1. Soleki fa Efeisesma 6:10-13 e sori, dan san na wan moi fasi fa Yehovah e sori taki a e broko en ede nanga wi? Tyari disi kon na krin.

WAN moi fasi fa Yehovah e sori taki a e broko en ede nanga wi, na taki a e yepi wi fu kakafutu gi den feanti fu wi. Den moro bigi feanti fu wi na Satan nanga den ogri yeye. Yehovah e warskow wi gi den feanti disi èn a e gi wi san wi abi fanowdu fu man kakafutu gi den. (Leisi Efeisesma 6:10-13.) Te wi e teki a yepi fu Yehovah èn te wi e frutrow na en tapu nanga wi heri ati, dan wi o man kakafutu gi Didibri. Wi o man taki a srefi sani di na apostel Paulus ben taki. A ben taki: „Efu Gado de nanga wi, dan suma sa man du wi wan sani?”​—Rom. 8:31.

2. San wi o luku na ini na artikel disi?

² Leki tru Kresten wi no e poti tumusi furu prakseri na Satan nanga den ogri yeye. Wi e poti moro prakseri na den sani di wi leri fu Yehovah èn na a anbegi fu en (Ps. 25:5). Toku wi musu kon sabi fa Satan e wroko. Fu san ede? So taki a no kori wi (2 Kor. 2:11). Na ini na artikel disi wi o taki fu wan prenspari fasi fa Satan nanga den ogri yeye e suku fu kori sma. Wi o luku tu fa wi kan sorgu taki den no kori wi.

3-4. (a) San na afkodrei? (b) O furu sma e bribi na ini afkodrei?

³ Wan prenspari sani di Satan nanga den ogri yeye e gebroiki fu kori sma, na afkodrei. Den sma di e du afkodrei feni taki den sabi sani di tra sma no sabi èn taki den man du sani di furu libisma no man du. Fu eksempre,  son sma e du lukuman-wroko noso den e luku den stari fu sabi san o pasa na ini a ten di e kon. Tra sma kan meki a gersi leki den e taki nanga dedesma. Son sma e du towfruwroko noso den e pruberi fu wisi trawan. *

⁴ O furu sma e bribi na ini afkodrei? Wan ondrosuku di du na ini 18 kondre na ini Latijns-Amerika nanga den Karibis èilanti e sori taki wán fu ibri dri sma e bribi na ini towfruwroko nanga bonuwroko. Èn pikinmoro ala den sma disi e bribi tu taki libisma man taki nanga yeye. Wan tra ondrosuku du na ini 18 kondre na ini Afrika. Drape moro leki afu fu den sma taki dati den e bribi na ini afkodrei. A no de fu taki dati awinsi pe wi e tan, wi musu luku bun nanga ogri yeye fu di Satan e suku fu kori sma „na heri grontapu”.​—Openb. 12:9.

5. Fa Yehovah e denki fu afkodrei?

⁵ Yehovah na „a Gado di no e fruteri lei” (Ps. 31:5). Fa Yehovah e denki fu afkodrei? A e tegu gi en! Yehovah ben taigi den Israelsma: „Nowan sma na un mindri musu meki en manpikin noso umapikin bron na ini faya. Boiti dati, nowan lukuman noso bonuman musu de na un mindri, nowan sma di e suku marki fu sabi san o pasa, nowan towfruman, nowan wisiman, nowan sma di e go suku rai na wan sma di e taki nanga yeye, nowan sma di abi a wroko fu taki sani na fesi, èn nowan sma di e go suku rai na den dedewan. Yehovah e tegu gi iniwan sma di e du den sani disi” (Deut. 18:10-12). Kresten no abi fu hori densrefi na a Wet di Yehovah ben gi den Israelsma. Ma wi sabi taki a fasi fa Yehovah e denki fu afkodrei no kenki.​—Mal. 3:6.

6. (a) Fa Satan e gebroiki afkodrei fu kori sma? (b) Soleki fa Preikiman 9:5 e sori, dan san e pasa trutru nanga wan sma te a dede?

⁶ Yehovah e warskow wi gi afkodrei fu di a sabi taki Satan e gebroiki en fu du ogri nanga sma. Nanga yepi fu afkodrei Satan e kori sma fu bribi den lei fu en. Wan fu den lei dati na taki den dedewan e libi go doro na wan tra presi. (Leisi Preikiman 9:5.) Satan e gebroiki afkodrei tu fu meki sma frede èn fu meki en muilek gi den fu dini Yehovah. Satan wani taki sma musu frutrow na tapu ogri yeye na presi fu Yehovah.

7. San Yehovah taigi wi?

⁷ Soleki fa wi taki kaba, dan Yehovah taigi wi san wi musu sabi so taki Satan nanga den ogri yeye no kori wi. Luku wan tu sani di wi musu du fu kakafutu gi Satan nanga den ogri yeye.

8. (a) San na a moro prenspari fasi fa wi kan kakafutu gi den ogri yeye? (b) Fa Psalm 146:4 e sori taki den sani di Satan taki fu den dedewan na lei?

⁸ Leisi Gado Wortu èn denki dipi fu en. Disi na a moro prenspari sani di e yepi wi fu no bribi den lei fu ogri yeye. Gado Wortu e yepi wi fu kon sabi den lei fu Satan (Ef. 6:17). Fu eksempre, Bijbel e sori taki den dedewan no man taki nanga den libiwan. (Leisi Psalm 146:4.)  A e memre wi tu taki na Yehovah wawan kan sori san o pasa trutru na ini a ten di e kon (Yes. 45:21; 46:10). Te wi abi a gwenti fu leisi Gado Wortu èn fu denki dipi fu en, dan wi no o meki den ogri yeye kori wi nanga den lei fu den.

9. Sortu sani di abi fu du nanga afkodrei, wi no e du?

⁹ No du nowan sani di abi fu du nanga afkodrei. Noiti tru Kresten e du afkodrei. Wi no e go na bonuman èn wi no e pruberi fu taki nanga den dedewan. Soleki fa wi ben si na ini na artikel na fesi, dan te wan sma fu wi dede wi no e teki prati na gwenti di abi fu du nanga a denki taki a yeye fu a dedesma de na libi ete. Wi no e luku den stari èn wi no e go na lukuman fu kon sabi san o pasa nanga wi (Yes. 8:19). Wi sabi taki te wi e du den sani disi, dan wi e wroko nanga Satan nanga den ogri yeye, èn dati kan tyari bigi problema kon gi wi.

10-11. (a) San son sma na ini a ten fu den apostel du di den kon sabi Yehovah? (b) Soleki fa 1 Korentesma 10:21 e sori, dan fu san ede wi musu teki na eksempre fu den fosi Kresten èn fa wi kan du dati?

¹⁰ Trowe ala sani di abi fu du nanga afkodrei. Sonwan fu den sma di ben libi na ini Efeise na ini a ten fu den apostel ben du afkodrei. Di den kon sabi Yehovah den tyari bigi kenki kon. Bijbel e taki: „Bun furu fu den sma di ben e du bonuwroko tyari den buku fu den kon na wán èn den bron den na fesi ala sma” (Tori 19:19). Den brada nanga sisa disi ben du ala san den man fu kakafutu gi ogri yeye. Den buku di den ben abi fu bonuwroko ben diri. Ma na presi taki den gi tra sma den noso taki den seri den, den bron den. Den no ben broko den ede nanga a moni di den  ben lasi, ma den ben wani prisiri Yehovah ati.

¹¹ Fa wi kan teki na eksempre fu den Kresten disi? A ben o de wan koni sani fu trowe ala sani di abi fu du nanga afkodrei. Dati na iniwan bui, keti, noso tra sani di yu abi noso di yu e weri fu kibri yusrefi gi ogri yeye.​—Leisi 1 Korentesma 10:21.

12. San wi musu aksi wisrefi fu den sani di wi e luku noso arki?

¹² Luku bun san yu e luku noso arki. Aksi yusrefi: ’Mi e leisi buku, tijdschrift noso artikel na tapu Internet di abi fu du nanga afkodrei? Fa a de nanga den poku di mi e arki, den felem nanga telefisi programa di mi e luku noso den video game di mi e prei? Den sani disi abi afkodrei na ini? Den abi sani na ini soleki vampier noso asema, zombie, noso tra spuku tori? Den e meki a gersi leki towfruwroko noso wisi na sani di no ogri?’ Son buku noso felem abi anansitori na ini. Ma a no ala ten den tori disi abi fu du nanga afkodrei. Te yu e prakseri sortu sani yu o luku noso arki, dan sorgu taki yu no du sani di Yehovah no lobi. Wi wani du ala san wi man fu „abi wan krin konsensi” na fesi wi Gado.​—Tori 24:16. *

13. San wi no wani du?

¹³ No fruteri tori di abi fu du nanga ogri yeye. Wi wani teki na eksempre fu  Yesus (1 Petr. 2:21). Fosi a kon na grontapu, a ben e libi na ini hemel èn a ben sabi furu fu Satan nanga den ogri yeye. Ma a no ben lobi fruteri wan lo tori fu san den ogri yeye disi du. Yesus ben wani de wan kotoigi fu Yehovah, a no ben wani meki reklame gi Satan. Neleki Yesus, wi no wani fruteri wan lo tori fu ogri yeye. Na presi fu dati, wi wani taki moro fu den moi leri fu Yehovah di ’naki wi ati’.​—Ps. 45:1.

14-15. (a) Fu san ede wi no abi fu frede den ogri yeye? (b) San e sori taki Yehovah e kibri en pipel?

¹⁴ No frede den ogri yeye. Na ini a grontapu disi ogri sani kan miti wi. Ongoloku kan miti wi, wi kan kon siki noso wi kan dede srefi. Ma wi no musu denki taki na den ogri yeye e du den sani disi. Bijbel e taki dati ’ogri ten nanga sani di wi no e fruwakti’ kan miti ibriwan fu wi (Preik. 9:11). Boiti dati, Yehovah sori taki a tranga omeni tron moro den ogri yeye. Fu eksempre, Gado no gi pasi taki Satan kiri Yob (Yob 2:6). Na ini a ten fu Moses Yehovah sori taki a tranga moro den bonuman fu Egepte (Eks. 8:18; 9:11). Di Yesus ben drai go baka na hemel, Yehovah gi en a makti fu trowe Satan nanga den ogri yeye kon na grontapu. Èn na ini a ten di e kon a o trowe den go na ini a dipi peti. Drape den no o man du ogri nanga nowan sma.​—Openb. 12:9; 20:2, 3.

¹⁵ Furu buweisi de di e sori taki Yehovah e kibri en pipel na ini a ten disi. Prakseri a tori disi: Wi e preiki a bun nyunsu na heri grontapu èn wi e gi sma leri (Mat. 28:19, 20). Te wi e du a wroko disi, dan wi e meki sma kon sabi sortu ogri Didibri e du. Wi kan de seiker taki efu Satan ben man, a ben o tapu wi fu du a wroko disi. Ma a no man tapu wi. Sobun, wi no abi fu frede den ogri yeye. Wi sabi taki „den ai fu Yehovah e luku heri grontapu fu si san e pasa, so taki a kan sori a krakti fu en fu yepi den wan di e dini en nanga den heri ati” (2 Kron. 16:9). Efu wi e tan gi yesi na  Yehovah, den ogri yeye no o man du wi noti.

16-17. Fruteri wan ondrofenitori fu wan sisa di ben abi a deki-ati fu kakafutu gi den ogri yeye.

¹⁶ Wi musu abi deki-ati fu kakafutu gi den ogri yeye, spesrutu te mati noso famiriman e gens wi. Yehovah e blesi den wan di e sori deki-ati. Luku na eksempre fu wan sisa di nen Erica èn di e libi na ini Gana. Erica ben abi 21 yari di a bigin studeri Bijbel. Fu di en papa ben de wan bonuman, meki den famiri fu en ben feni taki a ben musu nyan a meti di en papa ben gi leki ofrandi na den yeye fu den afo fu en di dede. Di Erica weigri fu du dati, dan a famiri fu en ben feni taki a no sori lespeki gi den yeye disi. Den ben frede taki den yeye ben o meki den kon law noso taki den ben o kon siki.

¹⁷ Den famiri fu Erica ben dwengi en fu hori ensrefi na a gwenti disi, ma a no ben wani. Dati meki a ben abi fu froisi. A ben go tan na difrenti Kotoigi. Wi kan taki dati Yehovah blesi Erica nanga wan nyun famiri, dati na den Kotoigi di tron en brada nanga sisa (Mark. 10:29, 30). Den sma fu Erica no ben si en leki famiri moro èn den bron ala den sani fu en. Ma Erica tan gi yesi na Yehovah, a dopu èn now a de wan gewoon pionier. A no e frede den ogri yeye. Erica taki fu en famiri: „Ala dei mi e begi gi mi famiri. Mi howpu taki densrefi kan kon sabi Yehovah, taki den kon dini wi lobi-ati Gado èn taki den kon fri fu den ogri yeye.”

18. Sortu blesi wi o kisi te wi e frutrow tapu Yehovah?

¹⁸ A no ala sma e kisi den sortu tesi disi. Ma wi alamala musu kakafutu gi den ogri yeye èn wi musu frutrow tapu Yehovah. Efu wi e du dati, dan wi o kisi furu blesi èn Satan no o kori wi nanga den lei fu en. Boiti dati, wi no o frede den ogri yeye èn den no o man meki wi tapu fu dini Yehovah. San moro prenspari, na taki wi o tron moro bun mati fu Yehovah. A disipel Yakobus ben skrifi: „Saka unsrefi na ondro Gado. Ma kakafutu gi Didibri èn a o lon gowe fu unu. Kon krosibei na Gado èn a o kon krosibei na unu.”​—Yak. 4:7, 8