon gi den. Na fu a Kownukondre disi Yesus leri den bakaman fu en fu begi na ini a Wi Tata begi: „Wi Tata na hemel, meki yu nen de santa. Meki yu Kownukondre kon. Meki yu wani pasa na grontapu soleki fa a e pasa na hemel.”​—Mateyus 6:9, 10.

„Mi [na apostel Yohanes] yere wan tranga sten e komoto fu a kownusturu. A taki: ’Luku, a tenti fu Gado de na libisma. . . . A o figi ala watra puru na den ai èn dede no o de moro. Nowan sari, noso krei, noso pen no o de moro. Den fositen sani pasa kaba.’”​—Openbaring 21:3, 4.

A fisyun disi e taki fu a ten te Yesus nanga den sma di kisi wan opobaka fu go na hemel, o tiri Gado Kownukondre. Den o tyari wan kaba kon na a tiri fu Satan èn den o meki grontapu tron wan paradijs. Nowan sani di e meki libisma pina èn sari o de moro. Srefi dede no o de moro.

Ma fa a de nanga den milyunmilyun sma di dede èn di no o kisi wan opobaka fu go na hemel? Na a ten dati, den sma disi o kon na libi baka fu libi fu têgo na ini Paradijs dya na grontapu.​—Lukas 23:43.