1-2. (a) Fa Satan e kori sma? (b) San wi o luku na ini na artikel disi?

SATAN, „a tata fu ala lei” e kori sma sensi a ten fu Adam nanga Eva (Yoh. 8:44). Sonwan fu den lei fu en abi fu du nanga san e pasa nanga wan sma te a dede. Dati meki furu sma e du sani noso e hori densrefi na gwenti di e sori taki den e frede den yeye fu dedesma. A sani disi meki taki son brada nanga sisa musu „feti tranga” gi a bribi fu den te wan sma na ini den famiri noso na a presi pe den e tan dede.​—Yud. 3.

² Efu yu de na ini so wan situwâsi, dan san kan yepi yu fu tan horibaka gi den sani di Bijbel e leri wi fu dede? (Ef. 6:11) Fa yu kan trowstu èn tranga wan Kresten brada noso sisa te tra sma e dwengi en fu du sani di Gado no feni bun? Na ini na artikel disi wi o si fa Yehovah e yepi wi fu du dati. Ma meki wi go luku fosi san Bijbel e leri wi fu den dedewan.

3. San pasa di Satan fruteri a fosi lei?

³ Gado no ben wani taki libisma musu dede. Ma Adam nanga Eva ben musu gi yesi na Yehovah efu den ben wani libi fu têgo. Yehovah ben gi den a wet disi: „Fu a bon di nen ’Sabi san bun èn san ogri’, yu no musu nyan, bika na a dei di yu o nyan fu en, na dede yu o dede” (Gen. 2:16, 17). Ma Satan kori den. A gebroiki wan sneki fu taki nanga Eva. A taigi en: „Unu no o dede kwetikweti.” Eva bribi a lei èn a nyan a froktu. Bakaten en masra nyan a froktu tu (Gen. 3:4, 6). Na so ala libisma kisi sondu èn dati meki den e dede.​—Rom. 5:12.

4-5. Fa Satan e tan kori sma nanga den lei fu en?

 ⁴ Adam nanga Eva dede neleki fa Gado ben taki. Ma Satan tan fruteri lei fu den dedewan. Wan fu den lei dati na taki a skin fu wan sma e dede, ma a yeye fu en e libi go doro. Den sortu lei disi e kori furu libisma te now ete.​—1 Tim. 4:1.

⁵ Fa Satan man kori so furu sma? Fu di Satan sabi taki sma e frede dede, meki a man kisi sma nanga den lei fu en. Boiti dati, Gado ben meki wi fu libi fu têgo, dati meki wi no wani dede (Preik. 3:11). Wi e si dede leki wan feanti.​—1 Kor. 15:26.

6-7. (a) Satan ben man sorgu taki libisma no kon sabi san e pasa nanga den dedewan? Fruklari dati. (b) Fa den leri fu Bijbel e yepi wi fu no frede den dedewan?

⁶ Aladi Satan e meki so furu muiti fu kori sma, toku wi sabi san e pasa nanga den dedewan. Na ini a ten disi furu sma sabi san Bijbel e leri fu den dedewan èn sortu howpu de gi den. Èn den e leri trawan den sani disi tu (Preik. 9:5, 10; Tori 24:15). Den Bijbel leri disi e trowstu wi. Dati meki wi no e frede den dedewan èn wi no e frede taki wan sani o pasa nanga den tu. Wi sabi taki den no de na libi èn taki den no man du ogri nanga nowan sma. A de neleki den de na ini wan dipi sribi (Yoh. 11:11-14). Wi sabi tu taki wan sma di dede no sabi noti. Sobun te den dedewan o kisi wan opobaka a o de leki na eife den ben tapu den ai, awinsi den ben dede hondrohondro yari kaba.

⁷ Yu no feni taki den sani di Bijbel e leri fu dede krin fu frustan èn taki den no e bruya wi? Ma na a tra sei, den lei fu Satan e bruya sma! Ma boiti taki Satan e kori libisma, a e gi wi Mekiman porinen. Fu man frustan sortu bruya den lei fu Satan tyari kon, wi o luku dri aksi: Fa den lei fu Satan e gi Yehovah porinen? Fa den e meki taki sma e denki taki a no de fanowdu fu bribi na ini a frulusu-ofrandi fu Krestes? Fa den e meki taki libisma e sari èn e pina moro?

8. Fa Yeremia 19:5 e sori taki den lei di Satan e fruteri fu den dedewan e gi Yehovah porinen?

⁸ Den lei di Satan e fruteri fu den dedewan e gi Yehovah porinen. Wan fu den  lei fu Satan na taki den dedewan de na ini hel pe Gado e bron den nanga faya. A lei disi e gi Yehovah porinen! Fa so? A lei disi e meki taki sma e bribi taki a Gado fu lobi abi den srefi takru fasi fu Didibri (1 Yoh. 4:8). Fa disi e meki yu firi? Fa yu denki taki Yehovah e firi? A sani disi e meki a sari fu di a no e prakseri srefi fu du ogri nanga sma.​—Leisi Yeremia 19:5.

9. Yohanes 3:16 nanga 15:13 e taki fu Krestes en lusu-paiman. Fa den lei fu Satan e meki taki sma no e bribi na ini a lusu-paiman?

⁹ Den lei fu Satan e meki sma denki taki a no de fanowdu fu bribi na ini a frulusu-ofrandi fu Krestes (Mat. 20:28). Wan tra lei fu Satan na taki libisma abi wan yeye di no man dede. Efu a sani disi ben tru, dan ala sma ben o libi fu têgo. A no ben o de fanowdu tu taki Krestes gi en libi leki wan lusu-paiman so taki wi kan kisi têgo libi. Ma hori na prakseri taki a lusu-paiman fu Krestes na a moro moi fasi fa Gado nanga Yesus sori taki den lobi wi. (Leisi Yohanes 3:16; 15:13.) Prakseri fa Yehovah nanga en Manpikin e firi te sma e denki taki a moi kado fu den no de fanowdu.

10. Fa den lei fu Satan meki taki sma e sari èn e pina moro?

¹⁰ Den lei fu Satan e meki taki libisma e sari èn e pina moro. Te papa nanga mama e sari fu di wan pikin fu den dede, dan son leisi sma e taigi den taki Gado teki a pikin fu den fu de wan engel na ini hemel. Yu no feni taki a lei disi e meki taki sma e sari moro? Fu di sma e bribi taki dedesma e bron na ini hel, meki na ini a ten di pasa den no ben e si en leki wan ogri fu bron sma na wan postu te den no ben agri nanga den kerki leri. Furu yari pasa yu ben abi wan Krutubangi fu Lomsu Kerki na ini Spanyorokondre di ben frufolgu sma di no ben agri nanga den kerki leri èn den ben bron den na wan postu. Wan buku e taki dati a krutubangi disi ben e du dati fu di den ben wani meki den sma disi „firi fa a de fu bron ini hel”. Na so fasi den ben kan sori berow fosi den dede, dan den no ben o go na ini hel. Na ini son kondre, sma e anbegi den afo fu den di dede, den e gi den grani noso den e suku kibri na den. Trawan e du sani gi den fu di den no wani taki den strafu den. Ma te sma e bribi den lei fu Satan, dan dati no e gi den trowstu. Na presi fu dati, den e frede moro èn den abi moro broko-ede.

11. Fa famiriman nanga mati kan dwengi wi fu trangayesi Gado?

¹¹ Te wan sma fu wi dede, dan son leisi famiriman noso mati e dwengi wi fu teki prati na gwenti di Gado no feni bun. Ma te wi lobi Gado nanga en Wortu, dan dati o gi wi a krakti fu gi yesi na Yehovah. Kande den e gi wi syen èn den e taigi wi taki wi no lobi a sma di dede èn taki wi no e lespeki en. A kan tu taki den e taigi wi taki wi o meki taki a dedesma du ogri nanga a famiri. San o yepi wi fu du san Bijbel e taki? Meki wi go luku fa Bijbel kan yepi wi.

12. Sortu gwenti di abi fu du nanga dede, no e kruderi nanga Bijbel?

¹² Tan fara fu gwenti di no e kruderi nanga Bijbel (2 Kor. 6:17). Na ini wan Karibis kondre, furu sma e bribi taki te wan sma dede, a yeye fu en e waka lontu fu strafu den sma di no ben libi bun nanga en. Wan buku e taki dati a yeye disi kan tyari problema kon tu gi den sma di e libi  na ini a birti. Na son presi na ini Afrika sma abi a gwenti fu tapu den spikri na ini den oso nanga wan duku baka te wan sma dede èn efu fowtow fu a sma de na ini na oso, dan den e drai den. Fu san ede den e du dati? Son sma e taki dati a dedesma no musu si ensrefi. Leki anbegiman fu Yehovah wi no e bribi nowan fu den lei disi èn wi no e teki prati na gwenti di e horibaka gi den lei fu Satan.​—1 Kor. 10:21, 22.

13. Soleki fa Yakobus 1:5 e sori, dan san yu musu du efu yu no sabi fa Yehovah e denki fu wan gwenti?

¹³ Efu yu no sabi fa Yehovah e denki fu wan gwenti, dan begi en fu gi yu koni. (Leisi Yakobus 1:5.) Te yu du dati, dan go ondrosuku san den buku fu wi e taki fu a tori. Efu a de fanowdu, yu kan go suku rai na den owruman fu yu gemeente. Den no o taigi yu san yu musu du, ma den kan sori yu sortu Bijbeltekst abi fu du nanga a tori, soleki den wan di kari na ini na artikel disi. Te yu e du den sani disi, yu e leri fu ’gebroiki yu frustan’, so taki yu kan „sabi san bun èn san no bun”.​—Hebr. 5:14.

14. Fa wi kan sorgu taki wi no meki sma fadon?

¹⁴ ’Du ala sani fu gi Gado glori. Un no musu du nowan sani di kan meki sma fadon’ (1 Kor. 10:31, 32). Te wi musu bosroiti efu a bun fu teki prati na wan gwenti, dan wi musu prakseri tu sortu krakti a bosroiti fu wi o abi tapu a konsensi fu trawan, spesrutu wi Kresten brada nanga sisa. Noiti wi wani du wan sani di o meki trawan fadon (Mark. 9:42). Boiti dati, wi no wani du sani fu meki sma di no e anbegi Yehovah ati bron. Lobi o meki taki wi o taki na wan lespeki fasi nanga den. Na so wi e gi Yehovah glori. Wi no o meki trobi nanga sma èn wi no o spotu den fu di den e hori den na den gwenti fu den. Hori na prakseri taki lobi kan du furu! Te wi e sori lobi nanga lespeki, dan dati kan safu na ati fu den sma di e gens wi.

15-16. (a) Fu san ede a bun fu taigi trawan san yu e bribi? Gi wan eksempre. (b) Fa wi kan du san skrifi na Romesma 1:16?

¹⁵ Meki den sma na ini yu birti sabi taki yu na wan Yehovah Kotoigi (Yes. 43:10). Efu wan sma fu yu dede, dan famiri nanga birtisma kan ati bron efu yu no e hori yusrefi na son gwenti. Ma efu yu fruteri den  na fesi san yu e bribi, dan dati kan meki en moro makelek gi yu na ini so wan situwâsi. Francisco di e libi na ini Mosambik, e skrifi: „Di mi nanga mi frow, Carolina bigin dini Yehovah, wi taigi wi famiri taki wi no o anbegi den dedewan moro. Di Carolina en sisa dede, a sani disi ben de wan tesi gi wi. Den sma abi a gwenti fu wasi a dedeskin èn fu du sani di abi fu du nanga afkodrei. Baka dati wan krosibei famiri musu go sribi dri dei na a presi pe den trowe a watra di den gebroiki fu wasi a dedeskin. Den e du den sani disi so taki a dedesma no ati bron nanga den. Carolina en famiri ben e fruwakti taki en ben o sribi na a presi pe den ben trowe a watra.”

¹⁶ San Francisco nanga en frow du? Francisco e taki: „Fu di wi lobi Yehovah èn wi wani du san a feni bun, meki wi weigri fu hori wisrefi na a gwenti disi. Carolina en famiri ben ati bron nanga wi. Den taki dati wi no abi lespeki gi den dedewan èn taki den no o yepi wi noso kon luku wi moro. Fu di wi ben fruteri den kaba san wi e bribi, meki wi no go taki nanga den moro fu a tori di den ben ati bron so. Son famiriman ben opo taki gi wi. Den ben taki dati wi ben taigi a famiri kaba san wi e bribi. Bakaten Carolina en famiri no ben ati bron moro èn wi meki sani bun baka nanga den. Sonwan fu den kon na wi oso srefi fu di den ben wani den buku fu wi.” Noiti wi musu syen fu taki san wi e bribi fu den dedewan.​—Leisi Romesma 1:16.

17. Fa wi kan de wan trutru mati gi wan brada noso sisa di e sari?

¹⁷ Te wan brada noso sisa lasi wan lobiwan na ini dede, wi musu du muiti fu de „wan trutru mati . . . , wan brada di gebore fu te nowtu de” (Odo 17:17). Fa wi kan de „wan trutru mati” te sma e dwengi wan brada noso sisa fu teki prati na wan gwenti di Gado no feni bun? Meki wi luku tu Bijbeltekst di kan yepi wi fu trowstu den wan di e sari fu di wan lobiwan fu den dede.

18. Fu san ede Yesus ben krei èn san wi kan leri fu na eksempre fu en?

 ¹⁸ „Krei nanga sma di e krei” (Rom. 12:15). Kande wi no sabi san wi musu taigi wan sma di e sari. Ma te den e si taki wi e krei nanga den, den o sabi taki wi e firi gi den. Di Lasarus, a mati fu Yesus dede, dan Maria, Marta nanga trawan ben krei fu di a ben de den brada nanga mati. Di Yesus doro drape baka fo dei, ensrefi „bigin krei”, aladi a ben sabi taki a ben o wiki Lasarus (Yoh. 11:17, 33-35). Di Yesus ben krei di Lasarus dede, dan dati ben e sori fa Yehovah ben firi. A ben sori tu taki Yesus ben lobi a famiri disi. A sani disi ben musu fu de wan trowstu gi Maria nanga Marta. Na so a de tu taki te wi e sori lobi gi den brada nanga sisa èn wi e sori taki wi e firi gi den, dan den o sabi taki den no de den wawan, ma den lai mati di wani yepi den.

19. Fa wi kan fiti Preikiman 3:7 te wi e trowstu wan brada noso sisa?

¹⁹ „Wan ten de fu tan tiri èn wan ten de fu taki” (Preik. 3:7). Wan tra fasi fa wi kan trowstu wan brada noso sisa di e sari na te wi e arki en. Gi en na okasi fu taki san de na tapu en ati èn no ati bron te a e „taki dondon sani” (Yob 6:2, 3). Kande a brada noso sisa e stress fu di famiriman di no de Kotoigi e dwengi en fu du wan sani di no bun. Dati meki a bun fu begi nanga en. Aksi Gado, „a sma di e arki begi”, fu gi en krakti nanga koni, so taki a no bruya (Ps. 65:2). Efu yu abi na okasi, leisi Bijbel nanga en. Noso leisi wan artikel, kande wan ondrofenitori, di abi fu du nanga a situwâsi fu en.

20. San wi o luku na ini a tra artikel?

²⁰ Wi breiti taki wi sabi san Bijbel e leri fu den dedewan èn sortu moi howpu de gi den (Yoh. 5:28, 29). Dati meki wi musu taki èn du sani di e sori taki wi e horibaka gi den sani di Bijbel e leri. Èn te wi abi na okasi wi musu fruteri trawan san wi e bribi. Na ini a tra artikel wi o si fa Satan e pruberi fu kori sma nanga afkodrei. Wi o si fu san ede wi musu wai pasi gi gwenti nanga tra sani di abi fu du nanga afkodrei.