1. San e gi wi furu prisiri?

 JEHOVAH wani taki wi musu de koloku. Wi sabi disi, fu di prisiri na wan fu den fasi di a santa yeye fu en e meki sma kisi (Gal. 5:22). Fu di wan sma sa de moro koloku te a e gi sani leki te a e kisi sani, meki wi e wroko tranga na ini a Kresten diniwroko èn wi e yepi wi brada nanga sisa na difrenti fasi.​—Tori 20:35.

2-3. (a) Soleki fa Galasiasma 6:4 e sori, dan san na tu sani di o yepi wi fu tan de nanga prisiri na ini a diniwroko fu Yehovah? (b) San wi o luku na ini na artikel disi?

² Soleki fa Galasiasma 6:4 e sori, dan na apostel Paulus e taki fu tu sani di o yepi wi fu tan de nanga prisiri. (Leisi en.) A fosi sani, na taki wi musu du ala san wi man du gi Yehovah. Efu wi e du ala san wi man du gi Yehovah, dan wi musu de nanga prisiri kaba (Mat. 22:36-38). A di fu tu sani, na taki wi no musu teki wisrefi gersi nanga trawan. Kande wi abi wan bun gosontu, kande wi abi wan tu koni, noso kande wi leri fu du son sani heri bun. Toku wi musu taigi Yehovah tangi gi den sani dati. Te wi luku en bun, dan na Yehovah gi wi ala den sani di wi abi. Ma na tra sei, efu tra sma man du wan sani moro bun leki wi na ini a diniwroko, dan wi musu breiti taki den e gebroiki den koni fu den fu prèise Yehovah, na presi fu strei nanga trawan noso fu suku biginen. Dati meki wi no musu strei nanga den, ma wi musu leri fu den.

³ Na ini na artikel disi, wi o luku san kan yepi wi te wi e firi brokosaka fu di wi no man du ala san wi wani du na ini a diniwroko. Wi o luku tu san na a moro bun fasi fa wi kan  gebroiki den koni di wi abi èn san wi kan leri fu na eksempre fu trawan.

4. Sortu situwâsi kan meki taki wi e firi brokosaka? Gi wan eksempre.

⁴ Sonwan fu wi no man du ala san wi ben o wani du na ini a diniwroko fu Yehovah fu di wi kon owru noso fu di wi siki, èn a sani disi e meki wi firi brokosaka. Na dati ben pasa nanga Carol. Fosi, a ben e preiki na ini wan kontren pe moro preikiman ben de fanowdu. Na a ten dati a ben abi 35 Bijbelstudie èn a yepi difrenti sma fu go na fesi so taki den ben kan gi densrefi abra èn teki dopu. Carol ben abi furu fu du na ini a diniwroko fu en. Ma dan a kon siki èn a no ben man komoto na oso so furu. Carol e taki: „Mi sabi taki na fu di mi kon siki, meki mi no man du san tra sma man du. Èn dati e meki mi firi leki mi no de so wan bun Kresten leki den. Mi no man du ala san mi wani du èn a sani disi e meki mi firi brokosaka.” Carol wani du ala san a man gi Yehovah. A no de fu taki dati a sani dati na wan moi sani. Wi kan de seiker taki a Gado fu wi di e firi gi trawan, breiti nanga en fu di a e du ala san a man.

5. (a) San wi no musu frigiti te wi e firi leki wi no man du so furu moro na ini a diniwroko leki san wi ben o wani? (b) Soleki fa den prenki e sori, dan fa wan brada tan du ala san a man du na ini a diniwroko fu Yehovah?

⁵ Efu son leisi yu e firi brokosaka fu di yu no man du so furu na ini a diniwroko, dan aksi yusrefi: ’San Yehovah e aksi fu mi?’ Yehovah wani taki yu e du ala san yu man du now na ini a situwâsi fu yu. Denki a tori disi: Wan sisa di abi 80 yari e firi brokosaka fu di a no man du so furu moro na ini a diniwroko leki di a ben abi 40 yari. A feni taki aladi a e du ala san a man, toku Yehovah no breiti nanga en. Ma a sani dati tru? Prakseri a sani disi: Efu a sisa ben du ala san a man gi Yehovah di a ben abi 40 yari èn a e du ala san a man ete now di a abi 80 yari, dan fu taki en leti, a no tapu fu gi Yehovah ala san a man. Te wi e bigin denki taki Yehovah no breiti nanga a diniwroko fu wi, dan wi no musu frigiti taki Yehovah na a sma di e bosroiti san a feni bun. Sobun, efu wi e du ala san wi man, dan a o de neleki Yehovah e taigi wi: „Heri bun!”​—Luku Mateyus 25:20-23.

6. San wi kan leri fu na eksempre fu Maria?

⁶ A o moro makelek gi wi fu tan de nanga prisiri te wi e poti prakseri na san wi man du, na presi fu luku nomo san wi no man du. Luku a tori fu wan sisa di nen Maria. A abi wan siki di e meki taki a no man du so furu leki san a ben o wani du na ini a diniwroko. Na a bigin a ben brokosaka srefisrefi èn a ben e firi leki a no warti noti. Ma di Maria prakseri wan sisa fu a gemeente di no man komoto na bedi, dan a bosroiti fu yepi a sisa dati. A e taki: „Mi seti sani fu go preiki nanga en. Wi ben e bel sma èn skrifi brifi. Te mi ben e kon na oso, dan mi ben e firi so prisiri taki mi ben man yepi mi sisa.” Wi srefi kan kon abi moro prisiri te wi e poti prakseri na san wi man du, na presi fu luku nomo san wi no man du. Ma fa a de efu wi man du moro gi Yehovah noso efu wi man du son sani na ini a diniwroko heri bun?

7. Sortu bun rai na apostel Petrus ben gi den Kresten?

⁷ Na ini a fosi brifi di na apostel Petrus skrifi, a gi den brada nanga sisa fu en deki-ati fu gebroiki iniwan koni di den  ben abi fu tranga makandra. Petrus ben skrifi: „Neleki fa ibriwan fu unu kisi a koni fu man du wan spesrutu sani, na so un musu gebroiki a koni dati fu dini makandra leki bun futuboi di Gado sori bun-ati” (1 Petr. 4:10). Wi musu du ala muiti fu gebroiki den koni fu wi èn wi no musu frede taki trawan o dyarusu na wi tapu, noso taki den o firi brokosaka. Efu wi no ben o gebroiki den koni fu wi, dan wi no ben o gi Yehovah ala san wi man.

8. Soleki fa 1 Korentesma 4:6, 7 e sori, dan fu san ede wi no musu meki bigi fu den koni di wi abi?

⁸ Wi musu du ala san wi man fu gebroiki den koni di wi abi, ma wi musu luku bun taki wi no e meki bigi fu den. (Leisi 1 Korentesma 4:6, 7.) Fu eksempre, kande yu sabi heri bun fa fu bigin Bijbelstudie. Gebroiki a koni dati, ma no meki bigi fu en. Kow taki dati no so langa pasa yu ondrofeni wan moi sani na ini a preikiwroko èn na so yu ben man bigin wan Bijbelstudie. Yu de fayafaya fu fruteri a preikiwroko grupu san pasa. Ma te yu e miti a grupu, dan wan sisa e fruteri taki a ben man prati wan tijdschrift. A sisa prati wan tijdschrift, ma yu bigin wan Bijbelstudie. San yu o du? Yu sabi taki a grupu o kisi deki-ati te yu fruteri den san yu ondrofeni. Ma yu kan bosroiti fu wakti teleki wan moro bun okasi de fu fruteri den a tori dati, fu di yu no wani meki a sisa di prati a tijdschrift lasi prisiri. Na so yu ben o sori taki yu e hori a sisa dati na prakseri. Toku yu no musu tapu fu aksi sma fu studeri Bijbel nanga den. Gebroiki a koni di yu abi.

9. Fa wi musu gebroiki den koni fu wi?

⁹ Wi no musu frigiti taki awinsi sortu koni wi abi, na Gado gi wi den sani dati. Wi musu gebroiki den koni dati fu tranga a gemeente. Wi no musu gebroiki den fu meki bigi (Fil. 2:3). Wi no o de nanga prisiri te wi e strei nanga trawan noso te wi e sori taki wi bun moro den. Ma wi o de nanga prisiri te wi e gebroiki a krakti nanga den koni fu wi fu prèise Yehovah.

10. Fu san ede a no de wan koni sani fu teki wisrefi gersi nanga trawan?

¹⁰ Wan sma ben kan bigin luku sortu sani a man du bun èn a kan bigin teki ensrefi gersi nanga wan sma di no man du den sani dati so bun. Fu eksempre, kande wan brada e hori moi lezing. Dati na a koni fu en. Ma na ini en ati, a kan bigin denki taki a bun moro wan tra brada di no man hori lezing so bun. Ma kande a brada  dati man du son sani moro bun leki en. Kande a lobi kari sma kon na en oso, kande a sabi fa fu gi en pikin leri, noso fa fu wroko fayafaya na ini a preikiwroko. Dati meki wi breiti srefisrefi taki wi abi someni difrenti brada nanga sisa di e gebroiki den koni fu den fu dini Yehovah èn fu yepi trawan.

11. Fu san ede wi musu pruberi fu de leki Yesus?

¹¹ Aladi wi no musu teki wisrefi gersi nanga trawan, toku wi kan leri furu fu tra futuboi fu Yehovah. A moro bun sma di wi kan leri fu en, na Yesus. Yesus no ben abi sondu, ma toku wi kan leri furu fu den moi fasi fu en èn fu den bun sani di a ben du gi trawan (1 Petr. 2:21). Te wi e du ala san wi man fu de leki Yesus, dan wi e tron moro bun futuboi fu Yehovah èn wi o man du a preikiwroko moro bun.

12-13. San wi kan leri fu Kownu David?

¹² Na ini Gado Wortu wi e feni furu eksempre fu man nanga uma di ben e anbegi Gado. Aladi den sma disi ben abi sondu, toku wi kan leri furu fu den (Hebr. 6:12). Prakseri Kownu David. Yehovah ben taki dati a de ’wan man di a lobi’, noso soleki fa wan tra Bijbel e taki „a sortu sma di e plisi mi moro tra sma” (Tori 13:22). Ma David ben de wan sondusma. Fu taki en leti, a meki wan tu seryusu fowtu. Ma toku a de wan bun eksempre gi wi. Fu san ede? We, di a kisi piri-ai, dan a no pruberi fu taki dati a no ben du den sani dati. Na presi fu dati, a ben teki a piri-ai di a ben kisi èn a hati en srefisrefi taki a ben meki den fowtu dati. Dati meki Yehovah gi en pardon.​—Ps. 51:3, 4, 10-12.

¹³ Wi kan leri fu David te wi e aksi wisrefi den sani disi: ’Fa mi feni en te mi e kisi rai? Mi de gaw fu taki dati mi meki wan fowtu, noso mi e pruberi fu sori sma taki mi no du noti? Mi lobi fu gi trawan a fowtu fu sani? Mi e du tranga muiti fu no meki den srefi fowtu baka?’ Yu kan aksi yusrefi den sortu sani disi tu te yu e leisi fu tra futuboi fu Gado na ini Bijbel. Den ben abi den srefi sortu problema leki yu? Sortu moi fasi den ben abi? Ibri leisi, yu kan aksi yusrefi: ’Fa mi kan de moro leki a futuboi disi fu Yehovah?’

14. San wi kan leri fu den Kresten brada nanga sisa fu wi?

¹⁴ Wi kan leri furu tu fu wi Kresten brada nanga sisa, awinsi den yongu noso  owru. Fu eksempre, yu sabi wan sma na ini yu gemeente di e tan horidoro aladi a e kisi tesi? Kande sma na wroko noso na skoro e dwengi en fu du sani di no bun. Kande en famiri e gens en, noso kande a e siki. Yu e si den moi fasi di a sma disi abi èn di yu srefi wani kon abi tu? Te yu e luku a bun eksempre fu a sma dati, dan dati kan yepi yu fu kon sabi san yu kan du fu man pasa den tesi di yu e kisi. Wi breiti srefisrefi taki wi abi den sortu eksempre disi na wi mindri.​—Hebr. 13:7; Yak. 1:2, 3.

15. Sortu rai di Paulus ben gi kan yepi wi fu tan de nanga prisiri na ini a diniwroko fu Yehovah?

¹⁵ Ibriwan fu wi musu du ala san a man fu sorgu taki freide nanga wánfasi de na ini a gemeente. Luku na eksempre fu den fosi Kresten. Den ben abi difrenti koni èn den ben e du difrenti wroko (1 Kor. 12:4, 7-11). Ma toku den no ben e strei nanga makandra èn pratifasi no ben de na den mindri. Paulus ben gi ibriwan fu den a deki-ati fu du san ben de fanowdu fu sorgu taki a skin fu Krestes kan kon tranga. Paulus ben skrifi den Efeisesma: „Te ibri pisi fu a skin e du san a musu du, dan a skin e gro kon tranga, fu di den lobi makandra” (Ef. 4:1-3, 11, 12, 16). Den Kresten di ben e du san Paulus ben taki, ben e yepi fu meki taki freide nanga wánfasi de èn na den fasi dati wi e si na ini den gemeente fu wi na ini a ten disi.

16. San wi alamala musu du? (Hebrewsma 6:10)

¹⁶ Du ala san yu man fu no teki yusrefi gersi nanga trawan. Na presi fu dati, leri fu Yesus èn du muiti fu sori den fasi fu en. Leri fu den eksempre na ini Bijbel èn fu brada nanga sisa na ini a ten disi. Te yu e du ala san yu man na ini a diniwroko fu yu, dan yu kan de seiker taki Yehovah no o frigiti a wroko fu yu fu di a no e du sani di no reti. (Leisi Hebrewsma 6:10.) Tan dini Yehovah nanga prisiri, èn sabi taki a breiti te a e si taki yu e du ala san yu man fu plisi en.