NA INI a ten fu Paulus pikinmoro ala den sipi ben tyari lai, den no ben tyari sma fu a wan presi go na a trawan. Efu wan sma ben wani feni wan sipi, dan a ben musu aksi trawan efu den ben sabi sortu sipi ben go na a presi pe a ben wani go. A ben musu aksi a kapten fu a sipi tu efu a ben wani tyari en (Tori 21:2, 3). Awinsi a sipi ben o tyari en afu pasi, a sma ben saka na wan tra lanpe pe a ben kan suku wan tra sipi di ben o tyari en go na a presi pe a ben wani go.​—Tori 27:1-6.

Den botoman ben go tapu se soso na spesrutu ten fu a yari èn den no ben hori densrefi na wan schema. Den no ben gowe efu a weer no ben bun noso efu den ben abi a firi taki sani no ben o waka bun. Fu eksempre, efu den ben si wan blaka fowru di ben sidon na den titei fu den seiri noso efu den ben si wan broko sipi na syoro, dan den no ben gowe. Ma te a winti ben bun fu seiri, dan wantewante den botoman ben gowe. Efu wan sma ben feni wan sipi di ben wani tyari en, dan a ben go na a lanpe nanga en lai èn a ben wakti fu yere o ten a sipi o lusu.

A historia skrifiman Lionel Casson e taki: „Na ini Rome a ben makelek gi sma fu feni wan sipi. Den srefi no ben abi fu go suku wan. A lanpe fu Rome ben de na a mofo fu Tiber-liba. A ben de krosibei fu a foto Ostia pe yu ben abi wan bigi pren di ben lai kantoro. Furu fu den kantoro disi ben de fu den sma di ben abi den sipi. Den sipiman fu Narbonne [now a nen Fransikondre] ben abi wan kantoro, den sipiman fu Carthage [now a nen Tunesia] ben abi wan tu, . . . èn tra sipiman ben abi kantoro tu. Efu wan sma ben suku wan sipi, dan a ben go na wan fu den kantoro disi fu aksi pe den sipi ben o go.”

Efu wan sma ben wani go na wan tra kondre, dan a ben doro moro gaw te a ben teki wan sipi, ma ogri ben kan miti en tu. Di Paulus ben go leki zendeling na difrenti presi, dan wan tu leisi a sipi pe a ben de na ini sungu.​—2 Kor. 11:25.