1. Sortu bun sani Yehovah e si na ini a pipel fu en?

YEHOVAH GADO „e prisiri nanga a pipel fu en” (Ps. 149:4). A sani disi e meki wi firi prisiri! Yehovah e si den bun fasi fu wi, a e si san wi man du, èn a e yepi wi fu tron mati fu en. Efu wi tan gi yesi na en, a o tan wi mati fu ala ten!​—Yoh. 6:44.

2. Fu san ede son sma no man bribi taki Yehovah lobi den?

² Kande son sma e prakseri: ’Mi sabi taki Yehovah lobi en pipel, ma fa mi kan de seiker taki a lobi mi?’ San kan meki taki son sma e aksi densrefi a sani disi? Oksana, * di ondrofeni wan lo ogri di a ben pikin, taki: „Mi ben breiti di mi dopu èn di mi bigin pionier. Ma baka 15 yari mi bigin prakseri den ogri sani di miti mi èn a ben meki mi sari srefisrefi. Mi ben denki taki Yehovah no ben feni mi bun èn taki a no ben lobi mi moro.” Yua, wan pionier sisa di ondrofeni den srefi sortu sani di a ben pikin, taki: „Mi gi mi libi abra na Yehovah fu di mi wani taki a prisiri nanga mi. Ma mi ben de seiker taki noiti a ben o man lobi mi.”

3. San wi o luku na ini na artikel disi?

³ Kande yu de leki den tu sisa disi. Yu lobi Yehovah, ma yu e tweifri efu a lobi yu trutru. Ma fu san ede yu no musu tweifri taki a lobi yu trutru? Èn san kan yepi yu te yu e denki taki Yehovah no lobi yu? Meki wi luku a piki tapu den aksi disi.

4. Fu san ede a no bun fu tweifri efu Gado lobi wi?

⁴ Lobi kan meki wi du furu sani. Efu wi de seiker taki Yehovah lobi wi èn taki a e horibaka gi wi, dan wi o  wani dini en nanga wi heri ati, awinsi sortu problema wi o kisi. Ma efu wi e denki taki Gado no e broko en ede nanga wi, dan wi „no o abi furu krakti” (Odo 24:10). Èn efu wi lasi-ati èn wi bigin prakseri taki Gado no lobi wi, dan Satan o man kisi wi moro makriki.​—Ef. 6:16.

5. San pasa nanga son brada nanga sisa di ben e tweifri efu Gado lobi den?

⁵ Na ini a ten fu wi a bribi fu son brada nanga sisa kon swaki fu di den bigin aksi densrefi efu Gado lobi den. Wan owruman di nen James taki: „Mi ben e dini na Betel èn mi ben breiti fu yepi na ini wan gemeente pe den e taki wan tra tongo. Ma toku mi ben e aksi misrefi efu Yehovah breiti trutru nanga den sani di mi e du gi en. Mi ben e denki srefi taki a no ben e arki den begi fu mi.” Eva, di e yepi na Betel tu, taki: „A no bun srefisrefi fu tweifri taki Yehovah lobi yu, bika a sani disi abi krakti tapu a heri fasi fa yu e dini en. A kan meki taki yu no e prisiri moro fu du sani gi Yehovah.” Michael, di de wan gewoon pionier nanga wan owruman, taki: „Efu yu no e bribi taki Gado lobi yu trutru, dan safrisafri yu o gowe libi en.”

6. San wi musu du efu wi bigin denki taki Gado no lobi wi?

⁶ Den ondrofenitori disi e sori taki den takru denki disi kan pori a bribi fu wi. Ma san wi kan du te wi e bigin prakseri taki Gado no lobi wi? Wi musu puru a denki disi na wi ede wantewante! Aksi Yehovah fu yepi yu fu no prakseri ’den sani di e moro yu’ èn fu gi yu ’a freide fu Gado di o kibri yu ati nanga frustan’ (Ps. 139:23; Fil. 4:6, 7). Èn no frigiti, yu no de yu wawan. Tra brada nanga sisa di e dini Yehovah fayafaya e feti nanga den firi disi tu. Srefi na ini owruten, futuboi fu Yehovah ben prakseri son leisi taki a no lobi den. Meki wi luku san wi kan leri fu na apostel Paulus.

7. Sortu problema Paulus ben abi?

⁷ Yu e firi son leisi taki yu abi someni frantwortu taki yu no man tyari den? Efu disi de so, dan yu o frustan fa Paulus ben e firi. A no ben e broko en ede nanga  wán gemeente nomo, ma nanga „ala den gemeente” (2 Kor. 11:23-28). Yu abi wan siki di e meki yu lasi prisiri? Paulus ben taki dati a ben abi ’wan maka na ini en skin’. Kande disi ben de wan siki di ben e moro en. A ben aksi Gado srefi fu puru a siki disi gi en (2 Kor. 12:7-10). Yu e firi brokosaka fu di yu abi swakifasi? Na so Paulus ben e firi son leisi. A ben taki: „Ai, mi de fu sari fu tru!” A ben taki a sani disi fu di a ben musu feti ala ten fu du san bun.​—Rom. 7:21-24.

8. San yepi Paulus fu horidoro aladi a ben abi problema?

⁸ Aladi Paulus ben abi so furu problema, toku a tan dini Yehovah. Fa a ben man du dati? A ben sabi heri bun taki en na wan sondu sma. Ma a ben abi wan tranga bribi na ini a lusu-paiman. A ben sabi taki Yesus ben pramisi taki ’ala sma di ben e bribi na ini Yesus ben kan kisi têgo libi’ (Yoh. 3:16; Rom. 6:23). A no de fu taki dati Paulus ben de wan fu den sma disi di ben e bribi na ini a lusu-paiman. A ben de seiker taki Yehovah ben de klariklari fu gi wan sma pardon efu a ben sori berow, awinsi a sma ben du wan seryusu sondu.​—Ps. 86:5.

9. San wi e leri fu a sani di Paulus taki na Galasiasma 2:20?

⁹ Paulus ben bribi tu taki Gado lobi en trutru fu di a ben sabi taki Gado seni Krestes fu dede gi en. (Leisi Galasiasma 2:20.) Den wortu di Paulus taki na a kaba fu a vers disi e gi wi trowstu trutru. A ben taki: „A Manpikin fu Gado . . . lobi mi èn . . . [a] gi en libi fu mi ede.” Paulus no ben denki taki a ben ogri so te, taki Gado noiti no ben o man lobi en. A no ben denki: ’Mi kan si fu san ede Yehovah lobi den tra brada nanga sisa, ma mi dati, noiti a no kan lobi mi.’ Paulus ben memre den Romesma a sani disi: „Krestes dede gi wi, aladi wi ben de sondari ete” (Rom. 5:8). Noti no kan tapu Gado fu lobi wi. Gado lobi ala futuboi fu en, awinsi suma den de.

10. San wi e leri fu Romesma 8:38, 39?

¹⁰ Leisi Romesma 8:38, 39. Paulus ben de seiker taki Gado lobi en trutru. A ben skrifi taki „noti no sa man prati wi fu a lobi fu Gado”. Paulus ben sabi taki Yehovah ben abi furu pasensi nanga den Israelsma. A ben sabi tu taki Yehovah ben sori sari-ati gi en. Sobun, san Paulus ben wani taki, na disi: ’Efu Yehovah seni  en eigi Manpikin fu dede gi mi, dan fa mi kan denki taki a no lobi mi?’​—Rom. 8:32.

11. Fu san ede Paulus ben de seiker taki Gado ben lobi en, aladi a ben du den sani di wi e leisi na 1 Timoteyus 1:12-15?

¹¹ Leisi 1 Timoteyus 1:12-15. A musu de taki Paulus ben e sari te a ben prakseri den sani di a ben e du fosi. A ben taki dati en ben de a moro bigiwan fu ala „sondari”, èn wi kan frustan fu san ede a taki a sani dati. Fosi Paulus kon sabi a tru bribi, a ben frufolgu den Kresten na wan ogri-ati fasi na ini ala den foto. A ben poti sonwan fu den na ini strafu-oso èn a ben agri nanga den krutuman fu kiri sonwan fu den (Tori 26:10, 11). Kon meki wi taki dati Paulus ben miti wan yongu Kresten, dan bakaten a kon yere taki a ben gi pasi taki sma kiri a papa nanga mama fu a yonguwan disi. Fa yu denki taki Paulus ben o firi? Den fowtu di Paulus ben meki fosi ben hati en srefisrefi, ma a ben sabi taki a no ben man kenki den sani dati. A ben bribi taki Krestes dede gi en èn dati meki a skrifi: „Na fu di Gado sori mi bun-ati, meki mi de a sma di mi de nownow” (1 Kor. 15:3, 10). San wi kan leri fu a sani disi? Yu musu bribi taki Krestes dede gi yu èn taki a opo a pasi gi yu fu tron wan bun mati fu Yehovah (Tori 3:19). Yehovah no e poti prakseri na den fowtu di wi ben meki fosi, awinsi wi ben de wan Yehovah Kotoigi noso awinsi wi no ben e dini en ete. San prenspari gi Yehovah na san wi e du now èn na ini a ten di e kon.​—Yes. 1:18.

12. Fa den wortu di skrifi na 1 Yohanes 3:19,20 e yepi wi te wi e denki taki wi no warti nofo noso taki wi no bun nofo fu Gado lobi wi?

¹² Te yu e prakseri taki Yesus dede fu tapu den sondu fu wi, dan kande yu e  taki: ’Mi no feni taki mi warti nofo fu kisi a moi kado dati.’ Fu san ede wan sma ben kan firi so? A sondu ati fu wi kan kori wi èn a kan meki wi firi taki wi no warti noti noso taki noiti Gado no kan lobi wi. (Leisi 1 Yohanes 3:19, 20.) Te dati pasa, dan wi musu memre taki „Gado bigi moro wi ati”. Wi Papa na hemel lobi wi èn a e gi sma pardon ala ten. Sobun, noiti no denki taki a no lobi yu èn taki a no o gi yu pardon. Wi musu overtoigi wisrefi taki Yehovah lobi wi. Dati meki wi musu abi a gwenti fu studeri a Wortu fu en, wi musu begi furu, èn wi musu tron mati fu sma di e dini en nanga den heri ati. Fu san ede a prenspari fu du den sani disi?

13. Te wi e studeri Gado Wortu, dan fa dati kan yepi wi? (Luku sosrefi a faki „ Fa Gado Wortu e yepi den”.)

¹³ Studeri Gado Wortu ibri dei. O moro yu e du disi, o moro yu o si den moi fasi fu Yehovah. Yu o frustan taki a lobi yu trutru. Te yu e denki dipi fu wan pisi fu Gado Wortu ibri dei, dan dati kan yepi yu „fu poti sani kon reti” na ini yu ati nanga yu frustan, sobun yu o si sani moro krin (2 Tim. 3:16). Wan owruman di nen Kevin ben feni taki a no warti noti. A taki: „Di mi leisi Psalm 103 èn mi denki dipi fu en, dan dati yepi mi fu kisi misrefi èn fu frustan taki Yehovah lobi mi trutru.” Eva, di wi ben kari kaba na ini na artikel disi, taki: „Na a kaba fu ibri dei, mi e teki ten fu prakseri fu a fasi fa Yehovah e si sani. A sani disi e meki mi firi korostu èn mi bribi e kon moro tranga.”

14. Fa begi kan yepi wi?

¹⁴ Begi furu (1 Tes. 5:17). Efu yu wani tron wan mati fu wan sma, dan yu musu taki furu nanga en èn yu musu fruteri en fa yu e firi. Na so a de tu te wi wani tron wan mati fu Yehovah. Te wi e fruteri en fa wi e firi, fa wi e denki, èn san e gi wi broko-ede, dan wi e sori taki wi e frutrow na en tapu èn taki wi sabi taki a lobi wi (Ps. 94:17-19; 1 Yoh. 5:14, 15). Yua, di wi ben kari kaba na ini na artikel disi, taki: „Te mi e begi, dan mi no e fruteri Yehovah soso san pasa a dei dati. Mi e fruteri en ala san de na tapu mi ati èn mi e taigi en fa mi e firi trutru. Mi kon si taki a no de leki wan basi fu wan bigi bedrijf, ma taki a de wan Papa di lobi en pikin trutru.”​—Luku a faki „ Yu leisi en kaba?”

15. Fa Yehovah e sori taki a e broko en ede nanga wi?

¹⁵ Suku bun mati. Bun mati na wan kado fu Yehovah (Yak. 1:17). Wi hemel Papa gi wi brada nanga sisa di e „sori lobi ala ten” (Odo 17:17). Na so Yehovah e sori taki a e broko en ede nanga wi. Na  ini a brifi gi den Kolosesma, Paulus ben taki dati son Kresten di ben e horibaka gi en ben ’trowstu en trutru’ (Kol. 4:10, 11). Yesus Krestes srefi ben abi yepi fanowdu èn a ben warderi a yepi di a ben kisi fu libisma nanga engel di ben de en mati.​—Luk. 22:28, 43.

16. Fa bun mati kan yepi wi fu kon moro krosibei fu Yehovah?

¹⁶ Yu e suku mati na ini a gemeente èn yu e teki a yepi fu den? Te yu e fruteri wan lepi mati den broko-ede fu yu, dan disi no wani taki dati yu bribi swaki. Na presi fu dati a kan de wan bigi yepi gi yu. James, di wi ben kari kaba na ini na artikel disi, taki: „Mi abi bun mati di de lepi Kresten èn den yepi mi trutru. Te takru prakseri e moro mi, dan den bun mati disi e arki mi nanga pasensi èn den e sori mi taki den lobi mi. Gi mi, disi na wan fasi fa Yehovah e sori taki a lobi mi èn taki a e broko en ede nanga mi.” Sobun, a prenspari srefisrefi fu tron mati fu den brada nanga sisa na ini a gemeente èn fu no lusu den noiti!

17-18. Suma wi musu arki èn fu san ede?

¹⁷ Satan wani taki wi gi abra èn taki wi tapu fu du san reti. A wani wi fu bribi taki Yehovah no lobi wi èn taki wi no bun nofo fu kisi frulusu. Ma soleki fa wi si, dan a sani disi no tru srefisrefi.

¹⁸ Yehovah lobi yu èn yu prenspari srefisrefi gi en. Efu yu gi yesi na en, dan a o ’tan lobi yu’ fu ala ten, neleki fa Yesus e du dati (Yoh. 15:10). Dati meki yu no musu arki Satan èn yu no musu arki yu ati di e krutu yu. Na presi fu dati, arki Yehovah di e si a bun na ini ibriwan fu wi. Yu kan bribi taki a e „prisiri nanga a pipel fu en” èn taki a breiti nanga yu tu!