1-3. (a) Fa Kresten sori taki den feni en prenspari fu kon makandra? (Luku a prenki na a bigin fu na artikel.) (b) San wi o go luku na ini na artikel disi?

CORINNA ben abi 17 yari nomo di skowtu tyari en mama go sroto na ini wan strafuman-kampu na Sovyet-Unie. Bakaten skowtu grabu Corinna hori tu, dan den seni en go leki strafuman na Siberia di ben de dusundusun kilometer fu en oso. Den sma drape ben si en leki wan srafu. Son leisi den ben dwengi en fu wroko na dorosei pe a ben kowru srefisrefi, aladi a no ben abi nofo krosi fu waran en skin. A libi disi ben hebi gi Corinna, ma toku en nanga wan tra sisa ben meki ala muiti fu go na wan fu den konmakandra fu wi.

² A taki: „Netiyuru wi gowe libi a presi pe wi ben e wroko èn wi waka go na a presi pe loko ben e stop. A pasi go drape ben de sowan 25 kilometer. A loko gowe tu yuru na neti èn wi rèi sowan siksi yuru fosi wi ben man komoto fu a loko. Baka dati wi waka 10 kilometer go na a konmakandra presi.” A ben bun taki den meki someni muiti? Corinna e taki: „Na a konmakandra wi studeri A Waktitoren èn wi singi Kownukondre singi. Disi gi wi deki-ati èn a tranga a bribi fu wi.” Aladi na baka dri dei fosi den drai  go baka na a presi pe den ben e wroko, toku a basi fu den no si srefi taki Corinna nanga a tra sisa no ben de.

³ A pipel fu Yehovah sori ala ten taki den feni en wan prenspari sani fu kon makandra fu anbegi Gado. Fu eksempre, leti baka di a fosi Kresten gemeente seti, den bakaman fu Yesus bigin kisi a gwenti fu kon na makandra. „Ibri dei den ben de na ini a tempel leki wán man” (Tori 2:46). Kande yu srefi e prisiri tu fu go na den konmakandra ibri wiki. Toku a e pasa nanga ala Kresten taki son leisi sani e tapu den fu go na den konmakandra. A kan de a grontapu wroko fu wi, kande wi abi furu fu du, noso kande den sani di wi musu du ala dei e weri wi skin so te taki a hebi gi wi fu go na den konmakandra. San wi kan du so taki den sani disi no e tapu wi fu go na ala den konmakandra? ^[1] Fa wi kan yepi wi Bijbelstudenti nanga tra sma fu si taki a de prenspari fu go na den konmakandra? Na ini na artikel disi wi o luku aiti sani di e sori wi fu san ede wi musu kon makandra fu anbegi Gado. Te wi o taki fu den aiti sani disi, wi o luku dri prenspari aksi: (1) Sortu wini yu e kisi, (2) sortu wini trawan e kisi èn (3) fa Yehovah e firi? ^[2]

4. Fa den konmakandra e yepi wi fu leri sani fu Yehovah?

⁴ Wi e leri furu na den konmakandra. Na ibri konmakandra wi e leri sani fu wi Gado Yehovah. Fu eksempre, na ini den tu yari di pasa furu gemeente studeri a buku Kon krosibei na Yehovah na a Gemeente Bijbelstudie. Yu no feni taki den moi fasi fu Gado di wi studeri na a konmakandra disi nanga den moi piki fu den brada nanga sisa, meki a lobi di yu abi gi yu hemel Tata kon moro tranga? Te wi e poti prakseri na den lezing, den demo nanga den pisi di wi e leisi na ini Bijbel, dan wi e kon sabi moro fu Gado Wortu tu (Neh. 8:8). Fu eksempre, denki den moi sani di yu e leri ala wiki te yu e sreka yusrefi gi a pisi fu Bijbel di wi musu leisi èn te yu e arki den moi sani di den brada nanga sisa e taki fu a pisi disi.

5. Fa den konmakandra yepi yu fu du san yu leri na ini Bijbel èn fu preiki moro bun?

⁵ Den konmakandra e yepi wi fu fiti Bijbel rai na ini wi libi (1 Tes. 4:9, 10). Fu eksempre, a Waktitoren-studie e taki spesrutu fu sani di Gado pipel abi fanowdu. A Waktitoren-studie yepi yu fu luku baka san yu wani du nanga yu libi? A yepi yu fu leri fa fu gi yu brada noso sisa pardon, noso fa yu kan begi moro bun? A mindriwiki konmakandra e leri wi fa fu du wi preikiwroko. Wi e leri fa fu preiki a bun nyunsu èn fa wi kan leri sma den tru tori fu Bijbel moro bun.​—Mat. 28:19, 20.

6. Fa den konmakandra e gi wi deki-ati èn e yepi wi fu tan abi wan tranga bribi?

⁶ Den konmakandra e gi wi deki-ati. A grontapu disi kan meki wi firi brokosaka, a kan meki wi lasi-ati èn a kan meki wi bribi kon swaki. Ma den konmakandra e gi wi deki-ati èn den e tranga a bribi fu wi. (Leisi Tori fu den apostel 15:30-32.) Na furu fu den konmakandra fu wi, wi e luku fa Bijbel profeititori e kon tru. Na so wi e kon de moro seiker taki den sani di Yehovah pramisi wi gi a ten di e kon, o kon tru. Ma a no den brada nanga sisa nomo di e hori wan lezing e gi wi deki-ati. Tra brada nanga sisa di e gi piki èn di e singi nanga den heri ati, e gi wi deki-ati tu (1 Kor. 14:26). Te wi e taki nanga wi brada nanga sisa, fosi a konmakandra bigin èn baka a konmakandra, dan wi e firi taki wi na wán famiri èn wi e kisi krakti baka.​—1 Kor. 16:17, 18.

7. Fu san ede a de so prenspari fu de na den konmakandra?

⁷ Na den konmakandra Gado e gi wi en santa yeye fu yepi wi. Yesus Krestes di tron Kownu ben taki: „A sma di abi yesi, meki a  yere san a santa yeye e taigi den gemeente” (Openb. 2:7). Sobun, Yesus e tiri a Kresten gemeente nanga yepi fu a santa yeye. Gado en santa yeye e yepi wi fu no gi abra te wi e kisi tesi. A santa yeye e yepi wi fu teki bun bosroiti, fu du wi preikiwroko bun èn fu preiki sondro frede. Dati meki efu wi wani meki a santa yeye yepi wi, dan wi musu gebroiki ala den sani di Gado seti gi wi èn wi musu go na den konmakandra tu.

8. Te brada nanga sisa e si wi na den konmakandra èn den e yere fa wi e gi piki èn fa wi e singi, dan fa dati e yepi den? (Luku sosrefi a faki „A e firi moro bun te a komoto fu den konmakandra”.)

⁸ Den konmakandra e gi wi na okasi fu sori wi brada nanga sisa taki wi lobi den. Son brada nanga sisa na ini yu gemeente e kisi furu problema. Dati meki na apostel Paulus e gi wi a rai disi: „Meki wi poti prakseri na makandra.” Baka dati Paulus e taki dati te wi „no misi konmakandra”, dan wi e sori taki wi e broko wi ede nanga den brada nanga sisa disi (Hebr. 10:24, 25). Sobun, te yu de na den konmakandra, yu e sori taki yu e meki ten gi yu brada nanga sisa, taki yu wani poti prakseri na den èn taki yu e broko yu ede nanga den. Boiti dati, te yu e singi èn yu e gi piki nanga yu heri ati, dan yu e gi den deki-ati.​—Kol. 3:16.

9, 10. (a) Fruteri fa den sani di Yesus taki na Yohanes 10:16 e yepi wi fu si o prenspari a de fu kon makandra nanga wi brada nanga sisa. (b) Te wi abi a gwenti fu de na den konmakandra, dan fa wi kan yepi wan sma di en famiri no wani bumui moro nanga en?

⁹ Den konmakandra e meki taki wi e kon de wán nanga wi brada nanga sisa. (Leisi Yohanes 10:16.) Yesus ben agersi ensrefi nanga wan skapuman èn den bakaman fu en a ben agersi nanga wan ipi skapu. Kon meki wi taki dati tu skapu de na tapu wan bergi e nyan grasi, wán de na a futu fu a bergi èn tu de na wan tra presi. Yu ben o taki dati den feifi skapu disi na wán ipi? Nôno. Na soso te skapu de nanga makandra èn den e waka baka a skapuman fu den, yu kan taki dati den na wán ipi. Na so a de tu nanga wi. Wi no man taki dati wi e waka baka a Skapuman fu wi efu fu espresi wi no e kon makandra nanga wi brada nanga sisa. Efu wi wani de „wán ipi di abi wán skapuman”, dan wi musu kon makandra nanga den.

¹⁰ Te wi e go na wan konmakandra, dan na so wi e sori taki wi de leki wán famiri (Ps. 133:1). Son brada nanga sisa fu wi abi papa, mama, brada, noso sisa di no wani bumui moro nanga den. Ma Yesus ben pramisi taki a ben o gi den wan famiri di lobi den èn di e sorgu gi den (Mark. 10:29, 30). Te yu abi a gwenti fu go na den konmakandra, dan yu kan tron wan papa, wan mama, wan brada noso sisa gi den lobi Kresten disi. Disi no  musu gi yu deki-ati fu de na ala den konmakandra?

11. Te wi e go na den konmakandra, dan fa wi e gi Yehovah san a abi reti na tapu?

¹¹ Te wi e go na den konmakandra, wi e gi Yehovah san a abi reti na tapu. Na Yehovah meki wi. Fu dati ede wi musu prèise en, wi musu gi en glori nanga grani èn wi musu taki en tangi. (Leisi Openbaring 7:12.) Te wi e begi, wi e singi èn wi e taki fu Yehovah na den konmakandra, dan wi e gi en san a abi reti na tapu. Na so wi e anbegi en. Wi e si en leki wan bigi grani fu prèise a Gado di du so furu bun gi wi.

12. Fa Yehovah e firi te wi e go na den konmakandra soleki fa a taigi wi fu du?

¹² Fu di Yehovah na wi Mekiman, meki wi musu gi yesi na en tu. A taigi wi taki wi no musu misi konmakandra, spesrutu na ini a ten disi fu a kaba. Te wi e du san Yehovah taki, dan a e prisiri (1 Yoh. 3:22). A e si sortu muiti wi e meki fu go na den konmakandra èn a breiti nanga dati.​—Hebr. 6:10.

13, 14. Fu san ede wi kan taki dati den konmakandra e meki wi kon krosibei na Yehovah nanga Yesus?

¹³ Te wi e go na den konmakandra, dan wi e sori Yehovah taki wi wani kon krosibei na en nanga en Manpikin. Na den konmakandra, wi Gran Leriman e gi wi leri nanga yepi fu en Wortu (Yes. 30:20, 21). Srefi te sma di no de Kotoigi e kon na den konmakandra fu wi, den kan si taki ’Gado de trutru na wi mindri’ (1 Kor. 14:23-25). Yehovah e blesi den konmakandra, fu di a e gi wi en santa yeye èn a e sorgu taki wi e kisi a leri di wi abi fanowdu. Dati meki wi kan taki dati te wi de na den konmakandra, wi e arki a sten fu Yehovah èn wi e firi taki a lobi wi. Na so wi e kon krosibei na en.

¹⁴ Yesus ben taki: „Te tu noso dri sma kon makandra na ini mi nen, dan mi de drape na den mindri” (Mat. 18:20). Te yu luku en bun, dan a sani disi di Yesus taki abi fu du nanga den konmakandra fu wi. Krestes di de na Edeman fu a gemeente, e „waka na mindri” den gemeente fu Gado pipel (Openb. 1:20–2:1). Denki a tori: Na Yehovah nanga Yesus srefi e gi wi deki-ati na den konmakandra. Fa yu denki taki Yehovah e firi te a si taki wi e meki muiti fu kon krosibei na en nanga en Manpikin?

15. Te wi e go na den konmakandra, dan fa dati e sori taki wi wani gi yesi na Gado?

¹⁵ Te wi e go na den konmakandra, dan wi e sori taki wi e horibaka gi Yehovah leki wi Tiriman. Aladi Yehovah taigi wi taki wi musu go na den konmakandra, toku a no e dwengi wi fu du dati (Yes. 43:23). Dati meki a de na wi fu sori Yehovah o tranga wi lobi en èn taki nanga wi heri ati wi e horibaka gi a tiri fu en (Rom. 6:17). Fu eksempre, kande a basi fu wi wani taki wi e wroko go doro aladi dati kan meki taki wi no e go ala wiki na den konmakandra. A kan pasa tu taki lanti e taigi wi taki efu wi go na den konmakandra, wi o pai butu, den o poti wi na strafu-oso noso den o du wan moro ogri sani nanga wi srefi. Noso kande wi wani go du wan prisiri sani na presi fu go na den konmakandra. Na ini ala den situwâsi disi wi musu teki wan bosroiti: Wi o gi yesi na Gado noso na libisma? (Tori 5:29) Te wi e teki a bosroiti fu horibaka gi Yehovah leki wi Tiriman, dan wi e prisiri na ati fu en.​—Odo 27:11.

16, 17. (a) Fa wi du sabi taki den konmakandra ben de prenspari gi den fosi Kresten? (b) Fa Brada George Gangas ben e si den konmakandra?

¹⁶ Baka di wan bigi wondru pasa na a Pinksterfesa fu a yari 33, den fosi Kresten ’tan poti prakseri na den leri fu den apostel. Ibri dei den ben de na ini a tempel leki wán man’  (Tori 2:42, 46). A no ben makriki gi den Kresten disi fu go na den konmakandra fu di a tirimakti fu Rome nanga den Dyu kerki fesiman ben e gens den. Toku den no tapu fu kon makandra.

¹⁷ Furu futuboi fu Yehovah na ini a ten disi sori taki den abi furu warderi gi den konmakandra. Fu eksempre, George Gangas di ben de wan memre fu a Tiri Skin moro leki 22 yari, ben taki: „Te mi e kon makandra nanga mi brada nanga sisa, mi e prisiri trutru èn mi e kisi furu deki-ati. Mi na wan fu den fosiwan di e doro na a Kownukondre zaal èn nofo tron mi e gowe leki wan fu den lastiwan. Mi e firi bun te mi e taki nanga a pipel fu Gado. Te mi de na den mindri, mi e firi taki mi de nanga mi famiri fu di wi e libi leki brada nanga sisa.” A brada disi ben taki tu dati a ben e angri ala ten fu de na den konmakandra.

18. Fa yu e denki fu den konmakandra fu wi èn san yu wani du?

¹⁸ Na so yu e denki tu fu den konmakandra fu wi pe wi e kon fu anbegi Yehovah? Efu yu e denki so, dan tan du muiti fu go na den konmakandra ibri wiki. Te yu e du dati, dan yu e sori taki yu e agri nanga Kownu David di ben taki: „Yehovah, mi lobi fu de na ini na oso pe yu e tan.”​—Ps. 26:8.