1-2. Fu san ede a ben hebi gi Yesus a lasti dei fu en leki libisma?

YESUS ben abi furu broko-ede a lasti dei fu en leki libisma. Heri esi ogri-ati man ben o pina en èn den ben o kiri en. Ma Yesus no ben e broko en ede nomo nanga a dede fu en. A ben lobi en Papa srefisrefi èn a ben wani plisi en. Yesus ben sabi taki efu a ben tan gi yesi na Yehovah te na a dede fu en, a ben o yepi krin Yehovah nen. Yesus ben lobi libisma tu èn a ben sabi taki na soso te a ben o tan gi yesi na Yehovah, wi ben o abi a howpu fu libi fu têgo.

² Aladi a ben hebi gi Yesus, toku a ben abi wan korostu firi. A taigi den apostel fu en: „Mi o meki unu firi korostu” (Yoh. 14:27). A ben abi „a freide fu Gado”. Dati na a korostu firi di wan sma abi te a de wan bun mati fu Yehovah. A freide dati yepi Yesus fu no broko en ede tumusi.​—Fil. 4:6, 7.

3. San wi o luku na ini na artikel disi?

³ Nowan fu wi o abi en so hebi leki Yesus, ma ala den bakaman fu en musu fruwakti taki den o kisi tesi (Mat. 16:24, 25; Yoh. 15:20). Neleki Yesus, wi o abi broko-ede tu. San wi kan du fu no broko wi ede tumusi èn fu tan abi wan korostu firi? Meki wi luku dri sani di Yesus du di a ben du en diniwroko na grontapu. Wi o luku tu fa wi kan teki na eksempre fu en te wi e kisi tesi.

4. Sortu eksempre e sori taki Yesus ben begi furu a lasti dei fosi a dede, èn sortu rai Kresten kisi bakaten na 1 Tesalonikasma 5:17?

⁴ Leisi 1 Tesalonikasma 5:17. A lasti dei fu Yesus fosi a dede, a begi furu. Di a sori den apostel fa den ben musu memre a dede fu en, a begi gi a brede nanga a win (1 Kor. 11:23-25). Fosi den gowe libi a presi pe den hori a Paskafesa, Yesus begi nanga den disipel (Yoh. 17:1-26). Di en nanga den disipel ben de na ini a dyari fu Getseimanei a neti dati, a begi omeni leisi (Mat. 26:36-39, 42, 44). Èn a lasti sani di Yesus du fosi a dede, na taki a begi (Luk. 23:46). Yesus taki nanga Yehovah fu ibri sani di pasa a lasti dei fu en libi.

5. Fu san ede den apostel no ben abi nofo deki-ati?

⁵ Wan sani di ben yepi Yesus te a ben e kisi tesi, na taki ala leisi a ben aksi en Papa fu yepi en fu horidoro. Ma na presi taki den apostel ben tan na ai èn ben e begi a neti dati, den fadon na sribi. Dati meki den no ben abi nofo deki-ati di den kisi tesi (Mat. 26:40, 41, 43, 45, 56). Te wi e kisi tesi, wi o man tai hori na Yehovah soso te wi e „begi doronomo” neleki Yesus. Fu san wi kan begi?

6. Fa bribi e yepi wi fu abi freide na ini wi ati?

⁶ Wi kan begi Yehovah fu „gi wi moro bribi” (Luk. 17:5; Yoh. 14:1). Wi musu abi bribi fu di Satan o tesi ala sma di e waka baka Yesus (Luk. 22:31). Fa bribi o yepi wi fu tan abi wan korostu firi awinsi wi e kisi problema baka makandra?  Te wi du ala san wi man fu lusu wan problema, dan bribi o meki taki wi no broko wi ede moro fu di wi sabi taki Yehovah o lusu en na a yoisti ten. Fu di wi sabi taki Yehovah koni moro wi, meki dati e meki wi abi freide na ini wi ati.​—1 Petr. 5:6, 7.

7. San yu leri fu den sani di Robert taki?

⁷ Begi e yepi wi fu tan abi wan korostu firi te wi e kisi tesi. Luku na eksempre fu Robert, wan owruman di pasa 80 yari kaba èn di e dini Yehovah furu yari langa. A taki: „A rai na Filipisma 4:6, 7 yepi mi fu horidoro na ini den furu tesi di mi kisi na ini mi libi. Mi ben abi moni problema èn wan pisi ten mi ben lasi a grani fu dini leki owruman.” San yepi Robert fu tan abi wan korostu firi? A taki: „Solanga mi e bigin broko mi ede nanga wan sani, mi e begi. Mi si taki te mi e begi furu èn te mi e begi fayafaya, dan mi e kisi wan korostu firi.”

8. Soleki fa Yohanes 8:29 e sori, dan sortu tra sani yepi Yesus fu abi wan korostu firi?

⁸ Leisi Yohanes 8:29. Srefi di Yesus ben e kisi tesi a ben abi wan korostu firi, fu di a ben sabi taki en Papa ben breiti nanga en. A tan gi yesi na en Papa srefi di a ben muilek gi en fu du dati. A ben lobi en Papa èn a wani fu Yehovah ben de a moro prenspari sani gi en. Fosi Yesus kon na grontapu, a yepi Gado fu meki ala sani (Odo 8:30). Di a ben de na  grontapu, a ben lobi leri tra sma sani fu en Papa (Mat. 6:9; Yoh. 5:17). A wroko dati ben gi Yesus furu prisiri.​—Yoh. 4:34-36.

9. Te wi e preiki fayafaya, dan fa dati e yepi wi fu abi wan korostu firi?

⁹ Wi e teki na eksempre fu Yesus te wi e gi yesi na Yehovah èn te ’ala ten wi abi furu fu du na ini a wroko fu Masra’ (1 Kor. 15:58). Te wi e ’preiki fayafaya’, dan wi no o poti tumusi furu prakseri na den problema fu wi (Tori 18:5). Furu fu den sma di wi e miti na ini a preikiwroko abi moro bigi problema leki wi. Ma te den kon leri fu lobi Yehovah èn te den e du san den leri, dan den e kon abi wan moro bun libi èn den de moro koloku. Ibri leisi te wi e si dati, dan dati e tranga wi bribi taki Yehovah o sorgu gi wi. Disi e yepi wi fu tan abi wan korostu firi. Na dati wan sisa ondrofeni. En heri libi langa a feti nanga a firi taki a no warti noti. A e taki: „Te mi e preiki fayafaya, dan mi no e broko mi ede so furu èn mi de moro koloku. Mi denki taki mi e firi so fu di te mi de na ini a preikiwroko, dan mi e firi taki Yehovah de na mi sei.”

10. San yu leri fu den sani di Brenda taki?

¹⁰ Luku na eksempre fu wan tra sisa di nen Brenda. En nanga a meisje fu en abi wan seryusu siki. Brenda de na ini wan rolsturu èn a no abi furu krakti. Son leisi a man preiki oso fu oso, ma moro furu a e skrifi brifi gi sma. A e taki: „Di mi kon frustan taki mi ben o abi fu libi nanga a siki disi, mi kon si taki a moro bun sani di mi ben kan du na fu poti prakseri na a preikiwroko. Fu taki en leti, te mi e preiki, dan mi no e prakseri den problema fu mi. Na presi fu dati, mi e prakseri fa mi kan yepi den sma di mi e miti na ini a kontren. Èn a preikiwroko e yepi mi fu tan denki a howpu di mi abi.”

11-13. (a) Fa den apostel nanga tra sma sori taki den na trutru mati fu Yesus? (b) Fa den mati fu Yesus ben meki a firi?

¹¹ A heri pisi ten di Yesus ben e du a diniwroko, den apostel fu en sori taki den ben de trutru mati, soleki fa wi kan leisi na Odo 18:24. Drape skrifi: ’Wan mati de di lobi yu moro leki wan brada.’ Yesus ben lobi den mati fu en. Di a ben du en diniwroko, nowan fu den brada fu en ben bribi na ini en (Yoh. 7:3-5). Wan pisi ten den famiri fu en ben denki srefi taki a ben law (Mark. 3:21). Ma den apostel ben de tra fasi. Dati meki a lasti neti fosi Yesus dede, a taki: „Unu na den wan di tan nanga mi di mi ben kisi tesi.”​—Luk. 22:28.

¹² Son leisi den apostel du sani di ben meki Yesus sari, ma a no ben tan prakseri den fowtu fu den. A ben si taki den ben e bribi na ini en (Mat. 26:40; Mark. 10:13, 14; Yoh. 6:66-69). A lasti neti fosi sma kiri Yesus, a taigi den 11 apostel fu en: „Mi kari unu mi mati, fu di mi taigi unu ala den sani di mi yere fu mi Tata” (Yoh. 15:15). A no de fu taki dati den mati fu Yesus gi en furu deki-ati. A fasi fa den yepi en di a ben du a preikiwroko, ben gi en furu prisiri.​—Luk. 10:17, 21.

¹³ Boiti den apostel, Yesus ben abi tra mati, man nanga uma, di ben yepi en te a ben e du a diniwroko fu en. Sonwan fu den ben kari en kon na den oso fu nyan nanga den (Luk. 10:38-42; Yoh. 12:1, 2).  Trawan ben e go makandra nanga en na tra foto èn den ben e gebroiki den sani fu den fu sorgu gi en (Luk. 8:3). Yesus ben abi bun mati, fu di en srefi ben de wan bun mati gi den. A ben e du bun gi den èn a no ben fruwakti tumusi furu fu den. Yesus no ben abi sondu, ma a ben breiti nanga a yepi di a ben kisi fu den mati fu en di ben de sondusma. Wi kan de seiker taki den yepi en fu tan abi wan korostu firi.

14-15. Fa wi kan feni bun mati èn fa den kan yepi wi?

¹⁴ Bun mati o yepi wi fu tan gi yesi na Yehovah. A moro bun fasi fu feni bun mati, na fu de wan bun mati (Mat. 7:12). Fu eksempre, Bijbel e gi wi a deki-ati fu meki muiti fu yepi trawan, spesrutu den wan di de „na nowtu” (Ef. 4:28). Prakseri suma yu kan yepi na ini a gemeente. Yu kan go na wenkri gi wan preikiman di no man komoto na oso fu di a owru noso fu di a siki? Yu kan bori wan nyanyan gi wan famiri di abi moni problema? Efu yu sabi fa fu gebroiki a jw.org^® website nanga a JW Library^® app, dan kande yu kan leri tra sma na ini a gemeente fa fu gebroiki den tu. Te wi lobi yepi sma, dan wi o de moro koloku.​—Tori 20:35.

¹⁵ Den mati fu wi o horibaka gi wi te wi e kisi tesi èn den o yepi wi fu tan abi wan korostu firi. Neleki fa Elihu ben e arki di Yob ben e fruteri en fu den tesi fu en, na so den mati fu wi o arki wi nanga pasensi te wi taigi den fa wi e  firi (Yob 32:4). Wi no musu fruwakti taki den mati fu wi o teki bosroiti gi wi, ma a de wan koni sani fu arki den Bijbel rai di den e gi wi (Odo 15:22). Neleki Kownu David di ben abi sakafasi èn di ben teki a yepi fu den mati fu en, na so wi musu abi sakafasi tu èn wi musu teki a yepi fu den mati fu wi te wi de na nowtu (2 Sam. 17:27-29). Iya, den sortu mati disi na kado fu Yehovah.​—Yak. 1:17.

16. Soleki fa Filipisma 4:6, 7 e sori, dan fa wi kan kon abi freide? Fruklari dati.

¹⁶ Leisi Filipisma 4:6, 7. Fu san ede Yehovah e taki dati wi kan kisi a freide fu en soso „nanga yepi fu Krestes Yesus”? A freide fu Gado o man kibri wi ati nanga wi denki soso te wi e frustan fa Yehovah e gebroiki Yesus fu meki a wani fu en kon tru èn te wi e bribi na ini en. Fu eksempre, nanga yepi fu a frulusu-ofrandi fu Yesus wi kan kisi pardon fu ala den sondu fu wi (1 Yoh. 2:12). A sani disi e trowstu wi trutru! Awinsi sortu ogri e miti wi na ini a grontapu fu Satan, Yesus, di de Kownu fu Gado Kownukondre, o meki ala sani kon bun baka (Yes. 65:17; 1 Yoh. 3:8; Openb. 21:3, 4). Disi na trutru wan moi howpu! Aladi Yesus gi wi wan muilek wroko fu du, toku a e horibaka gi wi na ini den lasti dei fu a grontapu disi (Mat. 28:19, 20). Disi e gi wi furu deki-ati! Iya, trowstu, howpu nanga deki-ati na prenspari sani di e yepi wi fu abi freide na ini wi ati.

17. (a) Fa wan Kresten kan tan abi wan korostu firi? (b) Soleki fa Yesus pramisi na Yohanes 16:33, dan san wi o man du?

¹⁷ Sobun, fa yu o man tan abi wan korostu firi te yu e kisi hebi tesi? Du den srefi sani di Yesus ben e du. (1) Begi èn tan begi awinsi san e pasa. (2) Gi yesi na Yehovah èn preiki fayafaya awinsi a muilek son leisi. (3) Teki a yepi fu den mati fu yu te yu de na nowtu. Te yu e du den sani disi, dan a freide fu Gado o kibri yu ati nanga yu frustan. Èn neleki Yesus, yu o man horidoro awinsi sortu tesi yu e kisi.​—Leisi Yohanes 16:33.