TUMUSI furu broko-ede kan meki wan sma lasi-ati (Odo 12:25). Oiti yu ben abi broko-ede? Oiti yu ben abi so furu broko-ede taki yu ben firi leki yu no man moro? Efu na so yu e firi, dan yu no de yu wawan. Furu fu wi musu sorgu gi wan famiriman di siki, kande sonwan fu wi lasi lobiwan na ini dede, kande wan rampu pasa na a presi pe wi e tan, noso wan tra sani. Den sortu situwâsi disi kan meki wi kon weri, den kan meki wi stress èn den kan meki wi sari srefisrefi. Ma san kan yepi wi te wi abi broko-ede? a

Wi kan leri furu fu Kownu David. A ben ondrofeni muilek situwâsi na ini en libi, srefi situwâsi pe a ben kan lasi en libi (1 Sam. 17:34, 35; 18:10, 11). San ben yepi David di a ben abi broko-ede? Fa wi kan teki na eksempre fu en?

David miti furu tesi na a srefi ten. Fu eksempre, wan situwâsi ben opo kon di a ben e lon gi Kownu Saul di ben wani kiri en. Di David nanga den man fu en ben komoto fu wan feti, den ben skreki di den si taki den feanti fu den ben fufuru den sani fu den, bron den oso fu den, èn tyari den famiri gowe. San David du? „David nanga den man di ben de nanga en bari krei, teleki den no man moro.” Efu dati no ben sari, den man fu David „ben wani ston David kiri” (1 Sam. 30:1-6). Now David ben abi dri bigi problema: Ogri ben kan miti en osofamiri, a ben frede taki den man di ben de nanga en ben o kiri en èn a ben e lon gi Kownu Saul ete. Prakseri fa David ben e broko en ede na a momenti dati.

San David du baka dati? Wantewante „a go suku yepi na Yehovah en Gado”. Fa David du dati? A ben du san a ben gwenti du. David ben begi Yehovah fu a yepi en èn a prakseri fa Yehovah ben yepi en na ini a ten di pasa (1 Sam. 17:37; Ps. 18:2, 6). David ben sabi taki a ben abi a yepi fu Yehovah fanowdu. Dati meki a aksi Yehovah san a ben musu du. Baka di David aksi Yehovah san a ben musu du, a du wantewante san a taki. A bakapisi ben de taki en nanga den man fu en ben kisi furu blesi fu Yehovah èn den feni den famiri nanga den sani fu den baka (1 Sam. 30:7-9, 18, 19). Yu si san na den dri sani di David du? A begi Yehovah fu yepi en, a prakseri fa Yehovah yepi en na ini a ten di pasa, èn a du wantewante san Yehovah taki. Fa wi kan teki na eksempre fu David? Den dri sani disi kan yepi wi.

1. Begi. Ala leisi te wi e bigin broko wi ede nanga wan sani, wi kan begi Yehovah fu yepi wi èn fu gi wi koni. Wi o firi moro bun te wi e taigi Yehovah san na den sani di e gi wi broko-ede. Noso wi kan taki wan syatu begi na ini wi ati, efu dati na a wan-enkri sani di wi kan du na a momenti dati. Ala leisi te wi e suku yepi na Yehovah, wi e sori taki wi e frutrow tapu en neleki David, di ben taki: „Yehovah na mi bigi ston èn mi fortresi. En na mi Frulusuman. Mi Gado na mi stonbergi. Na en mi o lon go kibri” (Ps. 18:2). Ma begi e yepi trutru? Wan pionier sisa di nen Kahlia, taki: „Baka te mi begi, mi e firi moro bun. Begi e yepi mi fu denki soleki fa Yehovah e  denki èn mi kon abi moro frutrow na ini en.” A tru, begi abi furu krakti èn na wan kado di Yehovah gi wi te wi abi broko-ede.

2. Prakseri fa Yehovah yepi yu na ini a ten di pasa. Te yu e denki a ten di pasa, dan yu kan prakseri wan tu tesi di yu pasa soso fu di Yehovah yepi yu? Te wi e denki fa Yehovah yepi den futuboi fu en na ini a ten di pasa èn fa a yepi wi, dan dati e gi wi a krakti di wi abi fanowdu èn wi o kisi moro frutrow na ini en (Ps. 18:17-19). „Mi skrifi ala den leisi di Yehovah piki den begi fu mi”, na so wan owruman di nen Joshua taki. „Disi ben yepi mi fu prakseri fa Yehovah ben yepi mi di mi ben aksi en wan spesrutu sani èn a gi mi precies san mi ben abi fanowdu.” Iya, te wi e denki fa Yehovah yepi wi na ini a ten di pasa, dan a e gi wi a krakti di wi abi fanowdu fu no broko wi ede tumusi.

3. Du wan sani. Fosi yu teki wan bosroiti, a bun fu luku na ini Gado Wortu san na a moro bun sani fu du (Ps. 19:7, 11). Furu sma feni taki te den e ondrosuku wan spesrutu vers na ini Gado Wortu, dan dati e yepi den fu frustan fa den kan fiti dati na ini den eigi libi. Wan owruman di nen Jarrod e taki: „Te mi e ondrosuku sani, dan dati e yepi mi fu leri moro fu wan vers èn a e yepi mi fu frustan san Yehovah wani taigi mi. Na so mi kan du san Yehovah taki fu di mi e bribi dati trutru.” Te wi e suku a yepi fu Yehovah na ini Gado Wortu èn wi e du san wi leri, dan dati o yepi wi fu sabi san wi musu du te wi abi broko-ede.

David ben frustan taki te a ben abi broko-ede, dan a ben o abi fu suku yepi na Yehovah. A ben breiti so te nanga a yepi fu Yehovah dati a taki: „Na mi Gado e meki taki mi man kren wan skotu. Leki wan banti di tai na mi mindribere, na so a tru Gado e gi mi krakti” (Ps. 18:29, 32). Wi kan firi son leisi taki den problema fu wi de leki hei skotu di wi no man kren. Ma nanga yepi fu Yehovah wi man pasa den problema disi. Iya, te wi e begi Yehovah fu yepi wi, te wi e prakseri fa a yepi wi na ini a ten di pasa èn te wi e du san a taigi wi, dan wi kan de seiker taki a o gi wi a krakti nanga a koni di wi abi fanowdu fu sabi san wi musu du te wi abi broko-ede.