1, 2. (a) Soleki fa Elifas nanga Bildad ben taki, dan fa Gado e denki fu a wroko di wi e du gi en? (b) Fa Yehovah meki den kon sabi fa a ben e denki trutru?

„YU DENKI taki Gado man gebroiki wan libisma gi wan bun sani? Yu denki taki a man gebroiki wan sma di man si sani krin? Na Almaktiwan e prisiri taki yu na wan reti-ati sma? Noso a e kisi wini te yu e du soso bun?” (Yob 22:1-3). Oiti yu aksi yusrefi san na a piki tapu den sortu aksi disi? Di Elifas a Teimansma ben aksi Yob den sani disi, dan a no de fu taki dati Elifas ben bribi taki a piki tapu den aksi disi na nôno. Elifas en mati, Bildad a Suwasma, ben feni srefi taki noiti libisma o bun nofo gi Gado.—Leisi Yob 25:4.

² Den falsi trowstuman disi ben feni taki a muiti di wi e meki fu dini Gado, no wani taki noti gi en, èn taki wi de leki woron gi Gado (Yob 4:19; 25:6). Te yu e luku en so, dan a gersi leki Elifas nanga Bildad ben abi sakafasi (Yob 22:29). Fu taki en leti, te yu de na tapu wan hei bergi noso na ini wan opolani, dan a gersi leki den sani di libisma meki na noti. Ma te Yehovah e luku kon na grontapu komoto fu hemel, dan yu denki taki na so a e denki fu a muiti di wi e meki fu horibaka  gi a Kownukondre? Wi e kon sabi fa Yehovah e denki te wi e luku fa a piri-ai gi Elifas, Bildad nanga Sofar, fu di den sani di den ben e taki no ben tru. A sori den taki a ben breiti nanga Yob èn a kari en „mi futuboi” (Yob 42:7, 8). Disi e sori taki „Gado man gebroiki wan libisma gi wan bun sani”.

3. San Elihu taki fu a muiti di wi e du fu dini Yehovah èn san a ben wani taki nanga dati?

³ Elihu no kisi piri-ai fu Yehovah di a aksi: „Efu yu feni taki yu abi leti trutru, yu denki taki yu e du en wan bun? Gado ben kisi wan sani fu yu?” (Yob 35:7) A de so taki Elihu ben e sori taki a muiti di wi e meki gi Yehovah na fu soso? Nôno. A ben taki dati Yehovah no abi wi fanowdu fu anbegi en. Yehovah no abi noti fanowdu. Wi no kan meki taki a e kon moro gudu noso taki a e kisi moro makti. Tra fasi leki dati, ibri bun fasi nanga ibri sani di wi man du e komoto fu Yehovah èn a e luku fa wi e gebroiki den sani dati.

4. Fa Yehovah e firi te wi e du bun gi trawan?

⁴ Te sma e sori trutru lobi gi den futuboi fu Yehovah, dan Yehovah e si en leki den du dati gi en. Odo 19:17 e taki: „A sma di e du bun gi den mofinawan e leni Yehovah èn A o pai a sma dati baka gi den bun di a du.” San a tekst disi e sori? A de so taki Yehovah e si iniwan bun di wi e du gi den mofinawan? Fu taki en leti, ibri leisi te wi e sori sari-ati gi trawan, Yehovah e si dati. Èn aladi Yehovah na a Mekiman fu hemel nanga grontapu, toku a e si den bun di wi e du gi trawan leki sani di wi leni en. A o pai wi baka nanga moi blesi. Gado en eigi manpikin ben taki dati.—Leisi Lukas 14:13, 14.

5. Sortu aksi wi o luku now?

⁵ Yehovah ben meki a profeiti Yesaya fruteri fa a breiti te libisma e yepi fu meki a wani fu en kon tru (Yes. 6:8-10). Yesaya ben de klariklari fu teki a frantwortu disi na en tapu. Na ini a ten disi dusundusun sma de leki Yesaya di ben taki: „Dya mi de! Seni mi.” Den sma disi de klariklari fu du ala sortu wroko gi Yehovah na iniwan presi èn na ini iniwan situwâsi. Toku wan sma ben kan aksi ensrefi: ’A muiti di mi e du prenspari gi Gado? Awansi mi no e teki prati na a wroko disi, toku Yehovah o sorgu taki a wroko e du, a no so?’ Oiti yu ben e firi so? Wi o kisi piki tapu den aksi disi te wi e luku san ben pasa na ini a ten fu Debora nanga Barak.

6. Fu san ede a ben gersi leki a legre fu Yabin ben o man wini den Israelsma makriki?

⁶ Sowan 20 yari, Kownu Yabin fu den Kanansma ben e „du ogri-ati sani” nanga den Israelsma. Den sma fu den dorpu ben frede srefi fu gowe libi den oso. Te yu luku en bun, den no ben o man wini a feti fu di den no ben abi bun fetisani. A feanti fu den ben abi 900 fetiwagi di ben abi isri nefi na den wiel.—Krut. 4:1-3, 13; 5:6-8.

7, 8. (a) San Yehovah ben taigi Barak? (b) Fa Israel wini a legre fu Yabin? (Luku a prenki na a bigin fu na artikel.)

⁷ Toku Yehovah meki na umaprofeiti Debora gi Barak a krin boskopu disi: „Go na Tabor-bergi makandra nanga tin dusun sma fu a lo fu Naftali nanga Seibulon èn panya unsrefi na ala sei fu a bergi. Dan mi o meki Sisera, a legre-edeman fu Yabin, kon na yu na a lagipresi pe Kison-liba e lon. Sisera o kon drape  makandra nanga en legre èn nanga den fetiwagi fu en. Dan mi o meki yu wini en.”—Krut. 4:4-7.

⁸ A boskopu panya, èn sma kon makandra na Tabor-bergi. Barak no lasi ten fu du san Yehovah ben taigi en. (Leisi Krutuman 4:14-16.) Di den ben e feti na Tanak, dan wantronso wan hebi alen fadon èn a heri presi drape kon tokotoko. Barak hari go na baka a legre fu Sisera te na Haroset di ben de sowan 24 kilometer moro fara. Ma di Sisera ben de na pasi, a kefalek fetiwagi fu en go fasi na ini a tokotoko. A libi a fetiwagi na baka èn a lon go na Sananim. Drape a go suku kibri na ini a tenti fu Yael, a wefi fu Heiber a Kenietsma. Fu di a ben weri fu a feti, meki a fadon na sribi. Na so Yael feni okasi fu kiri en (Krut. 4:17-21). A feanti fu Israel ben lasi a strei! *

9. San Krutuman 5:20, 21 e fruteri wi fu a feti nanga Sisera?

⁹ A bun fu studeri Krutuman kapitel 4 nanga 5 makandra, fu di ibriwan fu den kapitel e taki fu sani di no de fu feni na ini a trawan. Fu eksempre, Krutuman 5:20, 21 e taki: „Na hemel den stari ben de di den feti. Den ben de na a presi fu den di den feti nanga Sisera. Kison-liba wasi den gowe.” A sani disi wani taki dati den engel ben feti tu noso taki ston fadon komoto na hemel? Bijbel no e taki finifini san pasa. Ma a de krin taki na Gado wawan ben kan meki so wan hebi alen fadon na a yoisti presi èn na a yoisti yuru, so taki 900 fetiwagi fasi na ini a tokotoko. Krutuman 4:14, 15 e taki dri leisi taki na Yehovah meki den wini a feti. Nowan fu den 10.000 srudati ben kan meki bigi taki na en tyari frulusu kon gi a pipel.

10, 11. San ben de „Meros”, èn fu san ede den ben fluku en?

¹⁰ Ma luku taki di Barak nanga Debora ben e prèise Yehovah fu di den ben wini a strei, den singi: „’Fluku Meros,’ na so na engel fu Yehovah taki, ’tan fluku ala den sma di e libi drape, bika den no kon yepi Yehovah. Den no meki den tranga man fu den kon yepi Yehovah.’”—Krut. 5:23.

¹¹ San ben de Meros? Wi no sabi seiker. Kande a fluku wroko so bun taki Meros no de srefisrefi moro. Kande Meros ben de wan foto pe den sma no ben kon fu yepi di Yehovah ben kari sma fu kon feti. Efu Sisera ben pasa na ini a foto dati di a ben e lowe, dan kande den sma fu a foto dati no ben teki na okasi fu grabu en. Fa a kan taki den no ben yere taki Yehovah ben e kari sma fu kon yepi feti? Tin dusun sma fu a kontren fu den ben kon makandra fu kon yepi nanga a feti. Prakseri fa den sma fu Meros ben si fa na ogri-ati fetiman disi ben e lon pasa na ini den strati fu den aladi a ben frede. Disi ben o de wan heri moi okasi gi den fu yepi Yehovah èn fu kisi wan blesi fu en. Ma den ben teki na okasi dati? Efu den no ben teki en, dan den ben de heri tra fasi leki Yael di ben sori deki-ati.—Krut. 5:24-27.

12. Soleki fa Krutuman 5:9, 10 e sori, dan sortu denki den difrenti sma ben abi? San disi e leri wi?

¹² Na Krutuman 5:9, 10, wi e si wan tra difrenti na mindri den sma di ben go yepi Barak nanga a feti èn den wan di no go. Debora nanga Barak ben prèise „den legre-edeman fu Israel, di ben de klariklari fu go nanga a pipel”. Den ben de heri tra fasi leki den wan di ben e „rèi na  tapu umaburiki di weti pikinso”. Fu di den sma disi ben e denki tumusi furu fu densrefi, meki den no go yepi nanga a feti. Na so a ben de tu nanga den sma di ben e „sidon na tapu diri matamata di bradi na gron”. Den sma disi ben lobi wan gudu libi. Sosrefi den wan di ben e „waka na tapu a pasi”. Den sma disi no ben wani meki nowan muiti. Den ben de heri tra fasi leki den wan di ben de klariklari fu go feti nanga Barak na ini a bergi kontren fu Tabor èn na ini a lagi presi fu Kisyon di ben tron wan swampu. Ala den sma di ben de nomo fu abi wan switi libi, ben kisi a rai fu „poti prakseri!” Iya, den ben musu denki dipi fu na okasi di den ben lasi fu yepi Yehovah fu meki a wani fu en kon tru. Na ini a ten disi, den wan di no e meki muiti fu dini Gado nanga den heri ati, musu du a srefi tu.

13. Fa a denki fu den lo fu Ruben, Dan nanga Aser ben e difrenti fu a denki fu Seibulon nanga Naftali?

¹³ Den sma di go yepi nanga a feti, ben man si nanga den eigi ai fa Yehovah, a Moro Hei Tiriman, e kibri a pipel fu en. Den ben abi moi sani fu fruteri te den ben o „taki fu den reti sani di Yehovah ben du gi den” (Krut. 5:11). Ma Krutuman 5:15-17 e sori taki den lo fu Ruben, Dan, nanga Aser ben feni den skapu, den sipi nanga den lanpe fu den moro prenspari leki a wroko fu Yehovah. Ma tra fasi leki den lo dati, Seibulon nanga Naftali „ben de klariklari fu du sani di ben kan meki den lasi den libi”, soso fu man yepi Debora nanga Barak (Krut. 5:18). Wi kan leri wan sani te wi e luku den difrenti fasi fa den lo ben e denki fu na okasi di den kisi fu yepi Yehovah.

14. Fa wi kan horibaka gi Yehovah leki a Moro Hei Tiriman?

¹⁴ Na ini a ten disi, wi no e kisi kari fu go yepi nanga wan feti, ma wi abi a grani fu preiki fayafaya. Na so wi kan sori tu taki wi abi deki-ati. Noiti ete na organisâsi fu Yehovah ben abi so furu sma  fanowdu fu yepi nanga a wroko. Milyunmilyun brada, sisa, nanga yongusma e du difrenti sortu furuten wroko. Sonwan e dini leki pionier, den e dini na Betel, den e yepi bow Kownukondre zaal, noso den e yepi nanga a wroko di de fu du na kring konmakandra nanga kongres. Prakseri sosrefi den owruman di abi bigi frantwortu fu di den de na ini na Ati-oso Kontakti Komte noso fu di den e yepi orga kongres. Yu kan de seiker taki Yehovah e warderi en taki yu de klariklari fu wroko gi en, èn a no o frigiti dati.—Hebr. 6:10.

15. Fa wi kan kon sabi efu wi no e lasi a faya di wi ben abi gi a wroko fu Yehovah?

¹⁵ A bun te ibriwan fu wi e aksi ensrefi: ’Mi lobi te tra sma e du a wroko? Mi e meki gudu nanga tra sani tapu pasi gi mi fu yepi Yehovah nanga a wroko fu en? Mi de leki Barak, Debora, Yael, nanga den 10.000 trawan di ben abi bribi nanga deki-ati? Mi de klariklari fu gebroiki iniwan sani di mi abi fu dini Yehovah? Kande mi e prakseri fu froisi go na wan tra foto noso na wan tra kondre fu di mi e denki taki a libi drape moro bun. Mi e begi Yehovah fu yepi mi fu frustan fa disi o abi krakti tapu mi osofamiri èn tapu a gemeente?’ *

16. San wi kan gi Yehovah aladi a abi ala sani kaba?

¹⁶ Yehovah e lespeki wi, èn fu dati ede a e gi wi na okasi fu horibaka gi en leki a Moro Hei Tiriman. Didibri ben kori libisma fu horibaka gi en. Dati meki te wi e teki a sei fu Yehovah, wi e sori Satan krin suma na wi Gado. Yehovah breiti taki wi abi bribi èn taki wi e tai hori na en. Den sani disi e meki taki wi de klariklari fu wroko gi Yehovah (Odo 23:15, 16). Te wi e horibaka gi Yehovah, dan a kan gi wan piki na Satan di e spotu en (Odo 27:11). Sobun, te yu e tan gi yesi na Yehovah, dan yu e gi en wan sani di warti gi en èn a e breiti srefisrefi.

17. Sortu howpu Krutuman 5:31 abi gi a ten di e kon?

¹⁷ Heri esi grontapu o lai nanga sma di wani Yehovah leki a tiriman fu den. Wi e angri gi a dei dati trutru! Neleki Debora nanga Barak wi e singi: „Ala den feanti fu yu musu dede, Yehovah. Meki den sma di lobi yu kon de leki te son e skèin a bigi leti fu en” (Krut. 5:31). A sani disi o pasa te Yehovah o tyari wan kaba kon na a ogri grontapu fu Satan. Te a feti fu Armagedon e bigin, dan libisma no o de fanowdu fu puru a feanti na pasi. Na a ten dati wi o ’tanapu kánkan èn wi o luku fa Yehovah o frulusu wi’ (2 Kron. 20:17). Ma teleki a ten dati doro, furu okasi de fa wi kan yepi Yehovah fayafaya èn nanga deki-ati.

18. Fa trawan e kisi deki-ati te yu de klariklari fu dini Yehovah?

¹⁸ „A pipel ben de klariklari fu go na feti. Sobun, prèise Yehovah.” Na so Debora nanga Barak bigin a singi fu den di den wini a strei. Den no ben e prèise libisma, ma den ben e prèise a Moro Heiwan (Krut. 5:1, 2). Meki wi de klariklari tu fu dini Yehovah, so taki trawan e kisi deki-ati tu fu „prèise Yehovah”.