1. Fa a du kon dati wi man taki?

 NA GADO meki wi na so wan fasi dati wi man taki. Di a ben meki a fosi libisma, Adam, dan wantewante Adam ben man taki nanga en hemel Papa. A ben kan meki nyun wortu srefi. A sani disi ben yepi Adam di a ben kisi a wroko fu gi ala meti wan nen (Gen. 2:19). Èn a ben musu fu breiti di a ben man taki a fosi leisi nanga wan tra libisma: En moi wefi Eva!​—Gen. 2:22, 23.

2. Fa sma na ini a ten di pasa èn na ini a ten disi gebroiki a kado di Yehovah gi wi?

² A no teki langa fosi sma bigin gebroiki a kado disi na wan fasi di no bun. Satan Didibri lei gi Eva èn a lei dati meki taki libisma trangayesi Gado èn tron sondusma (Gen. 3:1-4). Adam srefi no ben gebroiki a kado disi bun fu di a ben taki dati na Eva ben meki a sondu èn a ben taki srefi dati Yehovah ben poti en na ini a situwâsi disi (Gen. 3:12). Kain lei gi Yehovah baka di a kiri en brada Abel (Gen. 4:9). Bakaten wan bakapikin fu Kain, di nen Lamek, skrifi wan puwema di ben sori fa sma ben e du ogri na ini a ten di a ben e libi (Gen. 4:23, 24). Fa a de na ini a ten disi? Son leisi politiekman no e syen srefi fu taki dotitaki te den e taki nanga bigi grupu sma. Èn a muilek fu feni wan felem pe sma no e taki dotitaki. Pikin e yere dotitaki na skoro èn bigisma e yere dotitaki na wroko. A sari fu si taki den sani di sma e taki na ini a ten disi e sori fa a grontapu disi kon de.

3. Nanga san wi musu luku bun èn san wi o luku na ini na artikel disi?

³ Efu wi no luku bun, dan wi srefi kan bigin taki dotitaki fu di wi e yere en so furu. A no de fu taki dati, leki Kresten  wi wani plisi Yehovah èn dati wani taki dati noiti wi wani taki dotitaki. Wi wani gebroiki a moi kado disi na wan bun fasi. Wi wani gebroiki en fu prèise wi Gado. Na ini na artikel disi wi o luku fa wi kan du dati (1) te wi de na ini a preikiwroko, (2) te wi de na den konmakandra èn (3) te wi e taki nanga trawan. Ma wi o luku fosi fu san ede den sani di wi e taki prenspari gi Yehovah.

4. Te wi e luku Maleaki 3:16, dan fu san ede den sani di wi e taki prenspari gi Yehovah?

⁴ Leisi Maleaki 3:16. Te wi luku a vers disi, dan Yehovah ben e prakseri „den wan di abi lespeki gi en èn di e hori en nen na prakseri”. A skrifi den nen na ini „wan buku fu memre den”. Fu san ede den sani di den ben taki ben prenspari gi en? Fu di den sani dati ben e sori san de na ini den ati. Yesus ben taki: „San furu na ati, na dati mofo e taki” (Mat. 12:34). Den sani di wi e taki e sori o furu wi lobi Yehovah. Èn Yehovah wani taki den wan di lobi en, libi fu têgo na ini wan nyun grontapu.

5. (a) Fa den sani di wi e taki abi fu du nanga na anbegi fu wi? (b) Te wi e luku a prenki, dan san wi no o du efu wi wani taki Yehovah breiti nanga den sani di wi e taki?

⁵ A fasi fa wi e taki o sori efu Yehovah o feni na anbegi fu wi bun (Yak. 1:26). Son sma di no lobi Gado, e taki nanga atibron, den e taki grofu èn na wan fasi di e sori taki den abi bigifasi (2 Tim. 3:1-5). A no de fu taki dati wi no wani de leki den. Wi wani plisi Yehovah nanga a fasi fa wi e taki. Ma yu denki taki Yehovah ben o breiti efu wi e taki switi nanga trawan na den Kresten konmakandra noso na ini a preikiwroko, ma te wi de na oso wi e taki grofu nanga den sma fu wi?​—1 Petr. 3:7.

6. Sortu moi sani pasa fu di Kimberly ben e taki na wan bun fasi?

⁶ Te wi e gebroiki a kado di wi kisi na wan bun fasi, dan wi e sori taki wi na anbegiman fu Yehovah. Wi e yepi den wan na wi lontu fu si krin „suma e dini Gado èn suma no e dini en” (Mal. 3:18). Na dati  pasa nanga wan sisa di nen Kimberly. b En nanga wan meisje fu en klas ben musu du wan skoro projekt. Baka di den wroko makandra, a meisje kon si taki Kimberly no ben de leki den tra studenti. A no ben taki sani fu trawan na den baka, a ben e taki na wan switi fasi èn a no ben e taki dotitaki. A meisje ben lobi a sani disi èn te fu kaba a ben wani studeri Bijbel. Yehovah breiti srefisrefi te a fasi fa wi e taki e meki taki trawan wani kon leri sabi a waarheid.

7. Fa yu wani gebroiki a kado di Gado gi yu?

⁷ Wi alamala wani taki na wan fasi di e gi Yehovah grani èn di e meki taki wi e kon moro krosibei na wi brada nanga sisa. Sobun, meki wi go luku san kan yepi wi fu de wan eksempre na ini a fasi fa wi e taki.

8. San wi e leri fu Yesus te wi e luku fa a ben e taki nanga trawan?

⁸ Taki na wan switi fasi èn nanga lespeki te trawan e atibron na yu tapu. Di Yesus ben de na grontapu, dan sma ben e lei gi en taki a ben de wan drunguman, taki a ben de wan gridiman, taki a ben e wroko nanga Didibri, taki a no ben e hori a Sabat èn taki a ben afrontu Gado (Mat. 11:19; 26:65; Luk. 11:15; Yoh. 9:16). Awinsi sma ben taki ala den sani disi fu Yesus, toku a no ben kosi den. Te sma no e taki switi nanga wi, dan wi musu du leki Yesus èn wi no musu taki na a srefi grofu fasi nanga den (1 Petr. 2:21-23). A no de fu taki dati a no makelek fu taki switi nanga trawan te den no e taki bun nanga wi (Yak. 3:2). San kan yepi wi?

9. San wi kan du te sma no e taki switi nanga wi na ini a preikiwroko?

⁹ Te wan sma no e taki na wan switi fasi nanga yu te yu de na ini a preikiwroko, dan pruberi fu no kisi atibron. Wan brada di nen Sam, taki: „Mi e pruberi fu hori na prakseri taki na ososma musu kon leri sabi den tru tori fu Gado èn taki so wan sma kan tron wan anbegiman fu en.” Son leisi wan ososma e atibron fu di wi no kon na wan bun ten. Te wi miti wan sma di e atibron, wi kan du san Sisa Lucia gwenti du. A e taki wan syatu begi èn a e aksi Yehovah fu yepi en fu hori ensrefi èn fu no taki wan sani di ben o sori taki a no abi lespeki noso taki a no abi switifasi.

10. Te wi e luku 1 Timoteyus 4:13, dan sortu marki wi musu poti?

¹⁰ Tron wan moro bun leriman. Timoteyus ben de wan preikiman di ben abi ondrofeni. Ma toku ensrefi ben musu tan meki muiti fu go na fesi. (Leisi 1 Timoteyus 4:13.) Fa wi kan tron moro bun leriman  na ini a preikiwroko? Wi musu sreka wisrefi bun. Wi de nanga tangi taki wi abi difrenti sani di kan yepi wi fu tron moro bun leriman. Yu kan feni moi rai na ini a brochure Meki muiti fu leisi bun èn fu gi leri èn na ini a pisi di nen „Du muiti fu tron wan moro bun preikiman” di de fu feni na ini Wi Kresten libi nanga a preikiwroko​—Studie-buku. Yu e gebroiki den sani disi? Te wi e sreka wisrefi bun, dan wi no o senwe tumusi èn wi o man taki nanga faya.

11. San son Kresten du fu tron moro bun leriman?

¹¹ Wan tra sani di kan yepi wi fu tron moro bun leriman, na te wi e luku fa trawan na ini a gemeente e gi leri. Sam, di wi ben taki fu en kaba na ini na artikel disi, aksi ensrefi fa a du kon taki son Kresten man gi leri so bun. Dati meki a e arki bun fa den e gi leri èn a e meki muiti fu gi leri neleki den. Wan sisa di nen Talia e arki bun te brada di abi ondrofeni e hori lezing. Na so a leri fa fu taki-go-taki-kon nanga sma na ini a preikiwroko fu sani di den gwenti aksi.

12. San son sma feni muilek fu du?

¹² Wi alamala kan teki prati na den konmakandra. Wi kan du dati te wi e singi èn te wi e gi bun piki (Ps. 22:22). Son sma feni en muilek fu singi noso fu gi piki na den konmakandra fu wi. Na so a de tu nanga yu? Efu dati de so, dan a bun fu luku san yepi trawan fu no frede fu singi noso fu gi piki.

13. San kan yepi yu fu singi nanga yu heri ati na den konmakandra?

¹³ Singi nanga yu heri ati. A moro prenspari reide fu san ede wi e singi na den konmakandra fu wi, na fu di wi wani prèise Yehovah. Wan sisa di nen Sara feni taki a no man singi bun. Toku a wani singi fu prèise Yehovah. Sobun, te a de na oso èn a e sreka ensrefi gi den konmakandra, dan a e oefen den singi tu. Te a e oefen den singi, dan a e pruberi fu si san den wortu fu den singi abi fu du nanga den sani di a o leri na a konmakandra. A e taki: „Te mi e prakseri den wortu, dan mi no e broko mi ede efu mi e singi bun noso efu mi no e singi bun.”

14. Efu yu e syensyen, dan san kan yepi yu fu gi piki na den konmakandra?

¹⁴ Abi a gwenti fu gi piki. Gi son sma dati no makelek ala ten. Talia di wi ben taki fu en kaba, e taki: „Trawan no man si taki mi e senwe srefisrefi fu gi piki, fu di mi gwenti taki rustig. Ma a muilek gi mi fu gi piki na den konmakandra.” Toku Talia no e meki dati tapu en fu gi piki. Te a e  sreka ensrefi gi den konmakandra, a e hori na prakseri taki a fosi piki musu de wan syatu piki di e piki na aksi wantewante. A e taki: „Dati meki a bun taki mi e gi piki di syatu èn di e piki den aksi wantewante fu di na den sortu piki dati a fesiman wani yere.”

15. Te a abi fu du nanga den piki fu wi, dan san wi musu hori na prakseri?

¹⁵ Srefi Kresten di no e syensyen e frede son leisi fu gi piki. Fu san ede? Wan sisa di nen Juliet e fruteri: „Son leisi mi e frede fu gi piki fu di mi feni taki den piki fu mi makelek tumusi èn taki den no bun nofo.” Ma hori na prakseri taki Yehovah wani taki wi gi a moro bun piki di wi man gi. c A e warderi en srefisrefi te wi e meki muiti fu gi piki na den konmakandra awinsi wi e senwe son leisi.

16. Nanga san wi musu luku bun te wi e taki nanga trawan?

¹⁶ No taki sani di e hati trawan (Kol. 3:8). Soleki fa wi ben taki kaba, wan Kresten no musu taki dotitaki. Ma toku wi musu luku bun taki wi no e taki sani di kan meki sma firi wan fasi. Fu eksempre, wi no musu taki ogri fu sma di de fu tra kulturu, tra lo, noso tra kondre. Wi musu luku bun tu taki wi no e taki sani di kan hati trawan firi. Wan brada e taki: „Son leisi mi ben taki sani di mi ben e si gewoon leki wan lafutori. Ma eigenlijk den sani dati hati wan sma firi. Na ini den yari di pasa, mi frow yepi mi furu. Te wi ben de wi wawan, dan a ben e sori mi taki den sani di mi ben e taki ben hati en noso trawan.”

17. Te wi e luku Efeisesma 4:29, dan fa wi kan gi trawan deki-ati?

¹⁷ Taki na wan fasi di e gi trawan deki-ati. Abi a gwenti fu prèise trawan na presi fu krutu den. (Leisi Efeisesma 4:29.) Den Israelsma ben abi furu reide fu de nanga tangi, ma na presi fu dati den ben abi a gwenti fu krutukrutu. Te wi e krutukrutu, dan trawan kan bigin du dati tu. Yu kan memre ete taki tin fu den man di ben go luku a kondre na wan kibri fasi ben fruteri soso ogri sani fu a kondre èn dati meki taki „ala den Israelsma bigin krutu nanga Moses” (Num. 13:31–14:4). Ma te wi e prèise trawan, dan wi nanga den o firi moro bun. Wi kan de seiker taki na umapikin fu Yefta ben e kisi furu deki-ati fu tan na ini a toewijzing fu en fu di den mati fu en ben gwenti fu go prèise en (Krut. 11:40). Sara, di wi ben taki fu en  kaba, taki: „Te wi e prèise trawan, wi e meki den firi taki Yehovah lobi den èn taki den brada nanga sisa na ini a gemeente lobi den tu.” Sobun suku okasi fu prèise yu brada nanga sisa.

18. Te wi e luku Psalm 15:1, 2, dan fu san ede wi musu taki san tru èn nanga san wi musu luku bun tu?

¹⁸ Taki sani di tru. Wi no kan prisiri Yehovah ati efu wi e taki sani di no tru. Yehovah no lobi en kwetikweti te sma e lei (Odo 6:16, 17). Sma na ini a ten disi e si lei leki wan gewoon sani, ma Yehovah no e feni en bun. (Leisi Psalm 15:1, 2.) A no de fu taki dati wi no wani fruteri lei, ma wi musu luku bun tu taki wi no e fruteri sma sani na so wan fasi taki den e bigin denki tra fasi fu wan tori leki fa a de trutru.

19. Nanga san wi musu luku bun tu?

¹⁹ No taki sma tori (Odo 25:23; 2 Tes. 3:11). Juliet di wi ben taki fu en kaba, e fruteri fa a e firi te tra sma e taki sma tori. A e taki: „Te sma e taki sma tori, dan dati no e gi mi deki-ati èn a kan meki taki mi no e frutrow a sma moro di e du dati. Fu taki en leti, fa mi o sabi efu a sma di e taki sma tori, no taki mi tori nanga trawan?” Efu yu de na ini wan takimakandra èn wan sma e bigin taki sma tori, dan a bun fu drai a tori èn taki fu wan sani di e gi deki-ati.​—Kol. 4:6.

20. Te a abi fu du nanga den sani di yu e taki, dan san yu o meki muiti fu du?

²⁰ Fu di wi e libi na ini wan grontapu pe furu sma e taki sani di no bun, meki wi musu du tranga muiti fu taki sani di e plisi Yehovah. Hori na prakseri taki na Yehovah meki wi na so wan fasi dati wi man taki èn a prenspari gi en fa wi e taki. A o blesi wi efu wi e meki muiti fu taki sani di e gi en grani te wi de na ini a preikiwroko, na den konmakandra èn te wi e taki nanga trawan. Te Yehovah o pori na ogri grontapu disi, a o moro makelek gi wi fu prèise Yehovah nanga den sani di wi e taki (Yud. 15). Fosi a ten dati doro, meki wi du ala san wi man fu prisiri Yehovah ati nanga ’den sani di wi e taki nanga wi mofo’.​—Ps. 19:14.