1, 2. (a) San sma e du fu di den wani kon fri? (b) San na a bakapisi?

NA INI a ten disi sma wani de fri èn den wani taki ala sma abi den srefi reti. Sma na ini difrenti kondre no wani taki trawan kwinsi den, den no wani taki sma desko den èn den no wani de pôtisma moro. Son sma wani de fri fu taki san den wani, fu teki den eigi bosroiti èn fu libi soleki fa densrefi wani. Sma na ala sei wani den sani disi.

² Fu man kisi den sani disi sma e go na strati fu feti gi den reti èn den e opo densrefi teige den tiriman. Ma den e kisi san den wani? Nôno. Nofo tron den sani disi e meki taki sma e pina moro èn sma e lasi den libi srefi. Ala den sani disi e sori taki Kownu Salomo ben abi leti di a taki: „Sensi di libisma bigin tiri tra libisma, sani no waka bun gi den.”​—Preik. 8:9.

3. San wi musu du fu kan de koloku?

³ A disipel Yakobus ben taki san wi musu du fu kan de koloku trutru. A skrifi: „Efu wan sma e luku finifini san skrifi na ini a wèt di bun srefisrefi èn di e meki sma kon fri  èn a e tan du dati, dan . . . a o de koloku” (Yak. 1:25). Na Yehovah gi a wet disi di bun srefisrefi èn a sabi san libisma abi fanowdu fu man de koloku trutru. A ben gi Adam nanga Eva ala san den ben abi fanowdu fu man de koloku èn den ben de fri trutru.

4. Fu san ede wi kan taki dati Adam nanga Eva ben fri trutru? (Luku a prenki na a bigin fu na artikel.)

⁴ Te wi e leisi den fosi tu kapitel fu Genesis, dan wi e si taki Adam nanga Eva ben fri trutru. Den ben abi ala san libisma na ini a ten disi e suku. Den no ben e mankeri noti, noti ben e frede den èn nowan sma ben e pina den. Den no ben e broko den ede nanga nyanyan èn nanga wroko. Den no ben frede taki den ben o siki èn taki den ben o dede (Gen. 1:27-29; 2:8, 9, 15). Disi wani taki dati Adam nanga Eva ben mag du ala san den wani? Den ben mag bosroiti gi densrefi san bun èn san no bun? Meki wi go luku.

5. San furu sma e denki, ma san de fanowdu fu kan de fri?

⁵ Furu sma na ini a ten disi e denki taki te den man du ala san den wani, dan den fri. Den no e span sortu bakapisi dati kan tyari kon. Wan wortubuku e taki dati sma de fri „te den man teki den eigi bosroiti èn te den man du den sani di den bosroiti” (The World Book Encyclopedia). A buku e taki moro fara: „Sma de fri solanga lanti no e poti wet gi den di hebi tumusi, di no de fanowdu, noso di e tapu den fu kisi san den abi reti na tapu.” Disi wani taki dati son wet de fanowdu fu sorgu taki ala sma kan de fri. Ma suma abi a reti fu bosroiti efu wan wet hebi tumusi, efu a bun èn efu a de fanowdu?

6. (a) Fu san ede na Yehovah wawan de fri fu du ala san a wani? (b) Sortu reti libisma no abi èn fu san ede dati de so?

⁶ A prenspari fu hori na prakseri taki na Yehovah wawan de fri fu du ala san a wani. Fu san ede? Fu di na en meki ala sani èn en na a Moro Hei Tiriman fu hemel nanga grontapu (1 Tim. 1:17; Openb. 4:11). Na wan heri moi fasi Kownu David ben skrifi fa Yehovah hei èn o furu makti a abi. (Leisi 1 Kroniki 29:11, 12.) Ma engel nanga libisma no abi a reti fu du ala san den wani. Den musu frustan taki na Yehovah wawan abi a reti fu poti wet gi den. Na en e bosroiti sortu wet bun gi wi èn sortu wet de fanowdu. Na dati Yehovah Gado du sensi di a meki den fosi libisma.

7. San na wan tu sani di libisma musu du, ma di e gi den prisiri?

⁷ Aladi Adam nanga Eva ben de fri fu du furu sani, toku den ben musu hori densrefi na son wet. Den wet disi no ben hebi gi den. Den ben e hori densrefi na den sondro fu si den leki wet. Fu eksempre, den ben sabi taki fu man tan na libi, den ben musu hari bro, den ben musu nyan èn den ben musu sribi. Den ben firi taki den no de fri, fu di den ben musu du ala den sani disi? Nôno, Yehovah meki den na so wan fasi taki te den ben o du den sani disi, den ben o firi bun èn den ben o de koloku (Ps. 104:14, 15; Preik. 3:12, 13). Wi alamala breiti taki wi man hari bro, taki wi man nyan wan switi nyanyan èn taki wi man sribi switi, a no so? Wi e  du den sani disi nanga prisiri. Wi no e si den leki wan hebi. A musu fu de so taki na so Adam nanga Eva ben e firi.

8. San Gado ben taigi Adam nanga Eva fu du èn fu san ede?

⁸ Yehovah ben taigi Adam nanga Eva fu meki pikin furu grontapu èn fu sorgu gi grontapu (Gen. 1:28). A sani disi di Gado taigi den fu du ben meki taki den no ben de fri? Nôno! Disi ben gi den na okasi fu wroko makandra nanga Yehovah fu meki grontapu tron wan Paradijs pe libisma di no abi sondu ben o libi fu têgo (Yes. 45:18). Na ini a ten disi sma no e trangayesi Yehovah te den e bosroiti fu no trow noso fu no kisi pikin. Toku sma e trow èn den e kisi pikin awinsi dati kan tyari problema kon gi den (1 Kor. 7:36-38). Fu san ede? Fu di den sabi taki den sani dati kan meki den de koloku (Ps. 127:3). Efu Adam nanga Eva ben gi yesi na Yehovah, dan a trowlibi nanga na osofamiri libi ben o gi den furu prisiri fu têgo.

9. Fu san ede a wet fu Gado na Genesis 2:17 ben bun?

⁹ Yehovah ben gi Adam nanga Eva wan tra wet èn a taigi den krin san ben o pasa efu den ben o trangayesi en. A taki: „Fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Gen. 2:17). A wet disi ben hebi tumusi? A ben de wan bun wet? A ben de fanowdu taki Yehovah gi den a wet disi? A wet disi ben meki taki Adam nanga Eva no ben de fri? Kwetikweti. Fu taki en leti, furu sabiman fu Bijbel e taki dati a de wan koni sani taki Gado gi den a wet disi èn den kan frustan fu san ede a du dati. Wan fu den sabiman disi taki dati a wet di skrifi na Genesis 2:16, 17 e leri wi taki „na Gado wawan sabi san bun . . . gi libisma èn na Gado wawan sabi san no bun . . . gi den. Efu libisma wani taki sani go ’bun’ nanga den, dan den musu frutrow Gado èn den musu gi yesi na en. Efu den e trangayesi en, dan den srefi o abi fu bosroiti san bun . . . èn san no bun.” Ma disi na wan sani di muilek tumusi gi libisma fu du.

10. Fu san ede a reti di wan sma abi fu teki en eigi bosroiti no de a srefi leki a reti fu bosroiti san bun èn san no bun?

¹⁰ Son sma feni taki a wet di Yehovah ben gi Adam ben meki taki a no ben de fri moro fu du san a wani. Ma den sma disi no e frustan taki a reti di wan sma abi fu teki en eigi bosroiti no de a srefi leki a reti fu bosroiti san bun èn san no bun. Adam nanga Eva ben de fri fu bosroiti efu den ben o gi yesi na Gado noso efu den no ben o du dati. Ma Yehovah wawan abi a reti fu bosroiti san bun èn san no bun. A „bon di nen ’Sabi san bun èn san ogri’” na ini a dyari fu Eden ben memre Adam nanga Eva na a sani disi (Gen. 2:9). Wi no sabi ala ten san o de a bakapisi fu den bosroiti di wi e teki èn wi no kan de seiker taki ala ten wi o teki bun bosroiti. Dati meki furu tron sma e teki bosroiti fu di den e denki taki sani o go bun. Ma den bosroiti dati e tyari bigi problema nanga sari kon gi den (Odo 14:12). Disi e kon fu di libisma no man du ala sani. Di Yehovah gi Adam nanga Eva a wet fu no nyan fu a bon, a leri den taki den ben musu gi yesi na en efu  den wani de fri trutru. San den bosroiti fu du?

11, 12. Fu san ede a bosroiti di Adam nanga Eva teki tyari takru bakapisi kon? Gi wan eksempre.

¹¹ A sari taki Adam nanga Eva bosroiti fu trangayesi Yehovah. Eva bribi Satan di a taki: „Un ai o opo èn unu o de leki Gado. Unu o sabi san bun èn san ogri” (Gen. 3:5). A bosroiti di Adam nanga Eva teki meki taki den kon moro fri, leki fa Satan ben taki? Kwetikweti. Fu taki en leti, a sani dati tyari bigi problema kon gi den (Gen. 3:16-19). Fu san ede? Fu di Yehovah no gi libisma a reti fu bosroiti gi densrefi san bun èn san no bun.​—Leisi Odo 20:24; Yeremia 10:23.

¹² Wi kan agersi a sani disi nanga wan piloot di e frei wan opolani. Fu man doro a presi pe a e go, a no kan frei pe a wani. A musu gebroiki den wrokosani fu na opolani di e sori en pe a musu go. Boiti dati, a musu arki den sma di abi a wroko fu sori en o ten a musu opo èn o ten a musu saka. Na so a no o frei go naki nanga tra opolani. Ma wan piloot di e bosroiti fu no arki den sma disi èn fu frei pe a wani, kan tyari sma go dede. Neleki a piloot dati, Adam nanga Eva ben wani du san den srefi wani. Den no gi yesi na Gado. San ben de a bakapisi? A bosroiti di den teki tyari sondu nanga dede kon gi den nanga den bakapikin fu den (Rom. 5:12). Fu di den ben wani bosroiti san bun èn san no bun, meki den no ben de fri moro.

13, 14. San wi musu du efu wi wani kon fri?

¹³ Son sma e denki taki efu den kan du ala san den wani, dan dati moro bun. Ma dati tru? A e tyari furu wini kon te sma kan teki den eigi bosroiti. Ma prakseri fa grontapu ben o de efu nowan wet no ben de. A wortubuku di kari na ini paragraaf feifi e taki dati ibri kondre abi ala sortu wet. Den wet disi musu sorgu taki sma de fri, ma den  musu sorgu tu taki sma no e du ala san den wani. A sani disi no makriki. Dati meki so furu wet de èn so furu afkati nanga krutuman de di e yepi sma fu frustan den wet disi. Den e sorgu tu taki sma e hori densrefi na den wet disi.

¹⁴ Yesus Krestes ben sori fa wi kan kon fri trutru. A taki: „Efu unu tan du den sani di mi taki, dan unu na mi disipel trutru. Unu o sabi san tru èn dati o meki unu kon fri” (Yoh. 8:31, 32). Sobun, efu wi wani kon fri, dan wi musu du tu sani: A fosi sani, na taki wi musu bribi den sani di Yesus leri wi. Èn a di fu tu sani, na taki wi musu tron en disipel. Te wi e du den sani disi, dan wi o kon fri. Ma fu san wi o kon fri? Yesus ben taki: „Ibri sma di e du sondu, na wan srafu fu sondu. . . . Efu a Manpikin meki unu kon fri, dan unu fri trutru.”​—Yoh. 8:34, 36.

15. Fu san ede a fri di Yesus pramisi wi, bun moro a fri di sma wani na ini a ten disi?

¹⁵ A de krin taki a fri di Yesus pramisi den disipel fu en, bun moro a fri di furu sma wani na ini a ten disi. Di Yesus taki „efu a Manpikin meki unu kon fri, dan unu fri trutru”, dan a ben e sori taki wi kan kon fri fu sondu. A moro ogri sani di miti libisma, na taki den tron „srafu fu sondu”. Fu san ede wi kan taki dati wi na srafu fu sondu? Fu di sondu e meki wi du ogri èn a e meki en muilek gi wi fu du san bun noso fu libi na a moro bun fasi. A sani disi e tyari soso broko-ede nanga sari kon gi wi, a e meki taki wi e pina èn taki wi e dede te fu kaba (Rom. 6:23). Na apostel Paulus ben sabi fa a ben hati fu de wan srafu fu sondu. (Leisi Romesma 7:21-25.) Soso te wi kon fri fu sondu, dan wi o kon fri trutru, neleki fa a ben de nanga Adam nanga Eva fosi den trangayesi Gado.

16. Fa wi kan kon fri trutru?

¹⁶ Yesus taki dati wi musu ’tan du den sani di a taki’. Sobun, wi musu du wan sani efu wi wani kon fri. Fu di wi na Kresten di gi densrefi abra na Gado, meki wi no musu libi gi wisrefi moro, ma wi musu gi yesi na den leri fu Yesus (Mat. 16:24). Soleki fa Yesus pramisi, dan na ini a ten di e kon a o gebroiki a lusu-paiman fu meki wi kon fri fu ala sani di e kwinsi wi.

17. (a) San wi musu du efu wi wani de koloku? (b) San wi o luku na ini a tra artikel?

¹⁷ Efu wi wani de koloku, dan wi musu du san Yesus leri wi. Te fu kaba, disi o meki taki wi kon fri fu sondu nanga dede. (Leisi Romesma 8:1, 2, 20, 21.) Na ini a tra artikel wi o leri fa wi kan teki koni bosroiti so taki fu têgo wi kan gi grani na Yehovah, a Gado di e meki sma kon fri trutru.