1. San ala futuboi fu Gado wani du èn fu san ede? (Luku a fowtow tapu a kafti.)

KRESTES YESUS gi den bakaman fu en a wroko fu ’go na sma fu ala kondre èn fu meki den tron disipel’ (Mat. 28:19). Ala den reti-ati futuboi fu Gado wani leri fa fu du a wroko disi „finifini” (2 Tim. 4:5). Fu taki en leti, a preikiwroko na a moro bun sani di wi kan du na ini a libi, a prenspari moro iniwan tra wroko èn wi no abi furu ten moro fu du a wroko disi. Ma kande wi no man du so furu na ini a preikiwroko leki fa wi wani.

2. Sortu sani kan meki en muilek gi wi fu du a diniwroko finifini?

² Boiti a preikiwroko, wi abi tra prenspari frantwortu di e teki furu fu wi ten nanga wi krakti. Kande yu musu wroko omeni yuru wan dei fu meki nofo moni fu sorgu yusrefi nanga yu osofamiri. Kande yu siki, yu brokosaka noso yu abi problema nanga yu gosontu fu di yu kon owru. Noso kande wan tra sma na ini na osofamiri abi den problema disi. Fa wi kan du a diniwroko finifini aladi wi abi den problema disi?

3. San wi e leri fu a sani di Yesus taki na Mateyus 13:23?

³ Efu wi no man du so furu na ini a preikiwroko, dan wi no musu lasi-ati. Yesus ben sabi taki son sma ben o man du moro na ini a preikiwroko leki trawan. (Leisi Mateyus 13:23.) Solanga wi e du ala san wi man, Yehovah breiti nanga san wi e du gi en (Hebr. 6:10-12). Ma kande wi si tu taki wi kan du moro. Na ini na artikel disi wi o si fa wi  kan sorgu taki wi no e gebroiki furu ten gi sani di no de so prenspari. Wi o luku tu fa wi kan preiki èn gi leri moro bun. Ma san a wani taki fu du wi diniwroko finifini?

4. San a wani taki fu du wi diniwroko finifini?

⁴ Fu kan du wi diniwroko finifini, wi musu preiki èn gi sma leri so furu leki wi man. Ma a no soso a ten di wi e gebroiki fu du disi prenspari. A reide fu san ede wi e du a preikiwroko prenspari gi Yehovah tu. Efu wi lobi Yehovah nanga tra sma, dan wi o du a diniwroko * di wi kisi nanga wi heri ati (Mark. 12:30, 31; Kol. 3:23). Te wi e dini Gado nanga wi heri ati, dan wi o gebroiki wi ten nanga wi krakti so furu leki wi kan na ini a preikiwroko. Te wi e si a preikiwroko leki wan grani, dan wi o preiki a bun nyunsu gi so furu sma leki wi man.

5-6. Gi wan eksempre di e sori fa wan sma di no abi furu ten kan poti a preikiwroko na a fosi presi na ini en libi.

⁵ Luku na eksempre disi. Wan yonguman lobi prei gitara. A lobi prei poku solanga a kisi na okasi. Now a feni wan wroko na wan presi pe a kan prei poku tapu satra nanga sonde. Ma a no e meki nofo moni nanga a wroko disi. Dati meki a e wroko tu na ini wan wenkri fu munde te go miti freida. Aladi a wroko na ini a wenkri e teki moro fu en ten, toku a lobi prei poku moro. A wani leri prei poku moro bun èn na a wroko dati a wani du ala dei. Ma awinsi a no abi furu ten now, toku a e suku iniwan okasi fu prei poku.

⁶ Kande yu no man du so furu leki yu wani na ini a preikiwroko. Toku na a wroko dati yu lobi du. Yu e pruberi fu tron wan moro bun preikiman so taki yu kan yepi sma fu kon sabi a bun nyunsu. Fu di yu abi so furu fu du, meki kande yu e aksi yusrefi fa yu kan poti a preikiwroko na a fosi presi na ini yu libi.

7-8. Fa wi kan du a preikiwroko neleki fa Yesus ben e du dati?

⁷ Yesus gi wi wan moi eksempre na ini a fasi fa a ben e du a preikiwroko. A ben lobi taki nanga sma fu Gado Kownukondre. Dati ben de a moro prenspari sani gi en (Yoh. 4:34, 35). A waka hondrohondro kilometer fu preiki gi so furu sma leki a man. Ala ten a ben e suku okasi fu taki nanga sma na den oso noso na tra presi. Yesus ben poti a diniwroko na a fosi presi na ini en libi.

⁸ Fu di wi wani teki na eksempre fu Krestes, meki wi e suku okasi tu fu fruteri sma a bun nyunsu awinsi pe wi de. Wi de klariklari fu du a preikiwroko awinsi a no makriki gi wi ala ten (Mark. 6:31-34; 1 Petr. 2:21). Son sma na ini a gemeente man dini leki spesrutu pionier, gewoon pionier noso yepipionier. Tra sma leri taki wan tra tongo noso den froisi go tan na wan presi pe moro preikiman de fanowdu. Ma na den preikiman na ini den gemeente di no man pionier, e du a moro bigi pisi fu a wroko. Awinsi wi no man du furu, Yehovah no e aksi moro leki san wi man du. A wani taki wi alamala musu dini en nanga prisiri aladi wi e preiki a „bun nyunsu fu a koloku Gado”.​—1 Tim. 1:11; Deut. 30:11.

9. (a) Fa Paulus sori taki a preikiwroko ben de a moro prenspari sani gi en, awinsi a ben musu wroko fu sorgu ensrefi? (b) San Tori fu den apostel 28:16, 30, 31 e leri wi fu a fasi fa Paulus ben e si a preikiwroko?

⁹ Na apostel Paulus gi wi wan bun eksempre tu. En srefi ben poti a preikiwroko na a fosi presi na ini en libi. Di a go preiki leki zendeling a di fu tu leisi, a ben de na ini Korente. Fu di a no ben abi furu moni moro, meki a ben musu wroko fu sorgu ensrefi. Paulus ben e meki tenti. Ma a no ben si a wroko dati leki a moro prenspari wroko. A ben e du a wroko disi so taki a ben kan preiki a bun nyunsu gi den Korentesma sondro taki den sma fu a gemeente ben abi fu sorgu en (2 Kor. 11:7). Aladi Paulus ben musu wroko fu sorgu ensrefi, a tan si a preikiwroko leki a moro prenspari sani èn a ben e preiki tapu ibri Sabat. Di a situwâsi fu en kenki, Paulus ben kan poti moro prakseri baka na a preikiwroko. A bigin „preiki a wortu fu Gado fayafaya èn a sori den Dyu krin taki Yesus na Krestes” (Tori 18:3-5; 2 Kor. 11:9). Bakaten, di Paulus ben de leki strafuman na ini en eigi oso na ini Rome tu yari langa, a ben e preiki gi den sma di ben kon luku en èn a ben e skrifi brifi. (Leisi Tori fu den apostel 28:16, 30, 31.) Paulus no ben wani taki noti puru en prakseri na a preikiwroko. A skrifi: „Wi abi a wroko disi, fu di Gado sori wi sari-ati. Dati meki wi no e gi abra” (2 Kor. 4:1). Awinsi wi musu wroko fu sorgu wisrefi neleki Paulus, toku wi kan poti a diniwroko fu wi na a fosi presi na ini wi libi.

10-11. Fa wi kan du wi diniwroko finifini efu wi siki noso efu wi owru?

¹⁰ Kande wi no man preiki oso fu oso so furu leki fa wi wani fu di wi kon owru noso fu di wi siki. Toku wi kan preiki na tra fasi. Den Kresten na ini a ten fu den apostel ben e preiki gi sma awinsi pe den ben de. Den gebroiki ibri okasi fu taki nanga sma na den oso noso na tra presi (Tori 17:17; 20:20). Efu wi no man waka furu, dan kande wi kan sidon na wan presi pe furu sma de èn wi kan preiki gi den sma di e waka pasa. Noso wi kan preiki gi sma na  ibri okasi di wi feni, wi kan skrifi brifi noso wi kan bel sma. Furu preikiman di no man preiki oso fu oso so furu moro, e prisiri fu preiki na den fasi disi.

¹¹ Awinsi yu siki, toku yu man du yu diniwroko finifini. Luku na eksempre baka fu na apostel Paulus. A ben taki: „Mi man du ala sani nanga yepi fu a sma di e gi mi krakti” (Fil. 4:13). Paulus ben abi a krakti dati fanowdu di a ben kon siki wan fu den leisi di a ben go preiki leki zendeling. A taigi den Galasiasma: „Fu di mi ben siki meki mi kisi na okasi fu fruteri unu a bun nyunsu a fosi leisi” (Gal. 4:13). Efu yu siki, dan kande yu e kisi na okasi tu fu preiki a bun nyunsu gi datra, ati-oso zuster noso gi tra sma di musu sorgu yu. Furu fu den sma disi de na wroko te preikiman e go preiki na den oso.

12. San Yesus ben wani leri wi nanga a sani di a taki na Mateyus 6:22?

¹² Yesus ben taki: „A lampu fu a skin na a ai. Fu dati ede, efu yu ai krin, dan yu heri skin o brenki” (Mat. 6:22). San Yesus ben wani leri wi? A ben wani leri wi taki wi no musu meki nowan sani puru wi prakseri na a sani di wi wani du. Yesus srefi gi wi wan bun eksempre fu di a ben e poti ala en prakseri na a preikiwroko èn a ben leri den disipel fu en fu poti na anbegi fu Yehovah nanga a Kownukondre na a fosi presi. Wi e teki na eksempre fu Yesus  te wi e poti a diniwroko na a fosi presi na ini wi libi èn te wi e „tan suku fosi a Kownukondre nanga Gado en retidu”.​—Mat. 6:33.

13. San kan yepi wi fu tan poti prakseri na a preikiwroko?

¹³ Wan fasi fa wi kan tan poti prakseri na a preikiwroko, na te wi no e gebroiki furu ten gi sani di no de so prenspari. Na so wi o abi moro ten fu yepi sma fu kon sabi Yehovah èn fu lobi en. * Kande wi kan seti wi grontapuwroko na so wan fasi, taki wi abi moro ten fu du a preikiwroko mindriwiki. Noso wi kan bosroiti fu no gebroiki tumusi furu ten fu du prisiri sani.

14. Sortu kenki wan trowpaar tyari kon fu kan abi moro ten gi a preikiwroko?

¹⁴ Luku san Elias, wan owruman, nanga en wefi du. A taki: „Wi no ben man pionier wantewante, ma wi ben kan kenki wan tu sani fu kan du moro na ini a preikiwroko. Wi bigin du pikinpikin sani di yepi wi fu abi moro ten gi a preikiwroko. Fu eksempre, wi no ben e bai so furu sani moro. Wi no ben e go koiri so furu moro èn wi aksi wi basi fu no wroko so furu moro. Disi meki taki wi man preiki now te mofoneti, wi abi moro Bijbelstudie èn tu leisi na ini a mun wi kan go na ini a preikiwroko mindriwiki. Disi e gi wi furu prisiri!”

15-16. Te wi e luku san 1 Timoteyus 4:13, 15 e taki, dan fa wi kan tron moro bun preikiman? (Luku a faki di nen „ Sani di yu kan du fu du a diniwroko finifini”.)

¹⁵ Wan tra fasi fa wi kan du wi diniwroko finifini na fu leri fu du a preikiwroko  moro bun. Sma di e du son wroko e kisi leri doronomo fu kan du den wroko moro bun. Na so a de tu nanga Kownukondre preikiman. Wi musu tan leri fu du a preikiwroko moro bun.​—Odo 1:5; leisi 1 Timoteyus 4:13, 15.

¹⁶ Ma fa wi kan du a preikiwroko moro bun? Wi musu wroko nanga den rai di wi e kisi na Wi Kresten libi nanga a preikiwroko konmakandra. A konmakandra disi e yepi wi fu tron moro bun preikiman. Fu eksempre, te a fesiman e gi rai na den studenti di ben abi wan prati, dan wi srefi kan luku fa den rai disi kan yepi wi fu du wi diniwroko moro bun. Wi kan gebroiki den rai disi a tra leisi te wi e preiki a bun nyunsu gi wan sma. Wi kan aksi a fesiman fu wi preikiwroko grupu fu yepi wi, noso wi kan wroko nanga en na ini a preikiwroko. Wi kan wroko tu nanga wan preikiman di abi ondrofeni, wan pionier noso nanga a kring-opziener. Te wi e leri fu gebroiki ibriwan fu den wrokosani di wi abi fu gi sma leri, dan a o gi wi moro prisiri fu preiki èn fu gi sma leri.

17. Fa yu o firi te yu e du yu diniwroko finifini?

¹⁷ A de wan bigi grani fu „wroko makandra” nanga Yehovah! (1 Kor. 3:9) Te yu „sabi san na den moro prenspari sani” èn te yu e poti a diniwroko na a fosi presi na ini yu libi, dan yu o „dini Yehovah nanga prisiri” (Fil. 1:10; Ps. 100:2). Yu kan de seiker taki Gado o gi yu a krakti di yu abi fanowdu fu du a diniwroko finifini, awinsi sortu problema yu abi (2 Kor. 4:1, 7; 6:4). Solanga yu e du a preikiwroko nanga yu heri ati, a o tan gi yu „prisiri” awinsi yu e du furu noso awinsi yu e du pikinso (Gal. 6:4). Te yu e du yu diniwroko finifini, dan yu e sori taki yu lobi Yehovah nanga tra sma. Disi o meki taki „yu o frulusu yusrefi nanga den sma di e arki yu”.​—1 Tim. 4:16.