1, 2. (a) Fu san ede sma na ini a ten fu Paulus ben e taki furu fu den sma di ben de srafu? (b) Suma kan meki sma kon fri trutru, soleki fa Paulus ben taki?

DEN fosi Kresten ben e libi na ini a Gran Kownukondre Rome pe sma ben e meki bigi fa den wet fu den bun, fa den e krutu sani na wan reti fasi èn fa ala sma de fri. Ma a makti kondre disi ben abi furu srafu di ben e wroko gi en. Wan pisi ten ben de taki sowan 30 procent fu den sma di ben e libi na ini a Gran Kownukondre Rome ben de srafu. Wi kan de seiker taki den sma fu a ten dati, srefi den Kresten, ben e taki furu fu den sma di ben de srafu èn fa den ben kan kon fri.

² Na apostel Paulus ben skrifi furu fu a fri di sma kan kon fri. Ma a no ben du disi fu di a ben wani lusu den problema fu a ten dati, neleki fa tra sma ben e pruberi fu du. Na presi fu dati, Paulus nanga den tra Kresten ben e meki tranga muiti fu preiki a bun nyunsu fu Gado Kownukondre èn fu yepi sma fu kon frustan o prenspari a lusu-paiman fu Krestes Yesus de. Paulus ben sori den Kresten brada nanga sisa  fu en suma kan meki den kon fri. Na ini a di fu tu brifi di a skrifi gi den Kresten na ini Korente, a taki: „Yehovah na a Yeye èn pe a yeye fu Yehovah de, drape sma de fri.”​—2 Kor. 3:17.

3, 4. (a) Fu sortu sani Paulus ben taki na ini den vers fosi 2 Korentesma 3:17? (b) San wi musu du efu wi wani taki Yehovah meki wi kon fri?

³ Na ini a srefi brifi disi di Paulus skrifi gi den Korentesma, a taki san pasa nanga Moses di a ben saka komoto fu Sinai-bergi, baka di a kaba taki nanga wan engel fu Yehovah. Moses en fesi ben e skèin leti! Di den Israelsma si en, den ben frede. Dati meki a tapu en fesi nanga wan duku (Eks. 34:29, 30, 33; 2 Kor. 3:7, 13). Paulus taki: „Ma te den e drai go na Yehovah, dan a duku e komoto” (2 Kor. 3:16). San den wortu disi fu Paulus wani taki?

⁴ Neleki fa wi leri na ini na artikel na fesi, Yehovah, a Gado di meki ala sani, na a wan-enkri sma di de fri fu du ala san a wani. Dati meki wi kan frustan taki „pe a yeye fu Yehovah de”, drape sma de fri. Sobun, efu wi wani de fri, dan wi musu go na Yehovah. Disi wani taki dati wi musu tron wan mati fu en. Di den Israelsma ben de na ini a sabana, den no ben e si sani soleki fa Yehovah e si sani. A ben de neleki wan duku ben tapu den frustan èn den ati ben kon tranga. Baka di den kon fri fu Egepte, den ben wani du soso san a sondu skin wani.​—Hebr. 3:8-10.

5. (a) Fu san a yeye fu Yehovah e meki wi kon fri? (b) Fa wi du sabi taki wan sma di de wan srafu noso di de na ini strafu-oso, kan abi a fri di Yehovah e gi? (c) Sortu aksi wi musu piki?

⁵ Te a yeye fu Yehovah e meki wi kon fri, dan dati bun moro leki te wan sma di de wan srafu kon fri. A yeye dati kan du wan sani di nowan libisma kan du. A kan meki wi kon fri fu sondu nanga dede èn fu falsi bribi nanga den gwenti fu en (Rom. 6:23; 8:2). Disi na wan moi sani trutru! Srefi wan sma di de wan srafu noso di de na strafu-oso, kan abi a fri disi (Gen. 39:20-23). Na so a ben de nanga Brada Harold King nanga Brada Horst Henschel di ben de na strafu-oso furu yari langa fu a bribi fu den ede. Yu kan luku na ondrofenitori fu den na JW Broadcasting. (Go na INTERVIEW NANGA ONDROFENITORI > DEN HORIDORO DI DEN KISI TESI.) Meki wi luku den aksi disi: Fa wi kan sori taki wi de nanga tangi taki wi kon fri? Fa wi kan gebroiki a fri disi na wan bun fasi?

6. Fa den Israelsma sori taki den no ben de nanga tangi taki Yehovah ben meki den kon fri?

⁶ Te wan sma gi wi wan warti kado, dan wi de nanga tangi gi dati. Den Israelsma no ben de nanga tangi taki Yehovah ben meki den kon fri fu den Egeptesma di ben teki den leki srafu. Baka wan tu mun nomo, den bigin angri gi den sani di den ben e nyan èn e dringi na ini Egepte. Dati meki den ben e krutu fu a mana di Yehovah ben gi den èn den ben wani drai go baka na Egepte. Prakseri a sani disi: ’Fisi, komkomro, watramun, ayun, nanga knofroku’ ben moro prenspari gi den leki a fri di Yehovah Gado ben meki den kon fri fu dini en. Wi kan frustan fu san ede Yehovah ben atibron nanga en pipel (Num. 11:5, 6, 10; 14:3, 4). Wi kan leri wan prenspari sani fu a tori disi.

7. Fa Paulus sori taki a ben du san a skrifi na 2 Korentesma 6:1 èn fa wi srefi kan du dati?

 ⁷ Na apostel Paulus ben gi ala Kresten a rai fu sori taki den de nanga tangi taki Yehovah meki den kon fri nanga yepi fu en Manpikin, Yesus Krestes. (Leisi 2 Korentesma 6:1.) Prakseri fa Paulus ben e sari fu di a ben de wan srafu fu sondu nanga dede. Toku a ben taki: „Mi e taki Gado tangi taki a frulusu mi nanga yepi fu wi Masra Yesus Krestes!” Fu san ede a taki dati? A taigi den Kresten brada nanga sisa: „Bika a wèt fu a yeye di e gi libi na den sma di de wán nanga Krestes Yesus, meki unu kon fri fu a wèt fu sondu nanga dede” (Rom. 7:24, 25; 8:2). Neleki Paulus, wi no musu frigiti taki Yehovah meki wi kon fri fu sondu nanga dede. A lusu-paiman meki taki wi kan dini Gado nanga wan krin konsensi èn dati e gi wi prisiri.​—Ps. 40:8.

8, 9. (a) Sortu warskow na apostel Petrus ben gi Kresten? (b) Fa wan sma ben kan gebroiki a fri di a abi na wan fasi di no bun?

⁸ Boiti taki wi de nanga tangi taki wi kon fri, wi musu luku bun taki wi no e gebroiki a fri fu wi fu du sani di no bun. Na apostel Petrus ben warskow Kresten taki den no musu gebroiki a fri fu den fu du san a sondu skin wani. (Leisi 1 Petrus 2:16.) A warskow disi e meki wi prakseri den sani di ben miti den Israelsma na ini a sabana. Efu wi no luku bun, a srefi sani kan miti wi. A grontapu fu Satan abi ala sortu krosi nanga modo di e hari sma. Sma e nyan, den e dringi èn den e du ala sortu sani fu meki prisiri. Bisnisman e gebroiki moi sma na ini reklame fu hari wi prakseri. Den sabi taki disi kan meki wi go bai den sani di wi e si aladi wi no abi den fanowdu trutru. Efu wi no luku bun, dan makriki a grontapu disi kan kori wi fu gebroiki a fri di wi kisi na wan fasi di no bun.

⁹ Wi kan fiti a rai fu Petrus tu te wi musu teki tra prenspari bosroiti na ini wi libi. Kande wi musu bosroiti sortu skoroleri wi o teki noso sortu wroko wi o du. Fu eksempre, sma e gi yonguwan a firi taki den musu du ala san den man fu go na den moro bun universiteit. Furu sma e taigi den taki efu den go na heiskoro, den o feni wan bun wroko, den o meki furu moni èn sma o lespeki den. Kande den sma disi e kon nanga raportu fu sori den taki sma di go na universiteit e meki moro moni leki sma di go na middelbaar skoro. Den sortu sani disi kan meki yongusma denki taki den musu go na heiskoro fu man abi wan bun libi na ini a ten di e kon. Ma san den yonguwan disi nanga den papa nanga mama musu hori na prakseri?

10. San wi musu hori na prakseri te wi musu teki bosroiti?

¹⁰ Son sma kan denki taki fu di ibri sma kan teki en eigi bosroiti na ini den tori disi, meki den de fri fu du san den wani solanga den konsensi e gi den pasi fu du dati. Kande den e denki: ’Mi de fri fu du san mi wani. Sobun, fu san ede a konsensi fu wan tra sma ben o krutu san mi du?’ Aladi wi de fri fu bosroiti sortu skoroleri wi o teki noso sortu wroko wi o du, toku wi musu hori na prakseri taki wi no kan du ala san wi wani. Den bosroiti fu wi kan tyari bun noso takru bakapisi kon tu. Dati meki Paulus ben taki: „Wi kan du ala sani, ma a no ala sani bun fu du. Wi kan du ala sani, ma a no ala sani e gi deki-ati” (1 Kor. 10:23). Sobun, aladi wi de fri fu teki wi eigi  bosroiti, toku wi no musu frigiti taki den sani di wi wani no musu de a moro prenspari sani na ini a libi.

11. Fu san ede Yehovah meki wi kon fri?

¹¹ Di Petrus ben warskow wi fu no gebroiki a fri di wi abi na wan fasi di no bun, a sori wi tu fa wi musu gebroiki en. A gi wi a deki-ati fu gebroiki a fri di wi abi „fu dini Gado leki srafu”. Yehovah meki Yesus frulusu wi fu sondu nanga dede, so taki wi kan gebroiki wi libi „fu dini Gado leki srafu”.

12. San wi kan leri fu Noa nanga en osofamiri?

¹² A moro bun fasi fa wi kan gebroiki a fri di wi abi, na te wi e gebroiki wi ten nanga wi krakti fu dini Yehovah. Te wi e du dati, dan wi no o feti baka grontapu sani èn den sani di wi wani no o de a moro prenspari sani na ini wi libi (Gal. 5:16). Luku na eksempre fu Noa nanga en osofamiri. Den ben e libi na ini wan ogri grontapu pe furu sma ben e libi wan morsu libi. Ma toku den no bigin libi leki den sma dati. San yepi den fu no du dati? Den ben gebroiki ala den ten fu du a wroko di Yehovah ben gi den. Den bow na ark, den kibri nyanyan gi densrefi nanga den meti èn den ben warskow den sma gi san ben o pasa. „Noa du ala san Gado taigi en fu du. A du leti so” (Gen. 6:22). San ben de a bakapisi? Noa nanga en osofamiri tan na libi di na ogri grontapu dati kisi pori.​—Hebr. 11:7.

13. Sortu wroko Yehovah gi wi fu du?

¹³ Sortu wroko Yehovah gi wi na ini a ten disi? Wi sabi taki Gado ben gi Yesus a wroko fu preiki èn Yesus gi den disipel fu en a srefi wroko disi. (Leisi Lukas 4:18, 19.) Na ini a ten disi, Satan, a gado fu a grontapu disi breni a frustan fu furu sma. Den sma disi na srafu fu falsi kerki, fu gudu èn fu politiek (2 Kor. 4:4). Neleki Yesus wi abi a grani fu yepi sma fu kon sabi èn fu anbegi Yehovah,  a Gado di e meki sma kon fri (Mat. 28:19, 20). A wroko disi no makelek. Na ini son kondre furu sma no wani arki èn son sma e ati bron srefi te wi e preiki gi den. Fu di na Yehovah gi wi a wroko fu preiki, meki wi alamala musu aksi wisrefi: ’Mi kan gebroiki a fri di mi abi fu du moro gi Yehovah?’

14, 15. San furu anbegiman fu Yehovah bosroiti fu du nanga den libi? (Luku a prenki na a bigin fu na artikel.)

¹⁴ A e gi wi deki-ati fu si taki furu brada nanga sisa tyari kenki kon na ini den libi so taki den kan bigin pionier. Den brada nanga sisa disi e frustan taki a kaba fu a grontapu disi de krosibei (1 Kor. 9:19, 23). Sonwan fu den e pionier na ini den eigi gemeente èn trawan froisi go na tra gemeente di abi yepi fanowdu. Na ini den feifi yari di pasa, moro leki 250.000 sma bigin pionier èn now wi abi moro leki 1.100.000 gewoon pionier. A moi fu si taki so furu brada nanga sisa e gebroiki a fri di den abi fu dini Yehovah.​—Ps. 110:3.

¹⁵ San yepi den brada nanga sisa disi fu gebroiki a fri di den abi na wan bun fasi? Luku a tori fu John nanga Judith di dini na ini difrenti kondre na ini den 30 yari di pasa. Den e memre ete taki di a Pionierskoro bigin na ini 1977, den studenti ben kisi a deki-ati fu froisi go dini na ini gemeente di abi yepi fanowdu. Fu man du a sani disi, John taki dati a kenki wroko omeni leisi so taki a ben kan tan pionier. Te fu kaba John nanga Judith ben man go dini na ini tra kondre. San yepi den fu man leri wan tra tongo, fu kon gwenti wan nyun kulturu noso a weer fu wan tra kondre? Den taki dati den ben e begi Yehovah èn den ben e frutrow na en tapu. Fa den ben feni en taki den ben man dini Yehovah na so wan fasi na ini ala den yari? John e taki: „Mi kan taki dati na ini mi heri libi, disi na a moro bun wroko di mi du. Mi kon leri sabi Yehovah moro bun. Mi kon si en leki wan papa di lobi wi. Now fosi mi e frustan san Yakobus 4:8 wani taki: ’Kon krosibei na Gado èn a o kon krosibei na unu.’ Mi feni san mi ben e suku. Mi e du wan wroko di e gi mi prisiri.”

16. Fa furu brada nanga sisa gebroiki a fri di den abi?

¹⁶ Ma a no ala brada nanga sisa kan pionier fu wan langa pisi ten neleki John nanga Judith. Toku furu fu den e go yepi nanga a bow-wroko di e du na heri grontapu. Fu eksempre, di den ben e bow a nyun edekantoro na ini Warwick, New York, sowan 27.000 brada nanga sisa go yepi. Sonwan ben e wroko tu wiki, trawan wan tu mun, noso moro leki wán yari srefi. Furu fu den ben musu tyari bigi kenki kon fu man go yepi drape. Den brada nanga sisa disi na moi eksempre gi wi fu di den gebroiki a fri di den abi fu gi grani na Yehovah, a Gado di e meki sma kon fri.

17. Sortu blesi wi o kisi te wi e gebroiki a fri di wi abi na wan bun fasi?

¹⁷ Wi de nanga tangi taki wi kon sabi Yehovah èn taki wi kon fri fu di wi e anbegi en. Meki a de so taki den bosroiti di wi e teki e sori taki wi e warderi en taki Yehovah meki wi kon fri. Noiti wi wani gebroiki a fri di wi abi na wan fasi di no bun. Ma wi wani gebroiki en fu dini Yehovah nanga ala san wi abi. Te wi e du dati, dan wi o kisi den blesi disi di Yehovah pramisi wi: „Den sani di Gado meki, kon fri fu wan skin di e dede. Na so den o kon fri na wan tumusi moi fasi leki pikin fu Gado.”​—Rom. 8:21.