Milyunmilyun sma na heri grontapu e bribi taki te den e hori Kresneti dan den e memre a dei di Yesus Krestes gebore. Ma oiti yu aksi yusrefi efu den fosi Kresten, soleki den apostel nanga den disipel fu Yesus, ben e hori Kresneti? Yu sabi san Bijbel e taki fu a hori di sma e hori friyaridei? Te wi feni piki tapu den aksi disi, dan wi o man sabi efu Kresten musu hori Kresneti.

Nowan presi ini Bijbel yu o leisi taki Yesus noso tra anbegiman fu Gado ben e hori friyari-oso. Bijbel e taki soso fu tu sma di ben hori den friyaridei. Nowan fu den sma disi ben e anbegi Yehovah, a Gado fu Bijbel. Boiti dati ogri ben pasa tapu a friyari-oso fu den (Genesis 40:20; Markus 6:21). Soleki fa na Encyclopædia Britannica e sori, dan den fosi Kresten „ben e si friyaridei leki wan gwenti fu sma di e anbegi falsi gado”. Den no ben wani abi noti fu du nanga a gwenti disi.

Bijbel no e taki soifri o ten Yesus gebore. A Cyclopedia fu McClintock nanga Strong e taki: „Na nowan presi na ini a Nyun Testamenti noso wan tra buku skrifi sortu dei Krestes gebore.” Efu Yesus ben wani taki den bakaman fu en musu hori en friyaridei, dan a ben o sorgu taki den sabi a dei di a gebore.

Boiti dati, Bijbel no e taki dati Yesus noso wan fu den disipel fu en ben e hori Kresneti. Soleki fa a New Catholic Encyclopedia e sori, dan a fosi presi pe skrifi taki sma ben hori Kresneti, ben de na ini a Chronograaf fu Filocalus, wan buku di meki na ini a yari 336 na ini Rome. Dati ben de omeni tenti yari baka di Bijbel kaba skrifi èn hondrohondro yari baka di Yesus ben de na grontapu. Dati meki McClintock nanga Strong taki dati „Kresneti a no wan fesa di komoto fu Gado èn a no skrifi tu na ini a Nyun Testamenti”. *

Yesus a Bigi Leriman taigi den bakaman fu en krin san a wani taki den musu du èn ala den sani disi skrifi na ini Bijbel. Ma a no taigi den fu hori Kresneti. Neleki fa wan skoromeester no wani taki den studenti e du sani di a no aksi den, na so Yesus no wani taki den bakaman fu en „du sani di no skrifi” na ini den Santa Buku.​—1 Korentesma 4:6.

Ma wan prenspari fesa de di den fosi Kresten ben e hori. Dati na a Memrefesa fu a dede fu Yesus. Na Yesus srefi taigi den disipel fu en fu hori a Memrefesa èn a sori den fa den musu du dati. Ala den sani di a taigi den èn sosrefi a dei di den musu hori a fesa disi, skrifi na ini Bijbel.​—Lukas 22:7, 19; 1 Korentesma 11:25.

Soleki fa wi si, dan Kresneti na wan fesa di abi fu du nanga friyaridei èn na sma di ben e anbegi falsi gado ben e hori friyaridei. Dati meki den fosi Kresten no ben hori Kresneti. Boiti dati, Bijbel no e taki dati Yesus noso den bakaman fu en ben e hori Kresneti. Na den sani disi meki taki milyunmilyun Kresten na heri grontapu no e hori Kresneti.