1-2. Fu san ede wi kan taki dati wi man waka baka Yesus? Gi wan agersitori.

KON meki wi taki dati yu nanga wan grupu sma e waka na ini wan sabana pe ogri kan miti unu. Wan sma di sabi a kontren e tyari unu. Ma baka wan pisi ten, unu no man si a sma dati moro. Toku yu no e bruya. Fu san ede? Fu di yu nanga den tra sma e si den futumarki fu en èn unu e waka soifri pe den e tyari unu go.

² Yu kan taki dati wi leki tru Kresten e waka na ini wan sabana tu pe ogri kan miti wi. A sabana dati na a ogri grontapu disi. Koloku taki Yehovah gi wi a moro bun sma di man sori wi pe wi musu waka. A sma disi na en Manpikin, Yesus Krestes, èn wi musu waka soifri na en baka (1 Petr. 2:21). Wan buku di e fruklari sani fu Bijbel, e sori taki na ini a tekst disi, Petrus e agersi Yesus nanga wan sma di e sori wi a pasi. Neleki fa den futumarki fu a sma di ben e tyari wi e sori wi pe wi musu waka, na so Yesus libi futumarki na baka tu di e sori wi pe wi musu waka. Wi o luku dri aksi di abi fu du nanga a tori disi. San a wani taki fu waka baka Yesus? Fu san ede wi musu du dati? Èn fa wi musu du dati?

3. San a wani taki fu waka baka wan sma?

³ San a wani taki fu waka baka wan sma? Na ini Bijbel, a wortu „waka” nanga a wortu „futu” abi fu du son leisi nanga a fasi fa wan sma e libi (Gen. 6:9; Odo 4:26). A fasi fa wan sma e libi de leki den futumarki di a e libi na baka  te a e waka. Sobun, te wi e waka baka wan sma, dan dati wani taki dati wi e teki na eksempre fu en.

4. San a wani taki fu waka baka Yesus?

⁴ Sobun, san a wani taki fu waka baka Yesus? Dati wani taki dati wi musu teki na eksempre fu en. Na ini a thema tekst fu na artikel disi, na apostel Petrus e taki fu a bun eksempre di Yesus gi fu di a horidoro di a ben e pina. Ma furu tra fasi de fa wi kan teki na eksempre fu Yesus (1 Petr. 2:18-25). Fu taki en leti, ala sani di Yesus taki èn du, sobun, en heri libi na wan eksempre gi wi.

5. A tru taki wi leki sondu libisma man waka baka Yesus? Fruklari dati.

⁵ A tru taki wi leki sondu libisma man waka baka Yesus? Iya, wi man du dati. Wi e waka baka Yesus te wi e du ala muiti fu teki na eksempre fu en, awinsi wi no man du ala sani finifini soleki fa en ben du dati. Na so wi e du san na apostel Yohanes ben taki: „Tan waka neleki fa [Yesus] ben e waka.”​—1 Yoh. 2:6.

6-7. Fu san ede wi kan taki dati wi o tron moro bun mati fu Yehovah te wi e waka baka Yesus?

⁶ Te wi e waka baka Yesus, dan wi o tron moro bun mati fu Yehovah. Fu san ede wi kan taki dati? Na a fosi presi, Yesus ben de wan heri bun eksempre gi wi, fu di a sori wi fa fu libi na wan fasi di Gado feni bun (Yoh. 8:29). Sobun, te wi e waka baka Yesus, dan Yehovah o breiti nanga wi. Èn wi kan de seiker taki wi Hemel Tata o tron wan mati fu den wan di e du tranga muiti fu tron en mati.​—Yak. 4:8.

⁷ A di fu tu, na taki Yesus ben e du ala sani soifri soleki fa en Papa ben du. Dati meki Yesus ben kan taki: „A sma di si mi,  si a Tata tu” (Yoh. 14:9). Yesus ben sori sari-ati gi wan gwasiman, a ben e firi gi wan uma di ben abi wan seryusu siki, èn a ben abi sari-ati nanga den wan di ben lasi sma na ini dede. Te wi e sori den fasi fu Yesus èn te wi e libi nanga trawan leki fa Yesus ben du dati, dan wi e teki na eksempre fu Yehovah tu (Mark. 1:40, 41; 5:25-34; Yoh. 11:33-35). O moro wi e kon de leki Yehovah, o moro wi e tron bun mati fu en.

8. Fruklari fa wi kan „wini grontapu” te wi e waka baka Yesus.

⁸ Te wi e waka baka Yesus, dan wi no o meki den sani fu na ogri grontapu disi puru wi prakseri na a wroko di wi e du gi Yehovah. A lasti neti di Yesus ben de na grontapu, a taki: „Mi wini grontapu” (Yoh. 16:33). A ben sori taki a ben weigri fu meki den sani di grontapusma ben e denki èn ben e du, abi krakti na en tapu. Noiti Yesus ben meki sani puru en prakseri na a wroko di a ben kon du na grontapu. A ben kon fu santa a nen fu Yehovah. Fa a de nanga wi? Na ini a grontapu disi, furu sani de di kan puru wi prakseri. Ma efu neleki Yesus wi e tan du san Yehovah wani, dan wi o man wini grontapu tu.​—1 Yoh. 5:5.

9. San wi musu du fu tan waka tapu a pasi di e tyari sma go na têgo libi?

⁹ Te wi e waka baka Yesus, dan wi o man kisi têgo libi. Di wan gudu yonguman aksi san a ben musu du fu kisi têgo libi, dan Yesus piki en: „Kon, tron wan bakaman fu mi” (Mat. 19:16-21). Sonwan fu den Dyu no ben wani bribi taki Yesus na a Krestes. Yesus ben taigi den: „Mi skapu . . . e waka na mi baka. Mi o gi den têgo libi” (Yoh. 10:24-29). Di Nikodeimus, wan memre fu a Grankrutu fu den Dyu, ben wani sabi moro fu den sani di Yesus ben e leri sma, dan Yesus taigi en taki den „sma di e bribi na ini en” o „kisi têgo libi” (Yoh. 3:16). Wi e sori taki wi e bribi na ini Yesus te wi e du san a leri wi èn te wi e teki na eksempre fu en. Te wi e du dati, dan wi o tan waka tapu a pasi di e tyari sma go na têgo libi.​—Mat. 7:14.

10. San wi musu du fu „leri sabi” Yesus moro bun? (Yoh. 17:3)

¹⁰ Efu wi wani waka soifri na Yesus baka, dan wi musu leri sabi en fosi. (Leisi Yohanes 17:3.) Wi musu kon sabi den fasi fu en, fa a e denki, èn san na den wet di a e hori. Awinsi o langa wi de na ini waarheid, toku wi musu tan du muiti fu leri sabi Yehovah nanga en Manpikin moro bun.

11. San skrifi na ini den fo Evangelietori?

¹¹ Fu di Yehovah wani taki wi kon sabi  en Manpikin, meki a sorgu taki sma skrifi den fo Evangelietori Mateyus, Markus, Lukas nanga Yohanes na ini Bijbel. Den Evangelietori disi e fruteri fu a libi fu Yesus èn fu a wroko di a du na grontapu. Den e sori wi san Yesus taki, san a du, èn fa a ben e firi. Den fo buku disi e yepi wi fu „poti prakseri finifini” na a eksempre fu Yesus (Hebr. 12:3). Wi kan taki dati den e sori wi den futumarki fu Yesus. Sobun, ibri leisi te wi e studeri den Evangelietori, dan wi e kon sabi Yesus moro bun. Na so wi o man waka soifri na en baka.

12. Fa den Evangelietori kan yepi wi fu kon sabi Yesus moro bun?

¹² Efu wi wani kon sabi Yesus moro bun, dan wi no musu leisi den Evangelietori nomo, ma wi musu teki ten fu studeri den finifini èn fu denki dipi fu san wi e leri. (Luku Yosua 1:8.) Meki wi go luku tu sani di kan yepi wi fu denki dipi fu den Evangelietori èn fu du san den e leri wi.

13. San kan yepi yu fu si den Evangelietori na yu fesi?

¹³ A fosi sani, pruberi fu si den sani na yu fesi. Pruberi fu si, fu yere, èn fu firi san e pasa. Wán sani di kan yepi yu, na te yu e ondrosuku sani moro fini na ini den buku fu Yehovah en organisâsi. Luku san ben pasa fosi èn baka a tori di yu e leisi. Pruberi fu kon sabi moro fu den sma èn den presi di kari na ini a tori. Luku san den difrenti Evangelie skrifiman e taki fu a srefi tori. Son leisi a wan e taki wan prenspari sani di den trawan no e taki.

14-15. San o yepi yu fu du san yu leri fu den Evangelietori?

¹⁴ A di fu tu sani, du san yu leri fu den Evangelietori (Yoh. 13:17). Baka te yu studeri na Evangelietori finifini, dan aksi yusrefi: ’San mi kan leri fu a tori disi? Fa mi kan gebroiki den sani di mi leri, na ini mi eigi libi? Fa mi kan gebroiki en fu yepi wan tra sma?’ Prakseri a sma  di yu ben o wani yepi èn fruteri en san yu leri. Ma du dati sondro fu meki a firi wan fasi.

¹⁵ Kon meki wi go luku wan eksempre di e sori wi fa wi kan du den tu sani disi. Wi o luku a tori fu a pôti uma di ben poti moni na ini a monikisi fu a tempel.

16. Fruteri san e pasa na Markus 12:41.

¹⁶ Pruberi fu si a tori na yu fesi. (Leisi Markus 12:41.) Tide na 11 Nisan fu a yari 33. Ete wan tu dei, dan den o kiri Yesus. Pikinmoro a heri dei Yesus gi leri na ini a tempel. Den kerki fesiman di e gens en, meki en muilek gi en. Wan pisi ten na fesi, wan tu fu den ben aksi en suma ben gi en a reti fu du den sani di a ben e du. Trawan pruberi fu fasi en nanga wan lo muilek aksi (Mark. 11:27-33; 12:13-34). Now Yesus go na wan tra pisi fu a tempel. A kan taki a de na a pisi now di nen a Fesidyari fu den umasma, pe a kan si den monikisi di de na sei a skotu fu a fesidyari. A e go sidon èn a e bigin luku den sma di e poti moni na ini den monikisi. Yesus e si fa furu gudusma e poti furu moni na ini den kisi disi. Kande a e sidon krosibei nofo fu yere fa a moni e fadon na ini den monikisi.

17. San Markus 12:42 e taki fu a pôti uma di masra ben dede kaba?

¹⁷ Leisi Markus 12:42. Baka wan pisi ten, Yesus e si wan uma. Na uma disi ben pôti èn en masra ben dede kaba. Kande a no ben abi moni srefi fu bai den moro prenspari sani di a ben abi fanowdu. Toku a e go na wan fu den monikisi èn a e poti tu pikin sensi na ini. A e du dati na so wan fasi taki sma no man si san a e poti. Kande yu no man yere den sensi disi srefi te den e fadon na ini den kisi. Ma Yesus sabi san na uma poti. A ben poti tu lepton. Disi na den moro pikin sensi di sma ben e gebroiki na ini a ten dati. A moni dati no ben sari srefi fu bai wan fu den moro pikin fowru di sma ben e bai fu nyan.

18. San Yesus taki fu a moni di a pôti uma ben gi, soleki fa Markus 12:43, 44 e sori?

¹⁸ Leisi Markus 12:43, 44. Di Yesus si san a pôti uma disi du, dan a sani dati naki en ati. Dati meki a e kari den disipel fu en kon èn a e sori go na a pôti uma disi. A e taigi den: „A pôti uma disi poti moro leki ala den sma di poti moni na ini a monikisi.” A e taigi den tu: „Den alamala [spesrutu den gudusma] poti san ben tan abra fu a moni fu den. Ma aladi na uma disi ben pôti, toku a poti ala san a ben abi.” Di a pôti uma disi gi a lasti moni di a ben abi na a dei dati, dan a poti en libi na ini Yehovah anu fu di a ben sabi taki Yehovah ben o sorgu gi en.​—Ps. 26:3.

19. Sortu prenspari sani wi kan leri te wi e luku san Yesus ben taki fu a pôti uma?

¹⁹ Du san yu leri. Aksi yusrefi: ’San mi kan leri fu den sani di Yesus ben taki fu a pôti uma?’ A no de fu taki dati a ben winsi taki a ben kan gi Yehovah moro. Ma toku a gi Yehovah ala san a ben man. Yesus ben sabi taki Yehovah ben e warderi a moni di a ben gi. A sani disi e leri wi wan prenspari sani: Yehovah breiti te wi e dini en nanga wi heri ati (Mat. 22:37; Kol. 3:23). Yehovah e prisiri te a e si taki wi e du ala san wi man. Dati wani taki dati a breiti nanga a muiti di wi e du fu anbegi en, fu du a diniwroko fu en, èn fu go na den konmakandra.

20. Fa yu kan gebroiki a tori fu a pôti uma te yu o yepi trawan? Gi wan eksempre.

 ²⁰ Fa yu kan gebroiki a tori fu a pôti uma te yu o yepi trawan? Yu sabi sma di ben o firi bun te yu e fruteri den taki Yehovah breiti nanga san den e du gi en? Yu sabi wan owru sisa di e firi sari fu di a no abi a krakti moro fu du san a ben gwenti du na ini a diniwroko? Noso kande yu sabi wan brada di abi wan siki di e gi en skin-ati èn di e meki taki a e lasi-ati fu di a no man kon na den konmakandra ibri wiki? Yepi den sma disi. Taigi den sani „di bun fu gi sma deki-ati” (Ef. 4:29). Fruteri den moi sani di wi leri fu a tori fu a pôti uma di ben gi moni na ini a tempel. Den sani di yu e fruteri den kan memre den taki Yehovah breiti te wi e du ala san wi man gi den (Odo 15:23; 1 Tes. 5:11). Te yu e prèise trawan fu di den e du ala san den man gi Yehovah, awansi san na dati, dan yu e waka soifri baka Yesus.

21. San yu wani du now di yu leri ala den sani disi?

²¹ Wi de nanga tangi trutru taki den Evangelietori e fruteri wi so furu sani fu Yesus en libi, so taki wi man teki na eksempre fu en èn waka soifri na en baka. Kande yu kan studeri den Evangelietori gi yusrefi noso na a Osofamiri Anbegi fu yu. Meki wi hori na prakseri taki efu wi wani leri wan sani fu a pisi di yu studeri, dan wi musu pruberi fu si den tori na wi fesi èn wi musu du san wi leri. Ma boiti taki wi e du san Yesus ben du, wi musu gi yesi tu na san a ben taki. Na ini a tra artikel wi o luku san wi kan leri fu den lasti sani di Yesus ben taki di a ben de na grontapu.